Ti Matalek a Mayordomo ken ti Bagi a Manarawidwidna

“Asino a pudpudno ti matalek a mayordomo, daydiay masirib, a dutokanto ni apona iti bagi dagiti agserserbi kenkuana tapno agtultuloy nga ipaayanna ida ti bingayda nga abasto a taraon iti umiso a tiempo.”​—Luc. 12:42.

1, 2. Ania a napateg a saludsod ti inyimtuod ni Jesus idi dinakamatna ti ragup a pagilasinan dagiti maudi nga aldaw?

 BAYAT ti panangipaay ni Jesus iti ragup a pagilasinan dagiti maudi nga aldaw, insaludsodna: “Siasino a pudpudno ti matalek ken masirib nga adipen a dinutokan ni apona a mangaywan kadagiti katulongna, tapno ipaayna kadakuada ti taraonda iti umiso a tiempo?” Kalpasanna, kinuna ni Jesus a kas gunggona ti kinamatalek daytoy nga adipen, madutokanto a mangaywan iti amin a sanikua ti Apona.​—Mat. 24:45-47.

² Sumagmamano a bulan kasakbayanna, inyimtuod ni Jesus ti umasping a saludsod. (Basaen ti Lucas 12:42-44.) Inawaganna ti adipen kas ti “mayordomo” ken tinukoyna dagiti “katulongna” kas “bagi dagiti agserserbi kenkuana.” Ti mayordomo ket maysa a manangaywan wenno administrador iti balay a nadutokan a  mangimaton kadagiti adipen. Ngem ti mayordomo ket maysa met nga adipen. Siasino daytoy nga adipen, wenno mayordomo, ken kasanona nga ipaay ti “taraon iti umiso a tiempo”? Napateg a bigbigentayo ti kalasugan a maus-usar a mangipaay iti naespirituan a taraon.

3. (a) Ania ti kunaen dagiti komentarista ti Kakristianuan kas panangilawlawagda iti sasao ni Jesus maipapan iti “adipen”? (b) Siasino ti “mayordomo” wenno “adipen,” ken siasino dagiti “agserserbi” wenno “katulong”?

³ Masansan a kunaen dagiti komentarista ti Kakristianuan a ti tuktukoyen ni Jesus ket dagidiay addaan iti akem iti timpuyog dagiti agkunkuna a Kristiano. Ngem ni Jesus, ti “apo” iti ilustrasion, saanna nga imbaga a nagadunto ti adipenna a naiwaras iti nagduduma a sekta ti Kakristianuan. Imbes ketdi, imbatadna nga adda laeng maymaysa a “mayordomo,” wenno “adipen,” a dinutokanna a mangaywan iti amin a sanikuana. Gapuna, kas masansan nga ilawlawag daytoy a magasin, ti mayordomo irepresentarna la ketdi ti “bassit nga ipastoran” dagiti napulotan nga adalan kas maysa a bagi, wenno grupo. Dinakamat ni Jesus ti maipapan kadagitoy iti mismo a konteksto ti Ebanghelio ni Lucas. (Luc. 12:32) Ti “bagi dagiti agserserbi,” wenno dagiti “katulong,” ket tumukoy iti isu met laeng a grupo ngem itampokna ti akemda kas indibidual. Tumaud ti maysa a mamagpanunot a saludsod, Adda kadi paset ti tunggal maysa a kameng daytoy a klase adipen iti panangipaay iti naespirituan a taraon iti umiso a tiempo? Nalawag ti sungbat no usigentayo a naimbag ti kunaen ti Kasuratan.

Ti Nagkauna nga Adipen ni Jehova

4. Kasano ti panangtukoy ni Jehova iti nagkauna a nasion ti Israel, ken ania ti napateg a laglagipentayo maipapan iti dayta a nasion?

⁴ Tinukoy ni Jehova ti ilina, ti nagkauna a nasion ti Israel, kas maysa nga adipen. “‘Dakayo [adu] dagiti saksik [adu],’ kuna ni Jehova, ‘ti mismo nga adipenko [maysa] a pinilik.’” (Isa. 43:10) Amin a kameng dayta a nasion ket karaman iti dayta a maysa a klase adipen. Nupay kasta, napateg a laglagipentayo a dagiti laeng papadi ken dagiti Levita a saan a papadi ti addaan iti rebbengen a mangisuro iti nasion.​—2 Cron. 35:3; Mal. 2:7.

