“Ti Nakapatpateg a Sagutmo”

KASTA ti panangdeskribir ti maysa a dati a primero ministro ti Belgium iti libro a Ti Katan-okan a Tao a Nagbiag Pay Laeng. a Isu ket sinarungkaran ti maysa a kaarrubana ket inikkanna iti maysa a kopia dayta a libro. Inawat ti primero ministro dayta ket idi agangay, kastoy ti insuratna kas ebkas ti panagyamanna: “Talaga a natukayak iti nainggayyeman nga isasarungkarmo, ket ad-adda pay a nagustuak ti nakapatpateg a sagutmo: ti libro maipapan iti ‘Katan-okan a Tao.’”

Dayta a libro ket inusig ti dati a primero ministro ket kastoy ti kinunana: “No la koma ad-adda a tagipatgen dagiti tattao ti mensahe ti Ebanghelio ken iyaplikarda dagiti prinsipio ni Jesu-Kristo, interamente koman a naiduma ti lubong ita. Ditay koman kasapulan ti maysa a Konsilio ti Seguridad; awan met koma dagiti mapasamak nga iyaatake dagiti terorista, ken maiparit met koman ti kinaranggas iti intero a lubong.” Nupay inadmitirna a kasla imposible dayta, inyebkasna ti panagraemna iti nainggayyeman nga isasarungkar ti kaarrubana.

Kastoy ti tuloy ti suratna: “Maysaka a kameng ti nagsayaat a grupo dagiti tattao a naimbag ti nakemda, a saan a positibo wenno negatibo, no di ket meliorista, kayatna a sawen dagiti tattao a mamati a rumbeng a maipamuspusan ti pannakapasayaat ti kasasaad ti tattao ken dagiti bambanag.”

Patien dagiti Saksi ni Jehova a ti ibaballaet ti Dios, saan a dagiti panagregget ti tao ti mangpasayaat iti kasasaad ti lubong. Ikagkagumaanda a tuladen ti katan-okan a tao a ni Jesu-Kristo. Adda kadi dagiti Saksi ni Jehova a simmarungkar kenka itay nabiit? Nalabit magustuamto met ti makisarita kadakuada maipapan iti katan-okan a tao, ket maragsakandanto a mangted kenka iti libro a nagustuan dayta a dati a primero ministro.

[Footnote]