Dagiti Anghel​—“Espirituda Amin a Maipaay iti Publiko a Panagserbi”

“Saan aya nga espirituda amin a maipaay iti publiko a panagserbi, a naibaon tapno agserbida kadagidiay agtawid iti pannakaisalakan?”​—Heb. 1:14.

1. Apay a makaliwliwa kadatayo ti Mateo 18:10 ken Hebreo 1:14?

BINALLAAGAN ni Jesu-Kristo ti siasinoman a mabalin a mangitibkol kadagiti pasurotna: “Siguraduenyo a dikay umsien ti maysa kadagitoy a babassit; ta ibagak kadakayo a dagiti anghelda sadi langit kanayon a makitada ti rupa ni Amak nga adda sadi langit.” (Mat. 18:10) Iti panangtukoyna kadagiti matalek nga anghel, insurat ni apostol Pablo: “Saan aya nga espirituda amin a maipaay iti publiko a panagserbi, a naibaon tapno agserbida kadagidiay agtawid iti pannakaisalakan?” (Heb. 1:14) Dagiti makaliwliwa a sasao ipatalgedna nga us-usaren ti Dios dagitoy a nailangitan a parsua a tumulong kadagiti tattao. Ania ti kunaen kadatayo ti Biblia maipapan kadagiti anghel? Kasanoda a tumultulong kadatayo? Ania ti maadaltayo kadakuada?

2, 3. Ania ti dadduma nga annongen dagiti nailangitan nga espiritu a parsua?

² Minilmilion dagiti matalek nga anghel idiay langit. Aminda ket “nabileg iti pannakabalin, a mangitungtungpal iti sao” ti Dios. (Sal. 103:20; basaen ti Apocalipsis 5:11.) Dagitoy nga espiritu nga annak ti Dios ket addaanda iti personalidad, kadagiti nadiosan a galad, ken iti wayawaya nga agpili. Nagsayaat ti pannakaorganisarda ken addaanda kadagiti nangato a saad iti urnos ti Dios. Ti arkanghel ket ni Miguel (ti nagan ni Jesus idiay langit). (Dan. 10:13; Jud. 9) Daytoy nga “inauna iti isuamin a parsua” isu “ti Sao” wenno Pannakangiwat ti Dios, ken isu ti inusar ni Jehova a nangaramid iti amin a bambanag.​—Col. 1:15-17; Juan 1:1-3.

³ Dagiti sumaganad iti arkanghel ket dagiti serafin, a mangiwarwaragawag iti kinasanto ni Jehova ken tumultulong iti ilina nga agtalinaed a nadalus iti naespirituan. Adda met dagiti kerubin a mangitantandudo iti kinasoberanona. (Gen. 3:24; Isa. 6:1-3, 6, 7) Dagiti dadduma nga anghel, wenno mensahero, ket nagduduma ti annongenda a mangitungpal iti pagayatan ti Dios.​—Heb. 12:22, 23.

4. Ania ti reaksion dagiti anghel idi naibangon ti daga, ken ania koma ti tinagiragsak ti tattao no siuumiso nga inusar da Adan ken Eva ti wayawayada nga agpili?

⁴ Nagrag-o ti amin nga anghel idi ‘nabangon ti daga’ ken siraragsak nga intungpalda ti annongenda bayat a pinagbalin ni Jehova a pagtaengan ti sangatauan daytoy nagpintas a planeta iti law-ang. (Job 38:4, 7) Nupay “nababbaba bassit  ngem kadagiti anghel,” ti tao ket pinarsua ni Jehova sigun iti ‘ladawanna,’ isu a mayanninaw dagiti tattao ti natan-ok a galad ti Namarsua kadakuada. (Heb. 2:7; Gen. 1:26) No siuumiso nga inusar da Adan ken Eva ti wayawayada nga agpili, tinagiragsakda koma agraman dagiti kaputotanda ti biag iti paraiso a pagtaenganda kas paset ti sapasap a pamilia ni Jehova a buklen dagiti intelihente a parsua.

5, 6. Ania a panagrebelde ti napasamak idiay langit, ken kasano a nagtignay ti Dios?

