Sisisigo nga Usaren “ti Kampilan ti Espiritu”

“Awatenyo . . . ti kampilan ti espiritu, a dayta ti, sao ti Dios.”​—EFE. 6:17.

1, 2. Ania koma ti aramidentayo yantangay kasapulan ti ad-adu a manangiwaragawag iti Pagarian?

 APAMAN a nakita ni Jesus ti naespirituan a kasapulan ti bunggoy, kinunana kadagiti adalanna: “Dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.” Saan la a basta imbaga dayta ni Jesus no di ket “inayabanna ti sangapulo ket dua nga adalanna” tapno ibaonna ida a mangasaba, wenno ‘agani’ iti nagduduma a lugar. (Mat. 9:35-38; 10:1, 5) Idi agangay, “nangdutok [ni Jesus] iti pitopulo a sabsabali ket imbaonna ida a sagdudua” tapno mangasabada met.​—Luc. 10:1, 2.

² Dakkel met ita ti panagkasapulan iti ad-adu a manangiwaragawag iti Pagarian. Ti timmabuno iti Memorial iti intero a lubong iti 2009 a tawen serbisio ket 18,168,323. Nasurok a 10 a milion nga ad-adu dayta ngem iti dagup a bilang dagiti Saksi ni Jehova. Pudno a natangkenanen dagiti anien iti tay-ak. (Juan 4:34, 35) Gapuna, masapul nga ikararag ken agdawattayo iti ad-adu a trabahador. Ngem ania met ti masapul nga aramidentayo maitunos iti dayta a kiddaw? Masapul nga ikagumaantayo ti agbalin nga ad-adda nga epektibo a ministro bayat a sireregta nga ikaskasabatayo ti Pagarian ken agaramid kadagiti adalan.​—Mat. 28:19, 20; Mar. 13:10.

3. Ania ti napateg nga akem ti espiritu ti Dios iti panagbalintayo nga ad-adda nga epektibo a ministro?

³ Inlawlawag ti immuna nga artikulo no kasano a nakatulong ti panagpaidalan iti espiritu ti Dios tapno ‘sawentayo a situtured ti sao ti Dios.’ (Ara. 4:31) Makatulong met dayta nga espiritu tapno agbalintayo a nasigo a ministro. Ti maysa a pamay-an a mapasayaattayo ti kinaepektibotayo iti ministerio ket ti panangusar a naimbag iti nagsayaat nga alikamen nga impaay ni Jehova a Dios​—ti naisurat a Saona, ti Biblia. Gapuanan dayta ti nasantuan nga espiritu. (2 Tim. 3:16) Ti mensahena ket impaltiing ti Dios. Gapuna, makuna nga agpapaidalantayo iti nasantuan nga espiritu no sisisigo nga ibataytayo iti Biblia ti ikaskasabatayo. Sakbay nga usigentayo no kasano a maaramidtayo dayta, utobentayo no kasano kabileg dayta a Sao.

‘Nabileg ti Sao ti Dios’

4. Ania a panagbalbaliw iti maysa a tao ti itden ti mensahe ti Dios manipud Biblia?

⁴ Anian a nagbileg ti sao wenno mensahe ti Dios! (Heb. 4:12) Iti piguratibo a pamay-an, natadtadem ti mensahe ti Biblia ngem iti aniaman a kampilan nga inaramid ti tao, ta arigna a sumalput iti paglasinan dagiti tulang ken pata. Ti kinapudno a linaon ti Kasuratan danonenna ti kaunggan ti maysa a tao ken salputenna dagiti pampanunot ken emosionna, nga ipalgakna ti pudno a kinataona. Nagbileg dayta a kinapudno ta kabaelanna a tignayen ti tao a mangaramid kadagiti dakkel a panagbalbaliw. (Basaen ti Colosas 3:10.) Wen, ti Sao ti Dios kabaelanna a balbaliwan ti biag!

