“Tiempo ti Panagulimek”

KUNA ti maysa a nagkauna a proverbio iti Daya a ti panagsao mayarig iti pirak, ken ti panagulimek mayarig iti balitok. Iti Brewer’s Dictionary of Phrase and Fable, kuna ti katupagna a pagsasao iti Hebreo: “No maysa a siklo ti gatad ti maysa a sao, dua a siklo ti gatad ti panagulimek.” Insurat met ni masirib nga Ari Solomon iti nagkauna nga Israel: “Iti tunggal banag adda naituding a tiempo, ti mismo a tiempo iti tunggal aramid iti baba ti langlangit . . . tiempo ti panagulimek ken tiempo ti panagsao.”​—Ecl. 3:1, 7.

Kaano ngarud ti maitutop a tiempo ti panagulimek? Kadagiti pinanid ti Biblia, masansan nga agparang dagiti sasao a “naulimek” ken “panagulimek.” Ipakita ti konteksto a nakausaran dagitoy a sasao nga umiso ti panagulimek iti di kumurang a tallo nga aspeto ti panagbiag. Usigentayo a naimbag ti panagulimek kas tanda ti panagraem, kas pammaneknek ti kinamasirib ken abilidad a mangilasin, ken kas makatulong iti panagmennamenna.

Tanda ti Panagraem

Ti panagulimek ket tanda ti panagraem wenno panangpadayaw. Kinuna ni mammadto a Habakuk: “Ni Jehova adda iti nasantuan a templona. Agulimekkayo iti sanguananna, intero a daga!” (Hab. 2:20) Dagiti pudno nga agdaydayaw masapul nga ‘agurayda, uray siuulimek, iti panangisalakan ni Jehova.’ (Un. 3:26) Inkanta ti salmista: “Agulimekka iti sanguanan ni Jehova ket agurayka a sigagagar kenkuana. Dika agpudpudot iti asinoman a mamagbalballigi iti dalanna.”​—Sal. 37:7.

Maidayawtayo kadi ni Jehova uray ditay agsasao? Bueno, saan kadi nga agamangatayo no dadduma no buybuyaentayo ti kinapintas ti panamarsua nga uray la a ditay makapagsao? Saan kadi a ti panangpampanunot iti kasta a kinadaeg ket maysa a wagas ti naimpusuan a panangidayaw iti Namarsua kadatayo? Inrugi ni salmista David ti maysa kadagiti kantana a kunkunana: “Kenka adda pannakaidaydayaw​—kinaulimek​—,O Dios, iti Sion; ket kenka maitungpalto ti kari.”​—Sal. 65:1.

No maikari ni Jehova iti panagraemtayo, rumbeng met a raementayo dagiti sasaona. Kas pagarigan, idi a ni Moises a mammadto ti Dios nagpalawag kas pammakada iti nasion ti Israel, isu ken dagiti papadi indagadagda kadagiti  amin a naummong: “Agulimekka . . . , ket masapul nga umimdengka iti timek ni Jehova a Diosmo.” Naikalikagum ti napasnek a panagimdeng uray kadagiti ubbing nga Israelita no agtataripnong dagiti annak ni Israel tapno dumngeg iti pannakaibasa ti Linteg ti Dios. “Ummongem dagiti umili,” kinuna ni Moises, “ti lallaki ken ti babbai ken dagidiay ubbing . . . tapno makasursuroda.”​—Deut. 27:9, 10; 31:11, 12.

Maitutop ngarud a dagiti agdaydayaw ken Jehova iti kaaldawantayo umimdengda buyogen ti panagraem kadagiti instruksion a maipapaay kadagiti Nakristianuan a panagtataripnong, agraman kadagiti dadakkel a kombension. Bayat a maipalpalawag iti plataporma dagiti napapateg a kinapudno iti Biblia, saan aya a kinaawan panagraem iti Sao ti Dios ken iti organisasionna no agtutungtongtayo nga awan ti napateg a makagapu? Dagiti sesion ket tiempo ti panagulimek ken panagimdeng.

Uray iti pribado a pannakisarita, tanda ti panagraem ti panagimdengtayo a naimbag. Kas pagarigan, kinuna ni patriarka a Job kadagiti mangak-akusar kenkuana: “Isurodak, ket siak, iti biangko, . . . agulimekakto.” Situtulok a nagimdeng ni Job idi nagsaoda. Ken idi batangnan ti agsao, kiniddawna: “Agulimekkayo iti sanguanak, tapno siak makapagsaoak.”​—Job 6:24; 13:13.

Pammaneknek iti Kinamasirib ken Abilidad a Mangilasin

Kuna ti Biblia: “Daydiay mangmedmed kadagiti bibigna agtigtignay a simamasirib.” “Ti tao nga addaan nalawa a panangilasin isu daydiay agtalinaed a siuulimek.” (Prov. 10:19; 11:12) Usigem ti nagsayaat a panangiparangarang ni Jesus iti kinamasirib ken abilidadna a mangilasin babaen iti panagulimekna. “Ni Jesus nagtalinaed a siuulimek” idi nailasinna nga awan ti mamaay ti pannakirinnasonna kadagiti bumusbusor kenkuana. (Mat. 26:63) Kalpasanna, idi naisaklang ni Jesus ken Pilato, “awan ti insungbatna.” Siaannad a binay-anna a ti nagapuananna iti publiko ti agsao para kenkuana.​—Mat. 27:11-14.