⁵ Nasdaaw la ketdi dagiti nasantuan nga anghel idi nangrugi ti panagrebelde iti nailangitan a pamilia ti Dios. Maysa kadakuada ti saanen a maragsakan nga agdayaw ken Jehova no di ket tinarigagayanna nga isu ti pagdayawan. Pinagbalinna ti bagina a Satanas (kayatna sawen “Bumusbusor”) babaen ti panangkaritna iti kalintegan ni Jehova nga agturay ken sitatangsit a pinadasna nga ipasdek ti bukodna a turay maibusor iti Dios. Ni Satanas ti umuna a nadakamat iti Biblia a nagulbod. Sinulisogna ti umuna a pagassawaan a makikadua kenkuana nga agrebelde iti naayat a Namarsua kadakuada.​—Gen. 3:4, 5; Juan 8:44.

⁶ Dagus a sinentensiaan ni Jehova ni Satanas sigun iti indeklarana nga umuna a padto iti Biblia: “Mangikabilakto ti panagginnura iti nagbaetanyo iti babai ken iti nagbaetan ti bin-im ken ti bin-ina. Dunorennakanto iti ulo ket dunoremto iti mukod.” (Gen. 3:15) Agtultuloyto ti panagginnura ni Satanas ken ti “babai” a kukua ti Dios. Wen, minatmatan ni Jehova ti nailangitan nga organisasion dagiti matalek nga espiritu a parsua kas dungdungnguenna nga asawa a naisinggalut Kenkuana. Nangipaay daytoy a padto iti sigurado a pangibatayan iti namnama, nupay nagtalinaed a “sagrado a palimed” dagiti detalye nga in-inut a naipalgak iti panaglabas ti tiempo. Pinanggep ti Dios a maysa kadagiti nailangitan a paset ti organisasionna ti mangdadaelto iti amin a rebelde ken babaen kenkuana, mapagkaykaysanto “ti bambanag iti langlangit ken ti bambanag iti daga.”​—Efe. 1:8-10.

7. Ania ti inaramid ti dadduma nga anghel idi kaaldawan ni Noe, ken ania ti nagbanaganda?

⁷ Idi kaaldawan ni Noe, pinanawan ti adu nga anghel ti ‘umiso a lugar a pagnaedanda’ ken pinagbalinda ti bagbagida a tattao tapno mapennekda ti agimbubukodan a tarigagayda ditoy daga. (Jud. 6; Gen. 6:1-4) Intapuak ni Jehova dagidiay a rebelde iti napuskol a kinasipnget. Nakikapponda ngarud ken Satanas ket nagbalinda a “nadangkes nga espiritu a puersa” ken napeggad a kabusor dagiti adipen ti Dios.​—Efe. 6:11-13; 2 Ped. 2:4.

Kasano a Tumultulong Dagiti Anghel Kadatayo?

8, 9. Kasano nga inusar ni Jehova dagiti anghel tapno matulongan dagiti tattao?

⁸ Karaman kadagiti tinulongan dagiti anghel ket da Abraham, Jacob, Moises, Josue, Isaias, Daniel, Jesus, Pedro, Juan, ken Pablo. Imbanag dagiti nalinteg nga anghel ti panangukom ti Dios ken impakaammoda dagiti padto ken panangiwanwanna, agraman ti Mosaiko a Linteg. (2 Ar. 19:35; Dan. 10:5, 11, 14; Ara. 7:53; Apoc. 1:1) Yantangay addaantayon iti kompleto a Sao ti Dios, mabalin a saanen a kasapulan nga ipakaammo dagiti anghel ti mensahe ti Dios. (2 Tim. 3:16, 17) Ngem nupay ditay ida makitkita, okupado dagiti anghel a mangitungtungpal iti pagayatan ti Dios ken tumultulong kadagiti adipenna.

⁹ Ipanamnama ti Biblia kadatayo: “Ti anghel ni Jehova agpakpakarso iti intero nga aglikmut dagidiay agbuteng kenkuana, ket alawenna ida.” (Sal. 34:7; 91:11) Gapu iti isyu ti kinatarnaw, palpalubosan ni Jehova ni Satanas a mangyeg kadatayo iti amin a kita ti pakasuotan. (Luc. 21:16-19) Nupay kasta, ammo ti Dios no kaano a ti panagibturtayo ket umdasen a mangpaneknek iti kinatarnawtayo kenkuana. (Basaen ti 1 Corinto 10:13.) Kanayon a nakasagana dagiti anghel a bumallaet sigun iti pagayatan ti Dios. Inispalda da Sidrac, Mesac, Abednego, Daniel, ken ni Pedro ngem saanda a linapdan ti pannakapapatay da Esteban ken Santiago. (Dan. 3:17, 18, 28; 6:22; Ara. 7:59, 60; 12:1-3, 7, 11) Nagduduma dagiti isyu ken kasasaad. Umasping iti dayta, dadduma a kakabsattayo ti napapatay iti kampo a pagbaludan dagiti Nazi, idinto ta kaaduan kadakuada ti tinulongan ni Jehova tapno makalasat.

