‘Situtured a Sawenyo ti Sao ti Dios’

“Napnoda iti nasantuan nga espiritu ket situtured a sasawenda idi ti sao ti Dios.”​—ARA. 4:31.

1, 2. Apay a masapul nga ikagumaantayo ti agbalin nga epektibo iti ministeriotayo?

 TALLO nga aldaw sakbay ti ipapatay ni Jesus, kinunana kadagiti adalanna: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” Sakbay a nagpalangit ti napagungar a ni Jesus, imbilinna kadagiti pasurotna a ‘mangaramidda iti ad-adalan kadagiti tattao iti amin a nasion, nga isuroda kadakuada a tungpalenda ti amin a bambanag nga imbilinna kadakuada.’ Inkarina nga isu ket adda kadakuada iti “amin nga al-aldaw agingga iti panungpalan ti sistema ti bambanag.”​—Mat. 24:14; 26:1, 2; 28:19, 20.

² Kas Saksi ni Jehova, aktibo a makipaspasettayo iti trabaho a nangrugi idi umuna a siglo. Awanen ti trabaho a napatpateg ngem iti mangispal-biag a trabaho a panangikasaba iti Pagarian ken panagaramid kadagiti adalan. Gapuna, anian a nagpateg ti agbalin nga epektibo iti ministeriotayo! Iti daytoy nga artikulo, kitaentayo no kasano a ti panagpaidalan iti nasantuan nga espiritu tulongannatayo nga agsao a situtured no makiramantayo iti ministerio. Ipakita ti dua a sumaganad nga artikulo no kasano a ti espiritu ni Jehova tulongannatayo nga agbalin a nasigo a mangisuro ken regular a mangasaba.

Kasapulantayo ti Kinatured

3. Apay nga agkalikagum iti kinatured ti panangikasaba iti Pagarian?

³ Nagdakkel a pribilehio ti inted ti Dios kadatayo a trabaho a mangikasaba iti Pagarian. Ngem adda dagiti karit a pakaipasanguantayo. Nupay  adda dagiti umawat iti naimbag a damag ti Pagarian ti Dios, adu ti umasping kadagiti tattao idi kaaldawan ni Noe. “Saanda a nangikankano agingga nga immay ti layus ket inyanudna amin ida,” kinuna ni Jesus. (Mat. 24:38, 39) Adda met dagidiay manguyaw ken bumusor kadatayo. (2 Ped. 3:3) Mabalin a busorendatayo dagiti autoridad, kaeskuelaan wenno katrabahuan, wenno uray pay kapamiliatayo. Malaksid iti dayta, masapul a daerantayo ti bukodtayo a pagkapuyan, kas iti kinamanagbabain ken panagamak a maipuera. Adu ti makagapu a narigat ti ‘agsao a siwayawaya’ ken ‘situtured’ a mangiranud iti sao ti Dios. (Efe. 6:19, 20) Tapno maitultuloytayo a mairanud ti sao ti Dios, kasapulan ti kinatured. Ania ti makatulong kadatayo nga agbalin a natured?

4. (a) Ania ti kinatured? (b) Kasano a nakaurnong ni apostol Pablo iti kinatured a mangasaba kadagiti taga-Tesalonica?

⁴ Ti Griego a sao a naipatarus a “kinatured” kaipapananna ti “panagsao a direkta, prangka, saan nga agpalpalikaw.” Ipasimudaag dayta a sao ti ideya a “kinamaingel, kompiansa, . . . kinaawan panagbuteng.” Ngem dina kaipapanan ti kinagubsang wenno di naannad a panagsasao. (Col. 4:6) Nupay naturedtayo, kayattayo met a taginayonen ti natalna a relasiontayo iti isuamin. (Roma 12:18) Kanayonanna, bayat nga ikasabatayo ti naimbag a damag ti Pagarian, agbalintayo koma a natured ngem kaskasdi a naannadtayo nga agsao tapno maliklikantayo ti di inggagara a pannakasair ti rikna ti dadduma. Kinapudnona, ti kinatured ket agkalikagum kadagiti galad a mapatanor babaen ti dakkel a panagregget. Ngem dayta a kinatured ket saan laeng nga agpannuray iti bukodtayo a pigsa. Kalpasan a ni apostol Pablo ken ti kakaduana ‘sikukuspag a natratoda idiay Filipos,’ kasano a ‘nakaurnongda iti kinatured’ a mangasaba kadagiti taga-Tesalonica? “Babaen iti Diostayo,” insurat ni Pablo. (Basaen ti 1 Tesalonica 2:2.) Wen, kabaelan nga ikkaten ni Jehova ti panagbutengtayo ken ipaayannatayo iti kasta a kinatured.