Masiribtayo met no agulimektayo, nangruna no adda mangrurod kadatayo. Kuna ti maysa a proverbio: “Daydiay nabannayat nga agunget naruay iti panangilasin, ngem ti maysa a di makaanus itantan-okna ti kinamaag.” (Prov. 14:29) No sumungbattayo a dagus gapu ta marurodtayo, mabalin a makaisawangtayo iti sasao a pagbabawyantayto. No kasta ti mapasamak, mabalin nga agparang a kinamaag dagiti sasaotayo, ket saanton a natalna ti panunottayo.

Tanda ti kinamasirib ti panagannad iti ibagbagatayo no maipasangotayo kadagiti nadangkes. No maipasangotayo kadagiti managuyaw iti ministeriotayo, nalabit a nasaysayaat no agulimektayo. Maysa pay, no adda naalas wenno dakes a sawen dagiti kaeskuelaan wenno katrabahuantayo, saan aya a nainsiriban no dadduma nga agulimektayo tapno dida ipagarup a kumankanunongtayo kadakuada? (Efe. 5:3) “Mangisaadakto iti busal kas agaywan iti bukodko a ngiwat,” insurat ti salmista, “bayat nga adda iti sanguanak ti asinoman a nadangkes.”​—Sal. 39:1.

 Ti tao nga addaan iti “nalawa a panangilasin” dina ipalgak ti palimed. (Prov. 11:12) Ti pudno a Kristiano dina koma ipalgak dagiti kompidensial a bambanag babaen ti di naannad a panagsasao. Dagiti Kristiano a panglakayen ti nasken a nangnangruna nga agannad tapno mataginayonda ti panagtalek dagiti kameng ti kongregasion.

Adda positibo nga epekto ti panagulimek. Ti Ingles a mannurat idi maika-19 a siglo a ni Sydney Smith, kinunana maipapan iti maysa kadagiti kapanawenanna: “Makaay-ayo ti makisarita kenkuana gapu ta ammona ti agulimek no dadduma.” Gapuna, iti inaldaw a panagsarita ti aggayyem, addaanda koma a dua iti gundaway nga agsao. Ti nalaing a makisarita nasken a nalaing met nga agimdeng.

Impakdaar ni Solomon: “Iti kinaruay ti sasao saan a maaw-awan ti salungasing, ngem daydiay mangmedmed kadagiti bibigna agtigtignay a simamasirib.” (Prov. 10:19) Gapuna, no manmano nga agsaotayo, manmano met a makaisawangtayo kadagiti di nainsiriban a sasao. Kinapudnona, ‘uray ti asinoman a maag, no agtalinaed a siuulimek, maibilangto a masirib; ti asinoman a mangikaem kadagiti bibigna, kas addaan iti pannakaawat.’ (Prov. 17:28) Ngarud, ikararagtayo koma ken Jehova a ‘mangisaad iti agsiput iti ruangan dagiti bibigtayo.’​—Sal. 141:3.

Makatulong iti Panagmennamenna

Ibaga ti Kasuratan kadatayo mainaig iti tao a mangan-annurot iti dalan ti kinalinteg nga “iti linteg [ti Dios] agbasa iti nababa a timek iti aldaw ken rabii.” (Sal. 1:2) Kuna Ti Baro a Naimbag a Damag Biblia: “Ti Linteg ni Yahweh; aldaw-rabii a basbasaen ken ut-utobenna.” Kaano ti kasayaatan a gundaway a panagutob wenno panagmennamenna?

Ti anak ni patriarka Abraham a ni Isaac “rimmuar a nagpagnapagna tapno agmennamenna idiay tay-ak iti agarup sarsardam.” (Gen. 24:63) Pinilina ti naulimek a lugar ken tiempo tapno agmennamenna. Nagmennamenna ni Ari David bayat dagiti panagbantayna iti rabii. (Sal. 63:6) Iti kabambantayan, disierto, ken dadduma a langalang a lugar, inkagumaan ti perpekto a tao a ni Jesus ti nangbirok iti gundaway nga agmaymaysa ken agmennamenna.​—Mat. 14:23; Luc. 4:42; 5:16.

Di mailibak dagiti pagimbagan ti kinaulimek. Mangipaay dayta iti nagsayaat a gundaway tapno masukimattayo ti bagitayo​—banag a kasapulan tapno rumang-aytayo. Makatulong ti kinaulimek tapno maaddaantayo iti natalna a panunot. Ti panagmennamenna kabayatan dagiti naulimek a gundaway, tulongannatayo a mangpatanor iti kinaemma ken kinapakumbaba. Maparang-ayna met ti panangapresiartayo kadagiti talaga a napateg a bambanag.

Nupay nasayaat ti agulimek, adda met “tiempo ti panagsao.” (Ecl. 3:7) Dagiti pudno a managdaydayaw iti kaaldawantayo okupadoda a mangikaskasaba iti naimbag a damag iti Pagarian ti Dios “iti intero a mapagnaedan a daga.” (Mat. 24:14) Pumigpigsa ti naragsak nga ariwawada bayat nga umad-adu ti bilangda. (Mik. 2:12) Gapuna, karamantayo koma kadagidiay naregta a mangiwarwaragawag iti naimbag a damag ti Pagarian ken mangisarsarita kadagiti nakaskasdaaw nga aramid ti Dios. Bayat a makiramramantayo iti daytoy nagpateg a trabaho, iparangarang koma ti panagbiagtayo a sipapanunottayo nga adda dagiti gundaway a ti panagulimek ket kas kapateg ti balitok.

[Ladawan iti panid 3]

Kabayatan dagiti Nakristianuan a gimong, rumbeng nga agimdeng ken agsursurotayo

[Ladawan iti panid 4]

Mabalin a nasaysayaat ti agulimek no pagsasawandatayo bayat ti panangasabatayo

[Ladawan iti panid 5]

Makapagmennamennatayo no naulimek