“Pinagsisina ti Pagsasao Ngem Pinagkaykaysa ti Ayat”

Pannakaispal. Pannakawayawaya. Pannakaisalakan. Nabayagen a tartarigagayan dagiti tattao a mabang-aranda kadagiti pakarigatan ken pakaseknanda. Kasano a madaerantayo dagiti parikut iti biag? Dumtengto pay kadi ti pannakaispal? No wen, kasano?

DAYTA ti topiko iti serye ti tallo nga aldaw a kombension distrito nga inorganisar dagiti Saksi ni Jehova a nangrugi idi Mayo 2006. Ti temana ket “Asidegen ti Pannakaisalakan!”

Rinibu a delegado manipud iti nagduduma a pagilian ti timmabuno iti siam kadagitoy a kombension. Naangay dagitoy idi Hulio ken Agosto 2006, idiay Prague, ti kabesera ti Czech Republic; idiay Bratislava, ti kabesera ti Slovakia; idiay Chorzow ken Poznan, Poland; * ken iti lima a siudad ti Alemania​—ti Dortmund, Frankfurt, Hamburg, Leipzig, ken Munich. Nasurok a 313,000 ti dagup dagiti timmabuno kadagitoy a kombension.

Ania ti kasasaad kadagiti kombension? Ania ti imbaga dagiti diario maipapan kadagitoy? Ken ania ti epekto dagiti kombension kadagiti timmabuno?

Panagsagana

Magagaran dagiti bisita ken lumugar a Saksi gapu ta ammoda a dagitoy ket nakallalagip a naespirituan a panagtataripnong. Dakkel a trabaho ti panangyurnos iti pagdagusan dagiti delegado. Kas pagarigan, iti kombension idiay Chorzow, pinadagus dagiti Saksi a taga-Poland ti dandani 13,000 a delegado manipud iti Makindaya a Europa. Naggapu dagiti delegado iti Armenia, Belarus, Estados Unidos, Estonia, Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine, ken Uzbekistan.

Adu a bulan a nagsagana dagiti delegado tapno makatabunoda kadagiti kombension. Makatawen pay sakbayna, nagurnongen iti gastuenna nga agbiahe ni Tatiana, maysa nga amin-tiempo nga ebanghelisador iti Kamchatka, maysa a peninsula ti Russia a masarakan iti amianan a daya ti Japan. Masapul nga agbiahe iti agarup 10,500 a kilometro. Umuna, nageroplano iti 5 nga oras, sa naglugan iti tren iti dandani tallo nga aldaw, ken naglugan iti bus iti 30 nga oras sa nakadanon idiay Chorzow.

Rinibu ti nagboluntario a nangisagana iti pagkombensionan. Dinalusanda dagiti istadium ken dagiti aglawlawna tapno maitutop a lugar a pagdaydayawan. (Deuteronomio 23:14) Kas pagarigan, dagiti kakabsat  idiay Leipzig dinalusanda a naimbag ti istadium, ket inkarida a dalusanda manen kalpasan ti kombension. Gapuna, kinanselar dagiti opisial ti paset ti katulagan nga agkidkiddaw iti dakkel a bayad para iti pannakadalusna.

Dagiti Imbitasion

Dagiti kongregasion iti intero a lubong impakaammoda a naimbag dagiti kombension nga “Asidegen ti Pannakaisalakan!” Dagiti delegado kadagitoy nga espesial a kombension kasta unay ti panagreggetda a nakipaset iti daytoy a kampania. Intultuloyda nga impakaammo ti kombension agingga nga adalemen ti rabii sakbay ti mismo nga aldaw a panangrugi ti kombension. Nagbunga ngata ti panagreggetda?

