“Agtakderkayo a Sititibker ket Kitaenyo ti Panangisalakan ni Jehova”

“Ni Jehova adda iti dasigko; saanakto nga agbuteng. Ania ti maaramidan kaniak ti naindagaan a tao?”​—SALMO 118:6.

1. Ania dagiti pasamak nga asidegen a mapasaran ti sangatauan?

 ASIDEGEN a mapasaran ti sangatauan dagiti pasamak a dina pay pulos napasaran. Iti panangipakpakaunana iti daytoy maipapan iti kaaldawantayo, impakdaar ni Jesus kadagiti pasurotna: “Addanto dakkel a rigat a dayta ket saan pay a napasamak nanipud idi pangrugian ti lubong agingga ita, saan, saanto met a mapasamak manen. Iti kinapudnona, malaksid no napaababa dagidiay nga aldaw, awan ti lasag a maisalakan; ngem maigapu kadagiti napili mapaababanto dagidiay nga aldaw.”​—Mateo 24:21, 22.

2. Apay nga igawgawid dagiti anghel ti panangrugi ti dakkel a rigat?

² Nupay saan a makita dagiti tattao, igawgawid dagiti anghel ti iyaay dayta a dakkel a rigat. Babaen ti panangipalgak ni Jesus, naaddaan ni apostol Juan iti pribilehio a mangammo no apay a kasta ti ar-aramiden dagiti anghel. Kastoy ti panangdeskribir ti lakayen nga apostol: “Nakakitaak iti uppat nga anghel nga agtaktakder iti uppat a suli ti daga, a siiirut a tengtenglenda ti uppat nga angin ti daga . . . Ket nakakitaak iti sabali nga anghel nga umul-uli manipud iti leleggakan ti init, nga addaan iti selio ti sibibiag a Dios; ket nagikkis buyogen ti natbag a timek iti uppat nga anghel . . . ‘Dikay dangran ti daga wenno ti baybay wenno dagiti kayo, agingga a malpasmi a selioan dagiti adipen ti Diostayo kadagiti mugingda.’”​—Apocalipsis 7:1-3.

3. Anianto ti umuna a paset ti dakkel a rigat?

³ Asidegen a malpas ti maudi a pannakaselio dagiti napulotan nga “adipen ti Diostayo.” Nakasaganan dagiti uppat nga anghel a mangibulos kadagiti mangdadael nga angin. Inton aramidenda dayta, ania ti umuna a mapasamak? Kastoy ti sungbat ti maysa nga anghel: “Iti kasta a napardas a panangipuruak maitapuakto ti Babilonia a dakkel a siudad, ket saanto a pulos masarakanen.” (Apocalipsis 18:21) Nakaragragsakto la ketdi dagiti adda idiay langit inton madadaelen ti sangalubongan nga imperio ti palso a relihion!​—Apocalipsis 19:1, 2.

4. Ania pay dagiti mapasamak iti masanguanan?

⁴ Agkaykaysanto ti amin a nasion ditoy daga maibusor iti ili ni Jehova. Agballiginto ngata dagita a nasion a mangikisap kadagita a matalek a Kristiano? Agparang a kasta. Ngem kitaenyo! Dagiti nailangitan a buyot nga idadauluan ni Kristo Jesus siguraduendanto a madadael dagitoy a puersa ti tattao. (Apocalipsis 19:19-21) Kamaudiananna, ti Diablo ken dagiti anghelna maigarangugongdanto iti simboliko nga abut, a sadiay awanto ti gawayda. Didanton maallilaw ti sangatauan agsipud ta maipupokda iti sangaribu a tawen. Anian a bang-ar dayta para iti makalasat a dakkel a bunggoy!​—Apocalipsis 7:9, 10, 14; 20:1-3.

5. Ania a rag-o ti masagrapto dagiti agtalinaed a nasungdo ken Jehova?

⁵ Asidegen a makitatayo dagitoy a nakaskasdaaw ken makapaamanga a pasamak. Adda amin pakainaigan dagita iti pannakaalangon ti sapasap a kinasoberano ni Jehova, ti kalinteganna nga agturay. Panunotenyo met daytoy: No agtalinaedtayo a nasungdo ken Jehova ken no sititibker a suportarantayo ti kinasoberanona, maaddaantayonto iti gundaway a makipaset iti pannakasantipikar ti nagan ni Jehova ken iti pannakatungpal ti panggepna. Anian nga awan kaaspingna a rag-o ti itdento dayta!

