Saanto nga Agballigi ti Aniaman nga Igam a Mapataud Maibusor Kenka

“Aniaman nga igam a mabukelto maibusor kenka saanto nga agballigi.”​—ISAIAS 54:17.

1, 2. Kasano nga ipakita dagiti kapadasan dagiti Saksi ni Jehova idiay Albania ti kinapudno ti Isaias 54:17?

 DINEKDEKADA ti napalabasen, iti maysa a bassit a kabambantayan a pagilian iti makin-abagatan a daya ti Europa, adda maysa a grupo dagiti natured a Kristiano. Maysa nga ateistiko a Komunista a gobierno ti nangaramid iti amin a kabaelanna tapno pukawenna ida. Kaskasdi, saanda a naikisap iti laksid ti pannakaparigatda, pannakaibaludda kadagiti kampo ti inkapilitan a panagtrabaho, ken panangpadakes kadakuada ti media. Siasinoda? Isuda dagiti Saksi ni Jehova idiay Albania. Nupay nakarigrigat para kadakuada ti aggigimong ken mangasaba, ti dinekdekada a kinapingetda ti nangital-o ken nangpadayaw iti Kristianidad ken nangitan-ok iti nagan ni Jehova. Idi naidedikar dagiti baro a pasilidad ti sanga nga opisina iti napalabas a tawen, kinuna ti maysa a nabayagen a Saksi: “Uray kasano kapinget ni Satanas, kanayon latta a maabak ket ni Jehova ti kanayon nga agballigi!”

² Amin dagitoy ket pammaneknek a pudno ti inkari ti Dios iti ilina kas dakamaten ti Isaias 54:17: “Aniaman nga igam a mabukelto maibusor kenka saanto nga agballigi, ket aniaman a dila a tumakderto a bumusor kenka iti panangukom kondenaremto.” Patalgedan ti historia nga awan ti maaramidan ti lubong ni Satanas a makapasardeng iti panagdayaw dagiti dedikado nga adipen ni Jehova a Dios.

Dagiti Napaay a Panagregget ni Satanas

3, 4. (a) Ania dagiti karaman kadagiti igam ni Satanas? (b) Iti ania a pamay-an a di nagballigi dagiti igam ti Diablo?

³ Dagiti igam a nausar maibusor kadagiti pudno nga agdaydayaw iramanna ti panangiparit, kinaranggas dagiti managderraaw, pannakaibalud, ken ti ‘panangibalabala iti riribuk babaen iti bilin.’ (Salmo 94:20) Kinapudnona, iti dadduma a pagilian, uray iti daytoy a kanito nga  ad-adalen dagiti Saksi ni Jehova daytoy nga artikulo, dagitoy a pudno a Kristiano ket ‘masubsubok’ ti kinatarnawda iti Dios.​—Apocalipsis 2:10.

⁴ Kas pagarigan, impadamag ti maysa a sanga nga opisina dagiti Saksi ni Jehova a kabayatan ti maysa la a tawen, adda 32 a kaso ti panangranggas kadagiti adipen ti Dios bayat a mangaskasabada. Kanayonanna, adda 59 a pasamak ti panangibalud dagiti polis kadagiti Saksi gapu iti panangasabada iti publiko. Karaman kadagitoy dagiti agtutubo ken nataengan, lallaki ken babbai. Dadduma kadakuada ti naalaan iti lamma ti ramay, naretrato, ken naibalud kas kriminal. Adda met dagiti napangtaan a madangran. Iti sabali a pagilian, adda itan ti nasurok a 1,100 a dokumentado a kaso ti panangaresto, panangmulta, wenno panangkabkabil kadagiti Saksi ni Jehova. Nasurok a 200 kadagitoy a kaso ti napasamak bayat ti panagtataripnongda a mangangay iti pananglaglagip iti ipapatay ni Jesus! Nupay kasta, ti espiritu ni Jehova pinabilegna ti ilina tapno makapagtultuloyda iti laksid dagiti panangidadanes a mapaspasaranda kadagitoy ken iti dadduma pay a pagilian. (Zacarias 4:6) Ti kinarungsot dagiti kabusor saanna a mapasardeng dagidiay agdaydayaw ken Jehova. Wen, agtalektayo nga awan ti igam a makabael a mangtungday iti panggep ti Dios.

