Saludsod Dagiti Agbasbasa

Nangasaba ni Jesus iti intero nga Israel. Apay ngarud a naikuna ni Pedro a dagiti umili a Judio ken dagiti agtuturay ‘nagtignayda nga ignorante’ idi kinalikagumanda ti pannakapapatayna?​—Ara. 3:17.

Idi kasasaona ti maysa a grupo dagiti Judio maipapan iti pasetda iti ipapatay ti Mesias, kinuna ni apostol Pedro: “Ammok a nagtignaykayo iti kinaignorante, a kas met iti panagtignay dagiti agturay kadakayo.” (Ara. 3:14-17) Mabalin a dadduma a Judio saanda a naawatan a ni Jesus ti Mesias ken mabalin a saanda pay a natarusan dagiti pannursurona. Adda met dagiti nagbalin nga ignorante gapu iti panangidumduma, apal, gura, ken kinaawan tarigagay a mangay-ayo iti Dios.

Usigentayo no kasano a naapektaran ti panangmatmat ti adu maipapan iti pannursuro ni Jesus gapu iti kaawan ti tarigagayda a mangay-ayo ken Jehova. Masansan a nangisuro ni Jesus babaen kadagiti ilustrasion, nga inlawlawagna iti amin nga agtarigagay a makaammo iti ad-adu pay. Ngem dadduma ti basta pimmanaw, a pulos a dida inkagumaan a tinarusan. Naminsan, kinarurod pay ketdi ti dadduma nga adalan ti maysa a pangngarig ni Jesus. (Juan 6:52-66) Saanda a naamiris a dagiti ilustrasion ni Jesus ti mangsubok iti kinamasindadaanda a mangbalbaliw iti panagpampanunot ken tigtignayda. (Isa. 6:9, 10; 44:18; Mat. 13:10-15) Saanda met nga inkankano ti padto maipapan iti panangusar ti Mesias kadagiti ilustrasion iti panangisurona.​—Sal. 78:2.

Dadduma ti nangilaksid kadagiti pannursuro ni Jesus gapu ta manangidumdumada. Idi nangisuro iti sinagoga ti Nazaret nga ilina, “nagsiddaaw” dagiti tattao. Ngem dida pulos inawat ni Jesus kas ti Mesias. Imbes ketdi, nagim-imtuodda maipapan iti kinataona: “Sadino ti nangalaan daytoy a tao kadagitoy a banag? . . . Saan kadi a daytoy ti allawagi nga anak ni Maria ken kabsat da Santiago ken Jose ken Judas ken Simon? Ket saan aya a ti kakabsatna a babbai addada ditoy a kaduatayo?” (Mar. 6:1-3) Para kadagiti umili iti Nazaret, awan ti mamaay dagiti pannursuro ni Jesus gapu ta nanumo laeng ti pamilia a nagtaudanna.

Dagiti met ngay panguluen ti relihion? Kaaduan kadakuada ti saan a nangipangag ken Jesus gapu met laeng kadagita a rason. (Juan 7:47-52) Saanda met nga impangag dagiti pannursurona gapu ta umapalda ken Jesus, nga adu ti sumursurot kenkuana. (Mar. 15:10) Ken adu a natan-ok ti narurod la ketdi idi kinondenarna ida gapu ta managinsisingpet ken manangallilawda. (Mat. 23:13-36) Umiso ti panangkondenar ni Jesus iti sipapakinakem a kinaignoranteda, a kunkunana: “Asikay pay a nalalaing iti Linteg, agsipud ta inikkatyo ti tulbek ti pannakaammo; dakayo saankayo a simrek [iti Pagarian], ket laplapdanyo dagidiay sumsumrek!”​—Luc. 11:37-52.

Iti tallo ket kagudua a tawen, inkasaba ni Jesus ti naimbag a damag iti Israel. Adu met ti sinanayna a makiraman iti dayta a trabaho. (Luc. 9:1, 2; 10:1, 16, 17) Epektibo unay ni Jesus ken dagiti adalanna isu nga inreklamo dagiti Fariseo: “Kitaenyo! Ti lubong simmuroten kenkuana.” (Juan 12:19) Gapuna, saan nga interamente nga awan ammo ti kaaduan a Judio. Kaskasdi, nagtalinaedda nga “ignorante” maipapan ken Jesus kas ti Mesias. Mabalin a naparang-ayda koma ti pannakaammo ken ayatda iti Mesias, ngem saanda a kinayat. Dadduma kadakuada ti nakikumplot iti pannakapapatay ni Jesus. Gapuna, kastoy ti pammagbaga ni apostol Pedro iti adu kadakuada: “Agbabawikayo, ngarud, ket agbaw-ingkayo tapno mapunas dagiti basolyo, iti kasta dagiti panawen ti pannakabang-ar umayda manipud iti persona ni Jehova ken iti kasta ibaonna koma ti Kristo a naituding kadakayo, ni Jesus.” (Ara. 3:19, 20) Makapainteres ta rinibu a Judio ti nangipangag, agraman ti “maysa a dakkel a bunggoy ti papadi.” Saandan a nagtignay a buyogen ti kinaignorante. Imbes ketdi, nagbabawida ket nagun-odda ti anamong ni Jehova.​—Ara. 2:41; 4:4; 5:14; 6:7.