6. Gapu kadagiti mabiiten a mapasamak, ania ti usigentayo?

 ⁶ Nakasaganatayo kadin para kadagitoy a nakapatpateg a pasamak? Adda kadi pammatitayo iti pannakabalin ni Jehova a mangisalakan? Agtalektayo kadi a tulongannatayto iti maitutop a tiempo ken iti kasayaatan a wagas? No sungbatanyo dagita a saludsod, laglagipentayo ti imbaga ni apostol Pablo kadagiti padana a Kristiano idiay Roma: “Amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) Karaman kadagiti banag a naisurat a pakasursuruantayo ken mangted iti liwliwa ken namnama kadatayo ket ti salaysay maipapan iti panangispal ni Jehova kadagiti Israelita manipud iti naulpit a panangtagabo dagiti Egipcio a nangirurumen kadakuada. No usigentayo dagiti makapagagar a pasamak idi immaniobra ni Jehova ti pannakaispal dagiti Israelita, maparegtatayo unay bayat a segseggaantayo ti umad-adanin a dakkel a rigat.

Ispalen ni Jehova ti Ilina

7. Idi 1513 K.K.P., ania ti nairteng a kasasaad idiay Egipto?

⁷ Tawen 1513 K.K.P. idi. Inyetnagen ni Jehova ti siam a saplit kadagiti Egipcio. Kalpasan ti maudi kadagita, ni Moises ket dagus a pinapanaw ni Faraon babaen kadagitoy a sasao: “Panawannak! Aluadam ta bagim! Dika padpadasen a kitaen manen ti rupak, agsipud ta iti aldaw a panangkitam iti rupak mataykanto.” Simmungbat ni Moises: “Kasta ti sinaom. Diakto padasenen a kitaen ta rupam uray kaanoman.”​—Exodo 10:28, 29.

8. Ania dagiti naibilin kadagiti Israelita nga aramidenda tapno maisalakanda ket ania ti resultana?

⁸ Impalgak itan ni Jehova ken Moises nga addanto pay maysa a saplit, nga isu ti kaudian nga umapay ken Faraon ken kadagiti amin nga Egipcio. Iti maika-14 ti Abib (Nisan), ti inauna nga anak ti amin nga Egipcio ken ti inauna nga anak ti amin nga animal ket matay. Ngem saan a maan-ano dagiti Israelita no la ket ta surotenda ti pammilin ti Dios nga impakaammona ken Moises. Ti dua a bautek ken ti makinngato a paset ti ruanganda ket nasken a warsianda iti dara ti kalakian a karnero ken nasken nga agtalinaedda iti uneg ti balbalayda. Ania ti napasamak iti dayta a rabii? Bay-antayo a ni Moises ti mangibaga kadatayo: “Naaramid nga iti tengnga ti rabii kinabil ni Jehova ti tunggal inauna iti daga ti Egipto.” Dagus a nagtignay ni Faraon. Pinaayabanna da Moises ken Aaron sana kinuna kadakuada: “Tumakderkayo, rummuarkayo manipud tengnga dagiti tattaok, . . . ket mapankayo, agserbikayo ken Jehova, kas iti insaoyo.” Nagdardaras ngarud a pimmanaw dagiti Israelita a nalabit buklen ti nasurok tallo a milion, kaduada ti di mabilang a “nakadakdakkel a naglalaok a bunggoy” dagiti saan nga Israelita.​—Exodo 12:1-7, 29, 31, 37, 38.

9. Ania a dalan ti nangiturongan ti Dios iti Israel a rimmuar manipud Egipto, ken apay?

⁹ Ti panglintegan a dalan dagiti Israelita ket iti igid ti Baybay Mediteraneo sada lumasat iti daga dagiti Filisteo. Ngem sakup dayta dagiti kabusor. Gapuna, tapno mailiklikna ti ilina iti pannakigubat, inturong ida  ni Jehova iti let-ang nga agturong iti Nalabaga a Baybay. Nupay minilion a tao ti nagdaliasat, naurnosda a bunggoy. Kuna ti Biblia: “Iti urnos ti pannakibakal a ti annak ti Israel simmang-atda manipud daga ti Egipto.”​—Exodo 13:17, 18.