5. Kasano a ni Jehova impaayanna iti kinatured da Pedro, Juan, ken ti dadduma pay nga adalan?

⁵ Idi naipasangoda iti ibubusor manipud kadagiti ‘agtuturay ken lallakay ken eskriba,’ kinuna da apostol Pedro ken Juan: “No nalinteg iti imatang ti Dios nga imdengandakayo imbes a ti Dios, ipatoyo iti bagbagiyo. Ngem no kadakami, saan a mabalin nga agsardengkami nga agsao maipapan iti bambanag a nakita ken nangngegmi.” Imbes nga inkararagda iti Dios a sumardeng koma ti pannakaidadanesda, inyararawda ketdi agraman dagiti kapammatianda: “Jehova, asikasuem dagiti pamutbutengda, ket ipaaymo kadagiti adipenmo nga itultuloyda a sawen ti saom buyogen ti isuamin a kinatured.” (Ara. 4:5, 19, 20, 29) Ania ti sungbat ni Jehova iti kiddawda? (Basaen ti Aramid 4:31.) Tinulongan ida ni Jehova a maaddaan iti kinatured babaen ti espirituna. Kasta met ti mabalin nga aramiden kadatayo ti espiritu ti Dios. Kasanotayo ngarud a magun-od ti espiritu ti Dios ken agpaidalan iti dayta iti ministeriotayo?

Gumun-od iti Tured

6, 7. Ania ti kangrunaan a pamay-an a direkta a magun-od ti nasantuan nga espiritu ti Dios? Mangted kadagiti pagarigan.

⁶ Ti kangrunaan a pamay-an a direkta a magun-od ti nasantuan nga espiritu ti Dios ket ti panangkiddaw iti dayta. Kinuna ni Jesus kadagiti agdengdengngeg kenkuana: “No dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!” (Luc. 11:13) Wen, masapul nga itultuloytayo nga ikararag ti nasantuan nga espiritu. No maamaktayo a makiraman iti dadduma nga aspeto ti ministeriotayo kas iti panangasaba iti lansangan, iti lugar ti negosio, wenno iti di pormal a pamay-an, mabalintayo nga ikararag ti espiritu ni Jehova tapno ikkannatayo iti kasapulantayo a kinatured.​—1 Tes. 5:17.

⁷ Kasta ti inaramid ti maysa a Kristiano nga agnagan iti Rosa. a Naminsan iti pagtrabahuanna, basbasaen ti padana a maestra ti maysa a report manipud iti sabali nga eskuelaan maipapan iti pannakamaltrato dagiti ubbing. Napalalo ti rurod ti katrabahuanna iti nabasana isu a naipeksana, “Ania ti mapaspasamaken iti daytoy a lubong?” Ginundawayan ni Rosa ti mangasaba.  Kasano a naaddaan iti tured nga agsao? “Nagkararagak ken Jehova ket kiniddawko ti tulong ti espirituna,” kuna ni Rosa. Kas resultana, nakaipaay iti nasayaat a panangsaksi ken nakayurnos iti sumaruno a panagsaritada. Usigenyo met ti kapadasan ti lima ti tawenna a balasitang a ni Milane, nga agnanaed iti New York City. Kuna ni Milane: “Sakbay a mapanak ageskuela, kanayonkami ken nanangko nga agkararag ken ni Jehova.” Ania ti ikarkararagda? Ti tured a kasapulan ni Milane tapno maitakderanna ti pammatina ken maisaritana ti maipapan iti Dios! “Dayta ti nakatulong ken Milane a mangilawlawag iti takderna mainaig iti birthday ken kadagiti piesta ken tapno saan a makipaset kadagita nga okasion,” kuna ni nanangna. Saan kadi nga ipakita dagita a pagarigan a makatulong ti kararag tapno makagun-od iti tured?