Nakondenar Dagiti Ulbod a Dila

5. Ania a kinaulbod ti napataud maibusor kadagiti adipen ni Jehova idi umuna a siglo?

⁵ Impadto ni Isaias a kondenaren ti ili ti Dios ti aniaman a dila a bumusor kadakuada. Idi umuna a siglo, masansan a dagiti Kristiano ti puntiria ti palso a pammabasol, a maipadpadamag a managdakdakesda. Ti umasping kadagita a pammabasol ket nailanad iti Aramid 16:20, 21: “Dagitoy a tattao rirriribukenda unay ti siudadtayo, . . . ket ibumbunannagda dagiti kaugalian a di nainkalintegan kadatayo nga awaten wenno annuroten, yantangay taga Romatayo.” Iti sabali a gundaway, dagiti relihioso a bumusbusor inkagumaanda a durogan dagiti agturay iti siudad tapno agtignayda a maibusor kadagiti pasurot ni Kristo a kunkunada: “Dagitoy a tattao a nangbalintuag iti mapagnaedan a daga addada met ditoy, [ket] agtigtignayda a maibusor kadagiti bilin ni Cesar.” (Aramid 17:6, 7) Ni apostol Pablo ket naawagan kas “peste a tao” ken lider ti sekta ken mangparparnuay kadagiti iyaalsa iti “intero a mapagnaedan a daga.”​—Aramid 24:2-5.

6, 7. Ania ti maysa a wagas a kondenaren dagiti pudno a Kristiano dagiti pammadakes maibusor kadakuada?

⁶ No kasta, ditay pagsiddaawan a dagiti pudno a Kristiano ita ket maipaspasangoda met iti nakaro a panangpadakes, panangpardaya, ken nagkaykaysa a panagregget a mangdadael iti reputasionda. Iti ania nga anag a kondenarentayo dagita nga ibubusor?​—Isaias 54:17.

⁷ Dagita a pammabasol ken propaganda ket masansan a masumra babaen ti nasayaat a kababalin dagiti Saksi ni Jehova. (1 Pedro 2:12) No paneknekan dagiti Kristiano a natulnogda iti linteg ken nadalus ti kabibiagda a pakakitaan ti pudno a pannakaseknanda iti pagimbagan dagiti padada a tattao, mapaneknekan nga ulbod dagiti pammabasol maibusor kadakuada. Ti nasayaat a konduktatayo ti mangpaneknek a saantayo a dakes. Bayat a mapalpaliiw dagiti tattao nga ikagkagumaantayo ti agaramid iti naimbag, masansan a matignayda a mangidayaw iti nailangitan nga Amatayo ken mangbigbig a natantan-ok ti wagas ti panagbiag dagiti adipenna.​—Isaias 60:14; Mateo 5:14-16.

8. (a) Apay a no dadduma, nasken nga idepensatayo ti takdertayo a naibasar iti Biblia? (b) Kas panangtulad ken Kristo, kasanotay a kondenaren dagiti bumusbusor a dila?

⁸ Malaksid iti nadiosan a konduktatayo, no dadduma nalabit nasken a situtured nga idepensatayo ti takdertayo a naibasar iti Biblia. Ti maysa a pamay-an ket ti panagapelartayo kadagiti gobierno ken korte tapno masalaknibantayo. (Ester 8:3; Aramid 22:25-29; 25:10-12) Idi adda ni Jesus ditoy daga, adda dagiti gundaway a situtured a binabalawna dagiti mangum-umsi kenkuana a binalusingsingna dagiti ulbod a pammabasolda. (Mateo 12:34-37; 15:1-11) Kas panangtuladtayo ken Jesus, aprobetsarentayo ti gundaway a mangilawlawag kadagiti sabsabali maipapan kadagiti napasnek a kombiksiontayo. (1 Pedro 3:15) Ditay koma ipalubos a ti pananglais dagiti kaeskuelaan, katrabaho, wenno di manamati a kabagian ti manglapped kadatayo a mangirakurak iti  kinapudno manipud iti Sao ti Dios.​—2 Pedro 3:3, 4.

