Agtalinaedkayo a Nasungdo Buyogen ti Nagkaykaysa a Puso

“Magnaakto iti kinapudnom. Pagkaykaysaem ti pusok nga agbuteng iti naganmo.”​—SAL. 86:11.

1, 2. (a) Sigun iti Salmo 86:2, 11, ania ti makatulong kadatayo nga agtalinaed a matalek ken Jehova iti sidong ti pannakasuot wenno pannulisog? (b) Kaano a rumbeng a sukayen ti naimpusuan a kinasungdo?

APAY a ti dadduma a Kristiano a nakapagtalinaed a matalek iti adu a tawen iti laksid ti pannakaibalud wenno pannakaidadanes natnagda iti materialismo idi agangay? Ti sungbat ket adda pakainaiganna iti piguratibo a puso​—ti pudno a kinataotayo. Sigun iti maika-86 a Salmo, ti kinasungdo ket mainaig iti nagkaykaysa a puso; kayatna a sawen, ti naan-anay wenno di nabingay a puso. “O saluadam ti kararuak, ta nasungdoak,” inkararag ni salmista a David. “Isalakanmo ti adipenmo​—sika ti Diosko​—nga agtaltalek kenka.” Inkararag pay ni David: “Isuronak, O Jehova, maipapan iti dalanmo. Magnaakto iti kinapudnom. Pagkaykaysaem ti pusok nga agbuteng iti naganmo.”​—Sal. 86:2, 11.

² No saantayo nga agtalek ken Jehova iti amin a pusotayo, dagiti dadduma a pakaseknan iti biag ken dagiti tattao a nasinged kadatayo mabalin a pakapuyenda ti kinasungdotayo iti pudno a Dios. Dagiti agimbubukodan a tarigagay mayarigda kadagiti naikali a bomba iti dalan a pagpagnaantayo. Uray pay nagtalinaedtayo a matalek ken Jehova iti sidong dagiti narigat a kasasaad, mabalin a matnagtayo kadagiti palab-og wenno silo ni Satanas. Nakapatpateg ngarud a sukayentayo itan ti naimpusuan a kinasungdo ken Jehova sakbay pay a maipasangotayo kadagiti suot wenno sulisog! “Ad-adda ngem iti  isuamin a sabali pay a maaluadan,” kuna ti Biblia, “saluadam ta pusom.” (Prov. 4:23) Mainaig iti dayta a banag, makasursurotayo kadagiti napateg a leksion manipud iti kapadasan ti propeta ti Juda nga imbaon ni Jehova kenni Ari Jeroboam iti Israel.

“Bay-am nga Ikkanka iti Sagut”

3. Ania ti inaramid ni Jeroboam idi impakaammo ti propeta ti Dios ti mensahe ti panangukom?

³ Iladawanmo ti eksena. Kalkalpas nga impakaammo ti mensahero ti Dios ti maysa a nadagsen a mensahe ken Jeroboam, ti ari a nangipasdek iti panagdayaw iti kigaw a baka iti makin-amianan a sangapulo a tribu a pagarian ti Israel. Nakapungtot ti ari. Minandaranna dagiti adipenna a tiliwenda ti mensahero. Ngem saan a binaybay-an ni Jehova ti mensaherona. Dagus a simimilagro a nagango ti ima nga inyunnat ti nakapungtot nga ari ken nagudua ti altar nga us-usarenda iti palso a panagdayaw. Kellaat a nagbaliw ti kababalin ni Jeroboam. Impakaasina iti propeta ti Dios: “Paluknengem, pangngaasim, ti rupa ni Jehova a Diosmo ket agkararagka maigapu kaniak tapno ti imak mapasubli koma kaniak.” Nagkararag ti propeta, ket immimbag ti ima ti ari.​—1 Ar. 13:1-6.

4. (a) Apay a ti tukon ti ari ket maysa a pannubok iti kinasungdo ti propeta? (b) Ania ti inaramid ti propeta?

