Pannakipagrikna iti Tengnga ti Naulpit a Lubong

ADDA lalaki idiay Burundi a nakaro ti sakitna a malaria. Masapul a mayospital a dagus. Ngem kasano? Isu ket tinulongan ti dua kadagiti nasinged a gagayyemna. Gapu ta awan sabali a pangilugananda, insakayda isuna iti bisikleta sada induron dayta iti makabannog a lima nga oras iti narigat a desdes iti kabambantayan. Kalpasan dayta, inluganda iti bus agingga iti kaasitgan nga ospital. Kalpasan ti sumagmamano nga aldaw, immimbag dayta a lalaki.

Iti sabali a paset ti daga, kalpasan ti idadalapus ti Bagyo a Katrina idi Agosto 2005, a nangdadael kadagiti lugar idiay Estados Unidos nga asideg iti baybay, adda grupo dagiti boluntario a nakakita iti maysa a balay a natupakan kadagiti natumba a kayo. Nupay dagiti boluntario ket saan a pulos nga am-ammo ti makimbalay, nagmalmalem dagitoy a nangikkat kadagiti natumba a kayo babaen kadagiti de motor a ragadi. “Diakto pulos masubadan ti kinaimbag dagitoy [a tattao],” kinuna ti makimbalay.

Dagiti makapasidduker a damag ket kadawyanna a mangitampok iti kinaranggas ken kinaulpit. Dagita ti masansan ken ad-adda a maipadamag imbes a dagiti inaldaw a panangipakita iti pannakipagrikna ken kinaasi. Ngem dayta ti saan a mangbalbaliw iti kinapudno a dagiti tattao iti amin a lugar ket mawaw iti ayat, dungngo, ken panangisakit. Tarigagayantay unay nga adda makipagrikna kadatayo! Dagita a karirikna ket mabalin nga ad-adda a maitampok no panawen ti Krismas. Iti dayta a tiempo, adu ti agsasao wenno agkankanta maipapan iti ‘talna ken naimbag a nakem kadagiti tattao.’​—Lucas 2:14.

Iti lubong a kaaduan ket saan a mannakigayyem  ken awanan pannakaseknan, mabalin a narigat nga iparangarang ti pannakipagrikna. Ibilang ti adu a tattao a naballigi ti maysa no isu ket naulpit ken saan a mannakipagrikna. Nabatad nga adu ti agbibiag a maitunos iti prinsipio nga ad-adda a nainsiriban ti agbalin a naulpit ngem ti agbalin a mannakipagrikna. Gapu iti kinamanagimbubukodan ken panagpasindayaw, mapukpukawen ti pannakipagrikna.

Kas resulta, adu ti mangipangpangruna iti bagbagida uray no kaipapanan dayta ti didan panangikabilangan iti rikna wenno pagimbagan ti sabsabali. Dagiti lallaki a bannuar iti isport ken paglinglingayan a saan a mangipakpakita iti naalumamay a kinadungngo ket masansan a madeskribir kas “pudpudno a lallaki” (wenno malalaki). Umasping met laeng kadagita ti kababalin ti dadduma a napolitikaan nga agtuturay.

Nasayaat ngarud no iyimtuodtayo iti bagbagitayo: Apay a rumbeng nga agbalintayo a naasi? Nasayaat kadi ti ibunga ti pannakipagrikna? Ket ania ti makatulong kadatayo nga agbalin a mannakipagrikna? Dagita a saludsod ket sungbatan ti sumaganad nga artikulo.

[Kahon iti panid 3]

•Maysa kadi a pagkapuyan ti kinamannakipagrikna?

•Nasayaat kadi ti ibunga ti kinamannakipagrikna?

•Ania dagiti pamay-an a maipakitam ti simpatia?