5. Kadagiti ania a pamay-an a maiwanwannatayo ti Biblia, ken ania ti resultana?

⁵ Kanayonanna, ti Biblia ket maysa a libro a naglaon iti awan kaaspingna a sirib. Naglaon met dayta kadagiti makatulong nga impormasion a mangisuro kadagiti tattao no kasano ti agbiag iti daytoy narikut a lubong. Ti Sao ti Dios saanna laeng a silawan ti pagaddangantayo no di ket ti masungad pay a pagnaantayo. (Sal. 119:105) Nagdakkel ti maitulongna no maipaspasangotayo kadagiti parikut wenno no agpilitayo kadagiti gagayyem, paglinglingayan, panggedan, kawes, ken dadduma pay. (Sal. 37:25; Prov. 13:20; Juan 15:14; 1 Tim. 2:9) Ti panangyaplikar  kadagiti prinsipio ti Sao ti Dios tulongannatayo a maaddaan iti nasayaat a relasion kadagiti sabsabali. (Mat. 7:12; Fil. 2:3, 4) No ipalubostayo a silawan ti Sao ti Dios ti masungad a pagnaantayo, makitatayo no kasano a dagiti desisiontayo apektarannatayo iti masanguanan. (1 Tim. 6:9) Ipalgak met ti Kasuratan ti panggep ti Dios iti masanguanan, a tumulong kadatayo nga agbiag maitunos iti dayta a panggep. (Mat. 6:33; 1 Juan 2:17, 18) Anian a makapnek a biag ti matagiragsak ti maysa no agpaiwanwan kadagiti nadiosan a prinsipio!

6. Kasano kabileg nga igam ti Biblia no iti naespirituan a pannakidangadangtayo?

⁶ Panunotenyo met no kasano kabileg nga igam ti Biblia iti naespirituan a pannakidangadangtayo. Tinukoy ni Pablo ti sao ti Dios kas “ti kampilan ti espiritu.” (Basaen ti Efeso 6:12, 17.) No sieepektibo a maidatag ti mensahe ti Biblia, kabaelanna a tulongan dagiti tattao a lumapsut manipud iti impluensia ni Satanas. Maysa dayta a kampilan a mangispal iti biag imbes a mangdadael. Gapuna, saan kadi a rumbeng laeng nga ikagumaantayo nga usaren a sisisigo dayta?

Usaren a Siuumiso

7. Apay a napateg a sursuruen nga usaren a naimbag “ti kampilan ti espiritu”?

⁷ Agbalin laeng nga epektibo ti panangusar ti maysa a soldado iti igamna no sanayen ken sursuruenna nga usaren a naimbag dayta. Kasta met laeng no iti panangusar iti “kampilan ti espiritu” iti naespirituan a pannakidangadangtayo. “Aramidem ti amin a kabaelam a mangiparang iti bagim a naanamongan iti Dios,” insurat ni Pablo, “maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.”​—2 Tim. 2:15.

8, 9. Ania ti makatulong kadatayo a mangtarus iti kaipapanan ti maysa a teksto iti Biblia? Mangted iti pagarigan.

⁸ Ania ti makatulong kadatayo a ‘mangusar a siuumiso iti sao ti kinapudno’ iti ministeriotayo? Sakbay a mairanudtayo a silalawag ti mensahe ti Biblia, masapul a maawatantayo nga umuna ti kaipapananna. Agkalikagum dayta iti panangipamaysa iti atensiontayo iti konteksto ti maysa a bersikulo wenno teksto. Sigun iti maysa a diksionario, “ti konteksto ti maysa a sao, sentensia, wenno teksto ket buklen dagiti sasao, sentensia, wenno teksto sakbay ken kalpasan dayta tapno agbalin a nalawag ti kaipapananna.”

⁹ Tapno maawatantayo ti umiso a kaipapanan ti maysa a teksto iti Biblia, masapul nga ikabilangantayo dagiti teksto a nadakamat sakbay ken kalpasanna. Alaentayo a pagarigan dagiti sasao ni Pablo iti Galacia 5:13. Insuratna: “Naayabankayo maipaay iti wayawaya, kakabsat; isuna laeng ta dikay usaren daytoy a wayawaya kas pakagutugotan a maipaay iti lasag, no di ket babaen ti ayat agpaadipenkayo iti maysa ken maysa.” Ania a wayawaya ti tuktukoyen ditoy ni Pablo? Tuktukoyenna kadi ti wayawaya manipud iti basol ken ipapatay, manipud iti pannakaigamer kadagiti di umiso a patpatien, wenno iti sabali a banag? Ipakita ti konteksto a tuktukoyen ni Pablo ti wayawaya nga itden ti ‘pannakaluk-at manipud iti lunod ti Linteg.’ (Gal. 3:13, 19-24; 4:1-5) Tuktukoyenna ti Nakristianuan a wayawaya. Dagidiay mangipateg iti dayta a wayawaya agpaadipenda  iti maysa ken maysa gapu iti ayat. Ngem dagidiay di mangipatpateg iti dayta agpipinnadakes ken agaapada.​—Gal. 5:15.

