Sidudungngo nga Ay-aywanan ni Jehova Dagiti Nataenganen nga Adipenna

“Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.”​—HEB. 6:10.

1, 2. (a) Ania ti mapanunotmo no makakitaka iti maysa nga ubanan? (b) Kasano ti panangmatmat ni Jehova kadagiti nataenganen a Kristiano?

ANIA ti mapanunotmo no makitam dagiti ubananen a lallakay ken babbaket iti kongregasion? Malagipmo kadi ti maysa a salaysay iti Daniel a libro iti Biblia? Iti sirmata nga intedna ken Daniel, inladawan ni Jehova a Dios ti bagina kas maysa nga ubanan. Insurat ni Daniel: “Intultuloyko ti kimmita agingga nga adda dagiti naisaad a trono ket nagtugaw ti Kadaanan iti Al-aldaw. Ti pagan-anayna napudaw a kasla niebe, ket ti buok ti ulona kasla nadalus a delana.”​—Dan. 7:9.

² Masansan a puraw ti kolor ti natural wenno nadalus a delana. Gapuna, ti kinaubanan ken ti titulo a “Kadaanan iti Al-aldaw” ipalagipna kadatayo ti di matukod a kapaut dagiti tawtawen ti Dios ken kinasiribna. Dagita ti makagapu nga isu ket maikari iti nauneg a panagraemtayo. Kasano ngarud ti panangmatmat ti Kadaanan iti Al-aldaw a ni Jehova kadagiti matalek a lallakay ken babbaket? Kuna ti Sao ti Dios a “ti kinaubanan ket korona ti kinapintas no masarakan dayta iti dalan ti kinalinteg.” (Prov. 16:31) Wen, no ubananen ti maysa a matalek a Kristiano, ti kasta a langana ket napintas iti imatang ti Dios. Kas ken Jehova met kadi ti panangmatmatmo kadagiti kapammatiantayo a nataenganen?

Apay a Maipatpategda Unay?

3. Apay nga ipatpategtayo unay dagiti nataengan a kapammatiantayo?

³ Karaman kadagita a maipatpateg a nataengan nga ad-adipen ti Dios ket dagiti kameng ti Bagi a Manarawidwid dagiti Saksi ni Jehova, dagiti dati ken agdama nga agdaldaliasat a manangaywan, nareregta a payunir, ken agibumbunannag a lallakay ken babbaket a simamatalek nga agserserbi kadagiti kongregasiontayo. Nalabit nga addada am-ammoyo a dinekdekadan a sireregta a mangikaskasaba iti naimbag a damag a dagiti nasayaat nga ulidanda ti mangparparegta ken mangiwanwanwan kadagiti agkabannuag. Dadduma kadagiti nataengan a kapammatiantayo ti addaan kadagiti nadagsen a responsabilidad ken mangib-ibtur iti pannakaidadanes maigapu iti naimbag a damag. Apresiaren unay ni Jehova ken “ti matalek ken masirib nga adipen” dagiti amin a naitulong ken maitultulongda iti trabaho mainaig iti Pagarian.​—Mat. 24:45.

4. Apay a rumbeng a raemen ken ikararagantayo dagiti nataengan a Kristiano?

⁴ Dagita a matalek a nataengan maikarida iti panagyaman ken panagraem ti dadduma pay nga ad-adipen ni Jehova a Dios. Kinapudnona, ti Linteg ti Dios a naited babaen ken Moises innaigna ti panagbuteng ken Jehova iti panangipakita iti konsiderasion ken panagraem kadagiti nataengan. (Lev. 19:32) Rumbeng a kanayon nga ikararagantayo dagita a matalek a kakabsat ken agyamantayo iti Dios gapu kadagiti naayat a panagbannogda. Inkararagan ni apostol Pablo dagiti patpatgenna a katrabahuan nga agtutubo ken nataengan.​—Basaen ti 1 Tesalonica 1:2, 3.

