Nakasaganaka Kadin Para iti Aldaw ni Jehova?

“Ti dakkel nga aldaw ni Jehova asidegen. Asidegen dayta, ket mapagdardaras iti kasta unay.”​—SOFONIAS 1:14.

1-3. (a) Ania ti kunaen ti Biblia maipapan iti aldaw ni Jehova? (b) Ania nga “aldaw ni Jehova” ti padpadaanantayo?

 TI ALDAW ni Jehova ket saan nga agpaut iti 24 nga oras. Naunday dayta a tiempo, ta kabayatan dayta, iwayat ti Dios ti panangukomna kadagiti nadangkes. Adda ngarud pamkuatan dagidiay saan nga agserserbi iti Dios nga agamak iti dayta nga aldaw ti kinasipnget, rungsot, sumsumged nga unget, kinariribuk, ken pannakalangalang. (Isaias 13:9; Amos 5:18-20; Sofonias 1:15) “Ilala pay ti aldaw,” kuna ti padto ni Joel, “agsipud ta asidegen ti aldaw ni Jehova, ket umayto a kas iti panangagaw manipud iti Daydiay Mannakabalin-amin!” (Joel 1:15) Ngem iti dayta a dakkel nga aldaw, isalakanto ti Dios dagidiay “napalungdo iti puso.”​—Salmo 7:10.

² Ti sasao nga “aldaw ni Jehova” ket tumukoy iti pannakaiwayat ti panangukom ti Dios iti nadumaduma a tiempo. Kas pagarigan, dimteng ti “aldaw ni Jehova” idi nga inusar ti Dios dagiti taga-Babilonia a mangiwayat iti panangukomna kadagiti agnanaed iti Jerusalem idi 607 K.K.P. (Sofonias 1:4-7) Ti sabali pay a pannakaiwayat ti panangukom ti Dios ket napasamak idi 70 K.P. idi nga inusar ti Dios dagiti Romano a mangiwayat iti panangukomna iti nasion dagiti Judio a nanglaksid iti Anakna. (Daniel 9:24-27; Juan 19:15) Impadto met ti Biblia ti iyaay ti “aldaw ni Jehova” inton isu ket ‘makigubat kadagiti amin a nasion.’ (Zacarias 14:1-3) Babaen iti paltiing, innaig ni apostol Pablo dayta nga aldaw iti kaadda ni Kristo, a nangrugi idi naitrono ni Jesus kas Ari idi 1914. (2 Tesalonica 2:1, 2) Yantangay ipakita dagiti ebidensia a nakaas-asidegen ti iyaay ti aldaw ni Jehova, maitutop unay ti teksto dagiti Saksi ni Jehova para iti tawen 2007. Naadaw dayta iti Sofonias 1:14, a kunana: “Ti dakkel nga aldaw ni Jehova asidegen.”

³ Yantangay asidegen ti dakkel nga aldaw ti Dios, itan ti tiempo tapno paneknekam a nakasaganaka. Kasanoka a makapagsagana para iti dayta nga aldaw? Ania pay dagiti nasken nga aramidem tapno makapagsaganaka para iti aldaw ni Jehova?

Paneknekam a Sisasaganaka

4. Insagana ni Jesus ti bagina agpaay iti ania a nakaro a suot?

⁴ Iti padtona maipapan iti panungpalan ti sistema ti bambanag, kinuna ni Jesu-Kristo kadagiti adalanna: “Paneknekanyo a sisasaganakayo.” (Mateo 24:44) Idi imbaga dayta ni Jesus, isu a mismo ket sisasagana a sumango iti nakaro a suot​—ti ipapatayna kas daton a pangsubbot. (Mateo 20:28) Ania ti masursurotayo iti wagas ti panangisagana ni Jesus iti bagina?

5, 6. (a) Kasano a ti panagayattayo iti Dios ken kadagiti tattao tulongannatayo nga agsagana para iti aldaw ni Jehova? (b) Ania nga ulidan ti impasdek ni Jesus no maipapan iti panagayat iti kaarruba?

⁵ Ni Jesus ket addaan iti naimpusuan a panagayat ken Jehova ken kadagiti nalinteg a pagalagadan ni Amana. Maipapan ken Jesus, kuna ti Hebreo 1:9: “Inayatmo ti kinalinteg, ket ginuram ti kinakillo. Dayta ti makagapu a ti Dios, ti Diosmo, pinulotannaka iti lana ti panagrag-o a nangnangruna ngem kadagiti kakaduam.” Gapu iti panagayatna iti nailangitan nga Amana, tinaginayon ni Jesus ti kinatarnawna Kenkuana. No addaantayo iti umasping a panagayat iti Dios ken kanayon a tungpalentayo dagiti ipakalikagumna kadatayo, salaknibannatayto. (Salmo 31:23) Ti kasta a panagayat ken panagtulnog tulongannatayo nga agsagana para iti aldaw ni Jehova.