8. Ania ti maadaltayo ken propeta Jeremias maipapan iti pananggun-od iti tured?

⁸ Panunotenyo met no ania ti nakatulong ken propeta Jeremias a makagun-od iti tured. Idi dinutokan ni Jehova nga agbalin a propeta kadagiti nasion, kinuna ni Jeremias: “Adtoy pudno a saanko nga ammo ti agsao, ta maysaak laeng nga ubing.” (Jer. 1:4-6) Ngem idi agangay, nagbalin ni Jeremias a nakapingpinget ken nakaregregta a manangaskasaba isu nga adu ti nangibilang kenkuana kas manangipaulog iti didigra. (Jer. 38:4) Iti nasurok nga 65 a tawen, situtured nga impakaammona dagiti panangukom ni Jehova. Nagdinamag idiay Israel ti kinaturedna a mangasaba. Isu a kalpasan ti agarup 600 a tawen, idi nangngegda a nagsao ni Jesus buyogen ti kinatured, impagarup ti dadduma nga isu ni Jeremias a nagungar. (Mat. 16:13, 14) Nupay nagkedked idi damo, kasano a napagballigian ni propeta Jeremias ti kinamanagbabainna? Kinunana: “Iti pusok nagbalin [ti sao ti Dios] a kas sumsumged nga apuy a napupok kadagiti tulangko; ket nabannogak a nangmedmed.” (Jer. 20:9) Wen, ti sao ni Jehova sibibileg a tinignayna ni Jeremias nga agsao.

9. Apay a ti sao ti Dios maapektarannatayo iti pamay-an nga inapektaranna ni Jeremias?

⁹ Iti surat ni apostol Pablo kadagiti Hebreo, kinunana: “Ti sao ti Dios nabiag ken adda bilegna ken natartarumamis ngem iti aniaman a kampilan a dua ti tademna ket sumalput uray agingga iti paglasinan ti kararua ken espiritu, ken kadagiti nagsusuopan ken iti patada, ket kabaelanna a lasinen dagiti panunot ken dagiti panagem ti puso.” (Heb. 4:12) Ti mensahe, wenno sao, ti Dios maapektarannatayo iti pamay-an nga inapektaranna ni Jeremias. Laglagipenyo a nupay tao ti nausar a mangisurat iti Biblia, saan a sirib ti tao ti linaonna yantangay impaltiing dayta ti Dios. Mabasatayo iti 2 Pedro 1:21: “Ti padto saan a naiyeg uray kaano babaen ti pagayatan ti tao, no di ket dagiti tattao nagsaoda manipud iti Dios bayat nga idaldalan ida ti nasantuan nga espiritu.” No adda eskediultayo para iti makagunggona a personal a panagadal iti Biblia, mapno ti isiptayo iti mensahe nga impaltiing ti nasantuan nga espiritu. (Basaen ti 1 Corinto 2:10.) Dayta a mensahe ket “kas sumsumged nga apuy” iti unegtayo a ditay kabaelan a medmedan.

10, 11. (a) Kasano ti rumbeng a panagadaltayo iti Biblia tapno maaddaantayo iti tured nga agsao? (b) Mangdakamat iti uray maysa laeng a planoyo nga aramiden tapno mapasayaatyo ti kalidad ti personal a panagadalyo.