⁴ Kalpasanna, kinuna ni Jeroboam iti propeta ti pudno a Dios: “Kumuyogka kaniak iti balay ket agtaraonka, ket bay-am nga ikkanka iti sagut.” (1 Ar. 13:7) Ania ti inaramid ti propeta? Inawatna kadi ti sagut ni Jeroboam kalpasan nga impakaammona ti mensahe a mangkondenar iti ari? (Sal. 119:113) Wenno pinagkedkedanna ketdi ti awis ti ari uray agparang a nagbabawin daytoy? Sigurado a kabaelan ni Jeroboam ti mangted iti nangingina a sagut kadagiti gagayyemna. No talaga a tarigagayan ti propeta ti Dios dagiti material a banag, agbalin a dakkel a pakasulisogan kenkuana ti tukon ti ari. Ngem imbilin ni Jehova iti propeta: “Dika mangan iti tinapay wenno uminum iti danum, ket dika agsubli babaen iti dalan a napanam.” Gapuna, sititibker ken silalawag nga insungbat ti propeta iti ari: “Uray itedmo kaniak ti kagudua ti balaymo saanak a kumuyog kenka ken mangan iti tinapay wenno uminum iti danum iti daytoy a lugar.” Iti kasta, ti propeta pimmanaw idiay Bethel babaen iti sabali a dalan. (1 Ar. 13:8-10) Mainaig iti desision ti propeta, ania ti masursurotayo maipapan iti naimpusuan a kinasungdo?​—Roma 15:4.

“Mapnektayon”

5. Kasano a ti materialismo subokenna ti kinasungdotayo?

⁵ Mabalin a kasla awan pakainaigan ti materialismo iti kinasungdotayo. Ngem kinapudnona, subokenna ti kinasungdotayo. Agtalektayo kadi iti kari ni Jehova nga ipaayna dagiti kasapulantayo? (Mat. 6:33; Heb. 13:5) Imbes a dagiti “nasaysayaat” a bambanag a ditay kabaelan a gun-oden ti ikagkagumaantayo a ragpaten, kabaelantayo kadi ti agbiag uray awan dagita? (Basaen ti Filipos 4:11-13.) Magargaritayo kadi a mangisakripisio kadagiti teokratiko a pribilehio tapno laeng magun-odtayo ti kayattayo? Ti kadi nasungdo a panagserbi ken Jehova ti ipangpangrunatayo? Ti sungbattayo kadagita ket agpannuray a nangnangruna iti panagserbitayo iti Dios, no naimpusuan met laeng dayta wenno saan. “Dayta ket panggun-od iti dakkel a gunggona,” insurat ni apostol Pablo, “daytoy nadiosan a debosion agraman iti pannakapnek. Ta awan ti inyegtayo iti lubong, ket saantay met a mabalin ti mangitugot iti aniaman a banag. Gapuna, no adda pagtaraon ken pagkawestayo, mapnektayon kadagitoy a banag.”​—1 Tim. 6:6-8.

6. Ania dagiti agparang a bendision a mabalin a maitukon kadatayo, ken ania ti makatulong kadatayo nga agdesision no awatentayo dagita wenno saan?

⁶ Kas pagarigan, mabalin nga itukon ti amotayo ti nangato a saad nga addaan iti dakdakkel a sueldo ken dadduma pay a benepisio. Wenno nalabit panunotentayo a dakdakkel ti masapulantayo no manggedtayo iti sabali a pagilian wenno lugar. Iti damo, mabalin nga agparang a bendision manipud ken Jehova dagiti kasta a gundaway. Ngem sakbay nga agdesisiontayo, saan ngata a nasaysayaat no sukimatentayo ti motibotayo? Ti koma kangrunaan a pakaseknantayo ket, “Kasano a ti desisionko apektaranna ti relasionko ken Jehova?”

