Napateg a Masursuro Dagiti Agtutubo

AGTARTRABAHO ni Gladys iti maysa nga eskuelaan idiay Mendoza, Argentina. Maysa nga aldaw nalabsanna ti maysa a klase ket nadlawna ti maestra a mangibasbasa kadagiti maikapat a grado nga estudiantena iti publikasion a Ti Librok Dagiti Estoria ti Biblia. * Inyam-ammo ni Gladys ti bagina iti maestra kas maysa a Saksi ni Jehova ket kiniddawna nga ipakitana kenkuana no kasano nga ad-adda a magunggonaanda iti publikasion. Gapu ta nagustuanna ti panangilawlawag ni Gladys, kayat ti maestra a pagbalinen ti libro a regular a paset ti adalen. Ngem masapul nga ipakadana dayta iti mangimatmaton iti eskuelaan. Maragsakan ti maestra ta napatgan ti kiddawna.

Kalpasanna, iti aldaw a nailatang tapno maiparegta ti panagbasa kadagiti libro, tinudingan ti maestra dagiti estudiantena a mangbasa iti maysa a kapitulo ti libro iti imatang dagiti kaklaseda. Gapu iti nasayaat nga imbunga daytoy a programa, naawis ti maestra nga agparang a kas bisita iti pabuya ti telebision iti lugarda. Idi nadakamat ti kababalin dagiti estudiante, ti mangiturturong iti pabuya dinamagna ti maestra, “Apay a disiplinado dagiti estudianteyo?” Inlawlawag ti maestra nga us-usarenna ti publikasion a napauluan iti Ti Librok Dagiti Estoria ti Biblia. Inlawlawag ti maestra a nupay di agisursuro iti relihion iti klasena, babaen ti daytoy a libro, maipasagepsep dagiti moral a prinsipio kas iti panagraem, panangpanuynoy, panagkaykaysa, kooperasion, panagtulnog, ken ayat. Immanamongda amin a dagitoy dagiti napateg a masursuro dagiti agtutubo.

Kayatyo kadi a maipasagepsep dagita a prinsipio kadagiti annakyo? Mabalin a kiddawenyo iti maysa a Saksi ni Jehova nga ikkannakayo iti kopia daytoy nagpintas a publikasion a Ti Librok Dagiti Estoria ti Biblia.

[Footnote]