5. Kasanotayo a mabenepisiaran iti pannakitimpuyogtayo kadagiti nataengan nga agdaydayaw ken Jehova?

⁵ Kanayonanna, ti intero a kongregasion ket mabalin a mabenepisiaran iti pannakitimpuyogda kadagiti nataengan a Kristiano. Babaen iti panagadal, panagpaliiw, ken kapadasanda, dagiti matalek a nataenganen nga agdaydayaw ken Jehova ket nakagun-oden iti nakapatpateg a pannakaammo. Nasursuroda ti aganus ken makipagrikna. Dakkel a rag-o ken pannakapnek ti masagsagrapda gapu ta dagiti nasursuroda ket iyal-allatiwda iti sumaruno a henerasion. (Sal. 71:18) Dakayo nga agkabannuag, agmasiribkayo ken aprobetsarenyo dayta a gubuayan ti pannakaammo a kas man la agsaksakdokayo iti nauneg a bubon.​—Prov. 20:5.

6. Kasano a maipakitam a talaga nga ap-apresiarem dagiti nataengan?

 ⁶ Ipakpakitam kadi kadagiti nataengan nga ipatpategmo ida a kas iti panangipateg ni Jehova kadakuada? Ti maysa a pamay-an tapno maaramidmo dayta ket ti panangibagam kadakuada nga ap-apresiarem dagiti opinionda ken ipatpategmo unay ida gapu iti kinamatalekda. Kanayonanna, no iyap-aplikarmo dagiti nasursurom kadakuada, ipakpakitam a talaga a raraemem ida. Adu a lallakay ken babbaketen a kapammatiantayo ti makalagip kadagiti nainsiriban a balakad nga impaay idi dagiti matalek a nataengan ken no kasano a nagunggonaanda iti unos ti panagbiagda gapu iti panangyaplikarda kadagita. *

Dagiti Praktikal a Pamay-an a Maipakitatayo ti Nadungngo a Panangikabilangan

7. Siasino ti nangipabaklayan ni Jehova iti kangrunaan a responsabilidad a mangaywan kadagiti nataengan?

⁷ Ti nangipabaklayan ti Dios iti kangrunaan a responsabilidad a mangaywan kadagiti nataengan ket kadagiti pamiliada a mismo. (Basaen ti 1 Timoteo 5:4, 8.) Maragsakan ni Jehova no tungpalen dagiti pamilia ti obligasionda kadagiti nataengan a kapamiliada. Iti kasta, ipakpakitada a maseknanda kadagiti nataengan a kas ken Jehova. Tulongan ti Dios dagitoy a pamilia ken bendisionanna ida gapu kadagiti panagregget ken iti amin a sakripisioda. *

8. Apay a rumbeng nga ipakita dagiti kongregasion ti pannakaseknanda kadagiti nataengan a Kristiano?

⁸ Maragsakan met ni Jehova no dagiti lokal a kongregasion tulonganda dagiti matalek a nataengan nga agkasapulan ngem awanan kadagiti manamati a kapamilia wenno awanan iti kapamilia a mayat a mangaywan kadakuada. (1 Tim. 5:3, 5, 9, 10) Iti kasta, ipakpakita dagiti kongregasion nga addaanda iti ‘pannakipagmaymaysa iti rikna, nainkabsatan a panagayat, ken nadungngo a pannakipagrikna’ kadagiti nataengan. (1 Ped. 3:8) Ti pannakaseknanda kadagiti nataengan a kakongregasionda ket nailadawan a naimbag idi impatuldo ni Pablo a no agsagaba ti maysa a paset ti bagi ti tao, “amin dagiti dadduma a kameng agsagabada a mairaman iti dayta.” (1 Cor. 12:26) Ti praktikal ken naasi a pamay-an ti panangasikaso kadagiti nataengan ti mangipakita  iti prinsipio a nakaibasaran daytoy a balakad ni Pablo: “Itultuloyyo nga awiten dagiti pakadagsenan ti maysa ken maysa, ket iti kasta tungpalenyo ti linteg ti Kristo.”​—Gal. 6:2.