Jerusalem​—“Bato a Makapadagsen”

9. Ania a Jerusalem ti isimsimbolo ti “bato a makapadagsen” a nadakamat iti Zacarias 12:3, ken asino ti mangirepresentar iti dayta ditoy daga?

⁹ Ti padto ni Zacarias ipalgakna no apay a dagiti pudno a Kristiano ket busbusoren dagiti nasion. Utobenyo ti kuna ti Zacarias 12:3: “Mapasamakto iti dayta nga aldaw a pagbalinek ti Jerusalem a bato a makapadagsen kadagiti amin nga ili.” Ania a Jerusalem ti tuktukoyen dayta a padto? Ti padto ni Zacarias mainaig iti Jerusalem ket agaplikar iti “nailangitan a Jerusalem,” ti nailangitan a Pagarian a nakaawisan dagiti napulotan a Kristiano. (Hebreo 12:22) Adda pay laeng ditoy daga ti bassit a natda kadagitoy nga agtawid iti Mesianiko a Pagarian. Idagdagadagda kadagiti tattao nga agpaiturayda iti Pagarian ti Dios bayat nga adda pay tiempo, ket kaduada ti “sabsabali a karnero” a mangar-aramid iti dayta. (Juan 10:16; Apocalipsis 11:15) Ania ti reaksion dagiti nasion iti dayta nga awis? Ket ania a suporta ti ipapaay ni Jehova kadagiti pudno nga agdaydayaw kenkuana iti kaaldawantayo? Ammuentayo dayta bayat nga itultuloytayo nga usigen ti kababagas ti Zacarias kapitulo 12. No aramidentayo dayta, magun-odantayo ti pammatalged a ‘saanto nga agballigi ti aniaman nga igam’ a maibusor kadagiti napulotan nga adipen ti Dios ken kadagiti dedikado a kakaduada.

10. (a) Apay a maidaddadanes dagiti adipen ti Dios? (b) Ania ti napasamak kadagidiay nangpadas a nangikkat iti “bato a makapadagsen”?

¹⁰ Ipaspasimudaag ti Zacarias 12:3 a dagiti nasion ‘magarumiadandanto iti nakaro.’ Kasano a mapasamak dayta? Imbilin ti Dios a masapul a maikasaba ti naimbag a damag ti Pagarian. Sipapasnek nga itungtungpal dagiti Saksi ni Jehova ti annongenda a mangasaba. Nupay kasta, ti panangiwaragawag iti Pagarian kas ti kakaisuna a namnama ti sangatauan ket nagbalin a “bato a makapadagsen” kadagiti nasion. Padpadasenda nga ikkaten dayta babaen ti pananglappedda kadagiti mangikaskasaba iti Pagarian. Iti panangaramidda iti dayta, dagita a nasion ket ‘nagarumiadanda a mismo iti nakaro,’ ken naglak-amda iti adu a sugat. Nadadael met ti reputasionda bayat a sagsagabaenda ti nakababain a pannakapaay dagiti gannuatda. Dida mapaulimek dagiti pudno a managdaydayaw a mangipatpateg iti pribilehioda a mangiwaragawag iti “agnanayon a naimbag a damag” ti Mesianiko a Pagarian ti Dios sakbay ti panungpalan daytoy sistema dagiti bambanag. (Apocalipsis 14:6) Idi makitana ti kinaranggas a maipalpalak-am kadagiti adipen ni Jehova, kinuna ti maysa a guardia iti pagbaludan iti maysa a pagilian idiay Africa: ‘Agbambannogkayo laeng iti panangidadanesyo kadagitoy a tattao. Didanto pulos makikompromiso. Lallalo laeng nga umad-aduda.’

