Salsaludsod Dagiti Agbasbasa

Yantangay iparit ni Jehova ti idolatria, apay a saanna a dinusa ni Aaron idi nangaramid iti balitok a kigaw a baka?

Idi inaramid ni Aaron ti kigaw a baka, kas nailanad iti Exodo kapitulo 32, linabsingna ti linteg ti Dios maipapan iti idolatria. (Ex. 20:3-5) Nagbanaganna, ‘nagpungtot unay ni Jehova ken Aaron agingga a talipuposenna koman; ngem immararaw ni Moises maigapu ken Aaron iti daydi met laeng a tiempo.’ (Deut. 9:19, 20) Ti kadi araraw ti nalinteg a lalaki a ni Moises ket “aduan iti puersa” tapno saan a madusa ni Aaron? (Sant. 5:16) Wen. Gapu iti dayta nga araraw ken iti sumagmamano pay a rason, agparang a sinungbatan ni Jehova ti kararag ni Moises ket saanna a dinusa ni Aaron.

Ti maysa ket agparang a maigapu iti napalabas a kinamatalek ni Aaron. Idi nabilin ni Moises a sumango ken ni Faraon ken iruarna dagiti Israelita idiay Egipto, ni Jehova dinutokanna ni Aaron a mangkuyog ken ni Moises ken agsao kas pannakabagina. (Ex. 4:10-16) Situtulnog a dimmatagda iti sanguanan ti ari ti Egipto iti adu a daras, nga inan-anusanda ti kinatangsit ni Faraon. No kasta, idi addada pay idiay Egipto, napaneknekan ni Aaron nga isu ket nasungdo ken matalek nga adipen ni Jehova.​—Ex. 4:21.

Usigenyo met no ania ti nangituggod ken Aaron nga agaramid iti balitok a kigaw a baka. Adda idi ni Moises idiay Bantay Sinai iti 40 nga aldaw. Idi “nakita dagiti umili a ni Moises nakabaybayag a sumalog iti bantay,” inallukoyda ni Aaron nga iyaramidanna ida iti idolo. Immanamong ni Aaron ket nagaramid iti balitok nga estatua ti kigaw a baka. (Ex. 32:1-6) Ngem ipakita dagiti simmaganad a tignay ni Aaron a saanna a nagayatan ti panagdayawda iti dayta nga idolo. Nabatad a napilitan laeng a nangaramid iti dayta. Kas pagarigan, idi rinisut ni Moises ti parikut mainaig iti idolatria iti naisangsangayan a pamay-an, amin dagiti annak ni Levi​—agraman ni Aaron​—sititibker a nakidasigda ken Jehova. Napapatay dagiti tallo a ribu a nangisungsong iti idolatria.​—Ex. 32:25-29.

Kalpasanna, kinuna ni Moises kadagiti umili: “Nagbasolkayo iti dakkel a basol.” (Ex. 32:30) Gapuna, saan laeng a ni Aaron ti adda basolna iti napasamak. Agpada a nagunggonaan ni Aaron ken dagiti umili iti dakkel a kinamanangngaasi ni Jehova.

Kalpasan ti pasamak mainaig iti balitok a kigaw a baka, imbilin ni Jehova a maisaad ni Aaron kas nangato a padi. Kinuna ti Dios ken Moises: “Masapul a kawesam ni Aaron iti nasantuan a kawkawes ket pulotam ken santipikarem, ket iti kasta masapul nga agakem a kas padi kaniak.” (Ex. 40:12, 13) Nabatad a pinakawan ni Jehova ti nagkapuyan ni Aaron. Iti puso ni Aaron, isu ket nasungdo a manangitandudo iti pudno a panagdayaw imbes a rebelde nga agdaydayaw iti idolo.