7. Apay a nagpateg nga iwaksi dagiti materialistiko a tarigagay?

⁷ Awan sarday nga itantandudo ti sistema ni  Satanas ti materialismo. (Basaen ti 1 Juan 2:15, 16.) Panggep ti Diablo nga allilawen ti pusotayo. Gapuna, nasken nga alistotayo a mangilasin ken mangiwaksi kadagiti materialistiko a tarigagay ti pusotayo. (Apoc. 3:15-17) Nalaka la a pinagkedkedan ni Jesus ti amin a pagarian ti lubong nga intukon ni Satanas. (Mat. 4:8-10) Impakdaarna: “Pagtalinaedenyo a silulukat dagiti matayo ket agaluadkayo iti tunggal kita ti kinaagum, agsipud ta uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” (Luc. 12:15) No nasungdotayo, agtalektayo ken Jehova imbes nga iti bagitayo.

‘Inallilaw’ ti Lakay a Propeta

8. Kasano a nasubok ti kinasungdo ti propeta ti Dios?

⁸ Saan koma a nairubo ti propeta ti Dios no diretso a nagawid. Nupay kasta, dagus a naipasango iti sabali pay a pannubok. “Ti maysa a lakay a mammadto agnanaed idi idiay Bethel,” kuna ti Biblia, “ket simrek ita ti annakna ket insalaysayda kenkuana” ti amin a napasamak iti dayta nga aldaw. Apaman a nangngegna ti salaysay, impaisagana ti lakay kadagiti annakna ti asno a pagsakayanna tapno kamakamenna ti propeta ti Dios. Di nagbayag, nasarakanna ti propeta nga agin-inana iti sirok ti dakkel a kayo ket kinunana: “Kumuyogka kaniak iti balay ket manganka iti tinapay.” Idi nagkedked ti propeta ti pudno a Dios, kinuna ti lakay a propeta: “Maysaak met a mammadto a kas kenka, ket ti maysa nga anghel nagsao a mismo kaniak babaen iti sao ni Jehova, a kunkunana, ‘Pagsubliem a kumuyog kenka iti balaymo tapno makapangan iti tinapay ken makainum iti danum.’” Ngem kinuna ti Kasuratan: “Isu inallilawna.”​—1 Ar. 13:11-18.

9. Ania ti ibaga ti Biblia maipapan kadagiti manangallilaw, ken siasino ti dangdangranda?

⁹ Aniaman ti mabalin a motibo ti lakay a propeta, kaskasdi nga isu ket nagulbod. Nalabit a sigud a matalek a propeta ni Jehova dayta a lakay. Ngem iti dayta a gundaway, isu ket nagbalin a manangallilaw. Nabatad a kondenaren ti Biblia ti kasta nga aramid. (Basaen ti Proverbio 3:32.) Dagiti manangallilaw saanda laeng a dadaelen ti relasionda iti Dios no di ket masansan a madangranda pay ti sabsabali.

“Nagsubli a Kimmuyog” iti Lakay

10. Ania ti inaramid ti propeta ti Dios idi inawis ti lakay a propeta, ken ania ti nagbanaganna?

¹⁰ Rumbeng a nailasin koma ti propeta ti Juda a mangal-allilaw laeng ti lakay a mammadto. Sinaludsodna koma iti bagina, ‘Apay a sabali a tao ti nangibaonan ni Jehova iti anghelna tapno idanonna kaniak dagiti baro a bilinna?’ Mabalin koma nga inyimtuod ti propeta kenni Jehova no naggapu met laeng kenkuana dayta a bilin, ngem awan ti ipamatmat ti Kasuratan a kasta ti inaramid ti propeta. Imbes ketdi, “nagsubli a kimmuyog [iti lakay] tapno makapangan iti tinapay idiay balayna ken makainum iti danum.”  Saan a naay-ayo ni Jehova iti dayta. Idi agawiden idiay Juda ti naallilaw a propeta, maysa a leon ti nakasarak ken nangpapatay kenkuana. Anian a nakalkaldaang a panagpatingga ti annongenna kas propeta!​—1 Ar. 13:19-25. *

11. Ania ti nasayaat nga ulidan ni Ahias?

¹¹ Iti sabali a bangir, nagtalinaed a matalek agingga iti kinalakayna ni Ahias, ti propeta a naibaon a mangpulot ken Jeroboam kas ari. Idi a bulsek ken lakayen ni Ahias, imbaon ni Jeroboam ti asawana tapno agimtuod ken Ahias maipapan iti kasasaad ti masakit nga anakda. Situtured nga impadto ni Ahias a matay ti anak a lalaki ni Jeroboam. (1 Ar. 14:1-18) Adu a bendision ti inawat ni Ahias. Maysa kadagita ket adda naitulongna iti pannakaisurat ti naipaltiing a Sao ti Dios. Kasano? Inusar ti padi a ni Esdras kas reperensia dagiti sinurat ni Ahias.​—2 Cron. 9:29.