9. Ania dagiti pakadagsenan ti maysa a lumakay wenno bumaketen?

⁹ Ania dagiti pakadagsenan ti lallakay ken babbaket? Adu ti nalakan a mabannog. Mabalin a mariknada a didan kabaelan nga aramiden uray dagiti simple a banag a kas iti panagpadoktor, panangasikaso kadagiti babayadan ken sursurat, panagdalus iti balay, ken panangisagana iti taraon. Yantangay saan unayen a naganas ti pannangan dagiti nataengan, mabalin a pagarupenda a saanen a masapul a mangan wenno uminumda iti adu a kas iti maiparbeng a kasapulanda. Mabalin a kasta met laeng iti naespirituan a pannangan. Gapu ta kumapuyen ti panagkita wenno panagdengngegda, marigatandan nga agbasa ken dumngeg bayat dagiti Nakristianuan a gimong, ken mabalin a marigatanda pay ketdin nga agrubbuat a makigimong. Ania ngarud ti mabalin nga aramiden ti dadduma para kadagita a nataengan?

No Kasanokayo a Makatulong

10. Ania ti mabalin nga aramiden dagiti panglakayen tapno masiertoda a maipaayan dagiti nataengan iti praktikal a tulong?

¹⁰ Iti adu a kongregasion, nagsayaat ti pannakaaywan dagiti nataengan. Dagiti naayat a kakabsat tultulonganda ida a makitienda, agluto ken agdalus. Tultulonganda dagiti lallakay ken babbaket nga agadal, agrubbuat a makigimong, ken agtalinaed a regular iti ministerio. Kuykuyogen ken iluglugan ida dagiti agkabannuag a kakabsat. No adda dagiti nataengan a din makapanaw iti pagtaenganda, maikonektarda kadagiti gimong babaen iti telepono, wenno mairekord dagita para kadakuada. Agingga iti mabalin, siertuen dagiti panglakayen a maipatungpal dagiti praktikal nga urnos tapno matulonganda dagiti nataenganen iti kongregasion. *

11. Isalaysayyo no kasano a ti maysa a pamilia ket tinulonganda ti maysa a lakayen a kabsat.

¹¹ Mabalin met nga ipakita ti tunggal Kristiano ti kinamanagpadagus ken kinamanagparabur. Idi nabiudo ti maysa a lakayen a kabsat, dinan kabaelan a bayadan ti abang ti pagnanaedanna a balay gapu ta awanen ti agpempension a baketna. Idi sibibiag pay ni baketna, adda pamilia nga addaan iti dua a babbalasitang nga inyadalanda iti Biblia. Dayta a pamilia ket addaan iti dakkel a balay. Impausarda iti nabiudo a kabsat ti dua a siled ti balayda tapno pagnaedanna. Nagbalin a paset ti pamiliada dayta a lakayen a kabsat, ket iti unos ti 15 a tawen, nagkakaduada kadagiti nararagsak nga aktibidad. Impakitada kenkuana ti nainkabsatan a panagayatda. Nagadu ti nasursuroda gapu iti pammati ken adun a kapadasanna. Uray isu a mismo ket nagunggonaan iti naragsak a pannakitimpuyogna kadakuada. Nakipagnaed kadakuada dayta a lakayen a kabsat agingga iti ipapatayna idi agtawenen iti 89. Agingga ita, dayta a pamilia ket agyamyaman iti Dios gapu iti nasagrapda nga adu a bendision nga imbunga ti pannakikaduada kenkuana. Saan a ‘mapukaw ti gunggonada’ gapu iti panangtulongda iti padada nga adalan ni Jesu-Kristo.​—Mat. 10:42. *

12. Ania ti mabalinmo nga aramiden tapno maipakitam ti nadungngo a panangikabilangam kadagiti kapammatiantayo a lallakay ken babbaket?

¹² Nalabit a saanmo a maaramidan ti kas iti inaramid dayta a pamilia, ngem mabalin a kabaelam a tulongan dagiti nataengan a mapan makigimong ken rummuar iti tay-ak ti ministerio. Mabalinmo met nga awisen ida iti pagtaengam ken ikuyog ida no agpasiarka. Mabalinmo ida a sarungkaran nangruna no masakit wenno naidalitda. Kanayonanna, mabalin ken rumbeng a kanayonmo ida a tratuen kas nataenganen. No la ket ta aktibo pay ti panagpampanunotda, dagiti nataengan a Kristiano ket rumbeng a maikabilangan iti amin a panagaramid iti desision a pakaapektaranda. Madlaw uray dagidiay saan unayen nga aktibo ti panunotda no raraemen ken ikabkabilangan ida dagiti sabsabali.