⁶ Ti panagayat kadagiti tattao ket nakadkadlaw a paset ti personalidad ni Jesus. Kinapudnona, “simnek ti asina kadakuada, agsipud ta nalalatan ken naiwarawarada a kasla karkarnero nga  awanan pastor.” (Mateo 9:36) Dayta ti makagapu nga inkasaba ni Jesus ti naimbag a damag kadagiti tattao, no kasano a ti ayat tigtignayennatayo met a mangiwaragawag iti mensahe ti Pagarian kadagiti kaarrubatayo. Gapu iti ayattayo iti Dios ken kadagiti kaarrubatayo, matignaytayo a makipaset a siaaktibo iti Nakristianuan a ministerio. Iti panangaramid iti dayta, makapagsaganatayo para iti dakkel nga aldaw ni Jehova.​—Mateo 22:37-39.

7. Apay a mabalintay ti agrag-o bayat nga ur-urayentayo ti aldaw ni Jehova?

⁷ Pagragsakan ni Jesus nga aramiden ti pagayatan ni Jehova. (Salmo 40:8) No addaantayo iti kasta a kababalin, maragsakantayo a mangipaay iti sagrado a panagserbi iti Dios. Matuladtayo ti kinaparabur ni Jesus isu nga agbalintayo a pudpudno a naragsak. (Aramid 20:35) Wen, “ti rag-o ni Jehova isu ti salindeg[ta]yo.” Babaen dayta, ad-adda a nakasaganatayo para iti dakkel nga aldaw ti Dios.​—Nehemias 8:10.

8. Apay a rumbeng nga umadanitayo ken Jehova babaen ti kararag?

⁸ Ti napasnek a panagkararag iti Dios natulonganna ni Jesus nga agbalin a sisasagana kadagiti pakasuotan ti pammatina. Isu ket agkarkararag idi binautisaran ni Juan. Agpatnag a nagkararag ni Jesus idi pinilina dagiti apostolna. (Lucas 6:12-16) Ket saan kadi a matukay ti siasinoman nga agbasbasa iti Biblia no mabasana dagiti naimpusuan a kararag ni Jesus idi maudi a rabii ti biagna ditoy daga? (Marcos 14:32-42; Juan 17:1-26) Masansan kadi met nga agkarkararagka a kas ken Jesus? Sansanem ti umadani ken Jehova, dika agap-apura iti panagkararagmo, kiddawem ti panangiwanwan ti nasantuan nga espirituna, ken situtulok nga awatem ti nabatad a panangiwanwanna. Nasken a maaddaantayo iti nasinged a relasion iti nailangitan nga Amatayo bayat daytoy napeggad a tiempo a sipapartak nga umas-asideg ti dakkel nga aldaw ti Dios. Dika ngarud bumdeng nga ad-adda nga umadani ken Jehova babaen iti kararag.​—Santiago 4:8.

9. Kasano kapateg ti pannakaseknantayo iti pannakasantipikar ti nagan ni Jehova?

⁹ Ti pannakaseknanna iti pannakasantipikar ti nasantuan a nagan ni Jehova ti nakatulong pay ken Jesus nga agbalin a sisasagana kadagiti maipasango idi kenkuana a pakasuotan. Kinapudnona, insurona dagiti pasurotna a rumbeng nga iramanda kadagiti kararagda iti Dios daytoy a kiddaw: “Masantipikar koma ti naganmo.” (Mateo 6:9) No il-iliwentayo unay ti pannakasantipikar ti nagan ni Jehova, ikagumaantayo a liklikan ti agaramid iti aniaman a mangyeg iti pakaumsian ti naganna. Iti kasta, ad-adda a nakasaganatayo para iti dakkel nga aldaw ni Jehova.

Adda Kadi Dagiti Nasken a Balbaliwam?

10. Apay a rumbeng a sukimatentayo ti biagtayo?

¹⁰ No dumteng ti aldaw ni Jehova inton bigat, nakasaganaka kadin? Tunggal maysa kadatayo ket rumbeng a sukimatenna ti panagbiagna tapno makitana no adda aniaman nga aramid wenno kababalin a nasken a balbaliwanna. No laglagipentayo ti kinaababa ken kinarasi ti biag ti tao, nasken a tunggal maysa kadatayo ket inaldaw a panunotenna no kasano nga ad-adda pay a mapasinged ti relasiontayo ken Jehova. (Eclesiastes 9:11, 12; Santiago 4:13-15) Usigentayo ngarud ti dadduma a banag a mabalin a nasken a parang-ayentayo.