Maysa a Saksi a taga-Poland nga agnagan iti Bogdan naam-ammona ti maysa a lakay a mayat a tumabuno iti kombension ngem imbaga ti lakay a saan nga umdas ti bassit a pensionna a gastuenna tapno makapan idiay Chorzow a 120 a kilometro ti kaadayona. Ngem adda bakante a tugaw iti bus nga inabangan ti kongregasion. Insalaysay ni Bogdan: “Imbagami iti lakay a mabalin a kumuyog kadakami a libre ti pletena no umay iti lugar a pagrubuatanmi iti 5:30 ti parbangon.” Pinatgan ti lakay dayta nga awis ket timmabuno iti kombension. Kalpasanna, nagsurat kadagiti kakabsat a kunkunana: “Idi natabunuak daytoy a kombension, inkeddengko ti agbalin a nasaysayaat a tao.”

Idiay Prague, maysa a lalaki nga adda iti hotel a pagnanaedan dagiti delegado a taga-Britania ti nangibaga kadagiti kombensionista iti maysa a rabii a tinabunuanna met ti sesion iti dayta nga aldaw. Apay a timmabuno? Imbaga ti lalaki nga idi sangapulon nga imbitasion ti naawatna kadagiti nagduduma nga agibumbunannag nga adda iti lansangan ti siudad, talaga a naguyugoy a tumabuno! Nasdaaw unay ket magagaran a makaammo iti ad-adu pay.​—1 Timoteo 2:3, 4.

Makapabileg a Naespirituan a Programa

Nailawlawag iti programa no kasano a tamingen dagiti nadumaduma a parikut. Impakita dagiti prangka a balakad ti Biblia no kasano a risuten ken ibturan dagiti parikut.

Babaen iti Biblia, naparegta dagiti mariribukan gapu iti kinabaket ken kinalakay, nakapuy a salun-at, ipapatay ti inay-ayat, wenno dadduma pay a parikut tapno maaddaanda iti nasaysayaat a panangmatmat iti biag. (Salmo 72:12-14) Nabalakadan dagiti agassawa ken nagannak no kasano nga agbalin a naragragsak ti panagasawada ken mapadakkelda a sibaballigi dagiti annakda. (Eclesiastes 4:12; Efeso 5:22, 25; Colosas 3:21) Dagiti agtutubo a Kristiano​—a maipasango idiay eskuelaan iti saan a nasayaat nga impluensia ngem no addada iti pagtaengan ken iti kongregasion makangngegda iti nainsiriban a balakad manipud iti Sao ti Dios​—nabalakadanda no kasanoda nga ‘adaywan dagiti tarigagay a naikasigudan iti agtutubo.’​—2 Timoteo 2:22.

Pudno nga Internasional a Panagkakabsat

Tagtagiragsaken dagiti Saksi ni Jehova ti nagsayaat a Nainkasuratan a panangiwanwan kadagiti taripnongda. (2 Timoteo 3:16) Ngem naiduma dagitoy a kombension gapu ta adu a pagilian ti naggapuan dagiti timmabuno. Amin dagiti naisangsangayan  a kombension imparangda ti maymaysa a naespirituan a programa iti adu a pagsasao. Kada aldaw, agpalawag dagiti kameng ti Bagi a Manarawidwid dagiti Saksi ni Jehova, ken adda dagiti makaparagsak a report manipud iti dadduma a pagilian. Maipatarus dagitoy a palawag ken report tapno magunggonaan dagiti timmabuno a sabali ti pagsasaoda.

Magagaran dagiti kakabsat a makiam-ammo kadagiti kakabsatda a naggapu kadagiti sabali a pagilian. “Saan a nagbalin a parikut ti panagduduma dagiti pagsasao,” kinuna ti maysa a delegado. “Naragragsak pay ketdi ti okasion. Nadumaduma ti kultura dagiti bisita, ngem nagkaykaysada gapu iti pammati.” Kastoy ti kinuna dagiti timmabuno idiay Munich: “Pinagsisina ti pagsasao ngem pinagkaykaysa ti ayat.” Aniaman ti pagilian ken pagsasao dagiti timmabuno, ammoda nga addada iti ummong dagiti pudno a gagayyem​—dagiti kapammatianda.​—Zacarias 8:23.

