Dagiti Tampok iti Libro a Malakias
Ti Sao ni Jehova Nabiag
Dagiti Tampok iti Libro a Malakias
NAIRINGPAS ti pannakaibangon manen ti templo idiay Jerusalem iti nasurok a 70 a tawen. Ngem iti panaglabas ti tiempo, kimmapuy unay ti espiritualidad dagiti Judio. Dimmakes ti kababalin uray dagiti papadi. Asino ti mangipabigbig iti pudno a kasasaadda ken mangikagumaan a tumulong kadakuada nga agbalin manen a nasinged iti Dios? Adda impaannong ni Jehova ken mammadto Malakias.
Ti maudi a libro ti Hebreo a Kasuratan ket insurat ni Malakias iti mangipaganetget nga estilo ken aglaon dayta iti padto nga impaltiing ti Dios. Ti panangipangag iti imbaga ni propeta Malakias ket makatulong kadatayo nga agsagana para iti “dakkel ken nakaam-amak nga aldaw ni Jehova,” inton agpatingga ti agdama a dakes a sistema ti bambanag.—Malakias 4:5.
DAGITI PAPADI ‘INTIBKOLDA TI ADU’
Inyebkas ni Jehova ti riknana iti Israel, babaen ti panangibagana iti: “Inayatkayo.” Ngem dagiti papadi imbabainda ti nagan ti Dios. Kasano? “Babaen ti panangidiaya[da] iti narugitan a tinapay iti rabaw ti altar[na]” ken babaen iti panangidiayada iti “pilay nga animal wenno masakit” kas daton.—Malakias 1:2, 6-8.
Dagiti papadi ‘intibkolda ti adu iti linteg.’ Dagiti umili ‘nakilangenda a sigugulib iti maysa ken maysa.’ Dadduma ti nangasawa kadagiti ganggannaet. Adda met dagidiay nakilangen a sigugulib iti “asawa ti kinaagtutubo[da].”—Malakias 2:8, 10, 11, 14-16.
Sungbat Kadagiti Nainkasuratan a Saludsod:
2:2—Iti ania a wagas a ni Jehova ‘ilunodna dagiti bendision’ dagiti nasukir a papadi? Dayta ket inaramid ti Dios iti anag a ti bendision a kiniddaw dagiti kasta a papadi ket nagbalin ketdi a lunod.
2:3—Ania ti kaipapanan ti ‘mangiwaris iti ibleng’ iti rupa dagiti papadi? Sigun iti Linteg, ti ibleng ti maidaton nga animal ket nasken a maipan iti ruar ti kampo ken mapuoran. (Levitico 16:27) Ti panangiwaris iti ibleng iti rupa dagiti papadi kaipapananna a saan nga inawat ni Jehova dagiti daton ken karimonna dagidiay agidatdaton.
2:13—Makinlulua ti nangabbong iti altar ni Jehova? Dagita ket lulua dagiti assawa a babbai nga immay iti santuario ti templo tapno iyebkasda dagiti ladingitda iti imatang ni Jehova. Apay a kasta unay ti leddaangda? Indiborsio ida dagiti Judio nga assawada gapu kadagiti di nainkalintegan a rason ken pinanawanda ida, nalabit tapno mangasawa kadagiti ub-ubing ken ganggannaet a babbai.
Dagiti Masursurotayo:
1:10. Saan a naay-ayo ni Jehova iti daton dagidiay naagum a papadi, a nagpatangdan uray kadagiti simple a serbisio kas iti panangiserra kadagiti ridaw wenno pananggangat kadagiti silaw ti altar. Anian ti kinapategna a dagiti aramidtayo a nainaig iti panagdayaw, agraman dagiti ar-aramidentayo iti Nakristianuan a ministerio, ket gapu iti di agimbubukodan a panagayattayo iti Dios ken iti kaarrubatayo, imbes a gapu iti kuarta!—Mateo 22:37-39; 2 Corinto 11:7.
1:14; 2:17. Ni Jehova saanna a panuynoyan ti kinamanaginsisingpet.
2:7-9. Dagidiay naikkan iti pribilehio a mangisuro iti kongregasion ket rumbeng a siertuenda a ti isursuroda ket maitunos iti Sao ti Dios, iti Nasantuan a Kasuratan, ken kadagiti naibasar-Biblia a publikasion “ti matalek a mayordomo.”—Lucas 12:42; Santiago 3:11.
2:10, 11. Namnamaen ni Jehova nga ipapuso dagiti agdaydayaw kenkuana ti balakad a makiasawada “isuna laeng ta iti Apo.”—1 Corinto 7:39.
2:15, 16. Dagiti pudno nga agdaydayaw adda nauneg a panagraemda iti asawa ti kinaagtutuboda.