10. Tapno matarusan ti umiso a kaipapanan ti Kasuratan, ania dagiti impormasion a masapul nga ikabilangantayo, ken kasanotayo a magun-od dayta?

¹⁰ Adda sabali pay a saklawen ti sao a “konteksto.” Ramanenna dayta dagiti ‘mainaig a detalye, kasasaad, wenno situasion.’ Tapno siuumiso a matarusan ti kaipapanan ti maysa a teksto, masapul nga ikabilangantayo dagiti mainaig a detalye kas iti no asino ti nangisurat iti libro ti Biblia, kaano a naisurat dayta, ken iti sidong dagiti ania a kasasaad. Makatulong met nga ammuen no ania ti panggep a naisurat ti libro ken, no posible, no ania ti kasasaad ti kagimongan, moralidad, ken relihion kadagidi a tiempo. a

11. Ania ti masapul a liklikantayo no ilawlawagtayo ti kasuratan?

¹¹ ‘Ti panangaramat a siuumiso iti sao ti kinapudno’ saanna laeng a ramanen ti umiso a panangilawlawag kadagiti kinapudno iti Kasuratan. Masapul met a liklikan nga usaren ti Biblia a pamutbuteng kadagiti tattao. Nupay usarentayo ti Kasuratan a mangidepensa iti kinapudno, kas inaramid ni Jesus idi pinadas a sulisogen ti Diablo, ti Biblia ket saan a maysa nga alikamen a pamutbuteng kadagiti agdengdengngeg kadatayo. (Deut. 6:16; 8:3; 10:20; Mat. 4:4, 7, 10) Nasken nga ipangagtayo ti balakad ni apostol Pedro: “Santipikarenyo ti Kristo kas Apo kadagiti pusoyo, a kankanayon a sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo, ngem aramidenyo ti kasta buyogen ti naalumamay a kababalin ken nauneg a panagraem.”​—1 Ped. 3:15.

12, 13. Ania a “natibker ti pannakasarikedkedna a bambanag” ti kabaelan a rippuogen ti kinapudno a linaon ti Sao ti Dios? Mangted iti pagarigan.

¹² No maaramat a siuumiso, ania ti magapuanan ti kinapudno a linaon ti Sao ti Dios? (Basaen ti 2 Corinto 10:4, 5.) Kabaelanna a rippuogen dagiti “natibker ti pannakasarikedkedna a bambanag,” kayatna a sawen, ibutaktakna dagiti ulbod a pannursuro, makadangran nga aramid, ken pilosopia a mangyanninaw iti sirib ti imperpekto a tao. Mabalintayo nga usaren ti Biblia a mangrebba iti aniaman a kapanunotan a “naibangon maibusor iti pannakaammo iti Dios.” Dagiti pannursuro ti Biblia ket mausar a tumulong iti sabsabali a mangitunos iti panagpampanunotda iti kinapudno.

