Ibilangmo Kadi ni Jehova a kas Amam?

“APO, isurom kadakami no kasano ti agkararag.” Idi kiniddaw dayta ti maysa kadagiti adalan ni Jesus, kinunana: “No agkararagkayo, kunaenyo, ‘Ama, masantipikar koma ti naganmo.’” (Luc. 11:1, 2) Mabalin koma nga inawagan ni Jesus ti Amana a ni Jehova babaen kadagiti natan-ok a titulo kas iti “Mannakabalin-amin,” “Naindaklan a Manangisuro,” “Namarsua,” “Kadaanan iti Al-aldaw,” ken “Ari ti kinaagnanayon.” (Gen. 49:25; Isa. 30:20; 40:28; Dan. 7:9; 1 Tim. 1:17) Nupay kasta, inusarna ti termino nga “Ama.” Apay? Nalabit kayatna nga umadanitayo iti kangatuan a Persona iti uniberso iti wagas nga iyaadani ti maysa a napakumbaba nga ubing iti naayat nga amana.

Ngem adda dagiti marigatan a mangibilang iti Dios kas Amada. Inamin ti maysa a Kristiano a ni Atsuko, a “Uray adun a tawen a bautisadoak, marigatanak nga umadani ken agkararag ken ni Jehova kas maysa nga Ama.” Imbagana no apay: “Awan ti malagipko a gundaway a nagbalin a nadungngo kaniak ni tatangko.”

Kadagitoy napeggad a maudi nga al-aldaw, bimmaawen ti “nainkasigudan a panagayat” a rumbeng koma nga ipakita ti ama iti anakna. (2 Tim. 3:1, 3) Gapuna, gagangay ita ti kas iti narikna ni Atsuko. Ngem maragsakantayo ta addaantayo kadagiti nasayaat a rason a mangibilang ken Jehova kas naayat nga Amatayo.

Ni Jehova​—Naayat a Manangipaay

Tapno maibilangtayo ni Jehova kas Amatayo, isu ket masapul nga am-ammuentayo a naimbag. “Awan ti makaam-ammo a naan-anay iti Anak no di ti Ama,” kinuna ni Jesus, “awan met ti asinoman a makaam-ammo a naan-anay iti Ama no di ti Anak ken ti asinoman a kayat a pangipalgakan kenkuana ti Anak.” (Mat. 11:27) Ti maysa a nagsayaat a pamay-an a maammuantayo no ania a kita nga Ama ni Jehova ket ti panangutob iti impalgak ni Jesus maipapan iti pudno a Dios. Ania ngarud ti impakaammo ni Jesus maipapan iti Ama?

Binigbig ni Jesus a ni Jehova ti Ubbog ti biagna. Kinunana: “Agbiagak gapu iti Ama.” (Juan 6:57) Utangtayo met iti Ama ti biagtayo. (Sal. 36:9; Ara. 17:28) Ania ti nangtignay ken Jehova a mangted iti biag kadagiti parsuana? Saan kadi a gapu iti ayat? Maitutop laeng nga ayatentayo ti nailangitan nga Amatayo kas subad iti dayta a sagut.

Ti kadakkelan a pammaneknek iti panagayat ti Dios iti sangatauan ket ti panangipaayna iti pangsubbot a daton ni Jesus. Dayta ti namagbalin a posible para kadagiti managbasol a tattao a maaddaan iti nasinged a relasion ken Jehova babaen ti dungdunguenna nga Anak. (Roma 5:12; 1 Juan 4:9, 10) Ken gapu ta ti nailangitan nga Amatayo ti Manangtungpal kadagiti karina, masiguradotayo nga amin nga agayat ken agtulnog kenkuana ti mangtagiragsakto iti “nadayag a wayawaya ti annak ti Dios.”​—Roma 8:21.