11. Ania ti kalatmo iti panagbasam iti Biblia?

 ¹¹ Ti maysa a napateg a banag nga ibalbalakad ti ‘matalek nga adipen’ isu ti inaldaw a panangbasatayo iti Biblia. (Mateo 24:45) Nalabit kayatmo a pagbalinen a kalat ti panangbasa iti Biblia manipud Genesis agingga iti Apocalipsis maminsan iti kada tawen ken iwayaam nga utoben dayta. No inaldaw a basaem ti uppat a kapitulo, mabasam ti 1,189 a kapitulo ti Biblia iti makatawen. Naibilin idi iti tunggal ari ti Israel a basaenna ti Linteg ni Jehova iti “amin nga al-aldaw ti panagbiagna.” Nabatad nga adda inaramid ni Josue nga umasping iti dayta. (Deuteronomio 17:14-20; Josue 1:7, 8) Talaga la ketdi a nakapatpateg para kadagiti panglakayen iti kongregasion nga inaldaw a basaenda ti Sao ti Dios ta dayta ti tumulong kadakuada a mangiburay iti “makapasalun-at a sursuro”!​—Tito 2:1.

12. Ti kinaasideg ti aldaw ni Jehova ti mangtignay koma kenka a mangaramid iti ania?

¹² Ti kinaasideg ti aldaw ni Jehova ti mangtignay koma kenka a regular a tumabuno kadagiti Nakristianuan a gimong ken naan-anay a makipaset kadagita aginggat’ mabalin. (Hebreo 10:24, 25) No aramidem dayta, rumang-ay dagiti abilidadmo kas manangiwaragawag ti Pagarian nga agbirbirok ken tumultulong kadagidiay siuumiso nga agannayas iti agnanayon a biag. (Aramid 13:48) Nalabit a kabaelam ti agbalin a naregregta iti kongregasion iti dadduma pay a wagas kas iti panangtulongmo kadagiti lallakay ken babbaket agraman ti panangparegtam kadagiti ubbing ken agtutubo. Makapnek la ketdi dagita a panagregget!

Ti Relasionmo iti Sabsabali

13. Ania dagiti mabalintay nga iyimtuod iti bagbagitayo no maipapan iti panangikawes iti baro a personalidad?

¹³ Yantangay asidegen ti aldaw ni Jehova, nasken kadi nga ad-adda nga ikagumaam nga ‘ikawes ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo’? (Efeso 4:20-24) Bayat a tultuladem dagiti galad ti Dios, makitanto ti sabsabali a ‘magmagnaka babaen ti espiritu ti Dios’ ken iyap-aplikarmo dagiti bunga dayta. (Galacia 5:16, 22-25) Adda kadin dagiti espesipiko nga inaramidmo agraman ti pamiliam tapno maikawesyo ti baro a personalidad? (Colosas 3:9, 10) Kas pagarigan, am-ammodaka kadi a naasi kadagiti kapammatiam ken iti sabsabali? (Galacia 6:10) Ti regular a panagadal iti Biblia ti makatulong kenka a rumang-ay iti panangtuladmo kadagiti galad ti Dios ken makatulong iti panagbalinmo a sisasagana iti aldaw ni Jehova.

14. Apay a rumbeng nga ikararag ti maysa a tao ti tulong ti nasantuan nga espiritu bayat nga ikagkagumaanna a parang-ayen ti panagteppelna?

¹⁴ Kasano ngay no nalakaka nga agpungtot ken maamirismo a nasken nga ad-adda a parang-ayem ti panagteppelmo? Dayta a galad ket paset ti bunga a mabalin a patauden kenka ti nasantuan nga espiritu ti Dios. Gapuna, ikararagmo ti tulong ti nasantuan nga espiritu a maitunos ti kinuna ni Jesus: “Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo. . . . No dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!”​—Lucas 11:9-13.