“Kitaenyo ti Panangisalakan ni Jehova”

10. Apay nga imbilin ti Dios iti Israel nga agpakarsoda iti sanguanan iti Pihahirot?

¹⁰ Sumaganad, adda makapakellaat a napasamak. Kinuna ni Jehova ken Moises: “Sawem iti annak ti Israel, a rebbeng nga agsublida ket agpakarsoda iti sanguanan ti Pihahirot iti nagbaetan ti Migdol ken ti baybay a matannawagan ti Baal-zefon.” Bayat a sursurotenda dagita a bilin, kaslada naipanget iti nagbaetan dagiti bantay ken iti luek ti Nalabaga a Baybay. Kasla awanen ti pagruaranda. Ngem ammo ni Jehova ti ar-aramidenna. Imbagana ken Moises: “Pudno a bay-akto ti puso ni Faraon a sumubeg, ket sigurado a kamatennanto ida ket gun-odekto ti pannakaipadayagko babaen ken Faraon ken amin dagiti puersa militarna; ket sigurado a maammuanto dagiti Egipcio a siak ni Jehova.”​—Exodo 14:1-4.

11. (a) Ania ti inaramid ni Faraon, ken ania ti reaksion dagiti Israelita? (b) Kasano a tinaming ni Moises dagiti reklamo ti Israel?

¹¹ Gapu ta impagarup ni Faraon a nagkamali iti panangpalubosna kadagiti Israelita a pumanaw manipud Egipto, kinamakamna ida a kaduana ti 600 a kasayaatan a pakigubat a karuahe. Idi masirpatan dagiti Israelita ti sumungsungad a buyot ti Egipto, nagkintayegda ken immasugda ken Moises: “Gapu kadi ta awan a pulos luglugar a pagitabonan idiay Egipto isu nga impannakami ditoy tapno mataykami iti let-ang?” Gapu ta agtalek iti panangisalakan ni Jehova, kinuna ni Moises: “Dikay agbuteng. Agtakderkayo a sititibker ket kitaenyo ti panangisalakan ni Jehova, nga aramidennanto maipaay kadakayo ita nga aldaw. . . . Makirupakto a mismo ni Jehova maipaay kadakayo, ket dakayo agulimekkayto.”​—Exodo 14:5-14.

12. Kasano nga inispal ni Jehova ti ilina?

¹² Kas kaitungpalan ti kinuna ni Moises a ni Jehova ti makidangadang para kadagiti Israelita, nagtignay itan dagiti puersa a nabilbileg ngem iti tao. Ti munmon nga ulep nga adda idi iti sanguanan ti pakarso ti Israel a mangiturturong kadakuada ket simimilagro nga inyakar ti anghel ni Jehova iti likudanda. Nupay dayta ti nangpataud iti kinasipnget kadagiti Egipcio, dayta met la a munmon ti nangipaay iti lawag kadagiti Israelita. (Exodo 13:21, 22; 14:19, 20) Kas panagtulnog iti bilin ti Dios, inyunnat ni Moises ti imana. Intuloy ti salaysay: “Rinugian ni Jehova a pasublien ti baybay babaen ti napigsa a wayaway nga angin iti intero nga agpatnag . . . Idi agangay limmasat ti annak ti Israel iti tengnga ti baybay iti namaga a daga, bayat a ti dandanum pader idi kadakuada iti makannawanda ken iti makannigidda.” Intuloy dagiti Egipcio ti kimmamat, ngem tinulongan ni Jehova ti ilina. Riniribukna ti pakarso dagiti Egipcio, sana kinuna ken Moises: “Iyunnatmo ta imam iti ngatuen ti baybay, tapno agsubli ti dandanum iti ngatuen dagiti Egipcio, kadagiti karuaheda a pakigubat ken kadagiti kabalieroda.” Interamente a naikisap ti buyot ni  Faraon nga uray la awan maysa a soldado ti nabati a sibibiag!​—Exodo 14:21-28; Salmo 136:15.

Ti Masursurotayo iti Pannakaispal ti Israel

13. Ania ti reaksion dagiti Israelita gapu iti pannakaispalda?

¹³ Ania ti reaksion dagiti Israelita gapu iti namilagruan a pannakaispalda? Dayta la ketdi ti nangtignay ken Moises ken dagiti Israelita a nagkanta kas panangidayawda ken Jehova! Inkantada: “Bay-anyo a kantaak ni Jehova, ta nagbalin a natan-ok unay. . . . Ni Jehova agturayto kas ari agingga iti tiempo a di nakedngan, iti mismo nga agnanayon.” (Exodo 15:1, 18) Wen, ti panangidayaw iti Dios ti damo a napanunotda. Iti dayta a kasasaad, naiparangarang ti kinasoberano ni Jehova.

