Salsaludsod Dagiti Agbasbasa

Kadagiti ania a kasasaad a mabalin nga ikabilangan ti panagpabautisar manen?

Adda dagiti kasasaad a mabalin a pagduaduaan ti maysa a bautisado no balido met laeng ti bautismona ket mabalin nga ikabilanganna ti agpabautisar manen. Kas pagarigan, nalabit nga idi nabautisaran, adda ilimlimedna a dakes nga aramid a mabalin a pakailaksidan ti asinoman a balido ti bautismona. Mabalinna kadi ti agdedikar iti Dios no kasta ti kasasaadna? Agbalin laeng a balido ti dedikasionna ken Jehova no insardengna ti di nainkasuratan nga aramidna sakbay pay a nagdedikar. Gapuna, ti maysa a nagpabautisar bayat nga adda nadagsen a basol nga ar-aramidenna ket maitutop nga ikabilanganna no masapul nga agpabautisar manen.

Komusta met ti maysa nga awan ti dakes nga aramidna idi tiempo ti bautismona ngem kalpasanna, nakaaramid iti basol nga agkalikagum iti pannakabukel iti hudisial a komite? Kas pagarigan ta ibagana a saanna a naan-anay a naawatan ti kaipapanan ti bautismona isu nga ipasimudaagna a saan a balido ti bautismona. No kasaritada ti nakabasol, di koma iparipirip dagiti panglakayen a saan a balido ti dedikasion ken bautismona ket damagenda no kasta met ti panagriknana. Total, nangngegna ti Nainkasuratan a palawag maipapan iti kaipapanan ti bautismo. Sinungbatanna iti “Wen” dagiti saludsod maipapan iti dedikasion ken bautismo. Kalpasanna, nagsukat iti kawesna ket literal a nagpaitaneb iti danum. Gapuna, nainkalintegan a patien a naan-anay a naawatanna ti kinaserioso ti inaramidna a panagpabautisar. Iti kasta, isu ket matmatan dagiti panglakayen kas maysa a bautisado.

No pagduaduaan ti maysa no balido met laeng ti bautismona, mabalin nga ipabasa dagiti panglakayen kenkuana dagiti napalabas nga artikulo Ti Pagwanawanan mainaig iti bautismo sada pagsasaritaan dayta. Personal a pangngeddeng ti maysa no isu ket agpabautisar manen iti sidong ti dadduma a kasasaad (kas iti kurang a pannakatarus iti Biblia idi tiempo a mabautisaran).

Ania dagiti masapul nga ikabilangan dagiti Kristiano no maipapan iti panagnaed iti maymaysa a balay a kadua ti dadduma?

Kasapulantayo amin ti pagnaedan. Ngem adu a tattao ita ti awanan iti bukod a balay. Gapu iti rigat ti panagbiag, parikut iti salun-at, wenno dadduma pay a banag, mabalin a kalikagumanna nga agkakabbalay dagiti agkakabagian. Iti dadduma a pagilian, aglilinnetlet dagiti agkakabagian iti maymaysa a kuarto nga uray la awanen ti mailemmengda.

Saan a responsabilidad ti organisasion ni Jehova ti mangipaay iti atiddog a listaan dagiti pagannurotan maipapan iti maitutop a pagnaedan dagiti Kristiano iti intero a lubong. Maparegta dagiti Kristiano nga ikabilanganda dagiti Nainkasuratan a prinsipio tapno maikeddengda no makaay-ayo iti Dios ti agdama nga urnos ti pannakikabbalayda. Ania ti dadduma kadagita a prinsipio?

Ti kangrunaan nga ikabilangantayo ket no ania ti epektona kadatayo ken iti espiritualidadtayo  ti panagnaed iti maymaysa a balay a kadua ti sabsabali. Siasino dagiti kabbalayyo? Agdaydayawda kadi ken Jehova? Agbibiagda kadi a maitunos kadagiti pagalagadan ti Biblia? “Dikay payaw-awan,” insurat ni apostol Pablo. “Dagiti dakes a pannakitimpuyog dadaelenda dagiti makagunggona nga ugali.”​—1 Cor. 15:33.

Ilawlawag ti Kasuratan a kondenaren ni Jehova ti pannakiabig ken pannakikamalala. (Heb. 13:4) Gapuna, saan a makaay-ayo iti Dios ti aniaman nga urnos ti panagnaed iti maymaysa a balay a mangted iti gundaway iti agkasungani a sekso nga agkabbalay a kasla agassawa. Saan a kayat ti maysa a Kristiano ti agnaed iti lugar a mapampanuynoyan ti imoralidad.

Kanayonanna, idagadag ti Biblia kadagiti amin nga agtarigagay a manggun-od iti anamong ti Dios nga ‘adaywanda ti pannakiabig.’ (1 Cor. 6:18) Gapuna, nainsiriban a liklikan dagiti Kristiano ti aniaman a kasasaad a mangituggod kadakuada a makaaramid iti imoralidad. Alaentayo a pagarigan ti kasasaad ti dadduma a Kristiano nga agnanaed iti maymaysa a balay. Ti kadi kasta nga urnos ket mangituggod kadagiti makasulisog a kasasaad? Kasanon no ti dua a di kasado ket di ninamnama a nabati iti pagtaengan gapu ta adda napanan dagiti kabbalayda? Mabalin met a napeggad kadagiti di kasado nga addaan iti rikna iti maysa ken maysa no agnanaedda iti maymaysa a balay. Nainsiriban a liklikan dagiti kasta a kasasaad.

Saan met a maitutop kadagiti nagdiborsio nga itultuloyda ti agnaed iti maymaysa a balay. Gapu ta sigudda nga agdendenna, mabalin a nalaka laeng a makaaramidda iti imoralidad.​—Prov. 22:3.

Ti maysa pay a napateg nga ikabilangantayo ket ti panangmatmat ti komunidad. Dagiti urnos ti panagkakabbalay nga umiso iti panangmatmat ti maysa a Kristiano ngem pakaigapuan ti tsismis iti komunidad ket masapul met a pakaseknan. Ditay pulos kayat a pakaumsian ti nagan ni Jehova ti konduktatayo. Kastoy ti kuna ni Pablo: “Liklikanyo ti agbalin a pakaigapuan ti pannakaitibkol kadagiti Judio kasta met kadagiti Griego ken iti kongregasion ti Dios, a kas met ti panangay-ayok iti amin a tattao iti amin a bambanag, a diak sapsapulen ti bukodko a pagsayaatan no di ket ti pagsayaatan dagiti adu, tapno maisalakanda koma.”​—1 Cor. 10:32, 33.

Mabalin a maysa a karit ti panagsapul iti maitutop nga urnos ti panagkakabbalay ken pagnaedan para kadagidiay agtarigagay a mangitandudo kadagiti nalinteg a pagannurotan ni Jehova. Ngem dagiti Kristiano masapul nga ‘itultuloyda a siguraduen no ania ti makaay-ayo iti Apo.’ Masapul a siguraduenda nga awan ti aniaman a saan a makaay-ayo a mapaspasamak iti uneg ti pagtaenganda. (Efe. 5:5, 10) Gapuna, masapul nga ikararag dagiti Kristiano ti panangiwanwan ti Dios ken aramidenda ti amin a kabaelanda a mangsalaknib iti pisikal ken moral a pagimbagan ti tunggal maysa ken tapno saan a mamulitan ti nagan ni Jehova.