10. Malaksid iti panangusarna kadagiti anghel, ania pay dagiti pamay-an a tulongannatayo ni Jehova?

¹⁰ Saan nga isursuro ti Biblia nga addaan ti  tunggal tao ditoy daga iti anghel de la guardia. Ngem ikarkararagtayo iti Dios buyogen ti panagtalek nga “uray ania ti dawatentayo maitunos iti pagayatanna, denggennatayo.” (1 Juan 5:14) Siempre, kabaelan ni Jehova ti mangibaon iti anghel a tumulong kadatayo, ngem mabalinna ti tumulong iti sabali a pamay-an. Mabalin a tignayenna dagiti padatayo a Kristiano a tumulong wenno mangliwliwa kadatayo. Mabalin a mangted ti Dios iti sirib ken bileg tapno mapagballigiantayo ti “siit iti lasag” a sagsagabaentayo a kas man la tungpa ti “maysa nga anghel ni Satanas.”​—2 Cor. 12:7-10; 1 Tes. 5:14.

Tuladenyo ni Jesus

11. Kasano a nausar dagiti anghel a tumulong ken Jesus, ken ania ti nagapuananna babaen ti panagtalinaedna a matalek iti Dios?

¹¹ Usigentayo no kasano a ni Jehova tinulonganna ni Jesus babaen kadagiti anghel. Impakaammoda ti pannakayanak ken panagungar ni Jesus ken nagserbida kenkuana idi adda ditoy daga. Mabalin koma a nalapdan dagiti anghel ti pannakaarestona ken ti naulpit nga ipapatayna. Ngem naibaon ketdi ti maysa nga anghel a nangpabileg kenkuana. (Mat. 28:5, 6; Luc. 2:8-11; 22:43) Maitunos iti panggep ni Jehova, natay ni Jesus kas maysa a sakripisio ket pinaneknekanna a kabaelan ti maysa a perpekto a tao a salimetmetan ti kinatarnawna uray masubok agingga ken patay. Gapuna, ni Jehova pinagungarna ni Jesus kas imortal a parsua idiay langit, ken intedna “amin nga autoridad” kenkuana agraman ti panangiturayna kadagiti anghel. (Mat. 28:18; Ara. 2:32; 1 Ped. 3:22) Pinaneknekan ngarud ni Jesus nga isu ti kangrunaan a paset ti “bin-i” ti “babai” a kukua ti Dios.​—Gen. 3:15; Gal. 3:16.

12. Kasano a matuladtayo ti kinasimbeng ni Jesus?

¹² Ammo ni Jesus a di umiso a subokenna ni Jehova. Saanna nga ekspektaren nga umarayat kenkuana dagiti anghel no agpeggad ti biagna gapu iti dina panagannad. (Basaen ti Mateo 4:5-7.) Kas ken Jesus, agbiagtayo koma buyogen ti “kinasimbeng ti panunot,” a ditay gagaraen a pagpeggaden ti biagtayo, ngem determinadotayo a sumango iti panangidadanes no kasapulan.​—Tito 2:12.

No Ania ti Maadaltayo Kadagiti Matalek nga Anghel

13. Ania ti maadaltayo iti ulidan dagiti nalinteg nga anghel a nadakamat iti 2 Pedro 2:9-11?

¹³ Iti panangtubngarna kadagiti “agsao a sibabassawang” kadagiti napulotan nga adipen ni Jehova, impatuldo ni apostol Pedro ti nagsayaat nga ulidan dagiti nalinteg nga anghel. ‘Gapu iti panagraemda ken Jehova,’ sipapakumbaba a liniklikan dagiti anghel ti mangpabasol kas uk-ukom, nupay addaanda iti dakkel a pannakabalin. (Basaen ti 2 Pedro 2:9-11.) Liklikantayo met koma ti mangukom, raementayo dagiti nadutokan a manangaywan iti kongregasion, ken bay-antayo a ni Jehova, ti Kangatuan nga Ukom, ti mangtaming kadagiti bambanag.​—Roma 12:18, 19; Heb. 13:17.

