No Kasano a Masarakan ti Rag-o iti Sagut a Kinaawan Asawa

“NAGKASARDA ket nagbiagda a siraragsak sipud idi.” Kasta ti pagnguduan ti adu nga estoria para kadagiti ubbing. Masansan a kasta met ti mensahe dagiti romantiko a pabuya ken nobela​—a nasken a mangasawaka tapno agbalinka a pudpudno a naragsak! Kanayonanna, iti kaaduan a kultura, maipagpaganetget unay ti panagasawa dagiti naganus pay nga adulto. “Iparparikna kenka dagiti tattao a ti panagasawa ti kakaisuna a kalat dagiti babbai,” kinuna ni Debby idi agtawen iti 25. “Pagparangenda a ti panagasawa ti pangrugian ti naragsak a biag.”

Saan a kasta ti kapanunotan ti maysa a tao a makatarus iti panangmatmat ni Jehova. Nupay gagangay idi kadagiti Israelita ti panagasawa, adda dagidiay awanan asawa a lallaki ken babbai a dinakamat ti Biblia a makagunggona unay ti biagda. Iti kaaldawantayo, adda dagiti Kristiano a kaykayatda ti agbiag nga awanan asawa, bayat a dadduma ti agtalinaed nga awanan asawa gapu iti kasasaad. Aniaman ti rason a saanda a nagasawa, napateg pay latta a mausig daytoy a saludsod: Kasano nga agballigi ti maysa a Kristiano uray no awanan iti asawa?

Ni Jesus a mismo ket saan a nangasawa, ket nalawag a maawatantayo dayta gapu iti naipaannong kenkuana. Imbagana kadagiti adalanna nga ‘iwayaanto’ met ti dadduma a pasurotna ti kinaawan asawa. (Mat. 19:10-12) Imparangarang ngarud ni Jesus a tapno agballigitayo iti kinaawan asawa, nasken nga awaten wenno iwayaantayo ti kasta a wagas ti panagbiag iti isip ken pusotayo.

Ti kadi balakad ni Jesus agaplikar laeng iti maysa a nangeddeng a saan a mangasawa iti intero a panagbiagna tapno maipamaysana ti agserbi iti Dios? (1 Cor. 7:34, 35) Saan. Usigenyo ti kasasaad ti maysa a Kristiano a kayatna ti makiasawa ngem awan pay ti makitana a maitutop kenkuana. Kinuna ni Ana, maysa a kabsat a balasang nga agtawenen iti nasurok 30: “Iti nabiit pay, naklaatak idi kiddawen ti di Saksi a katrabahuak nga agkasarkami. Kasla maayatanak, ngem dagus a sinarangetko dayta a riknak agsipud ta ti kayatko a pakiasawaan ket daydiay laeng makatulong kaniak nga ad-adda a suminged ken Jehova.”

Ti tarigagay a makiasawa laeng mayalubog “iti Apo” ket nakatulong iti adu a kakabsat a babbai a kas ken Ana tapno maliklikanda ti makiasawa iti di manamati. a (1 Cor. 7:39; 2 Cor. 6:14) Gapu iti balakad ti Dios, inkeddengda ti agtalinaed nga awanan asawa iti sumagmamano a tiempo. Kasano a maaramidda dayta a sibaballigi?

Bigbigenyo Dagiti Pagimbagan ti Kinaawan Asawa

Ti kababalintayo ket makatulong kadatayo a mangawat iti maysa a kasasaad, uray no saan a dayta ti kayattayo. “Tagiragsakek ti adda kaniak, ken diak arapaapen ti awan kaniak,” kuna ni Carmen, maysa a kabsat a balasang nga agtawen iti nasurok nga 40. Siempre, addada gundaway a malidayan wenno maupaytayo. Ngem ti pannakaammo a mapaspasaran met dayta ti adu a kakabsat iti sangalubongan a timpuyog ti mangparegta kadatayo nga agtultuloy buyogen ti panagtalek. Adun ti natulongan ni  Jehova nga agballigi iti kinaawan asawa ken mangdaer iti dadduma a pakarigatan.​—1 Ped. 5:9, 10.