5. Sigun ken Jesus, ania a dakkel a panagbalbaliw ti mapasamak?

⁵ Ti kadi nasion ti Israel ti adipen a tuktukoyen ni Jesus? Saan. Ammotayo dayta gapu iti kinuna ni Jesus kadagiti Judio idi kaaldawanna: “Ti pagarian ti Dios maikkatto kadakayo ket maited iti nasion a mangpatpataud kadagiti bungana.” (Mat. 21:43) Nalawag nga adda panagbalbaliw. Mangusar ni Jehova iti maysa a baro a nasion. Nupay kasta, no maipapan iti panangisuro kadagiti pagannurotan ti Dios, ti trabaho ti adipen iti ilustrasion ni Jesus ket umasping iti annongen ti “adipen” ti Dios iti nagkauna nga Israel.

Dimteng ti Matalek nga Adipen

6. Ania a baro a nasion ti timmaud idi Pentecostes 33 K.P., ken siasino dagiti nagbalin a kameng dayta?

⁶ Ti baro a nasion, “ti Israel ti Dios,” ket buklen dagiti naespirituan nga Israelita. (Gal. 6:16; Roma 2:28, 29; 9:6) Timmaud dayta idi naiparukpok ti nasantuan nga espiritu ti Dios idi Pentecostes 33 K.P. Kalpasanna, amin a Kristiano a napulotan iti espiritu nagbalinda a paset ti nasion nga agserserbin kas ti klase adipen a dinutokan ti Apo, ni Jesu-Kristo. Tunggal kameng dayta a nasion ket naipaayan iti annongen a mangikasaba iti naimbag a damag ken mangaramid iti adalan. (Mat. 28:19, 20) Ngem karaman kadi ti tunggal kameng dayta a grupo iti panangipaay iti naespirituan a taraon iti umiso a tiempo? Kitaentayo no kasano a sungbatan ti Kasuratan dayta a saludsod.

7. Idi damo, ania ti kangrunaan a trabaho dagiti apostol, ken ania ti kanayonan a trabahoda idi agangay?

⁷ Idi nangdutok ni Jesus iti 12 nga apostolna, ramanen ti kangrunaan a trabahoda ti pannakaibaonda a mangikasaba iti naimbag a damag. (Basaen ti Marcos 3:13-15.) Maitunos daytoy nga annongen iti kangrunaan a kaipapanan ti Griego a sao nga apostolos, a naggapu iti berbo a ti simple a kaipapananna ket “ibaon.” Nupay kasta, bayat ti panaglabas ti tiempo ken idi dandanin maipasdek ti kongregasion Kristiano, ti kinaapostol ket nagbalin nga ‘akem a panangaywan.’​—Ara. 1:20-26.

8, 9. (a) Ania ti kangrunaan a pakaseknan dagiti 12 nga apostol? (b) Siasino pay ti naikkan iti kanayonan a responsabilidad, a pinatalgedan ti bagi a manarawidwid?

 ⁸ Ania idi ti kangrunaan a pakaseknan dagiti 12 nga apostol? Maammuan ti sungbat kadagiti pasamak kalpasan ti aldaw ti Pentecostes. Idi adda di pagkikinnaawatan mainaig iti inaldaw a panagiwaras iti taraon para kadagiti balo, dagiti 12 nga apostol inummongda dagiti adalan ket kinunada: “Saan a makaay-ayo kadakami a baybay-an ti sao ti Dios tapno agiwaraskami iti taraon kadagiti lamisaan.” (Basaen ti Aramid 6:1-6.) Gapuna, nangdutok dagiti apostol kadagiti sabali a kualipikado a kakabsat a mangasikaso iti daytoy a “nasken nga aramid” tapno maipamaysada ti panangaramidda “iti ministerio ti sao.” Binendisionan ni Jehova dayta nga urnos ta “rimmangrang-ay ti sao ti Dios, ket ti bilang dagiti adalan nagtultuloy nga immadu iti kasta unay idiay Jerusalem.” (Ara. 6:7) Isu a dagiti apostol ti kangrunaan a nangibaklay iti annongen a panangipaay iti naespirituan a taraon.​—Ara. 2:42.