 ¹⁰ Tapno maaddaan iti nabileg nga epekto kadatayo ti personal a panagadal iti Biblia, ipalubostayo nga umukuok iti kaunggantayo ti mensahe ti Biblia, nga apektaranna ti kinataotayo. Kas pagarigan, nasirmata ni propeta Ezequiel a nakiddaw kenkuana a kanenna ti maysa a lukot ti libro a naglaon iti nadagsen a mensahe a maipakaammo kadagiti manangyaleng-aleng a tattao. Masapul a naan-anay nga agsepen ni Ezequiel ti mensahe tapno agbalin dayta a paset ti bagina. Iti kasta, agbalin a makaay-ayo ti panangipakaammona iti mensahe​—kas nasam-it a diro.​—Basaen ti Ezequiel 2:8–3:4, 7-9.

¹¹ Umasping ti kasasaadtayo ken Ezequiel. Adu ita ti saan a mayat a dumngeg iti mensahe ti Biblia. Tapno agtultuloy a maipakaammotayo ti sao ti Dios, napateg nga adalentayo ti Kasuratan iti wagas a naan-anay a maagsep wenno matarusantayo dagiti mensahe a linaonna. Regular koma ti personal a panagadaltayo, saan ket a sagpaminsan laeng. Ti tarigagaytayo ket kas koma iti inkanta ti salmista: “Dagiti sasao ti ngiwatko ken ti panagmennamenna ti pusok agbalinda koma a makaparagsak iti sanguanam, O Jehova a Batok ken Mannubbotko.” (Sal. 19:14) Anian a nagpateg nga iwayaantayo nga utoben dagiti nabasatayo tapno umukuok iti pusotayo dagiti kinapudno a linaon ti Biblia! Gapuna, ikagumaantayo koma a pasayaaten ti kalidad ti personal a panagadaltayo. b

12. Apay a dagiti Nakristianuan a gimong tulongandatayo nga agpaiwanwan iti nasantuan nga espiritu?

¹² Ti maysa pay a pamay-an a magunggonaantayo manipud iti nasantuan nga espiritu ni Jehova ket ti ‘panagpipinnanunottayo iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa.’ (Heb. 10:24, 25) Ti panangikagumaantayo a tumabuno a regular kadagiti Nakristianuan a gimong, panagimdeng a naimbag, ken panangyaplikar kadagiti naadaltayo, ket nasayaat a pamay-an a maiwanwannatayo ti espiritu. Total, saan kadi nga iwanwanwannatayo ti espiritu ni Jehova babaen ti kongregasion?​—Basaen ti Apocalipsis 3:6.

Dagiti Gunggona ti Pananggun-od iti Tured

13. Ania ti maadaltayo manipud iti nagapuanan dagiti Kristiano idi umuna a siglo mainaig iti trabaho a panangasaba?

¹³ Ti nasantuan nga espiritu ti kabilgan a puersa iti uniberso, ken mapabilegna dagiti tattao a mangaramid iti pagayatan ni Jehova. Iti tulong dayta nga espiritu, nagdakkel ti nagapuanan dagiti Kristiano idi umuna a siglo iti trabaho a panangasaba. Naikasabada ti naimbag a damag “iti isuamin a parsua nga adda iti baba ti langit.” (Col. 1:23) Yantangay “awan adalna ken gagangay” ti kaaduan kadakuada, nabatad nga adda nabilbileg a puersa a nangtignay kadakuada.​—Ara. 4:13.

14. Ania ti makatulong kadatayo nga agbalin a “nasged iti espiritu”?

¹⁴ Ti panagbiag a maitunos iti panangiwanwan ti nasantuan nga espiritu matignaynatayo met a mangitungpal a situtured iti ministeriotayo. Agbalintayo a ‘nasged iti espiritu’ no kanayon nga ikararagtayo ti espiritu, siaanep nga agadaltayo a personal, utobentayo dagiti naadaltayo buyogen ti panagkararag, ken regular a tumabunotayo kadagiti Nakristianuan a gimong. (Roma 12:11) No maipapan iti “maysa a Judio a managan Apolos, a katutubo iti Alejandria, lalaki a nalaing nga agbitla, [a] dimteng idiay Efeso,” kuna ti Biblia: “Yantangay nasged iti espiritu, insasao ken insursurona a siuumiso ti bambanag maipapan ken Jesus.” (Ara. 18:24, 25) No “dumardarangtayo iti Espiritu,” ad-adda a tumuredtayo a mangasaba iti binalaybalay ken iti di pormal a pamay-an.​—Roma 12:11, The Bible​—An American Translation.

