Malagipyo Kadi?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Apay a manayon ti kinapateg ti “Daan a Tulag”?

Ti Autorna ket saan a naulpit a didiosen no di ket ti naayat a Dios a ni Jehova. Ni Jesus ken dagiti nagkauna a pasurotna intultuloyda nga inusar ti Hebreo a Kasuratan kas reperensia. Aglaon dagita iti praktikal a balakad agpaay iti inaldaw a biag ken mangipaay iti nagsayaat a namnama para iti masanguanan.​—9/1, panid 4-7.

• Babaen ti naipalubos a panaglabas ti tiempo, ania ti naibanag sipud idi nagbasol da Adan ken Eva?

Iti mapattapatta nga 6,000 a tawen a napalabas sipud idi nagbasolda, ni Satanas ket napaneknekan a managulbod agsipud ta natay da Adan, Eva ken ti minilion nga annakda. Pinaneknekan ti naglabas a tiempo a saan a nangyeg iti nasaysayaat a resulta ti panangilaksid iti turay ti Dios ken awan kalintegan wenno abilidad ti tao a mangiturong kadagiti addangda.​—9/15, panid 6-7.

• Apay a saan a nababalaw ni Jacob idi nagpammarang nga isu ni Esau?

Ni Jacob ket maikari iti pamendision ni amana yantangay ginatangna ti kalintegan ni Esau kas inauna. Idi naamiris ni Isaac a ni Jacob ti binendisionanna, dinan imbabawi dayta. Saan met a linapdan dayta ti Dios, nupay kabaelanna koma, agsipud ta nalawag a ni Jacob ti kayatna a mabendisionan.​—10/1, panid 31.

• Iti ania a wagas a ti kaadda ti konsiensiatayo paneknekanna a saantayo a timmaud gapu iti ebolusion?

Iti amin a puli ken kultura, dagiti tattao ket masindadaan a tumulong iti sabsabali, uray no isebbada ti biagda. Awan ti kasta a kinamanagsakripisio iti biang ti tao no isu ket maysa laeng a kita ti animal a mangikagkagumaan nga agbiag uray no madangran ti sabsabali.​—10/15, panid 20.

• Apay a makunatayo a napakumbaba ti Dios, ket kasano nga iparparangarangna dayta a galad?

Addaantayo kadagiti limitasion idinto ta ti Dios, kas Soberano ken Namarsua, ket saan a kasta. Ngem maitunos iti 2 Samuel 22:36, ti Dios ket napakumbaba iti anag nga ipakpakitana ti pannakaseknanna kadagiti nanumo a tattao a mangikagkagumaan a mangay-ayo kenkuana ken ipapaayanna ida iti asi. Arigna a bumaba ni Jehova, tapno makilangen buyogen asi kadagiti tattao a managbuteng kenkuana.​—11/1, panid 4-5.

• Kasano a dagiti nagkauna a ribak ti damili pasingkedanda a pudno dagiti nailanad iti Biblia?

Dagiti arkeologo ket nakasarak kadagiti ribak ti damili idiay Samaria a nakaisuratan ti pito a nagan ti pamilia a nailanad idiay Josue 17:1-6. Dagiti ribak ti damili idiay Arad ti mangpasingked iti impormasion ti Biblia maipapan kadagiti pamilia ti papadi ken ti nagan ti Dios. Dagiti ribak ti damili idiay Laquis ti mangilawlawag iti napolitikaan a kasasaad ken ti nasaknap a riribuk idiay Juda sakbay a rinaut dagiti taga-Babilonia.​—11/15, panid 12-14.

• Ania ti pamatiantayo a ni Lucas ti nangisurat iti libro nga Aramid?

Ti Ebanghelio ni Lucas ken ti Aramid dagiti Apostol ket agpada a naiturong ken Teofilo. Dayta ti mangipasimudaag a ni Lucas ti nangurnos kadagita a dua a libro. Ti pannakausar ti sasao nga “inkagumaanmi” ken “napankami” ti mangipasimudaag a ni Lucas ket nakiraman iti dadduma kadagiti naisalaysay a pasamak. (Aramid 16:8-15)​—11/15, panid 18.

• Ania ti rumbeng a panangmatmat ti maysa a Kristiano iti panaganup ken panagkalap?

Sipud idi kaaldawan ni Noe, ti Dios palpalubosanna dagiti tattao nga agparti ken mangan kadagiti animal. Ngem ti pagannurotan a rumbeng a padaraenda dagita ti mangipaganetget a masapul a maraem ti biag ti animal yantangay nagtaud dayta iti Dios. Dagiti Kristiano ket rumbeng a saan a pumatay kadagiti animal tapno laeng pagay-ayaman wenno pagraragsakan. Napateg met nga agtulnogtayo kadagiti linteg ni Cesar ken ikabilangantayo ti konsiensia ti sabsabali. (Roma 14:13)​—12/1, panid 31.