Adu a Kristiano a kakabsat a lallaki ken babbai ti nakapaneknek iti pagimbagan ti kinaawan asawa. “Panagkunak, maaddaantayo iti rag-o no masursurotayo a tagiragsaken dagiti pagimbagan ti aniaman a kasasaadtayo,” kuna ni Ester, maysa a kabsat a balasang nga agtawen iti 35. Innayon ni Carmen, “Mamatiak a kasadoak man wenno saan, awan ti aniaman a naimbag nga ipaidam ni Jehova kaniak no iyun-unak ti interes ti Pagarianna.” (Sal. 84:11) “Mabalin a saan a kas iti pinanggepko ti pagtungpalan ti biagko, ngem naragsakak ket agtultuloy a kasta.”

Dagiti Di Naasawaan a Nadakamat iti Biblia

Ti babai nga anak ni Jefte saanna a pinanggep ti agtalinaed a balasang. Ngem gapu iti inkari ni tatangna, naobligar nga agserbi iti santuario manipud kinaagtutubona. Dayta a di ninamnama nga annongen ti sigurado a nangbalbaliw kadagiti personal a planona ken maikontra dayta iti riknana. Dua a bulan a nagsangsangit idi maammuanna a dina mabalin ti makiasawa ken agpamilia. Nupay kasta, inawatna ti baro a kasasaadna ken situtulok a nagserbi iti unos ti biagna. Dagiti dadduma a babbai nga Israelita tinawen a kinomendaranda gapu iti kinamanagsakripisiona.​—Uk. 11:36-40.

Dadduma idi panawen ni Isaias ti mabalin a naupay gapu iti kasasaadda kas eunuko. Saan nga ibaga ti Biblia no apay a nagbalinda a eunuko. Kas eunuko, dida mabalin ti naan-anay a maikameng iti kongregasion ti Israel, ken dida met mabalin ti makiasawa ken maaddaan iti annak. (Deut. 23:1) Nupay kasta, maawatan ni Jehova ti riknada, ket kinomendaranna ida gapu iti naimpusuan a panagtulnogda iti tulagna. Imbagana kadakuada a maaddaanda iti “monumento” ken “iti nagan agingga iti tiempo a di nakedngan” iti balayna. Iti sabali a pannao, sigurado ti namnama dagitoy a matalek a eunuko nga agbiag nga agnanayon iti sidong ti Mesianiko a turay ni Jesus. Dinto ida malipatan ni Jehova.​—Isa. 56:3-5.

Naiduma unay ti kasasaad ni Jeremias. Idi dinutokan ti Dios ni Jeremias kas maysa a mammadto, imbilinna kenkuana a saan a mangasawa gapu ta napeggad ti tiempo a pagbibiaganna ken gapu ta naisangsangayan ti annongenna. “Dika mangala maipaay kenka iti asawa,” kinuna ni Jehova, “ket dika maaddaan iti annak a lallaki ken annak a babbai iti daytoy a lugar.” (Jer. 16:1-4) Saan nga impalgak ti Biblia ti rikna ni Jeremias maipapan iti naibilin kenkuana, nupay ipasigurado ti Biblia kadatayo a pagragsakanna ti sao ni Jehova. (Jer. 15:16) Iti naudi a tawtawen, idi inibturan ni Jeremias ti nakaam-amak a 18 a bulan a pannakalakub ti Jerusalem, awan duadua a nakitana ti kinasirib iti panagtulnog iti bilin ni Jehova a panagtalinaedna nga awanan iti asawa.​—Un. 4:4, 10.