Impakitada ti Panagyamanda

Talaga a nasubok ti anus ken panagandur dagiti delegado bayat dagiti kombension idiay Poland gapu iti paniempo. Saan laeng a masansan nga agtudo no di ket nakalamlam-ek pay​—agarup 14 a degree Celsius ti temperatura. Kinuna ti maysa a kabsat idiay Estados Unidos: “Dayta ti kakaruan ken kalam-ekan a temperatura a napasarak iti maysa a kombension, ket bassit laeng ti naawatak iti programa. Ngem nasubadan amin dagita gapu iti sangalubongan a panagkakabsat, kinaragsak, ken naisangsangayan a kinamanagpadagus a nagraira iti daytoy nga okasion. Saankonto a malipatan daytoy a kombension!”

Ti pannakairuar ti Insight on the Scriptures iti pagsasaoda ti maysa a di malipatan dagiti delegado a Polako. Nagsayaat a regalo dayta gapu iti panangandurda iti lam-ek ken tudo. Nagragsakan met ti amin a timmabuno kadagiti kombension nga “Asidegen ti Pannakaisalakan!” gapu iti pannakairuar ti publikasion nga Agbiagka a Silalagip iti Aldaw ni Jehova.

Adda pay dadduma a rason no apay a dagiti timmabuno malaglagipdanto dagitoy a kombension. Nalagip ni Kristina, maysa a kabsat a taga-Czech a nagboluntario a mangkuyog iti maysa a bus a nagluganan dagiti delegado a naggapu iti sabali a pagilian: “Idi agpakadakamin, inarakupnak ti maysa a kabsat a babai ket kinunana: ‘Nagsayaat ti pannakaaywanmi! Ikkandakami pay iti taraon ken inumen kadagiti mismo a tugawmi. Agyamankami unay iti managsakripisio nga ayatyo.’” Tuktukoyenna ti pangngaldaw a naipaay kadagiti delegado a naggapu iti sabali a pagilian. “Itatta laeng nga inaramidmi daytoy a trabaho,” kinuna ti maysa a kabsat a lalaki. “Masapul a mangipaaykami iti agarup 6,500 a pangngaldaw iti kada aldaw. Makaparagsak a makita ti nagadu a nagboluntario a timmulong, agraman dagiti ubbing.”

Kinuna ti kabsat a babai a naggapu idiay Ukraine a nakikombension idiay Chorzow: “Naragsakankami iti ayat, panangaywan, ken kinamanagparabur dagiti kapammatianmi. Di mayebkas dagiti sasao ti napalaus a panagyamanmi.” Nagsurat ti agtawen iti walo a taga-Finland a ni Annika iti sanga nga opisina dagiti Saksi ni Jehova idiay Poland: “Naragragsak pay ti kombension ngem ti ninamnamak. Nagsayaat ti maikameng iti organisasion ni Jehova, ta maaddaanka iti gagayyem iti intero a lubong!”​—Salmo 133:1.

Komento Dagiti Agbuybuya

Sakbay ti kombension, adda nayurnos a panagpasiar ti dadduma a delegado tapno  makitada ti lugar. Iti probinsia ti Bavaria, simmardeng dagiti bisita kadagiti Kingdom Hall, ket pinasangbay ida dagiti lumugar a Saksi. Kasta unay ti pannakaallukoy ti saan a Saksi a giya ti maysa a grupo gapu iti kastoy a nainkabsatan a pammateg. Kinuna ti maysa a delegado, “Idi addakamin iti bus nga agsubli iti hotel, imbaga ti giya a talaga a naidumakami kadagiti dadduma a grupo nga agpaspasiar. Napintas ken naemma ti panagkawkawesmi ken nakidanggay ti amin iti mangidadaulo iti grupo. Awan dagiti panangilunod ken riribuk. Nasdaaw ta dagus a nagbalin a nagsayaat nga aggagayyem dagiti ganggannaet.”