⁹ Idi agangay, naitalek iti sabsabali dagiti dadakkel a responsabilidad. Iti panangiwanwan ti nasantuan nga espiritu, naibaon da Pablo ken Bernabe kas misionero babaen ti kongregasion ti Antioquia. Naibilangda met kas apostol, nupay saanda a karaman iti immuna a 12 nga apostol. (Ara. 13:1-3; 14:14; Gal. 1:19) Ti pannakadutokda ket pinasingkedan idi agangay ti bagi a manarawidwid idiay Jerusalem. (Gal. 2:7-10) Kalpasan unay dayta, naaddaan ni Pablo iti paset iti pannakaiwaras ti naespirituan a taraon. Pinutarna ti umuna a naipaltiing a suratna.

10. Idi umuna a siglo, amin kadi a Kristiano a napulotan iti espiritu nairamanda iti panangisagana iti naespirituan a taraon? Ilawlawag.

¹⁰ Nupay kasta, amin kadi a Kristiano a napulotan iti espiritu nairamanda iti panangaywan iti trabaho a panangasaba ken panangisagana iti naespirituan a taraon? Saan. Kinuna kadatayo ni apostol Pablo: “Amin kadi ket apostol? Amin kadi ket mammadto? Amin kadi ket mannursuro? Amin kadi ket agaramid iti mannakabalin nga ar-aramid?” (1 Cor. 12:29) Ipaspasimudaag ditoy ni Pablo a ti sungbat ket saan. Nupay mangaskasaba ti amin a Kristiano a napulotan iti espiritu, sumagmamano wenno walo laeng a lallaki ti nausar a mangisurat iti 27 a libro ti Kristiano a Griego a Kasuratan.

Ti Matalek nga Adipen iti Moderno a Tiempo

11. Ania dagiti “sanikua” a naipaaywan iti adipen?

¹¹ Dagiti sasao ni Jesus a nailanad iti Mateo 24:45 ibatadna nga addanto latta ti klase matalek ken masirib nga adipen a sibibiag ditoy daga bayat ti tiempo ti panungpalan. Natukoy dagitoy iti Apocalipsis 12:17 kas “dagiti natda” ti bin-i ti babai. Kas maysa a grupo, nadutokan daytoy a natda a mangaywan iti amin a sanikua ni Kristo ditoy daga. Dagiti “sanikua” a naipaaywan iti matalek a mayordomo isu dagiti naarian nga interes ti Apo ditoy daga, a ramanenna dagiti naindagaan a sakup ti Pagarian ken dagiti pasilidad a maus-usar iti panangikasaba iti naimbag a damag.

12, 13. Kasano nga ammo ti maysa a Kristiano a nailangitan ti namnamana?

¹² Kasano nga ammo ti maysa a Kristiano no nailangitan ti namnamana ken karaman iti natda iti naespirituan nga Israel? Masarakam ti sungbat iti kinuna ni apostol Pablo kadagiti padana nga addaan iti nailangitan a namnama: “Amin nga iturong ti espiritu ti Dios, dagitoy ket annak ti Dios. Ta saanyo nga inawat ti espiritu ti pannakaadipen a mamataud manen iti buteng, no di ket inawatyo ti espiritu ti pannakaampon kas annak, a babaen iti dayta nga espiritu ipukkawtayo: ‘Abba, Ama!’ Ti mismo nga espiritu mangsaksi a buyogen ti espiritutayo a datayo ket annak ti Dios. Ngarud, no datayo ket annak, agtawidtayo met: pudno a dagiti agtawid ti Dios, ngem makipagtawid ken Kristo, no la ket agsagabatayo a sangsangkamaysa tapno maipadayagtayo met a sangsangkamaysa.”​—Roma 8:14-17.