14. Ania a napakumbaba a panagserbi ti impakita dagiti anghel?

¹⁴ Nagsayaat ti inyulidan kadatayo dagiti anghel ni Jehova no maipapan iti napakumbaba a panagserbi. Dadduma nga anghel saanda nga impakaammo ti naganda kadagiti tattao. (Gen. 32:29; Uk. 13:17, 18) Nupay dinakamat ti Biblia ti  nagan da Miguel ken Gabriel, saanna nga impalgak ti nagan ti minilmilion a dadduma nga espiritu a parsua idiay langit. Maysa dayta a panggapuantayo tapno liklikantayo ti mangipaay iti di umiso a pammadayaw kadagiti anghel. (Luc. 1:26; Apoc. 12:7) Idi nagrukbab ni apostol Juan tapno agdayaw iti anghel, nabagbagaan: “Agannadka! Dika aramiden dayta! Maysaak laeng nga adipen a padam ken pada ti kakabsatmo.” (Apoc. 22:8, 9) Rumbeng a ti laeng Dios ti pagdayawan ken pagkararagantayo.​—Basaen ti Mateo 4:8-10.

15. Kasano a nangipakita dagiti anghel iti ulidan ti kinaanus?

¹⁵ Nangipakita met dagiti anghel iti ulidan no maipapan iti kinaanus. Nupay tartarigagayanda a maammuan ti sagrado a palimed ti Dios, saanda nga ammo ti amin maipapan iti dayta. “Dagitoy met laeng a banag ti tartarigagayan dagiti anghel a matmatan,” kuna ti Biblia. (1 Ped. 1:12) Ania ngarud ti aramidenda? Siaanus nga agur-urayda iti maitutop a tiempo agingga nga ‘ipakaammo ti Dios ti nagduduma a siribna babaen ti kongregasion.’​—Efe. 3:10, 11.

16. Ania ti epektona kadagiti anghel ti konduktatayo?

¹⁶ Para kadagiti anghel, dagiti Kristiano a masubsubok kayariganda dagiti ‘bubuyaen iti teatro.’ (1 Cor. 4:9) Maragragsakan dagiti anghel no makitada ti kinamatalektayo ken agrag-oda no agbabawi ti uray maysa laeng a managbasol. (Luc. 15:10) Makitkita dagiti anghel ti nadiosan a kondukta dagiti Kristiano a babbai. Kunaen ti Biblia a “ti babai rebbeng a maaddaan iti pagilasinan ti kinaturay iti rabaw ti ulona gapu kadagiti anghel.” (1 Cor. 11:3, 10) Wen, pakaragsakan dagiti anghel a makita dagiti Kristiano a babbai ken amin nga adipen ti Dios ditoy daga a sumursurot iti nateokratikuan nga urnos ken kinaulo. Ti kasta a panagtulnog ket agserbi a pammalagip kadagiti nailangitan nga annak ti Dios.

Aktibo a Tumultulong Dagiti Anghel iti Trabaho a Panangasaba

17, 18. Apay a maikunatayo a tumultulong dagiti anghel iti panangasabatayo?

¹⁷ Nairaman dagiti anghel iti dadduma a napateg a pasamak “iti aldaw ti Apo.” Ramanen dayta ti pannakaipasdek ti Pagarian idi 1914 ken ti pannakaitapuak ni Satanas agraman dagiti demoniona manipud langit babaen ken “ni Miguel ken dagiti anghelna.” (Apoc. 1:10; 11:15; 12:5-9) Nakakita ni apostol Juan iti “anghel nga agtaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnanaed iti  daga.” Indagadag ti anghel: “Agbutengkayo iti Dios ket idayawyo, agsipud ta dimtengen ti oras ti panangukomna, ket ngarud agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.” (Apoc. 14:6, 7) Dagiti adipen ni Jehova manamnamada ngarud ti suporta dagiti anghel bayat nga ikaskasabada ti naimbag a damag ti naipasdeken a Pagarian iti laksid ti nakaro nga ibubusor ti Diablo.​—Apoc. 12:13, 17.

¹⁸ Ita, saandatayo nga iturong dagiti anghel kadagiti napudno ti panagpuspusona a tattao babaen ti pannakisaritada kadatayo a kas iti pannakisarita ti maysa nga anghel ken Felipe ken panangiturongna kenkuana iti eunuko nga Etiope. (Ara. 8:26-29) Kaskasdi, adu dagiti kapadasan iti kaaldawantayo a mangpaneknek a nupay ditay makita dagiti anghel, tumultulongda iti trabahotayo a panangikasaba iti Pagarian ken iturturongdatayo kadagiti “siuumiso nga agannayas iti agnanayon a biag.” * (Ara. 13:48) Anian a nakapatpateg a regular a makiramantayo iti ministerio tapno maaramidtayo ti pasettayo a mangsapul kadagiti agtarigagay nga ‘agdayaw iti Ama buyogen ti espiritu ken kinapudno’!​—Juan 4:23, 24.