14. (a) Ania ti masursurotayo maipapan ken Jehova no mainaig iti kapadasan ti Israel? (b) Ania ti teksto para iti tawen 2008?

¹⁴ Ania a leksion, liwliwa, ken namnama ti magun-odantayo kadagitoy a makapikapik a pasamak? Sigurado a paneknekan dagita a kabaelan ni Jehova a tulongan ti ilina iti aniaman a pakasuotan a kasapulan a sanguenda. Kabaelanna a risuten ti aniaman a kasasaad a maipasango kadakuada. Ti Nalabaga a Baybay ket saan a nakalapped iti Israel idi inusar ni Jehova daydi nakapigpigsa a wayaway nga angin a nangbisngay iti dayta. Ken nabalinanna nga inusar dayta a Nalabaga a Baybay kas tanem dagiti buyot ni Faraon. No utobentayo daytoy, maibagatayo met ti kas iti nakuna ti salmista: “Ni Jehova adda iti dasigko; saanakto nga agbuteng. Ania ti maaramidan kaniak ti naindagaan a tao?” (Salmo 118:6) Makaliwliwa met kadatayo ti kinuna ni Pablo iti Roma 8:31: “No ti Dios adda kadatayo, siasinonto ti bumusor kadatayo?” Anian a pammatalged ti ipaay kadatayo dagita a naipaltiing a sasao! Dagita ti mangpaksiat iti aniaman a buteng ken panagduaduatayo ken mangipaay kadatayo iti namnama. Maitutop laeng ngarud a ti tekstotayo para iti tawen 2008 ket “Agtakderkayo a sititibker ket kitaenyo ti panangisalakan ni Jehova!​—Exodo 14:13.

15. Kasano kapateg ti kinatulnog iti pannakaispal dagiti Israelita manipud Egipto, ken kasano kapateg dayta iti kaaldawantayo?

¹⁵ Ania pay ti masursurotayo iti Ipapanaw ti Israel manipud Egipto? A nasken nga agtulnogtayo ken Jehova iti aniaman nga ipaaramidna kadatayo. Tinungpal dagiti Israelita dagiti detalyado a bilin iti panagsagana para iti Paskua. Situtulnog a nagtalinaedda iti uneg ti balbalayda bayat ti rabii ti Nisan 14. Idi nakapanawda met laengen manipud Egipto, ti panagdaliasatda ket kasapulan a kas “iti urnos ti pannakibakal.” (Exodo 13:18) Iti kaaldawantayo, nakapatpateg a surotentayo ti panangiwanwan “ti matalek ken masirib nga adipen”! (Mateo 24:45) Masapul nga umimdengtayo a naimbag iti sao ti Dios iti likudantayo, a mangibagbaga: “‘Daytoy ti dalan. Magnakayo iti dayta,’ no kas pagarigan agpakannawankayto wenno no kas pagarigan agpakannigidkayto.” (Isaias 30:21) Bayat nga umad-adanin ti iyaay ti dakkel a rigat, posible unay a makaawattayo kadagiti detalyado nga instruksion. Ti  natalged a panagdaliasattayo iti daytoy nariribuk nga al-aldaw ket agpannuray iti agtultuloy a pannakidanggaytayo kadagiti dadduma a nasungdo nga ad-adipen ni Jehova.

16. Ania ti masursurotayo iti wagas a panangimaniobra ti Dios iti bambanag idi inispalna dagiti Israelita?

¹⁶ Laglagipentayo met nga inturong ni Jehova dagiti Israelita iti kasasaad a kasla naipangetda iti nagbaetan ti Nalabaga a Baybay ken iti kabambantayan. Agparang a kamali dayta a tinurongda. Ngem kabaelan ni Jehova nga imaniobra ti bambanag, ket nagballigi ti amin nga inggannuatna agpaay a pakaidayawanna ken pakaisalakanan ti ilina. Ita, mabalin a saantay a maawatan a naimbag no apay nga adda ti bambanag iti organisasion a nataming iti kasla naiduma a wagas. Nupay kasta, naan-anay a makapagtalektayo iti panangiwanwan ni Jehova babaen ti matalek a kalasugan nga us-usarenna a makikomunikar kadatayo. No dadduma, kasla naballigi dagiti kabusortayo. Gapu ta limitado ti panangmatmattayo, mabalin a ditay makita ti amin a banag a nairaman. Kaskasdi, kabaelan ni Jehova nga imaniobra ti bambanag iti umiso a kanito, kas iti inaramidna idi kadagiti Israelita.​—Proverbio 3:5.