¹³ Nabatad ngarud a dagitoy nga indibidual ket napulotan iti nasantuan nga espiritu ti Dios ken umawatda iti nailangitan a “pannakaayab” wenno awis. (Heb. 3:1) Ti Dios ti naggapuan dayta a personal nga awis. Kas panangipangag  iti dayta, dagus nga awaten dagiti napulotan ti awis a dida pagduaduaan wenno pagamkan ti pannakapulotda kas annak ti Dios. (Basaen ti 1 Juan 2:20, 21.) No kasta, saan nga isuda a mismo ti nangpili iti dayta a namnama. Imbes ketdi, minarkaan ida ni Jehova wenno intedna ti nasantuan nga espirituna kadakuada.​—2 Cor. 1:21, 22; 1 Ped. 1:3, 4.

Ti Umiso a Panangmatmat

14. Ania ti panangmatmat dagiti napulotan maipapan iti pannakaayabda?

¹⁴ Ania ti rumbeng a panangmatmat dagitoy a napulotan iti bagbagida bayat nga ur-urayenda ti nailangitan a gunggonada? Nupay nakaawatda iti naisangsangayan nga imbitasion, bigbigenda a maysa la nga awis dayta. Nasken nga agtalinaedda a matalek agingga ken patay tapno magun-odda dayta a gunggona. Buyogen ti kinapakumbaba, mariknada ti kas iti narikna ni Pablo a nangikuna: “Kakabsat, saanko pay nga ibilang ti bagik a naiggamakon dayta; ngem adda maysa a banag maipapan iti dayta: Iti pananglipat kadagiti banag a nalikudan ken panangragpat kadagiti banag nga adda iti masanguanan, agregreggetak nga agturong iti kalat maipaay iti gunggona a panagpangato nga ayab ti Dios babaen ken Kristo Jesus.” (Fil. 3:13, 14) Dagiti napulotan a natda masapul nga ikagumaanda ti ‘magna a maikari iti pannakaayab a nakaayabanda, buyogen ti naan-anay a kinapakumbaba iti panagpampanunot,’ nga ar-aramidenda dayta “buyogen ti buteng ken panagpigerger.”​—Efe. 4:1, 2; Fil. 2:12; 1 Tes. 2:12.

15. Ania ti rumbeng a panangmatmat dagiti Kristiano kadagiti makiramraman iti emblema iti Memorial, ken ania ti panangmatmat dagiti napulotan maipapan iti bagbagida?

¹⁵ Iti sabali a bangir, ania ti rumbeng a panangmatmat dagiti dadduma a Kristiano iti maysa a tao nga agkuna nga isu ket napulotan ken makiramramanen kadagiti emblema ti Memorial? Saanda a rumbeng nga ukomen. Dayta ket personal a banag iti nagbaetan dayta a tao ken ni Jehova. (Roma 14:12) Nupay kasta, dagidiay pudpudno a napulotan dida kalikaguman ti espesial nga atension. Dida ipagarup a gapu ta karamanda kadagiti napulotan ket addaandan iti naisangsangayan a pannakatarus a naringringbaw ngem iti dadduma nga aduan kapadasan a kameng ti “dakkel a bunggoy.” (Apoc. 7:9) Dida ipapan nga addaanda iti ad-adu a nasantuan nga espiritu ngem kadagiti kakaduada a “sabsabali a karnero.” (Juan 10:16) Dida mangnamnama iti espesial a pannakatrato; dida met panunoten a gapu ta  makiramramanda kadagiti emblema ket natantan-okda ngem kadagiti nadutokan a panglakayen iti kongregasion.

16-18. (a) Karaman kadi ti amin a napulotan iti panangipalgak kadagiti baro a naespirituan a kinapudno? Iyilustraryo. (b) Apay a saanen a kasapulan a kauman ti Bagi a Manarawidwid dagiti amin nga agkunkuna a napulotan?

¹⁶ Amin kadi a napulotan iti intero a daga ket pasetda iti sangalubongan a panangyallatiw iti impormasion a nainaig iti panangipalgak kadagiti baro a naespirituan a kinapudno? Saan. Nupay ti klase adipen, kas maysa a bagi, rebbengenna ti mangtaraon iti naespirituan a sangakabbalayan, saan nga agpapada ti annongen wenno trabaho ti tunggal kamengna. (Basaen ti 1 Corinto 12:14-18.) Kas nadakamaten, amin a Kristiano idi umuna a siglo ket karaman iti nagpateg a trabaho a panangasaba. Ngem sumagmamano laeng kadakuada ti nausar a mangisurat kadagiti libro ti Biblia ken mangiwanwan iti kongregasion Kristiano.