12-14. (a) Ania ti maadaltayo iti napasamak iti ub-ubing a propeta? (b) Iyilustraryo ti kinapateg ti naannad ken nabuyogan iti kararag a panangusig kadagiti naibatay iti Biblia a balakad dagiti panglakayen.

¹² Saan a dinakamat ti Biblia no apay a ti ub-ubing a propeta ket saan a nagkonsulta ken Jehova sakbay a napan nakipangan ken nakiinum iti lakay a propeta. Saan ngata a kayatna met a talaga ti imbaga ti lakay a propeta? Ania ti maadaltayo iti dayta? Masapul a kombinsidotayo a nainkalintegan dagiti kalikagum ni Jehova. Ken masapul a determinadotayo a mangannurot kadagita aniaman ti mapasamak.

¹³ Dadduma ti mangipangag kadagiti balakad a kayatda laeng a mangngeg. Kas pagarigan, ti maysa nga agibumbunannag mabalin a maitukonan iti trabaho a mangibus iti panawen a mabalinna koma a busbosen iti pamiliana ken kadagiti teokratiko nga aktibidad. Nalabit nga agpabalakad iti maysa a panglakayen. Mabalin nga ipakpakauna ti panglakayen a saan nga isu ti mangikeddeng no kasano a suportaran ti agibumbunannag ti pamiliana. Kalpasanna, irepaso kenkuana ti panglakayen no ania dagiti naespirituan a peggad no awatenna ti trabaho a naitukon kenkuana. Ti laeng kadi pakpakauna a komento ti panglakayen ti ikabilangan ti kabsat wenno sipapasnek met nga usigenna ti dadduma pay a naibalakad kenkuana? Masapul a ti kangrunaan a tingitingen ti kabsat ket no ania ti kasayaatan a pagimbaganna iti naespirituan.

¹⁴ Usigenyo ti maysa pay a kasasaad. Mabalin a ti kabsat a babai damagenna iti maysa a panglakayen no rumbeng a makisina iti saan a manamati nga asawana. Awan duadua nga ilawlawag ti panglakayen a ti kabsat a babai ti rumbeng nga agdesision. Kalpasanna, mabalin nga ipalagipna  ti balakad ti Biblia mainaig iti dayta. (1 Cor. 7:10-16) Ikabilangan kadi ti kabsat a babai ti balakad ti panglakayen? Wenno nakapagdesisionen a panawanna ni lakayna sakbay pay a nagpabalakad? Iti panagdesisionna, nainsiriban no usigenna dagiti naibatay iti Biblia a balakad buyogen ti kararag.

Agbalin a Naemma

15. Ania ti maadaltayo iti nagbiddutan ti propeta ti Dios?

¹⁵ Ania pay ti maadaltayo iti nagbiddutan ti propeta ti Juda? Kuna ti Proverbio 3:5: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat.” Imbes a nagtalek ken Jehova a kas iti inar-aramidna iti napalabas, iti dayta a gundaway nagtalek ti propeta ti Juda iti bukodna a pannakaawat. Gapu iti dayta, napukawna ti biagna ken ti nasayaat a naganna iti imatang ti Dios. Ipaganetget ti kapadasanna a napateg ti panagbalin a naemma ken nasungdo bayat nga agserserbitayo ken Jehova.

16, 17. Ania ti makatulong kadatayo nga agtalinaed a nasungdo ken Jehova?