Agtalektayo ken Jehova

17. Apay a naan-anay a makapagtalektayo iti panangiwanwan ti Dios?

¹⁷ Mailadawanyo kadi iti panunotyo ti panagtalek dagiti Israelita bayat a pampanunotenda ti maipapan iti dayta a munmon nga ulep iti aldaw ken iti munmon nga apuy iti rabii? Paneknekan dayta a “ti anghel ti pudno a Dios” ti mangiturturong iti panagdaliasatda. (Exodo 13:21, 22; 14:19) Ita, makapagtalektayo nga agtigtignay ni Jehova tapno maiwanwan, masalakniban, ken maispal ti ilina. Ipapusotayo koma daytoy a karina: “[Ni Jehova] saannanto a panawan dagidiay nasungdona. Agingga iti tiempo a di nakedngan sigurado a masaluadandanto.” (Salmo 37:28) Ditay koma pulos liplipatan dagiti mannakabalin a puersa dagiti anghel a tumultulong kadagiti adipen ti Dios iti kaaldawantayo. Babaen ti suportada, ‘makapagtakdertayo a sititibker ken makitatayo ti panangisalakan ni Jehova.’​—Exodo 14:13.

18. Apay a nasken nga ‘ikapettayo ti naan-anay a kabal manipud iti Dios’?

¹⁸ Kasanotayo a ‘makapagtakder a sititibker’ iti dana ti kinapudno? Babaen ti panangisuottayo iti naespirituan a kabal a dineskribir ni Pablo iti suratna kadagiti taga-Efeso. Imutektekanyo ta balbalakadannatayo ni Pablo nga ‘ikapettayo ti naan-anay a kabal manipud iti Dios.’ Sikakawestayo kadi iti amin a paset daytoy a naespirituan a kabal? Iti tawen 2008, nainsiriban nga usigentayo amin ti bagbagitayo tapno masigurado a siuumiso a nakakawes kadatayo ti amin a paset dayta a kabal. Ti kabusortayo a ni Satanas a Diablo ammona dagiti pagkapuyantayo, ken ikagkagumaannatayo a gundawayan no saantayo a naridam wenno puntiriaenna ti pagkapuyantayo. Addaantayo iti “pannakigubal” kadagiti dakes nga espiritu a puersa. Kaskasdi, babaen ti bileg ni Jehova, makapagtalinaedtayo a natarnaw!​—Efeso 6:11-18; Proverbio 27:11.

19. No agibturtayo, maaddaantayo iti ania a pribilehio?

¹⁹ Kinuna ni Jesus kadagiti pasurotna: “Babaen ti panagibturyo magun-odanyonto dagiti kararuayo.” (Lucas 21:19) Sapay koma ta karamantayo kadagidiay a simamatalek a mangib-ibtur iti aniaman a pakarigatan ket iti kasta, babaen ti di kaikarian a kinamanangngaasi ti Dios, maaddaantayo iti pribilehio nga ‘agtakder a sititibker ken kitaen ti panangisalakan ni Jehova.’

Ania ti Sungbatmo?

• Ania dagiti makapikapik a pasamak nga asidegen a dumteng?

• Kasano nga impakita ni Jehova ti pannakabalinna a mangispal idi 1513 K.K.P.?

• Ania ti determinasionmo nga aramiden iti masanguanan?

[Salsaludsod]

[Blurb iti panid 20]

Ti teksto para iti tawen 2008 ket: “Agtakderkayo a sititibker ket kitaenyo ti panangisalakan ni Jehova.”​—Exodo 14:13.

[Ladawan iti panid 17]

“Amin a bambanag a naisurat a nasaksakbay naisuratda a pakasursuruantayo”

[Ladawan iti panid 18]

Nadidigra ti Egipto gapu iti kinasubeg ni Faraon

[Ladawan iti panid 19]

Naispal dagiti Israelita idi inaramidda ti amin nga imbilin ni Jehova