¹³ Alaentayo a pagarigan ti kapadasan ti 93 ti tawenna a baket a taga-India. Sipud kinaubingna, naimula kenkuana ti panamati iti reinkarnasion. Idi nangrugi nga agadal iti Biblia babaen iti surat manipud iti anakna nga agnanaed iti ballasiw taaw, dagus nga inakseptarna dagiti maad-adalna maipapan ken ni Jehova ken kadagiti karina. Ngem kasta unay ti pannakairamut kenkuana ti sursuro a reinkarnasion isu a saanna a patien ti insurat kenkuana ti anakna maipapan iti kasasaad dagiti natay. Kinunana: “Diak maawatan ti pannursuro ti Kasuratanyo. Isursuro ti amin a relihion nga adda banag iti unegtayo a  saan a matay. Nabayagen a mamatiak a matay ti bagi ken adda di makita a pasetna nga agtultuloy nga agbiag iti sabali a bagi iti agarup 8,400,000 a daras. Kasano koma a di umiso daytoy? Nagkamali kadi ti kaaduan a relihion?” Ti kadi “kampilan ti espiritu” kabaelanna a paruten ti kasta a nauneg ti pannakairamutna a patpatien? Kalpasan ti kanayonan a panagadal iti Kasuratan mainaig iti dayta a topiko, insurat dayta nga ina sumagmamano a lawas kalpasanna: “Mangrugi met laengen a matarusak ti kinapudno maipapan kadagiti natay. Maragsakanak unay a makaammo nga inton panagungar, makitatayto manen dagiti ipatpategtayo. Sapay koma ta mabiiten a dumteng ti Pagarian ti Dios.”

Usaren Buyogen ti Panangguyugoy

14. Ania ti kaipapanan ti panangguyugoy kadagiti agdengdengngeg?

¹⁴ Ti epektibo a panangusar iti Biblia iti ministerio ket saan laeng a basta panangadaw kadagiti teksto. Nagsao ni Pablo buyogen ti “panangguyugoy,” ket kastatay met koma. (Basaen ti Aramid 19:8, 9; 28:23.) Ti “panangguyugoy” kaipapananna ti “naballigi a panangkombinsir.” Daydiay naguyugoy ket “kombinsido unay isu nga agtalek iti maysa a banag.” No guyugoyentayo ti maysa tapno patienna ti maysa a pannursuro ti Biblia, kayatna a sawen a komkombinsirentayo nga agtalek iti dayta a pannursuro. Tapno maibanagtayo dayta, masapul a kombinsirentayo dagiti agdengdengngeg a pudno ti ibagbagatayo. Maaramidtayo dayta babaen kadagiti sumaganad a pamay-an.

15. Kasanoyo a maitampok ti Biblia iti pamay-an a mangpatanor iti panagraem iti dayta?

¹⁵ Itampokyo ti Sao ti Dios iti pamay-an a raemenda dayta. No iruanganyo ti maysa a teksto, itampokyo ti kinapateg ti panangammo iti kapanunotan ti Dios iti maysa a topiko. Kalpasan nga agsaludsod ken maammuanyo ti opinion ti bumalay, mabalinyo a kunaen, ‘Kitaenta no ania ti kapanunotan ti Dios iti dayta a banag.’ Wenno isaludsodyo, ‘Ania ti kapanunotan ti Dios iti daytoy a banag?’ No kasta ti panangiruanganyo iti teksto, ipagpaganetgetyo a ti Biblia ket naggapu iti Dios ken makatulong kadagiti agdengdengngeg tapno umuneg ti panagraemda iti dayta. Nangnangruna a napateg ti panangaramid iti kasta no kaskasabaantayo ti maysa a mamati iti Dios ngem saan a pamiliar kadagiti pannursuro ti Biblia.​—Sal. 19:7-10.

16. Ania ti makatulong kadakayo a siuumiso a mangilawlawag iti teksto?

¹⁶ Saanyo la koma a basaen no di ket ilawlawagyo dagiti teksto. Inyugali ni Pablo nga ‘ilawlawag ken paneknekan babaen kadagiti reperensia’ dagiti bambanag nga isursurona. (Ara. 17:3) Ti maysa a teksto ti Biblia ket masansan a naglaon iti nagduduma a punto isu a nalabit a kasapulan a pagminarenyo dagiti kangrunaan a sasao nga agaplikar iti pagsarsaritaanyo. Maaramidyo dayta babaen ti panangulityo kadagiti sasao a mangitampok iti kangrunaan a punto wenno babaen ti panangyimtuod kadagiti saludsod a tumulong iti bumalay a mangbigbig kadagita a punto. Kalpasanna, ilawlawagyo ti kaipapanan dayta a paset ti teksto sa tulonganyo ti bumalay a mangkita no kasano nga agaplikar dayta kenkuana.