¹⁶ Gapu iti agimbubukodan a pagannayasan ti pusotayo, masansan a maallilawtayo. “Ti puso nagulgulib ngem iti aniaman a banag ket desperado.” (Jer. 17:9) Tapno makapagtalinaedtayo a nasungdo ken Jehova, masapul a sipipinget nga itultuloytayo nga uksoben ti daan a personalidad agraman ti pagannayasantayo nga agpannuray iti bukodtayo a pannakaawat ken agbalin a natangsit. Kasta met, masapul nga ikawestayo ti baro a personalidad a “naparsua maitunos iti pagayatan ti Dios iti pudno a kinalinteg ken kinasungdo.”​—Basaen ti Efeso 4:22-24.

¹⁷ “Ti sirib adda kadagidiay naemma,” kuna ti Proverbio 11:2. Ti sipapakumbaba a panagpannuray ken Jehova tulongannatayo a saan a makaaramid iti serioso a basol. Kas pagarigan, ti pannakaupay nalakana a ballikugen ti panangmatmattayo. (Prov. 24:10) Mabalin a mabannogtayo a makipaset iti dadduma nga aspeto ti sagrado a panagserbi ket mariknatayo nga umdasen ti naaramidantayo iti adun a tawen, a pampanunotentayo a tiempo metten a dagiti dadduma ti mangibaklay iti annongen. Wenno nalabit tarigagayantayo ti ibilang ti kaaduan kas normal a biag. Nupay kasta, masaluadan ti pusotayo no ‘umagawatayo a sipipinget’ ken ‘kankanayon nga aduantayo ti aramiden iti trabaho ti Apo.’​—Luc. 13:24; 1 Cor. 15:58.

18. Ania ti mabalintayo nga aramiden no marigatantayo nga agdesision?

¹⁸ No dadduma, nalabit maipasangotayo kadagiti narigat a desision ken mabalin a saan a nalaka nga ikeddeng no ania ti umiso nga aramiden. Agannayastayo kadi a mangrisut iti dayta iti bukodtayo a pamay-an? Iti aniaman a kasasaad, nainsiriban no agpatulongtayo ken Jehova. Kuna ti Santiago 1:5: “No ti asinoman kadakayo agkurang iti sirib, agtultuloy koma nga agdawat iti Dios, ta isu mangted a sipaparabur kadagiti isuamin.” Ti nailangitan nga Amatayo ipaayna kadatayo ti nasantuan nga espiritu a kasapulantayo tapno makaaramidtayo iti umiso a desision.​—Basaen ti Lucas 11:9, 13.

Determinado nga Agtalinaed a Nasungdo

19, 20. Ania ti determinado nga aramidentayo?

¹⁹ Talaga a nasubok ti kinasungdo dagiti adipen ti Dios bayat dagiti nariribuk a panawen kalpasan ti isisiasi ni Solomon iti pudno a panagdayaw. Pudno nga adu kadakuada ti nakikompromiso, ngem dadduma ti nagtalinaed a nasungdo ken Jehova.

²⁰ Inaldaw a maipaspasangotayo kadagiti pagpilian ken desision a mangsubok iti kinasungdotayo. Mabalintayo met a paneknekan a matalektayo. Agtalinaedtayo koma a nasungdo ken Jehova bayat a naipamaysa ti pusotayo buyogen ti naan-anay a panagtalek nga agtultuloy a bendisionan ni Jehova dagiti nasungdo kenkuana.​—2 Sam. 22:26.

[Footnote]

Ania ti Sungbatyo?

• Apay a pagreggetantayo nga iwaksi dagiti materialistiko a tarigagay iti pusotayo?

• Ania ti makatulong kadatayo nga agtalinaed a nasungdo ken Jehova?

• Kasano a makatulong kadatayo ti kinaemma tapno makapagtalinaedtayo a nasungdo iti Dios?

[Salsaludsod]

[Dagiti Ladawan iti panid 9]

Marigatankayo kadi a mangsaranget kadagiti sulisog?

[Dagiti Ladawan iti panid 10]

Ikabilanganyo kadi dagiti balakad a naibatay iti Biblia buyogen ti kararag?