Itultuloyyo a Sanayen Dagiti Pannakabalin ti Pannakaawatyo

ANIAN a makaay-ayo a buyaen ti nalap-it a garaw ti maysa a nasigo a gymnast! Iparparegta ti Biblia kadagiti Kristiano a sanayenda ti abilidadda nga agpanunot a kas iti panagsanay ti maysa a gymnast.

Kuna ni apostol Pablo iti suratna kadagiti Hebreo: “Ti nakired a taraon agpaay kadagiti nataengan a tattao, kadagidiay a babaen iti panangusar nasanay [kas iti maysa a gymnast] dagiti pannakabalin ti pannakaawatda [Literal a kaipapananna, “dagiti organo ti sentido.”] a mangilasin agpadpada iti umiso ken di umiso.” (Heb. 5:14, footnote ti New World Translation​—With References) Apay nga idagdagadag ni Pablo kadagiti Hebreo a Kristiano a sanayenda ti abilidadda nga agpanunot a kas iti panangwatwat ti gymnast kadagiti piskelna? Kasanotayo a sanayen dagiti pannakabalin ti pannakaawattayo?

“Rebbeng Koma a Mannursurokayon”

Idi inlawlawag ni Pablo ti akem ni Jesus kas “nangato a padi maitunos iti kasasaad ni Melquisedec,” insuratna: “Maipapan kenkuana [ni Jesus] adu ti maisaomi ket narigat a mailawlawag, yantangay nagbalinkayo a ngelngel iti panagdengngegyo. Ta, pudno unay, nupay rebbeng koma a mannursurokayon gapu iti panawen, kasapulanyo manen nga adda mangisuro kadakayo manipud pangrugian kadagiti pamunganayan a banag dagiti sagrado a pammakdaar ti Dios; ket nagbalinkayo a kas kadagiti makasapul iti gatas, saan nga iti nakired a taraon.”​—Heb. 5:10-12.

Nabatad a dadduma a Judio a Kristiano idi umuna a siglo ket saan nga immuneg ti pannakaawatda isu a saanda a rimmang-ay iti naespirituan. Kas pagarigan, marigatanda a mangawat iti nagbaliw a lawag mainaig iti Linteg ken pannakakugit. (Ara. 15:1, 2, 27-29; Gal. 2:11-14; 6:12, 13) Narigatan ti dadduma a mangisardeng kadagiti nakayugalianda nga aramid mainaig iti linawas a panagngilin iti Sabbath ken ti tinawen a panangrambak iti Aldaw ti Panangabbong. (Col. 2:16, 17; Heb. 9:1-14) Gapuna, pinaregta ida ni Pablo a sanayenda dagiti pannakabalin ti pannakaawatda tapno mailasinda ti umiso ken di umiso ken ‘agreggetda koma a rumang-ay iti kinanataengan.’ (Heb. 6:1, 2) Gapu iti dayta, sigurado nga adda dagiti natignay a mangutob no kasanoda nga us-usaren ti abilidadda nga agpanunot wenno pannakabalin ti pannakaawatda ket nalabit a nakatulong dayta kadakuada a rimmang-ay iti naespirituan. Datayo ngay?

Sanayenyo ti Abilidadyo nga Agpanunot

Kasanotayo a sanayen ti abilidadtayo nga agpanunot tapno agmataengantayo iti naespirituan? “Babaen iti panangusar,” kuna ni Pablo. No kasano a babaen ti panagwatwat sansanayen ti gymnast ti bagi ken piskelna tapno maaramidna dagiti makaay-ayo ken narikut a garaw, masapul met a sanayentayo ti abilidadtayo nga agpanunot tapno mailasintayo ti umiso ken di umiso.

“Ti panangsanay ti kasasayaatan a maaramidanyo iti utekyo,” kinuna ni John Ratey a propesor ti psychiatry idiay Harvard Medical School. Sigun ken Gene Cohen, direktor iti Center on Aging, Health and Humanities idiay George Washington University, “no usarentayo ti utektayo nga agpanunot iti narikut a banag, makapataud dagiti selula ti utek kadagiti baro a dendrite ket umadu dagiti synapse wenno koneksion.”