Saan a Lipaten ni Jehova ti Aramidyo

13. Apay a napateg ti panangikabilangan iti rikna dagiti nataengan a Kristiano?

¹³ Nakapatpateg ti panangikabilangan iti rikna  dagiti nataengan. Gagangay a maupay dagiti nataengan gapu ta didan maaramidan ti amin a dati a kabaelanda nga aramiden idi kabambannuaganda pay laeng. Kas pagarigan, adda baket a sireregta a nagserbi ken Jehova iti agarup 50 a tawen ken nagserbi met kas regular pioneer. Naaddaan iti makapakapuy a sakit isu a marigatan unayen a makigimong. Makasangit idi indiligna ti dati a magapgapuananna iti ministerio ken iti agdama a limitasionna. Nagdumog sa agsangsangit a nangibaga: “Awanen ti maar-aramidak.”

14. Ania a pammaregta ti magun-odan dagiti nataengan nga adipen ni Jehova manipud iti salmo?

¹⁴ No maysakayo a nataenganen, nariknayo met kadin ti kasta? Wenno adda met kadi dagiti tiempo a nariknayo a kasla binaybay-annakayo ni Jehova? Mabalin a kasta met ti narikna ti maysa a salmista idi lumakayen, ta inyararawna ken Jehova: “Saannak nga ibelleng iti tiempo ti kinalakay; inton agkapuyen ti bilegko, saannak a baybay-an. . . . Uray pay agingga iti kinalakay ken kinaubanan, O Dios, saannak a baybay-an.” (Sal. 71:9, 18) Siempre, talaga a saan a binaybay-an ni Jehova ti nangputar iti dayta a salmo, isu a sigurado a dinakay met baybay-an. Iti maysa pay a salmo, inyebkas ni David ti panagtalekna iti pannaranay ti Dios. (Basaen ti Salmo 68:19.) Mainanamayo met a no maysakayo a matalek a nataengan a Kristiano, badangannakayo ni Jehova ken itultuloynakayo nga andingayen iti inaldaw.

15. Ania ti makatulong kadagiti lallakay ken babbaket tapno agtalinaed a positibo ti panangmatmatda?

¹⁵ Kadakayo a lallakay ken babbaket a Saksi ni Jehova, di pulos lipaten ti Dios amin a naaramidan ken ar-aramidenyo agpaay a pakaidayawanna. “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna,” kuna ti Biblia. (Heb. 6:10) Gapuna, diyo koma ipagarup nga awanen ti serserbiyo ken Jehova gapu ta lakay wenno baketkayon. Imbes nga agpanunotkayo kadagiti negatibo ken makapaupay a banag, ikagumaanyo ketdi ti agbalin nga optimistiko ken positibo. Agrag-okayo gapu kadagiti bendision a sagsagrapenyo ken iti namnamayo iti masanguanan! Addaantayo iti kasayaatan pay laeng ‘a masanguanan ken namnama’ ket dayta ti pinatalgedanen ti Namarsua kadatayo. (Jer. 29:11, 12; Ara. 17:31; 1 Tim. 6:19) Utobenyo ti namnamayo iti masanguanan, ikagumaanyo ti agtalinaed a naragsak ken positibo ket diyo pulos tagibassiten ti kinapateg ti kaaddayo iti kongregasion! *

16. Apay a napanunot ti maysa a kabsat a lakay ti agsardeng iti kinapanglakayenna, ngem kasano a pinaregta ti bagi dagiti panglakayen?