15. Ania ti rumbeng nga aramidem no adda diyo nagkinnaawatan iti maysa a kapammatiam?

¹⁵ Ipapantayo nga adda diyo nagkinnaawatan iti maysa a kapammatiam. Iti dayta a kasasaad, ikagumaam ti makikappia tapno maitandudo ti talna ken panagkaykaysa ti kongregasion. (Salmo 133:1-3) Iyaplikarmo ti balakad ni Jesus a naisurat iti Mateo 5:23, 24 wenno Mateo 18:15-17. No impalubosmo a limnek ti init a makapungpungtotka pay laeng, darasem koma nga aturen dagiti bambanag. Masansan a ti laeng kasapulan ket ti situtulok a panangpakawan. Insurat ni Pablo: “Agbalinkayo a manangngaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa no kasano a ti Dios sibubulos a nangpakawan met kadakayo babaen ken Kristo.”​—Efeso 4:25, 26, 32.

16. Kadagiti ania a wagas a ti pannakipagrikna ket napateg iti relasion dagiti agassawa?

¹⁶ Ti relasion ti agassawa kalikagumanna a nadungngo ken mannakipagriknada iti tunggal maysa ken adda dagiti tiempo a nasken nga agpinnakawanda. No nasken nga agbalinka a nadungdungngo ken ad-adda a mannakipagrikna iti asawam, ikagumaam nga aramiden dayta babaen ti tulong ti Dios ken ti Saona. Adda kadi ti nasken a balbaliwam tapno matungpalmo ti  1 Corinto 7:1-5 ket iti kasta, sumayaat ti relasionyo nga agassawa ken maliklikam ti pananggulib iti asawam? Sigurado nga iti dayta a paset ti biag a nasken nga agbalin a “nadungngo a mannakipagrikna” ti asawa a lalaki wenno babai.

17. Ania dagiti rumbeng nga aramiden ti maysa no nakaaramid iti nadagsen a basol?

¹⁷ Kasano ngay no nakaaramidka iti nadagsen a basol? Aginggat’ mabalin, aturem a dagus dayta. Ikagumaam ti agpatulong kadagiti Kristiano a panglakayen. Makatulong dagiti kararag ken balakadda tapno sumalun-at manen ti espiritualidadmo. (Santiago 5:13-16) Agkararagka ken Jehova buyogen ti managbabawi a puso. No dimo aramiden dayta, sidiren ken riribukennaka ti konsiensiam. Napasaran dayta ni David, ngem anian a bang-ar ti nariknana idi naipudnona ken Jehova ti inaramidna! Insurat ni David: “Naragsak daydiay a ti iyaalsana mapakawan, a ti basolna maabbongan. Naragsak ti tao nga iti kuentaanna saan a mangikabil ni Jehova iti biddut, ket iti espirituna awan ti allilaw.” (Salmo 32:1-5) Pakawanen ni Jehova dagidiay nakabasol ngem sipapasnek nga agbabbabawi.​—Salmo 103:8-14; Proverbio 28:13.

Agtalinaedka a Saan a Paset ti Lubong

18. Kasano ti rumbeng a panangmatmatmo iti lubong?

¹⁸ Sigurado a segseggaam ti nagsayaat a baro a lubong nga inkari ti nailangitan nga Amatayo. Kasano ngarud ti rumbeng a panangmatmatmo iti nakillo a kagimongan ti tao a naisina iti Dios? Ni Satanas nga isu “ti agturay iti daytoy a lubong,” awan pannakabalinna ken Jesu-Kristo. (Juan 12:31; 14:30) Sigurado a saanmo a kayat a kontrolennaka ti Diablo ken ti lubongna, isu nga ipapusom ti kinuna ni apostol Juan: “Dikay ayaten ti lubong wenno uray ti bambanag nga adda iti lubong.” Nainsiriban dayta agsipud ta “ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.”​—1 Juan 2:15-17.

19. Aniada a kalat ti maidagadag a ragpaten dagiti Kristiano nga agtutubo?

¹⁹ Tultulongam kadi dagiti annakmo nga ‘agtalinaed nga awanan mulit manipud iti lubong’? (Santiago 1:27) Kayat ni Satanas nga allilawen dagiti annakmo a kas iti aramiden ti maysa a tao no agkalap iti ikan. Ti nadumaduma a gunglo wenno organisasion ket nadisenio a mangimpluensia kadagiti agtutubo nga agbalin a paset ti lubong ni Satanas. Ngem dagiti adipen ni Jehova ket kamengen ti kakaisuna nga organisasion a makalasat inton agpatingga daytoy dakes a sistema ti bambanag. Isu a dagiti Kristiano nga agtutubo ket rumbeng a maparegta nga ‘aduanda koma iti aramiden iti trabaho ti Apo.’ (1 Corinto 15:58) Dagiti nagannak a managbuteng iti Dios nasken a tulonganda dagiti annakda a mangragpat kadagiti kalat a mangyeg kadakuada iti naragsak ken makagunggona a biag agpaay a pakaidayawan ti Dios ken makatulong kadakuada nga agbalin a nakasagana para iti aldaw ni Jehova.