17. Kasanokayo a makirinnason manipud iti Kasuratan iti pamay-an a makakombinsir?

¹⁷ Makirinnasonkayo manipud iti Kasuratan iti pamay-an a makakombinsir. Buyogen ti makatukay iti puso a panangilawlawag ken lohikal nga argumento, makakombinsir a ‘nakirinnason ni Pablo kadagiti sabsabali manipud iti Kasuratan.’ (Ara. 17:2, 4) Kas kenkuana, ikagumaanyo a danonen ti puso ti kasarsaritayo. ‘Aonenyo’ ti adda iti pusona babaen ti panagusar kadagiti naasi a saludsod a mangipakita iti pannakaseknan kenkuana. (Prov. 20:5) Liklikanyo ti agusar kadagiti nagubsang a sasao. Idatagyo dagiti argumento iti nalawag ken lohikal a pamay-an. Masapul a pasingkedanyo dagita babaen kadagiti  makakombinsir nga ebidensia. Dagiti sawenyo ket naibatay koma a naan-anay iti Sao ti Dios. Nasaysayaat ti mangusar iti maysa laeng a teksto a nailawlawag ken nayilustrar a naimbag ngem iti basta agsasaruno a panangibasa iti dua wenno tallo a teksto. Ti panangusar iti mangsuporta nga ebidensia pagbalinenna nga ‘ad-adda a makaguyugoy ti ibagayo.’ (Prov. 16:23, Ti Baro a Naimbag a Damag Biblia) No dadduma, mabalin a kasapulan ti panagsukimat ken panangipaay iti kanayonan nga impormasion. Ti 93 ti tawenna a baket a nadakamat itay kayatna a maammuan no apay nga adu ti mamati iti pannursuro nga imortal ti kararua (wenno espiritu). Idi naawatanna ti nagtaudan dayta a doktrina ken no kasano a nakastrek iti kaaduan a relihion iti lubong, naguyugoy met laeng a mangawat kadagiti pannursuro ti Biblia mainaig iti dayta a topiko. b

Itultuloyyo a Sisisigo nga Usaren

18, 19. Apay a masapul nga itultuloytayo nga usaren a sisisigo “ti kampilan ti espiritu”?

¹⁸ “Ti buya daytoy a lubong agbaliwbaliw,” kuna ti Biblia. Dagiti nadangkes kumarkaro ti kinadakesda. (1 Cor. 7:31; 2 Tim. 3:13) Gapuna, napateg nga itultuloytayo a paruten dagiti “natibker ti pannakasarikedkedna a bambanag” babaen ti panangusar iti “kampilan ti espiritu, a dayta ti, sao ti Dios.”

¹⁹ Anian a ragsaktayo nga adda kadatayo ti Sao ti Dios, ti Biblia, ken mangusar iti nabileg a mensahena a mangparut kadagiti di umiso a pannursuro ken mangiranud iti dayta kadagiti nasingpet a tattao! Awan ti natibker ti pannakasarikedkedna a banag a nabilbileg ngem iti dayta a mensahe. Gapuna, ikagumaantayo nga usaren a sisisigo “ti kampilan ti espiritu” bayat nga itungpaltayo ti inted ti Dios a trabahotayo a panangiwaragawag iti Pagarian.

[Footnotes]

Ania ti Naadalyo?

• Kasano kabileg ti Sao ti Dios?

• Kasanotayo nga ‘aramaten a siuumiso ti sao ti kinapudno’?

• Ania ti kabaelan nga aramiden ti mensahe ti Biblia no maipapan kadagiti “natibker ti pannakasarikedkedna a bambanag”?

• Kasano nga agbalinkayo nga ad-adda a makaguyugoy iti ministerio?

[Salsaludsod]

[Kahon/Ladawan iti panid 12]

No Kasano a Pagbalinen a Makaguyugoy ti Panangusar iti Sao ti Dios

▪ Itampokyo ti Biblia iti pamay-an a raemenda dayta

▪ Ilawlawagyo ti Kasuratan

▪ Makirinnasonkayo iti makakombinsir a pamay-an tapno madanonyo ti puso

[Ladawan iti panid 11]

Sursuruenyo nga usaren a sieepektibo “ti kampilan ti espiritu”