Ti nailangitan nga Amatayo “pagleggakenna ti initna” kadatayo iti inaldaw. (Mat. 5:45) Gapuna, nalabit a panunotentayo a saanen a kasapulan nga ikararag a lumgak koma ti init. Kaskasdi, kasapulan ken pagragsakantayo la ketdi ti bara nga itdenna! Kanayonanna, ti Amatayo isu ti di maartapan a Manangipaay, a makaammo kadagiti material a kasapulantayo sakbay pay a kiddawentayo dagita. Gapuna, saan kadi a rumbeng laeng nga iwayaantayo a paliiwen ken utoben buyogen ti panangapresiar no kasano nga ay-aywanan ti nailangitan nga Amatayo dagiti parsuana?​—Mat. 6:8, 26.

 Ti Amatayo​—“Nadungngo a Manangsalaknib”

Ti padto ni Isaias impanamnamana iti nagkauna nga ili ti Dios: “Mabalin nga agbaliw dagiti bantay ken maikkat dagiti turod, ngem di pulos agbaliw ti pannakigayyemko kenka wenno maikkat ti tulagko iti kappia, kuna ti nadungngo a manangsalaknib kenka a ni Jehova.” (Isa. 54:10, The Bible in Living English) Pudno a “nadungngo a manangsalaknib” ni Jehova kas ipakita ti kararag ni Jesus bayat ti maudi a rabii ti biagna ditoy daga. Inkararag ni Jesus maipapan kadagiti adalanna: “Isuda addada iti lubong ket um-umayakon kenka. Nasantuan nga Ama, aywanam ida maigapu iti bukodmo a nagan.” (Juan 17:11, 14) Inaywanan ken sinalakniban ni Jehova dagiti pasurot ni Jesus.

Ti maysa a pamay-an a salaknibannatayo ita ti Dios manipud kadagiti silo ni Satanas ket ti panangipaayna iti naintiempuan a naespirituan a taraon babaen “ti matalek ken masirib nga adipen.” (Mat. 24:45) Kasapulan ti panangipauneg kadagita a makapakired a taraon tapno ‘maikapettayo ti naan-anay a kabal manipud iti Dios.’ Usigentayo, kas pagarigan, “ti dakkel a kalasag ti pammati” a babaen iti dayta ‘mabalinantayo a depdepen amin dagiti sumsumged a gayang daydiay nadangkes.’ (Efe. 6:11, 16) Ti pammati nga iparparangarangtayo ket mangsalaknib kadatayo manipud kadagiti makadangran iti espiritualidadtayo ken pammaneknek dayta a bigbigentayo a kabaelannatayo a salakniban ti Amatayo.

Ad-adda a matarusantayo ti kinadungngo ti nailangitan nga Amatayo babaen ti panangusig a naimbag iti kondukta ti Anak ti Dios idi adda ditoy daga. Imutektekam ti salaysay iti Marcos 10:13-16, idi kinuna ni Jesus kadagiti adalanna: “Bay-anyo dagiti ubbing nga umay kaniak.” Bayat nga inaribungbongan dagiti ubbing, sidudungngo nga inarakup ken binendisionan ida ni Jesus. Rimmaniag la ketdi ti rupada iti rag-o! Ken gapu ta kinuna ni Jesus: “Ti nakakita kaniak nakitana met ti Ama,” ammotayo a kayat ti pudno a Dios nga umadanitayo kenkuana.​—Juan 14:9.

Ni Jehova a Dios ti Gubuayan ti aglaplapusanan nga ayat. Awan umasping kenkuana kas Manangipaay ken Manangsalaknib, ket kayatna a sumingedtayo kenkuana. (Sant. 4:8) Gapuna, awan duadua a ni Jehova ti kasayaatan nga Ama!

No Kasanotayo a Magunggonaan!