11. Kasano a tinungpal ti Dios ti karina a nailanad iti Zacarias 12:4?

¹¹ Basaenyo ti Zacarias 12:4. Inkari ni Jehova a piguratibo a bulseken ken ‘riribukenna’ dagidiay makidangadang kadagiti natured a mensahero ti Pagarian. Tinungpalna ti imbagana. Kas pagarigan, iti maysa a pagilian a maparparitan ti pudno a panagdayaw, dagiti bumusbusor dida nalapdan ti ili ti Dios a gumun-od iti naespirituan a taraon. Kinuna pay ketdi ti maysa a periodiko nga agus-usar dagiti Saksi ni Jehova kadagiti balloon tapno maiserrekda iti pagilian dagiti literatura a  naibasar iti Biblia! Napaneknekan a pudno ti kari ti Dios kadagiti nasungdo nga adipenna: “Luktakto dagiti matak, ket tunggal kabalio dagiti ili kabilekto iti pannakapukaw ti panagkita.” Dagiti bumusbusor iti Pagarian ket arigna a nabulsekda gapu iti pungtotda isu a dida ammo no ania ti aramidenda. Ngem kombinsidotayo nga ispalen ni Jehova ti ilina kas maysa a grupo ken mangipakita iti pannakaseknan para iti pagimbaganda.​—2 Ar-ari 6:15-19.

12. (a) Iti ania nga anag a nangpasged ni Jesus iti piguratibo nga apuy idi adda ditoy daga? (b) Kasano a ti napulotan a natda pinasgedanda ti bambanag iti piguratibo a wagas, ket ania ti resultana?

¹² Basaenyo ti Zacarias 12:5, 6. “Dagiti shik ti Juda” tuktukoyenda dagidiay napulotan a mangay-aywan iti ili ti Dios. Ipapaayan ida ni Jehova iti umap-apuy a regta tapno mayadelantarda dagiti naindagaan nga interes ti Pagarianna. Naminsan, imbaga ni Jesus kadagiti adalanna: “Immayak mangirugi iti apuy ditoy daga.” (Lucas 12:49) Kinapudnona, isu ket nagpasged iti piguratibo nga apuy. Ti Pagarian ti Dios ti kangrunaan a tema a sireregta nga inkasaba ni Jesus kadagiti tattao. Dayta ti nangpataud iti nabara a supiat iti intero a nasion dagiti Judio. (Mateo 4:17, 25; 10:5-7, 17-20) Umasping iti dayta, “kasla banga nga addaan apuy iti tengnga ti kaykayo ken kas iti gumilgil-ayab nga aluten iti intar ti kagapgapas a binukel,” dagiti pasurot ni Kristo iti kaaldawantayo paspasgedanda ti bambanag iti piguratibo a wagas. Ti libro a The Finished Mystery a a naipablaak idi 1917 silalawag nga imbutaktakna ti panaginsisingpet ti Kakristianuan. Gapu iti dayta,  nakapungtot dagiti klero. Iti kallabes a tawen, ti Kingdom News No. 37 a napauluan iti “Asidegen nga Agpatingga ti Palso a Relihion!” tinignayna ti adu a tattao a mangpili no dumasigda iti Pagarian ti Dios wenno saan.

Naisalakan “Dagiti Tolda ti Juda”

13. Ania ti ipasimudaag ti sasao a “dagiti tolda ti Juda,” ken apay nga ispalen ni Jehova dagidiay agpegpeggad a maraut?

¹³ Basaenyo ti Zacarias 12:7, 8. Gagangay a makita dagiti tolda iti nagkauna nga Israel, ta pasaray usaren dayta dagiti pastor ken mannalon. Dagita nga umili ti umuna a maapektaran ken agkasapulan iti pannalaknib no ti maysa a bumusbusor a nasion ket rumaut iti siudad ti Jerusalem. Ti sasao a “dagiti tolda ti Juda” ipasimudaagda a no ar-arigen, ti napulotan a natda iti tiempotayo ket addada iti tay-ak, saan a kadagiti nasarikedkedan a siudad. Addada iti tay-ak agsipud ta situtured nga iyad-adelantarda dagiti interes ti Mesianiko a Pagarian. Ni Jehova dagiti buybuyot ispalenna nga “umuna dagiti tolda ti Juda” gapu ta isuda ti kangrunaan a puntiria ti iraraut ni Satanas.

14. Kasano a salsalakniban ni Jehova dagidiay adda kadagiti “tolda ti Juda” ken kasano nga ilikliklikna ida iti pannakaitibkol?