Dagiti Pamay-an Tapno Rumagsak ti Biagmo

Dagiti dinakamat ti Biblia ket awananda iti asawa, ngem tinulongan ida ni Jehova ket naipamaysada ti panagserbida kenkuana. Kasta met ita, dakkel ti maaramidan ti makagunggona a trabaho tapno rumagsak ti biagtayo. Impadto ti Biblia a dagiti babbai a mangiwarwaragawag iti naimbag a damag agbalindanto a dakkel a buyot. (Sal. 68:11) Karaman ditoy dagiti rinibu a kakabsat a babbai nga awanan asawa. Bayat ti panagbunga ti ministerioda, adu ti naaddaan kadagiti naespirituan nga annak a babbai ken lallaki.​—Mar. 10:29, 30; 1 Tes. 2:7, 8.

 “Naaddaan panggep ti biagko gapu iti panagpayunirko,” kinuna ni Loli a 14 a tawenen a payunir. “Kas maysa a balasang, inyugalik ti agbalin nga okupado, isu a saanak a naliday. Maragragsakanak iti kada panagngudo ti aldaw gapu ta talaga a matultulongak dagiti tattao babaen iti ministeriok. Dayta ti mangmangted kaniak iti dakkel a rag-o.”

Adu a kakabsat a babbai ti nakaadal iti baro a lenguahe ken nangpalawa iti ministerioda babaen ti panangasaba kadagiti tattao a sabali ti lenguaheda. “Iti pagnanaedak a siudad, rinibu dagiti ganggannaet,” kuna ni Ana, a nadakamat itay. Pagay-ayatna ti mangasaba kadagiti tattao a Pranses ti lenguaheda. “Babaen ti panagadalko iti lenguahe tapno makasaritak ti adu kadakuada, naaddaanak iti baro a tay-ak a pangasabaan ket nagbalin a naragragsak ti panangasabak.”

Gapu ta basbassit ti obligasion dagiti awanan asawa, inaprobetsarda dayta a kasasaadda tapno makapagserbida iti lugar a dakdakkel ti pakasapulan. “Mamatiak a no ad-adu ti maaramidam iti panagserbi ken Jehova, nalaklakaka ti makigayyem ken ad-adda a mariknam a maipatpategka,” kinuna ni Lidiana, maysa a kabsat a balasang nga agtawen iti 35. Isu ket nakapagserbin iti sabali a pagilian, kadagiti lugar a dakdakkel ti pakasapulan. “Immadu dagiti nasinged a gagayyemko a nagduduma ti nasionalidadda ken kapadasanda iti biag, ket ti kasta a panaggagayyem ti nangparagsak unay iti biagko.”

Tukoyen ti Biblia ni Felipe nga ebanghelisador nga addaan iti uppat a babbalasang a nagipadto. (Ara. 21:8, 9) Naregtada la ketdi a kas ken amada. Inusarda ngata ti sagutda nga agipadto agpaay iti pagimbagan dagiti padada a Kristiano idiay Cesarea? (1 Cor. 14:1, 3) Iti kaaldawantayo, adu a kakabsat a babbai nga awanan asawa ti mangparparegta met iti sabsabali babaen ti regular nga itatabuno ken pannakipasetda kadagiti Nakristianuan a gimong.

Iti sabali a bangir, ni Lidia​—a mabalin a balasang wenno balo​—ket maysa a nagkauna a Kristiano idiay Filipos a kinomendaran ti Biblia gapu iti kinamanagpadagusna. (Ara. 16:14, 15, 40) Gapu iti kinaparaburna, naaddaan iti gundaway a mangtagiragsak iti makagunggona a pannakitimpuyog kadagiti agdaldaliasat a manangaywan, kas kada Pablo, Silas, ken Lucas. Ti kasta a kinamanagpadagus ket mangyeg met iti umasping a bendision.