Masiribtayo ngarud no sanayentayo ti abilidadtayo nga agpanunot ken parang-ayentayo ti pannakaammotayo iti Sao ti Dios. No aramidentayo dayta, ad-adda a kabaelantayo nga aramiden ti “naan-anay a pagayatan ti Dios.”​—Roma 12:1, 2.

 Patanorenyo ti Panagtarigagay iti “Nakired a Taraon”

No tarigagayantayo ti “rumang-ay iti kinanataengan,” nasken nga isaludsodtayo iti bagitayo: ‘Rumangrang-ay kadi ti pannakaawatko iti kinapudno iti Biblia? Matmatandak kadi ti sabsabali kas maysa a nataengan iti naespirituan?’ Pakaragsakan ti ina nga ipaayan ti maladagana iti gatas ken iti dadduma pay a taraon ti maladaga. Ngem panunotenyo laengen no ania ti riknana no agtultuloy a gatas laeng ti kayat nga ipauneg ti anakna iti panaglabas ti tawtawen. Umasping iti dayta, pakaragsakantayo no ti maysa nga iyad-adalantayo iti Biblia ket rumang-ay agingga nga agdedikar ken agpabautisar. Ngem kasanon no saan a rumang-ay iti naespirituan? Saan kadi a makapaupay dayta? (1 Cor. 3:1-4) Siempre, namnamaen ti mangyad-adal kenkuana nga inton agangay, isu ket mangisuronto met.

Tapno mausartayo ti abilidadtayo nga agpanunot a mangtingiting kadagiti bambanag, kasapulan ti panagutob, ken agkalikagum dayta iti panagregget. (Sal. 1:1-3) Tapno makagunggona ti panagutobtayo, masapul a liklikantayo dagiti pakasingaan​—kas iti panagbuya iti telebision wenno kadagiti pagesman a saan unay a kasapulan ti panagpanunot. Tapno rumang-ay ti abilidadtayo nga agpanunot, nasken a patanoren ken pennekentayo ti tarigagaytayo nga agadal iti Biblia ken kadagiti publikasion “ti matalek ken masirib nga adipen.” (Mat. 24:45-47) Malaksid iti regular a programa ti personal a panagbasa iti Biblia, napateg a mangilatangtayo iti tiempo para iti Panagdaydayaw ti Pamilia ken iti naun-uneg a panagsukimat mainaig kadagiti topiko iti Biblia.

Sigun ken Jerónimo, maysa nga agdaldaliasat a manangaywan idiay Mexico, adalenna ti tunggal ruar Ti Pagwanawanan apaman a makaala iti kopia. Mangituding met iti oras a panagadalda a dua ken baketna. Kuna ni Jerónimo, “Nayugalimi ken baketko ti agdanggay a mangbasa iti Biblia iti inaldaw, ket agusarkami kadagiti katulongan a kas iti broshur a ‘Nasayaat a Daga.’” Dinakamat ti Kristiano nga agnagan iti Ronald a kanayon a sursurotenna ti eskediul ti kongregasion para iti panagbasa iti Biblia. Addaan met iti maysa wenno dua a napaut a proyekto mainaig iti personal a panagadal. “Dagitoy a proyekto ti manggutugot kaniak a mangsegga iti adalek iti sumaganad a gundaway,” kuna ni Ronald.

Komustatay met? Mangilatlatangtayo kadi iti umdas a tiempo nga agadal iti Biblia ken mangutob iti Sao ti Dios? Sansanayentayo kadi ti abilidadtayo nga agpanunot ken agsursuro nga agaramid kadagiti desision maitunos kadagiti prinsipio ti Kasuratan? (Prov. 2:1-7) Pagbalinentayo koma a kalat ti agmataengan iti naespirituan kas indibidual, a naparaburan iti pannakaammo ken sirib nga ik-ikutan dagidiay mangsansanay kadagiti pannakabalin ti pannakaawatda a mangilasin iti umiso ken di umiso!

[Ladawan iti panid 23]

Sanayentayo ti abilidadtayo nga agpanunot “babaen iti panangusar”