“UMAYTO ITI TEMPLONA TI PUDNO NGA APO”
“Giddato nga umayto iti templona ti pudno nga Apo [ni Jehova a Dios]” a kaduana “ti mensahero ti tulag [a ni Jesu-Kristo].” Ti Dios ket ‘umasidegto kadakayo maipaay iti panangukom’ ken agbalin a nasiglat a saksi maikontra iti amin a kita ti managdakdakes. Kanayonanna, “maysa a libro a pakalaglagipan” ti nangrugi a masuratan maipaay kadagidiay agbuteng ken Jehova.—Malakias 3:1, 3, 5, 16.
Umayto ti aldaw a “sumsumged a kas iti urno” ken alun-onenna dagiti amin a nadangkes. Sakbay ti iyaay dayta nga aldaw, maibaon ti maysa a mammadto tapno “isublinanto ti puso ti amma iti annak, ken ti puso ti annak kadagiti amma.”—Malakias 4:1, 5, 6.
Sungbat Kadagiti Nainkasuratan a Saludsod:
3:1-3—Kaano nga immay “ti pudno nga Apo” ken “ti mensahero ti tulag” iti templo, ken asino ti naibaon nga immun-una ngem isuda? Babaen ti pannakabagina, immay ni Jehova iti templona ken dinalusanna dayta idi Nisan 10, 33 K.P. Dayta a tiempo ket idi a simrek ni Jesus idiay templo sana pinaruar dagidiay aggatgatang ken aglaklako. (Marcos 11:15) Dayta ket tallo ket kagudua a tawen kalpasan a napulotan ni Jesus kas Nadutokan nga Ari. Umasping iti dayta, agparang a tallo ket kagudua a tawen kalpasan ti pannakaitronona kas Ari idiay langit, ni Jesus ket kimmuyog ken Jehova iti naespirituan a templo ket nasarakanda a nasken a madalusan ti ili ti Dios. Idi umuna a siglo, naibaon ni Juan a Manangbautisar tapno pagsaganaen dagiti Judio iti iyaay ni Kristo. Iti moderno a tiempo, adda mensahero a naibaon a nasaksakbay tapno isaganana ti dalan agpaay iti iyaay ni Jehova iti naespirituan a templona. Idi dekada pay laeng ti 1880, addan grupo dagiti agad-adal iti Biblia a nangrugi a nakipaset iti trabaho a panangisuro iti Biblia tapno maisubli ti adu a kangrunaan a kinapudno nga isursuro ti Biblia iti puso dagiti nasingpet a tattao.
3:10—Ti kadi panangted iti ‘amin nga apagkapullo,’ irepresentarna ti panangtedtayo iti amin nga adda kadatayo para ken Jehova? Nawaswas ti Mosaiko a Linteg gapu iti ipapatay ni Jesus, isu a saanen a maikalikagum ti apagkapullo a kuarta iti panagdayawtayo iti Dios. Nupay kasta, adda simboliko a kaipapanan ti panangted iti apagkapullo. (Efeso 2:15) Dayta ket saan a mangirepresentar iti panangtedtayo iti amin nga ik-ikutantayo. Nupay maited ti apagkapullo iti kada tawen, maminsan laeng nga itedtayo ken Jehova ti amin nga ik-ikutantayo—idi nagdedikartayo Kenkuana ken insimbolotayo ti dedikasiontayo babaen ti panagbautisartayo. Sipud idin, amin nga ik-ikutantayo ket kukuan ni Jehova. Kaskasdi, ipalpalubosna nga agpilitayo iti kayattayo nga ited—maysa a simboliko nga apagkapullo—nga usarentayo iti panagserbitayo kenkuana. Dayta ket aniaman nga ipalubos ti kasasaadtayo ken idiktar ti pusotayo. Dagiti idatontayo ken Jehova ket karamanna ti tiempo, pigsa, ken sanikuatayo, a mausar iti trabaho a panangasaba iti Pagarian ken panagaramid kadagiti adalan. Nairaman met ti itatabunotayo kadagiti Nakristianuan a gimong, panangsarungkar kadagiti masakit, ken natataengan a kapammatiantayo ken panangted iti pinansial a tulong para iti pudno a panagdayaw.
4:3—Iti ania a wagas a dagiti agdaydayaw ken Jehova ‘ibaddebaddekdanto dagidiay nadangkes’? Ti ili ti Dios ditoy daga saandanton a literal nga ‘ibaddebaddek dagidiay nadangkes’ kayatna a sawen, saanda a makiraman iti panangipakat iti panangukom kenkuana. Imbes ketdi, ipasimudaagna nga aramidento dayta dagiti adipen ni Jehova ditoy daga iti simbolikal a wagas babaen ti naimpusuan a pannakipasetda iti panangselebrar iti panagballigi kalpasan ti panungpalan ti lubong ni Satanas.—Salmo 145:20; Apocalipsis 20:1-3.