Panunotem ti Tiempo Kalpasan ti Dakkel nga Aldaw ni Jehova

20. Apay a rumbeng a sipapanunottayo iti biag nga agnanayon?

²⁰ Kabaelam nga urayen ti aldaw ni Jehova buyogen ti kalmado a puso no sipapanunotka iti biag nga agnanayon. (Judas 20, 21) Seggaam ti panagbiagmo nga agnanayon idiay Paraiso, ket iti kasta mainanamam nga agsublinto ti kinaagkabannuagmo ken ti manayon a panangragpatmo kadagiti makagunggona a kalat ken panagsursurom iti adu-adu pay maipapan ken Jehova. Kinapudnona, agnanayon nga adda mabalintay nga adalen maipapan iti Dios yantangay ti ammo laeng dagiti tattao ita ket ti “pingir ti daldalanna.” (Job 26:14) Anian a makaparagsak dagita a namnama!

21, 22. Anianto dagiti mabalin nga iranud kenka dagiti mapagungar ken anianto met dagiti mairanudmo kadakuada?

²¹ Idiay Paraiso, dagiti mapagungar maammuandanto dagiti bambanag a nakaikapisanda bayat a matmaturogda ken patay. Addanto ni  Enoc sadiay a mangilawlawag kadatayo no kasano a naaddaan iti kinatured tapno maiwaragawagna ti mensahe ni Jehova kadagiti nadangkes a tattao. (Judas 14, 15) Sigurado nga iyestorianto met ni Noe no kasano nga imbangonna ti daong. Ipakaammonto da Abraham ken Sara ti nariknada idi pinanawanda ti nanam-ay a biagda idiay Ur ket nagnaedda kadagiti tolda. Panunotem ni Ester a mangisalsalaysay no kasano nga inkaluyana dagiti kailianna ken tinungdayna ti gakat ni Haman a maibusor kadakuada. (Ester 7:1-6) Iladawanmo iti panunotmo ni Jonas inton iyestoriana ti kasasaadna bayat ti tallo nga aldaw a kaaddana iti tian ti dakkel nga ikan wenno inton ilawlawag ni Juan a Manangbautisar dagiti nariknana idi binautisaranna ni Jesus. (Lucas 3:21, 22; 7:28) Anian a makapainteres a maammuan ti maipapan kadagita!

²² Bayat ti Sangaribu a Tawen a Panagturay ni Kristo, mabalin a maaddaankanto iti pribilehio a tumulong kadagiti mapagungar tapno maaddaanda iti “mismo a pannakaammo iti Dios.” (Proverbio 2:1-6) Iti kaaldawantayo, anian ti ragsaktayo no makitatayo dagiti tattao a gumun-od iti pannakaammo maipapan ken Jehova a Dios ken iyaplikarda dayta iti biagda! Ngem darepdepem ti rag-o a masagrapmo iti dayta a tiempo iti masanguanan inton bendisionan ni Jehova dagiti panagreggetmo a mangisuro kadagiti tattao a nagbiag idi ugma ken iyaplikarda dagiti isurom buyogen ti kinamanagyaman!

23. Ania ti rumbeng a determinado nga aramidentayo?

²³ Gapu iti kinaimperpektotayo, ditay mabilang wenno matukod dagiti bendision a masagsagraptayo ita kas ili ni Jehova. (Salmo 40:5) Nangnangruna nga agyamantayo iti Dios gapu kadagiti naespirituan a probisionna. (Isaias 48:17, 18) Aniaman dagiti kasasaadtayo, itultuloytayo koma ti naimpusuan ken sagrado a panagserbitayo bayat nga ur-urayentayo ti dakkel nga aldaw ni Jehova.

Ania ti Sungbatmo?

• Ania “ti aldaw ni Jehova”?

• Kasano a mapaneknekam a nakasaganaka para iti aldaw ni Jehova?

• Yantangay nakaas-asidegen ti dakkel nga aldaw ti Dios, ania dagiti nasken a balbaliwantayo?

• Ania ti segseggaam kalpasan ti aldaw ni Jehova?

[Salsaludsod]

[Ladawan iti panid 12]

Pinaneknekan ni Jesus nga isu ket nakasagana a sumango kadagiti pakasuotan

[Ladawan iti panid 15]

Anian a pribilehio ti tumulongto kadagiti mapagungar a gumun-od iti pannakaammo maipapan ken Jehova!