¹⁷ Kas panangyilustrar: Ti Kasuratan dakamatenna no dadduma ti “kongregasion” kas mangtamtaming kadagiti hudisial a kaso. (Mat. 18:17) Nupay kasta, dagiti panglakayen ti aktual a mangaramid iti dayta kas pannakabagi ti kongregasion. Dagiti panglakayen saandan a kasapulan a kauman ti amin a kameng ti kongregasion tapno ammuenda dagiti kapanunotan dagitoy sakbay a mangngeddengda. Maitunos iti teokratiko nga urnos, aramidenda ti naipaannong kadakuada; agtignayda kas pannakabagi ti intero a kongregasion.

¹⁸ Umasping iti dayta, sumagmamano laeng kadagiti napulotan ti addaan responsabilidad a mangibagi iti klase adipen. Buklenda ti Bagi a Manarawidwid dagiti Saksi ni Jehova. Dagitoy a napulotan a lallaki ti mangiwanwan iti trabaho ti Pagarian ken iti programa a panangipaay iti naespirituan a taraon. Ngem kas met idi umuna a siglo, saanen a kauman ti Bagi a Manarawidwid ti tunggal kameng ti klase adipen sakbay a mangaramidda kadagiti desision. (Basaen ti Aramid 16:4, 5.) Nupay kasta, naan-anay ti pannakipaset ti amin a napulotan a Saksi iti agdama a nagpateg a trabaho a panagani. Kas grupo, “ti matalek ken masirib nga adipen” ket maysa a bagi, ngem kas indibidual, nagduduma ti trabahoda.​—1 Cor. 12:19-26.

19, 20. Ania ti balanse a panangmatmat ti dakkel a bunggoy maipapan iti “matalek ken masirib nga adipen” ken ti Bagi a Manarawidwidna?

¹⁹ Ania ti rumbeng nga epekto dagiti nadakamaten a kinapudno kadagiti umad-adu a paset ti dakkel a bunggoy a mangnamnama nga agbiag nga agnanayon ditoy daga? Kas paset dagiti sanikua ti Ari, maragsakanda a makitunos a naan-anay kadagiti urnos ti Bagi a Manarawidwid, a mangirepresentar iti “matalek ken masirib nga adipen.” Dagiti kameng ti dakkel a bunggoy apresiarenda dagiti naespirituan a taraon a maipapaay babaen ti panangiwanwan ti Bagi a Manarawidwid. Ngem nupay dagiti kameng ti dakkel a bunggoy raraemenda ti adipen kas maysa a grupo, liklikanda nga itan-ok ti siasinoman nga indibidual nga agkunkuna a kameng dayta. Ti Kristiano a pudpudno a napulotan iti nasantuan nga espiritu ti Dios saanna a tarigagayan wenno namnamaen ti kasta a pannakatrato.​—Ara. 10:25, 26; 14:14, 15.

²⁰ Datayo man ket “katulong,” a karaman iti napulotan a natda, wenno kamengnatayo ti dakkel a bunggoy, determinadotayo koma a makitunos a naan-anay iti matalek a mayordomo ken iti Bagi a Manarawidwidna. Sapay koma ta tunggal maysa kadatayo ‘agtultuloy nga agbantay’ ket paneknekantayo a matalektayo agingga iti panungpalan.​—Mat. 24:13, 42.

Malagipyo Kadi?

• Siasino “ti matalek ken masirib nga adipen,” ken siasino dagiti katulong?

• Kasano nga ammo ti maysa a tao no nailangitan ti namnamana?

• Siasino ti kangrunaan a makinresponsabilidad iti panangisagana kadagiti baro a naespirituan a taraon?

• Ania ti rumbeng a panangmatmat ti maysa a napulotan maipapan iti bagina?

[Salsaludsod]

[Ladawan iti panid 23]

Ti Bagi a Manarawidwid ita irepresentarna ti klase matalek ken masirib nga adipen. Kasta ti urnos idi umuna a siglo