Padayawanyo ti Lallakay ken Babbaket
Padayawanyo ti Lallakay ken Babbaket
MASARAKAN iti kosta ti California, E.U.A. ti maysa kadagiti kangrunaan a maretretrato a kayo iti intero a lubong. Maawagan dayta iti Lone Cypress. Naipadamag a nasurok a 250 a tawenen dayta a kayo. Nalatak dayta gapu iti kinaandurna ken naipaayan iti naisangsangayan nga atension iti nagduduma a pamay-an. Kas pagarigan, nasarikedkedan kadagiti kable ken batbato ti puonna.
Ti Lone Cypress ipalagipna kadatayo dagiti kakaduatayo a lallakay ken babbaket a Kristiano, a mangipakpakita iti nakaskasdaaw a kinaandur. Ti maysa a naisangsangayan a pamay-an a maaramidda dayta ket babaen ti panangiwaragawagda iti naimbag a damag. Impadto ni propeta Joel nga ipakaammo dagiti “lallakay” ti mensahe ti Biblia. (Joel 2:28-32; Ara. 2:16-21) Panunotenyo laengen ti adu nga oras a busbusbosenda a mangtulong a sipapasnek kadagiti sabsabali tapno maammuanda ti “naimbag a damag ti pagarian”! (Mat. 24:14) Dadduma kadakuada ti mangib-ibtur iti adun a tawen a pannakaidadanes ken dadduma pay a pakarigatan. No ti maysa laeng a kayo a cypress a nalatak gapu iti kinaandurna ket nasarikedkedan kadagiti kable ken bato, anian nga ad-adda pay a maikari dagiti lallakay ken babbaket a bigbigen ken tratuentayo buyogen ti dignidad ken panagraem!
Imbilin ni Jehova a Dios iti nagkauna nga ilina: “Iti sanguanan ti ubanan rebbeng a tumakderka, ket masapul nga ipakitaam ti konsiderasion ti kinatao ti maysa a lakay.” (Lev. 19:32) Karaman kadagiti adipen ni Jehova ita dagiti mapagulidanan a matalek a ‘makipagpagna iti Dios’ iti dinekdekadan. (Mik. 6:8) Bayat nga itultuloyda nga iyaplikar dagiti Nainkasuratan a prinsipio, pampaneknekanda a talaga a “korona ti kinapintas” ti kinaubananda.—Prov. 16:31.
Binalakadan ni apostol Pablo ti agtutubo a ni Timoteo: “Dika palaluan a dillawen ti maysa a lakay. Iti kasupadina, makipakaasika kenkuana a kas ama . . . [ken] kadagiti babbaket a kas inna.” (1 Tim. 5:1, 2) Iti kasta, arigna a ‘tumakder’ ni Timoteo iti sanguanan ti ubanan. Nabatad ngarud a namnamaen ni Jehova a nadayaw koma ti panagsasaotayo.
“Iti panangipakita ti pammadayaw iti maysa ken maysa mangidaulokayo,” kuna ti Roma 12:10. Dagiti manangaywan iti kongregasion nasken nga ipakitada ti pammadayaw kadagiti Kristiano a lallakay ken babbaket. Ngem rumbeng nga amintayo ti mangyun-una a mangipakita iti pammadayaw iti maysa ken maysa.
Siempre, dagiti kameng ti pamilia ti addaan iti naisangsangayan a responsabilidad a mangpadayaw kadagiti nagannak, lolo, ken lolada. Nangsapul dagiti tattao kadagiti pamay-an tapno mataginayon ti Lone Cypress, ken nagtultuloy ti panangaramidda iti dayta. No kasta, rumbeng met a mangbiroktayo kadagiti pamay-an a mangtaginayon iti dignidad dagiti nataenganen a nagannak, lolo, ken lolatayo. Kas pagarigan, no umimdengtayo a naimbag kadakuada, mabalin a maliklikantay nga ipilit ti pamay-antayo a mangaramid iti bambanag a ditay ikabkabilangan dagiti riknada.—Prov. 23:22; 1 Tim. 5:4.
Nakapatpateg ken Jehova dagiti kapammatiantayo a lallakay ken babbaket. Dina baybay-an ida. (Sal. 71:18) Kinapudnona, ti pudno a Dios pabilgenna ida nga agtalinaed a matalek kenkuana. Itultuloytayo met koma a suportaran ken padayawan dagiti lallakay ken babbaket.
[Dagiti Ladawan iti panid 7]
No kasano a ti Lone Cypress kasapulanna ti suporta, masapul a tratuentayo dagiti lallakay ken babbaket buyogen ti dignidad ken panagraem
[Credit Line]
American Spirit Images/age fotostock