15. Kasano a makagunggona kadatayo no naturturedtayo a mangasaba?

¹⁵ Adda dagiti positibo nga epektona kadatayo no naturturedtayo a mangasaba. Sumayaat ti panangmatmattayo yantangay ad-adda a maawatantayo ti kinapateg ken gunggona nga itden ti trabahotayo. Rumayray ti kinagagartayo gapu ta naragragsaktayo no epektibotayo iti ministerio. Ken naregregtatayo yantangay agbalintayo nga ad-adda a sipapanunot iti kinaganat ti trabaho a panangasaba.

16. Ania ti nasken nga aramidentayo no bumaaw ti regtatayo iti ministerio?

¹⁶ Komusta met ngay no napukaw wenno bimmaaw ti regtatayo iti ministerio? No kasta, kasapulan ti napudno a panangsukimat iti bagi. Insurat ni Pablo: “Itultuloyyo a suboken no addakayo iti pammati, itultuloyyo a paneknekan no aniakayo.” (2 Cor. 13:5) Isaludsodyo: ‘Nasgedak kadi pay iti espiritu? Ikarkararagko kadi ti espiritu ni Jehova? Ipakpakita kadi dagiti kararagko nga agpannurayak kenkuana tapno maaramidko ti pagayatanna? Naglaon kadi dagiti kararagko kadagiti ebkas ti panangapresiar iti ministerio a naitalek kaniak? Komusta ti personal a panagadalko? Kasano kaadu ti tiempo a busbusbosek a mangutob iti nabasa ken nangngegko? Kasano kadakkel ken kasansan ti pannakipasetko kadagiti gimong iti kongregasion?’ Ti panangutob kadagiti kasta a saludsod matulongandatayo a mangilasin no ania dagiti pagkapuyantayo ken mangaramid kadagiti addang a mangatur kadagita.

Ti Espiritu ti Dios ti Mangpatured Kadakayo

17, 18. (a) Kasano kasaknap itan ti trabaho a panangasaba? (b) Kasanotayo a maaddaan iti naan-anay a “wayawaya nga agsao” iti ministeriotayo?

¹⁷ Ti napagungar a ni Jesus kinunana kadagiti adalanna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Ara. 1:8) Ti trabaho a nayussuat idi ket maitungtungpal ita iti awan kaaspingna a kasaknap. Nasurok a pito a milion a Saksi ni Jehova ti mangiwarwaragawag iti mensahe ti Pagarian iti nasurok a 230 a dagdaga, a mangbusbusbosda iti dandani 1.5 a bilion nga oras iti ministerio iti kada tawen. Anian a makaparagsak ti naregta a pannakiraman iti daytoy dinto mauliten a trabaho!

¹⁸ Kas idi umuna a siglo, ti sangalubongan a panangasaba ita ket maibambanag babaen ti panangidalan ti espiritu ti Dios. No surotentayo ti panangidalan ti espiritu, maaddaantayo iti naan-anay a “wayawaya nga agsao” iti ministeriotayo. (Ara. 28:31) Gapuna, agpaidalantayo koma iti espiritu bayat nga iwarwaragawagtayo ti naimbag a damag ti Pagarian ti Dios!

[Footnotes]

Ania ti Naadalyo?

• Apay a kasapulantayo ti agbalin a natured iti panangipakaammo iti sao ti Dios?

• Ania ti nakatulong kadagiti nagkauna nga adalan nga agsao a situtured?

• Kasanotayo a magun-odan ti kinatured?

• Kasano a makagunggona kadatayo ti panagbalin a natured?

[Salsaludsod]

[Ladawan iti panid 7]

Kasano a dagiti nagannak matulonganda dagiti annakda a gumun-od iti tured?

[Dagiti Ladawan iti panid 8]

Ti ababa a kararag tulongannakayo nga agbalin a natured iti ministerio