¹⁴ Wen, paneknekan ti historia a salsalakniban ni Jehova dagiti napulotan nga embahador ti Pagarian kadagiti ‘toldada’ iti tay-ak. b Ilikliklikna ida iti ‘pannakaitibkol’ babaen ti panangpabileg ken panangpaturedna kadakuada a kas iti mannakidangadang nga ari a ni David.

15. Apay a ni Jehova ‘ikagumaanna a talipuposen amin dagiti nasion,’ ken kaano nga aramidenna dayta?

¹⁵ Basaenyo ti Zacarias 12:9. Apay a ni Jehova ‘ikagumaanna a talipuposen amin dagiti nasion’? Agsipud ta porsegidoda a mangbusor iti Mesianiko a Pagarian. Nakondenarda gapu iti panangriribuk ken panangidadanesda iti ili ti Dios. Iti mabiiten, dagiti pasurot ni Satanas ditoy daga rautendanto iti maudi a gundaway dagiti pudno nga agdaydayaw iti Dios, a mangitunda iti sangalubongan a pasamak a dineskribir ti Biblia kas ti Har–Magedon. (Apocalipsis 16:13-16) Kas panagtignay iti dayta nga iraraut, ti Kangatuan nga Ukom ikaluyananto dagiti adipenna ken santipikarennanto ti naganna iti tengnga dagiti nasion.​—Ezequiel 38:14-18, 22, 23.

16, 17. (a) Ania “ti pagtatawidan a sanikua dagiti adipen ni Jehova”? (b)Ti panagibturtayo kadagiti iraraut ni Satanas paneknekanna ti ania?

¹⁶ Awan igam ni Satanas a makabael a mangpakapuy iti pammati ken kinaregta ti ili ti Dios iti intero a lubong. Ti natalna a kasasaadtayo iti naespirituan, a resulta ti pannakaammotayo a supsuportarannatayo ni Jehova babaen ti mangispal a pannakabalinna, ket isu “ti pagtatawidan a sanikua dagiti adipen ni Jehova.” (Isaias 54:17) Awan ti asinoman a makaikkat kadatayo iti natalna a kasasaad ken naespirituan a kinarang-aytayo. (Salmo 118:6) Rubrubroban ni Satanas ti ibubusor ken pakpakaruenna ti rigat. Ti nasungdo a panagibturtayo iti laksid ti panangumsi ket pammaneknek nga adda kadatayo ti espiritu ti Dios. (1 Pedro 4:14) Ti naimbag a damag ti naipasdeken a Pagarian ni Jehova ket maiwarwaragawag iti intero a lubong. Kas kadagiti igam a nairanta a mangimayeng kadagiti mapuntaanna, adu a simboliko a “bato ti pallatibong” ti naibato kadagiti adipen ti Dios tapno maimayeng ken malappedanda. Ngem babaen iti bileg ni Jehova, saan nga iginggina dagita dagiti adipenna. (Zacarias 9:15) Awanto ti makapasardeng iti napulotan a natda ken dagiti nasungdo a kakaduada!

¹⁷ Segseggaantayo ti naan-anay a pannakaispaltayo manipud kadagiti iraraut ti Diablo. Anian a makaliwliwa ti pammatalged nga ‘aniaman nga igam a mabukelto maibusor kadatayo ket saanto nga agballigi, ken aniaman a dila a tumakderto a bumusor kadatayo iti panangukom kondenarentayto’!

[Footnotes]

Ania ti Sungbatmo?

• Ania ti mangipakita a saan a nagballigi dagiti igam ni Satanas?

• Kasano a ti nailangitan a Jerusalem nagbalin a “bato a makapadagsen”?

• Kasano nga ispalen ni Jehova “dagiti tolda ti Juda”?

• Bayat nga umad-adani ti iyaay ti Armagedon, ania ti masiguradom?

[Salsaludsod]

[Dagiti Ladawan iti panid 21]

Nagtalinaed a matalek dagiti adipen ni Jehova idiay Albania iti laksid dagiti iraraut ni Satanas

[Ladawan iti panid 23]

Binalusingsing ni Jesus dagiti ulbod a pammabasol

[Dagiti Ladawan iti panid 24]

Awan ti agballigi nga igam a napataud a maibusor kadagidiay mangiwarwaragawag iti naimbag a damag