Panangpennek iti Panagkasapulan iti Pammateg

Malaksid iti makagunggona a trabaho a mangparayray iti biagtayo, addaantayo amin iti panagkasapulan a maayat ken maipateg. Kasano a mapennek dayta a panagkasapulan dagiti awanan asawa? Umuna, kanayon nga ayaten, pabilgen, ken imdengannatayo ni Jehova. Adda panawen nga ‘agmaymaysa ken naparigatan’ ni Ari David, kaskasdi ammona a kanayon a mabalinna ti agpatulong ken Jehova. (Sal. 25:16; 55:22) “No kas pagarigan ti bukodko nga ama ken ti bukodko nga ina pinanawandak, ni met laeng Jehova pidutennakto,” insuratna. (Sal. 27:10) Aw-awisen ti Dios ti amin nga adipenna nga umadanida kenkuana wenno agbalinda a nasinged a gagayyemna.​—Sal. 25:14; Sant. 2:23; 4:8.

Malaksid iti dayta, iti sangalubongan a panagkakabsat, addaantayo met kadagiti naespirituan nga amma, inna, ken kakabsat a lallaki ken babbai a mangparagsak iti biagtayo gapu iti ayatda. (Mat. 19:29; 1 Ped. 2:17) Adu nga awanan assawa a Kristiano ti naaddaan iti dakkel a pannakapnek iti panangsurotda iti ulidan ni Dorcas, nga “aduan iti naimbag nga ar-aramid ken sagsagut ti asi.” (Ara. 9:36, 39) “Sadinoman a papanak, kumitaak kadagiti pudpudno a gagayyem iti kongregasion a mangiparikna  kaniak iti ayat ken tumulong kaniak no lumlumdaangak,” kinuna ni Loli. “Tapno mapabileg ti kasta a panaggagayyem, ikagkagumaak nga ipakita ti ayat ken pannakaseknan iti sabsabali. Walon a kongregasion ti nagserbiak, ket kanayon nga adda masarakak a pudno a gagayyem. Masansan a saanko a kasadaran dagitoy​—dadduma ti babbaketen ken addada met dagiti agtutubo.” Iti tunggal kongregasion, adda dagiti makasapul iti pammateg ken kakadua. No ipakitatayo ti napudno a pannakaseknan kadakuada, dakkel ti maitulongtayo kadakuada ken mapnek ti tarigagaytayo nga agayat ken maayat.​—Luc. 6:38.

Saanto a Manglipat ti Dios

Ipakita ti Biblia a masapul nga agsakripisio ti amin a Kristiano iti nagduduma a pamay-an gapu ta agbibiagtayo iti narigat a tiempo. (1 Cor. 7:29-31) Dagidiay agtalinaed nga awanan asawa gapu iti determinasionda nga agtulnog iti bilin a makiasawa laeng mayalubog iti Apo ket sigurado a maikarida iti naisangsangayan a panagraem ken konsiderasion. (Mat. 19:12) Nupay agsakripisioda, saanna a kayat a sawen a dida naan-anay a matagiragsak ti biag.

“Addaanak iti makapnek a biag nga agpannuray iti relasionko ken Jehova ken iti panagserbik kenkuana,” kuna ni Lidiana. “Adda dagiti am-ammok a naasawaan a naragsak ngem adda met dagiti saan a naragsak. Dayta a kinapudno ti nangkombinsir kaniak a ti kinaragsakko ket saan nga agpannuray iti pannakiasawak wenno iti diak pannakiasawa.” Kas impaganetget ni Jesus, ti kinaragsak agpannuray a nangnangruna iti panangted ken panagserbi, maysa a banag a kabaelan nga aramiden ti amin a Kristiano.​—Juan 13:14-17; Ara. 20:35.

Di pagduaduaan a ti kangrunaan a mangyeg iti rag-o ket ti pannakaammo a bendisionan ni Jehova ti aniaman a panagsakripisiotayo a mangaramid iti pagayatanna. Ipanamnama kadatayo ti Biblia: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.”​—Heb. 6:10.

[Footnote]

[Blurb iti panid 25]

“Tagiragsakek ti adda kaniak, ken diak arapaapen ti awan kaniak.”​—Carmen

[Ladawan iti panid 26]

Tagtagiragsaken da Loli ken Lidiana ti agserbi iti lugar a dakdakkel ti pakasapulan

[Ladawan iti panid 27]

Aw-awisen ti Dios ti amin nga adipenna nga umadanida kenkuana