Dakkel ti magunggonatayo no agtalektayo ken Jehova kas naayat ken nadungngo a nailangitan nga Amatayo. (Prov. 3:5, 6) Nagunggonaan ni Jesus gapu iti naan-anay a panagtalekna ken Amana. “Saanak nga agmaymaysa,” kinuna ni Kristo kadagiti adalanna, “no di ket ti Ama a nangibaon kaniak adda kaniak.” (Juan 8:16) Ammo ni Jesus nga isu ket kanayon a suportaran ni Jehova. Idi nabautisaran, kas pagarigan, immawat iti naayat a pammasingked manipud iti Amana, a nagkuna: “Daytoy ti Anakko, ti dungdungnguen, nga inanamongak.” (Mat. 3:15-17) Ken sakbay unay ti ipapatayna, inyikkis ni Jesus: “Ama, kadagita imam italekko ti espirituk.” (Luc. 23:46) Saan a pulos a nagbaliw ti natibker a panagtalek ni Jesus iti Amana.

Kasta met kadatayo ita. Yantangay adda ni Jehova iti dasigtayo, adda kadi pay rumbeng a pagbutngantayo? (Sal. 118:6) Ni Atsuko, a nadakamat itay, ket nairuam nga agpannuray iti bukodna a pigsa no maipasango kadagiti parikut. Nupay kasta, inrugina nga inadal ti maipapan iti biag ken ministerio ni Jesus, nangruna iti nasinged a relasion ni Jesus iti nailangitan nga Amana. Ti resultana? “Nasursurok no ania ti kayat a sawen ti maaddaan iti Ama ken no kasano ti agtalek kenkuana,” kuna ni Atsuko. Innayonna: “Nariknak ti pudno a talna ken ragsak. Wen, awan ti aniaman a rumbeng a pagdanagantayo.”

Ania pay ti magunggonatayo no ibilangtayo ni Jehova a kas Amatayo? Dagiti annak gagangay nga ayatenda dagiti nagannakda ken kayatda a paragsaken ida. Gapu iti ayat, ti Anak ti Dios ‘kankanayon nga inaramidna ti bambanag a makaay-ayo iti Amana.’ (Juan 8:29) Umasping iti dayta, ti panagayat iti nailangitan nga Amatayo ti manggutugot kadatayo nga agtignay a nainsiriban ken ‘mangidaydayaw kenkuana iti publiko.’​—Mat. 11:25; Juan 5:19.

 Ti Amatayo ‘Ig-iggamanna ti Makannawan nga Imatayo’

Ti nailangitan nga Amatayo ket nangipaay met iti “katulongan”​—ti nasantuan nga espirituna. “Idalannakayto iti isuamin a kinapudno,” kinuna ni Jesus. (Juan 14:15-17; 16:12, 13) Ti nasantuan nga espiritu ti Dios tulongannatayo a maaddaan iti nasaysayaat a pannakatarus maipapan iti Amatayo. Matulongannatayo a mangatur kadagiti “natibker ti pannakasarikedkedna a bambanag,” kayatna a sawen, dagiti sigud a patpatien, di umiso a kapanunotan, wenno ballikug a panangmatmat, iti kasta ‘kautibuenna ti tunggal panunot tapno pagbalinenna a natulnog iti Kristo.’ (2 Cor. 10:4, 5) Ikararagtayo ngarud ken Jehova ti naikari a “katulongan,” nga agtalektayo a “ti Ama sadi langit mangtedto iti nasantuan nga espiritu kadagidiay agdawdawat kenkuana.” (Luc. 11:13) Maitutop met nga ikararagtayo a ti nasantuan nga espiritu tulongannatayo nga ad-adda a suminged ken Jehova.

Natalged ti rikna ti ubing ken awan ti pagamkanna no kibkibinen ni amana. No talaga nga ibilangmo ni Jehova a kas Amam, makapagtalekka kadagitoy a makaliwliwa a sasao: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’” (Isa. 41:13) Addaanka iti nagsayaat a pribilehio a ‘makipagna’ iti Dios iti agnanayon. (Mik. 6:8) Itultuloymo nga aramiden ti pagayatanna, ket matagiragsakmo ti ayat, rag-o, ken kinatalged nga itden ti panangibilang ken Jehova a kas Amam.

[Footnote]