Addaanka Kadi iti Naespirituan a Mamalbalakad?

ITI naganus a tawenna a 16, ni Ozias ket nagbalin nga ari iti abagatan a pagarian ti Juda. Isu ket nagturay iti nasurok a 50 a tawen, manipud idi arinunos ti maikasiam agingga iti rugrugi ti maikawalo a siglo K.K.P. Sipud kinaubingna, ni Ozias “inar-aramidna no ania ti umiso kadagiti mata ni Jehova.” Siasino ti timmulong kenkuana a magna iti nalinteg a dana? Kuna ti historikal a rekord: “[Ni Ozias] nagtultuloy a nagannayas a mangbirok iti Dios idi kaaldawan ni Zacarias, ti manangisuro iti panagbuteng iti pudno a Dios; ket, iti al-aldaw a panangbirokna ken Jehova, isu pinagbalin ti pudno a Dios a narang-ay.”​—2 Cronicas 26:1, 4, 5.

Malaksid iti dayta a salaysay iti Biblia, awanen ti adu nga impormasion a maammuantayo maipapan ken Zacarias a mamalbalakad ti ari. Ngem kas “manangisuro iti panagbuteng iti pudno a Dios,” naaddaan ni Zacarias iti nagsayaat nga impluensia iti agtutubo nga ari tapno maaramidna ti umiso. Sigun iti The Expositor’s Bible, nabatad a ni Zacarias ket “maysa a tao a pamiliar kadagiti Nainkasuratan a pannakaammo, aduan iti naespirituan a kapadasan, ken makabael a mangiburay iti pannakaammona. Kinuna ti maysa nga eskolar ti Biblia maipapan ken Zacarias: “Isu ket pamiliar kadagiti padto ken . . . nasaririt, naregta ken nalinteg a tao ket nabatad a dakkel ti naitulongna ken Ozias.”

Gapu iti kinamatalek ni Ozias, nasagrapna ti adu a bendision ken “nangipakita iti pigsa a nalabes unay” agsipud ta “isu intuloy a tulongan ti pudno a Dios.” Wen, dagiti naballigi a gannuatna kas ari ket nagpannuray iti agtultuloy a kinamatalekna iti Dios “idi kaaldawan ni Zacarias.” (2 Cronicas 26:6-8) Ngem kalpasan ti panagballigi ni Ozias, inidianna dagiti pannursuro ti mamalbalakadna a ni Zacarias. “Timmangsit ti pusona agingga a mismo iti punto a mangdadael, iti kasta nagtignay a di simamatalek maibusor ken Jehova.” Gapu iti kinaawan panagraemna, isu ket nadusa iti nakaar-ariek a sakit iti kudil a namagbalin kenkuana a baldado, isu a dinan maaramid ti amin nga annongenna kas ari.​—2 Cronicas 26:16-21.

Adda kadi siasinoman a nalabit ibilangmo a mannursuro, maysa a mamalbalakad ken maysa a positibo nga impluensia kenka iti ‘panangbirokmo iti Dios’? Maysaka man nga agtutubo, nataengan, lalaki wenno babai, mabalin nga adda kasta a tao iti biagmo. Tagipatgem dayta a mamalbalakad ta makatulong kenka dagiti pammagbagana tapno makapagtultuloyka a mangaramid iti umiso iti imatang ni Jehova. Ipangagmo dayta a nataengan a Kristiano ken iyaplikarmo dagiti balakadna. Dimo koma idian dagiti nainsiriban a balakad ti kasta a “manangisuro iti panagbuteng iti pudno a Dios.”​—Proverbio 1:5; 12:15; 19:20.