4:4—Apay a rumbeng a ‘lagipentayo ti linteg ni Moises’? Saan a maipakalikagum kadagiti Kristiano a surotenda dayta a Linteg ngem agserbi dayta kas “anniniwan ti naimbag a bambanag nga umay.” (Hebreo 10:1) Gapuna, ti panangipangag iti Mosaiko a Linteg ti mangipaawat kadatayo a matungtungpalen dagiti naisurat iti dayta. (Lucas 24:44, 45) Kanayonanna, linaon ti Linteg “dagiti mangisimbolo a ladawan ti bambanag iti langlangit.” Nasken nga adalentayo dayta tapno maawatantayo dagiti Nakristianuan a pannursuro ken kondukta.—Hebreo 9:23.
4:5, 6—Siasino ti irepresentar ni “Elias a mammadto”? Naipadto a ni “Elias” ket mangaramid iti trabaho a panangisubli, kayatna a sawen ti panangisagana iti puso dagiti tattao. Idi umuna a siglo K.P., ni Jesu-Kristo inyam-ammona ni Juan a Manangbautisar kas ni “Elias.” (Mateo 11:12-14; Marcos 9:11-13) Ti moderno-aldaw a katupagna ket naibaon “sakbay ti iyaay ti dakkel ken nakaam-amak nga aldaw ni Jehova.” Ti mangirepresentar ken Elias iti kaaldawantayo ket awan sabali no di “ti matalek ken masirib nga adipen.” (Mateo 24:45) Dayta a grupo dagiti napulotan a Kristiano ket sipipinget a tumultulong kadagiti tattao tapno maisubli ti relasionda iti Dios.
Dagiti Masursurotayo:
3:10. Ditay magun-odan ti bendision ni Jehova no ditay ited kenkuana dagiti kasayaatan nga ik-ikutantayo.
3:14, 15. Gapu ta saan a mapagulidanan dagiti papadi, rinugian dagiti Judio a tagilag-anen ti panagserbida iti Dios. Dagidiay maikkan iti responsabilidad iti kongregasion Kristiano ket rumbeng a mapagulidanan.—1 Pedro 5:1-3.
3:16. Adda libro ni Jehova a nakaisuratan ti nagan dagidiay agbuteng ken matalek kenkuana. Malagipna ida ken ispalennanto ida inton pagpatinggaenna ti dakes a lubong ni Satanas. Saan koma a pulos a kumapuy ti determinasiontayo nga agtalinaed a natarnaw iti Diostayo.—Job 27:5.
4:1. Inton aldaw a makikinnuentatayo ken Jehova, maymaysanto ti pagbanagan ti “kangrunaan a sanga” ken ti “ramut”—dagiti ubbing umawatdanto iti isu met la a panangukom a kas iti awaten dagiti nagannakda. Anian a nagdakkel ti responsabilidad dagiti nagannak kadagiti ubbing pay nga annakda! Masapul nga ikagumaan dagiti Kristiano nga amma ken inna a gun-oden ti anamong ti Dios ken taginayonen ti nasayaat a takderda iti imatangna.—1 Corinto 7:14.
“Agbutengka iti Pudno a Dios”
Asinonto ti maisalakan iti “dakkel ken nakaam-amak nga aldaw ni Jehova”? (Malakias 4:5) Kinuna ni Jehova: “Kadakayo nga agbuteng iti naganko sigurado nga agsilnagto ti init ti kinalinteg, a kadagiti payakna adda pannakapaimbag; ket pudno a rummuarkayto ket karukayenyo ti daga a kas kadagiti pinalukmeg a kigaw a baka.”—Malakias 4:2.
“Ti init ti kinalinteg,” a ni Jesu-Kristo, ket agsilnagto kadagidiay addaan iti nadayaw a panagbuteng iti nagan ti Dios, ket sagrapendanto ti anamong ni Jehova. (Juan 8:12) Para kadakuada, “kadagiti payakna adda pannakapaimbag”—naespirituan a pannakapaimbag ita ken naan-anay a pisikal, mental, ken emosional a pannakapaimbag idiay baro a lubong ti Dios. (Apocalipsis 22:1, 2) Gapu ta magagaran ken maragragsakanda, agtigtignayda a “kas kadagiti pinalukmeg a kigaw a baka.” Tapno masagraptayo dagita a bendision nga agur-uray kadatayo, ipangagtayo ti balakad ni Ari Solomon: “Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.”—Eclesiastes 12:13.
[Ladawan iti panid 26]
Ni mammadto Malakias ket naregta ken napasnek nga adipen ti Dios
[Ladawan iti panid 29]
Ti isursurotayo ket rumbeng a maitunos iti Biblia
[Ladawan iti panid 29]
Raraemen dagiti adipen ni Jehova ti tulag ti panagasawada