19, 20. Ania ti paset dagiti anghel kadagiti pasamak a mangtanda iti “panungpalan ti sistema ti bambanag”?

¹⁹ Maipapan iti kaaldawantayo, kinuna ni Jesus nga iti “panungpalan ti sistema ti bambanag,” dagiti anghel “ilasinda dagiti nadangkes manipud kadagiti nalinteg.” (Mat. 13:37-43, 49) Adda paset dagiti anghel iti maudi a panangurnong ken panangselio kadagiti napulotan. (Basaen ti Mateo 24:31; Apoc. 7:1-3) Kanayonanna, kaduanto ni Jesus dagiti anghel inton “ilasinna dagiti karnero manipud kadagiti kalding.”​—Mat. 25:31-33, 46.

²⁰ “Iti pannakaipanayag ni Apo Jesus manipud langit a kadua dagiti mannakabalin nga anghelna,” madadaelto amin ‘dagidiay saan a makaammo iti Dios ken dagidiay saan nga agtulnog iti naimbag a damag maipapan ken Apotayo a Jesus.’ (2 Tes. 1:6-10) Idi nasirmata ni Juan dayta a pasamak, dineskribirna ni Jesus ken dagiti nailangitan a buyot dagiti anghel a sisasakay kadagiti puraw a kabalio tapno makigubatda buyogen ti kinalinteg.​—Apoc. 19:11-14.

21. Ania ti aramidento ti anghel “nga addaan iti tulbek ti mangliwengliweng ken maysa a dakkel a kawar iti imana” maibusor ken Satanas ken kadagiti demoniona?

²¹ Nakita pay ni Juan ti “maysa nga anghel a bumabbaba manipud langit nga addaan iti tulbek ti mangliwengliweng ken maysa a dakkel a kawar iti imana.” Awan sabali a tuktukoyen daytoy no di ni Miguel nga arkanghel, a mangparaut ken mangigarangugong iti Diablo​—agraman kadagiti demonio​—iti mangliwengliweng nga abut. Maluk-atandanto iti apagbiit apaman a maturpos ti Sangaribu a Tawen a Panagturay ni Kristo, inton maipasango ti sangatauan iti maudi a pannubok. Kalpasanna, madadaelto ni Satanas ken ti amin a dadduma a rebelde. (Apoc. 20:1-3, 7-10; 1 Juan 3:8) Agpatingganton ti amin a panagrebelde iti Dios.

22. Kasano a nairaman dagiti anghel iti asidegen a mapasamak, ken ania ti rumbeng a riknatayo maipapan iti akemda?

²² Dandanin ti pannakaispaltayo iti dakes a sistema ni Satanas. Addanto masinunuo a paset dagiti anghel kadagitoy a nagpateg a pasamak a mangalangon iti kinasoberano ni Jehova ken mangyeg iti naan-anay a kaitungpalan ti panggepna agpaay iti daga ken iti sangatauan. Talaga a dagiti nalinteg nga anghel ket “espirituda a maipaay iti publiko a panagserbi a naibaon tapno agserbida kadagidiay agtawidto iti pannakaisalakan.” Agyamantayo ngarud ken Jehova a Dios iti pamay-an a panangusarna kadagiti anghel a tumulong kadatayo a mangaramid iti pagayatanna ken manggun-od iti biag nga agnanayon.

[Footnote]

Ania ti Sungbatyo?

• Kasano a naorganisar dagiti espiritu a parsua idiay langit?

• Ania ti inaramid ti dadduma nga anghel idi kaaldawan ni Noe?

• Kasano nga inusar ti Dios dagiti anghel a tumulong kadatayo?

• Ania ti akem dagiti nalinteg nga anghel iti kaaldawantayo?

[Salsaludsod]

[Ladawan iti panid 21]

Pagrag-oan dagiti anghel nga itungpal ti pagayatan ti Dios

[Ladawan iti panid 23]

Kas iti panangsalaknibda ken Daniel, kanayon a nakasagana dagiti anghel a tumulong maitunos iti pagayatan ti Dios

[Dagiti Ladawan iti panid 24]

Agbalinkayo a natured ta supsuportaran dagiti anghel ti trabaho a panangikasaba iti Pagarian!

[Credit Line]

Globe: Rinetrato ti NASA