¹⁶ Usigenyo ti kapadasan ni Johan nga agtawenen iti 80. Isu a mismo ti mangay-aywan iti baldado itan ngem matalek a baketna a ni Sannie. * Tapno makagimong ni Johan ken makaruar iti tay-ak ti ministerio, agsisinnublat dagiti kakabsat a babbai a mangaywan ken Sannie. Ngem itay nabiit, narikna ni Johan a nganngani mapaksuyanen ken pampanunotenna payen ti agsardeng a panglakayen. Insaludsodna bayat nga agar-arubos dagiti luana: “Adda kadi pay serserbik a panglakayen? Awan met ngaminen ti maitultulongko iti kongregasion.” Impanamnama kenkuana dagiti padana a panglakayen a nakapatpateg dagiti kapadasan ken kapanunotanna. Indagadagda nga itultuloyna latta ti agserbi kas panglakayen nupay limitadon ti maar-aramidanna. Gapu ta naparegta unay, intultuloy ni Johan ti kinapanglakayenna a pakabembendisionan ti kongregasion.

Talaga a Maseknan ni Jehova

17. Ania dagiti ipasigurado ti Biblia kadagiti nataengan a Kristiano?

¹⁷ Ibatad ti Biblia a kabaelan dagiti nataengan nga itultuloy a parang-ayen ti espiritualidadda iti laksid dagiti parikut a kakuykuyog ti panaglakay wenno panagbaket. Kinuna ti salmista: “Dagidiay a naimula iti balay ni Jehova . . . agtultuloydanto pay nga agbarusbos bayat ti kinaubanan, agtultuloydanto a nalukmeg  ken nasalibukag.” (Sal. 92:13, 14) Ni apostol Pablo a mabalin nga addaan idi iti an-annayen ket ‘saan a simmuko uray pay no ti kinataona iti ruar ket kumapkapuy.’​—Basaen ti 2 Corinto 4:16-18.

18. Apay a dagiti nataengan a kapammatiantayo ken dagiti agay-aywan kadakuada ket kasapulanda ti tulongtayo?

¹⁸ Adu a kapadasan iti kaaldawantayo ti mangpaneknek a kabaelan dagiti nataengan ti ‘agtultuloy nga agbarusbos.’ Ngem mabalin a makapaupay dagiti karit nga itden ti panagsakit ken panaglakay wenno panagbaket, uray kadagidiay addaan iti nadungngo ken napasnek a kapamilia a tumultulong kadakuada. Uray met dagiti agay-aywan ket mabalin a mapaksuyan. Pribilehio ken responsabilidad ti kongregasion nga ipakita ti panagayatda kadagiti nataengan ken kadagiti agay-aywan kadakuada. (Gal. 6:10) Ti kasta a tulong ti mangipakita a saantayo laeng nga arigna ibagbaga kadagita a kakabsat nga “aginudo ken agbussogkayo” ngem ditay met ngarud ipapaayan ida iti praktikal a tulong.​—Sant. 2:15-17.

19. Apay a mainanama dagiti matalek a nataenganen a kakabsat nga addaanda iti naraniag a masakbayan?

¹⁹ Mabalin a medio agbalbaliw dagiti aktibidad ti maysa a Kristiano gapu iti panaglakay wenno panagbaketna, ngem saan a pulos nga agbalbaliw ti panagayat ni Jehova kadagiti matalek a nataenganen nga adipenna. Imbes ketdi, amin dagitoy a matalek a Kristiano ket ipatpategna ken dinanto pulos baybay-an ida. (Sal. 37:28; Isa. 46:4) Ni Jehova ti mangsaranay ken mangidalan kadakuada iti unos ti kinalakay wenno kinabaketda.​—Sal. 48:14.

[Footnotes]

Ania ti Sungbatyo?

• Apay nga ibilangtayo a napateg dagiti matalek a nataengan a Kristiano?

• Kasano a maipakitatayo ti nadungngo a panangikabilangan kadagiti lallakay ken babbaket a kapammatiantayo?

• Ania ti makatulong kadagiti nataengan nga adipen ni Jehova tapno maaddaanda iti positibo a panangmatmat?

[Salsaludsod]

[Dagiti Ladawan iti panid 18]

Dagiti nataengan ket ipatpateg unay dagiti kameng ti kongregasion