Impadamag ti maysa a kabsat a lalaki nga agtartrabaho iti News Service Department ti kombension idiay Prague: “Iti agsapa ti Domingo, simmarungkar ti opisial a mangay-aywan kadagiti polis a naituding iti pagkombensionan. Nakitana a natalna ket imbagana nga awanen ti aramidenna sadiay. Dinakamatna met a nagsaludsod ti dadduma a lumugar maipapan iti programa. Idi dinakamatna dagiti Saksi ni Jehova, naupayda iti imbaga ti opisial kadakuada: ‘Uray no kagudua laeng ti matulad dagiti tattao iti kababalin dagiti Saksi ni Jehova, saan koma a kasapulanen ti polis.’”

Adun ti Naisalakan!

Natalna ken agkaykaysa dagiti Kristiano ta ti Sao ti Dios, ti Biblia, ti mamagkaykaysa kadagiti nagduduma a kultura. (Roma 14:19; Efeso 4:22-24; Filipos 4:7) Napaneknekan daytoy kadagiti naisangsangayan a kombension nga “Asidegen ti Pannakaisalakan!” Nawayawayaanen dagiti Saksi ni Jehova manipud iti adu a pakadanagan iti daytoy a lubong. Awanen kadakuada ti manangikuspil iti puli, manangriribuk, ken manangidumduma iti puli​—bambanag a mangparparigat iti kagimongan​—ket segseggaanda ti tiempo inton awanen dagita a parikut iti intero a lubong.

Napasaran a mismo dagiti timmabuno kadagitoy a kombension ti panagkaykaysa dagiti Saksi manipud iti nagduduma a pagilian ken kultura. Nakadkadlaw daytoy idi agngudo dagiti kombension. Nagpapalakpak, nagiinnarakup dagiti baro nga aggagayyem, ken nagpaparetratoda. (1 Corinto 1:10; 1 Pedro 2:17) Naragsak dagiti delegado a nagawid kadagiti balay ken kongregasionda ket mamatida nga asidegen ti pannakaisalakan kadagitoy amin a pakarigatan ken pakaseknan, ken ad-adda manen nga ikagumaanda a siiirut a salimetmetan ti “sao ti biag” a nagtaud iti Dios.​—Filipos 2:15, 16.

[Footnote]

[Kahon/Ladawan iti panid 10]

Aggigiddan ti Duapulo ket Innem a Lenguahe

Naiparang ti programa kadagiti siam a kombension iti lokal a pagsasao. Iti kombension idiay Alemania, naipalawag met dagiti diskurso iti 18 a sabali a pagsasao. Idiay Dortmund nausar ti pagsasao nga Arabe, Espaniol, Farsi, Portugues, ken Ruso; naibitla met iti Ingles, Pranses, ken Serbiano/Croatiano idiay Frankfurt; nausar ti Danes, Olandes, Sueko, ken Tamil idiay Hamburg; naipalawag iti Polako, Tsino, ken Turko idiay Leipzig; ket idiay Munich naibitla iti Griego, Italiano, ken German Sign Language. Czech, Ingles, ken Ruso ti amin a diskurso iti kombension idiay Prague. Idiay Bratislava naiparang ti programa iti Hungario, Ingles, Slovako, ken ti Slovakian Sign Language. Polako, Ruso, Ukranio, ken Polish Sign Language ti nausar a pagsasao idiay Chorzow. Pinlandes ken Polako met dagiti palawag idiay Poznan.

Duapulo ket innem a pagsasao! Talaga a nabingaybingay dagiti kombensionista gapu iti pagsasao, ngem pinagkaykaysa ida ti ayat.

[Ladawan iti panid 9]

Maragsakan dagiti delegado idiay Frankfurt a makaawat iti “Baro a Lubong a Patarus” iti bukodda a pagsasao