“Ti Kalintegan ti Ubing a Rumang-ay iti Naespirituan”

IDI Disiembre 9, 2008, ti Swedish Academy for the Rights of the Child ti nangangay iti maysa a naisangsangayan a seminar a natemaan iti “Ti Kalintegan ti Ubing a Rumang-ay iti Naespirituan.” Adu a kapanunotan ti indatag dagiti ispiker a mangibagi iti Church of Sweden, dadduma a denominasion ti Kakristianuan, Islam, ken grupo dagiti mangitantandudo iti pagimbagan ti tao.

Maysa kadagiti ispiker ket ti klero a nagkuna: “No maipapan kadagiti salaysay ti Biblia, awan ti asinoman a naan-anay a makailawlawag iti kinapategda mainaig iti espiritualidad dagiti ubbing.” Kasano a dagiti salaysay iti Biblia maipaayda dagiti naespirituan a kasapulan dagiti ubbing?

“Dagiti linaon ti Biblia ket mabalin nga usaren dagiti ubbing a mangsukimat iti bagida ken agmennamenna,” kinuna ti klero. Dinakamatna “ti pakasaritaan da Adan ken Eva, Cain ken Abel, David ken Goliat, ti pannakayanak ni Jesus, ti agsingsingir iti buis a ni Zaqueo, ti pangngarig maipapan iti barayuboy nga anak, ken ti naasi a Samaritano.” Nadakamat dagitoy kas “sumagmamano a salaysay nga agserbi a mangigiya iti isip [ti ubing] mainaig kadagiti agkakapateg nga isyu iti biag kas iti panangallilaw, panangpakawan, panagdaton, gura, pananglais, pannakikappia, nainkabsatan ken di agimbubukodan nga ayat.” Innayonna: “Dagita a salaysay ket naglaon kadagiti ulidan a mabalin nga iyaplikar ti maysa iti biagna.”

Pudno, nasayaat nga iparegta ti panagbasa iti Biblia. Ngem kabaelan kadi a talaga dagiti ubbing a ‘sukimaten ti bagida ken mennamennaen’ dagiti mabasada iti Kasuratan ken makagtengda iti umiso a konklusion?

Uray dagiti adulto masapul nga adda mangilawlawag kadakuada kadagiti teksto ti Biblia. Kas pagarigan, dakamaten ti Biblia ti maysa a lalaki a dina naawatan ti kasuratan uray ‘sinukimatna ti bagina ken nagmennamenna.’ Dayta a lalaki ket maysa nga Etiope nga opisial. Basbasaenna idi ti padto ni Isaias ngem dina maawatan ti kaipapanan dayta. Gapu ta kayatna a matarusan ti mensahe ti mammadto, immimdeng iti panangilawlawag ti adalan a ni Felipe. (Ara. 8:26-40) Saan laeng a dayta nga Etiope ti agkasapulan iti pannakailawlawag ti Kasuratan no di ket amintayo​—nangruna dagiti ubbing.

Pakdaarannatayo ti Biblia: “Ti kinamaag naisinggalut iti puso ti maysa nga ubing.” (Prov. 22:15) Kasapulan dagiti ubbing ti giya ken panangiwanwan, ket dagiti nagannak ti addaan iti responsabilidad a mangipaay iti moral ken naespirituan nga edukasion a naibatay iti Biblia ken kadagiti maisursuro iti kongregasion Kristiano. Kalintegan dagiti ubbing a magun-od ti kasta a pannakasanay. Sipud kinaubingda, kasapulanda ti tulong a mangipasdek iti natibker a pundasion a naibatay iti Biblia para iti panagrang-ayda iti naespirituan tapno agbalinda a “nataengan a tattao . . . [a] nasanay dagiti pannakabalin ti pannakaawatda a mangilasin agpadpada iti umiso ken di umiso.”​—Heb. 5:14.