Malagipyo Kadi?

Natagiragsakyo kadi a binasa dagiti nabiit pay a ruar Ti Pagwanawanan? Kitaentayo no masungbatanyo dagiti sumaganad a saludsod:

• Asino ti nagtaudan ti pammati a predestinasion ken ania dagiti relihion a timmaud iti dayta?

Itampok ti Calvinismo ti doktrina a predestinasion. Dagiti pannursuro ti Repormador a ni Jean Cauvin (John Calvin) ket nasaknap kadagiti denominasion a kas iti Reformed, Presbyterian, Congregational, ken Puritan.​—9/1, panid 18-21.

• Nangalaan ni Cain iti asawana?

Nalabit ti naasawa ni Cain ket anak ni Eva, yantangay isu ket nagpasngay kadagiti “annak a lallaki ken babbai.” (Gen. 5:4)​—9/1, panid 25.

• Asino nga anghel ti imbaon ti Dios iti sanguanan ti Israel idi inruarna ida iti Egipto? (Ex. 23:20, 21)

Nainkalintegan a patien a ti anghel nga ‘addaan iti nagan ni Jehova’ ket ti inauna nga Anak ti Dios, a nagbalin a Jesus idi agangay.​—9/15, panid 21.

• Apay a nadakamat iti libro nga 1 Corinto ti karne a naidaton kadagiti idolo?

Maidatdaton idi dagiti animal kadagiti templo dagiti Griego ken Romano, ngem mabalin a mailaklako iti tiendaan dagiti karne a saan a makan bayat ti seremonia. Saan a nakiraman dagiti Kristiano iti pagano a panagdayaw ngem dida ibilang a namulitan dagita a karne no mailako iti tiendaan. Insurat ni apostol Pablo: “Tunggal banag a mailako idiay tiendaan ti karne itultuloyyo a kanen, a dikay agim-imtuod maigapu iti konsiensiayo; ta ‘kukua ni Jehova ti daga ken ti linaonna.’” (1 Cor. 10:25, 26)​—10/1, panid 12.

• No maipapan iti pudno a panagdayaw, ania dagiti pambar a saan nga awaten ti Dios?

‘Nakarigrigat. Diak kayat. Okupadoak unay. Saanak a kualipikado. Adda nangsair kaniak.’ Di nainkalintegan dagita a pambar tapno laeng saan nga itungpal ti bilin ti Dios.​—10/15, panid 12-15.

• Ania ti sumagmamano a pamay-an a mabalinmo nga aramiden tapno makapabileg kenka ken iti sabsabali dagiti Nakristianuan a gimong?

Agsagana a nasaksakbay. Regular a tumabuno. Nasapa a sumangpet. Kompleto nga alikamen. Liklikan dagiti pakasingaan. Makipaset. Ababa koma dagiti komento. Iparang dagiti paset. Komendaran dagiti nagpaset. Makilangen sakbay ken kalpasan dagiti gimong.​—10/15, panid 22.

• Ania a salaysay iti Biblia mainaig iti maysa a balasitang ti nakadakamatan ti kukutel, a pakairamanan ita ti maaw-awagan a Hansen’s disease?

Ti maikadua nga Ar-ari kapitulo 5 dakamatenna ti Israelita a balasitang, a maysa nga adipen iti balay ti panguluen ti buyot ti Siria nga agnagan iti Naaman. Gapu ta agkukutel, insingasing ti balasitang a mapan ken propeta Eliseo tapno umimbag.​—11/1, panid 22.

• Ania ti maadaltayo iti itutulok ni Aaron iti panangpilit dagiti kapatadanna?

Bayat ti kaawan ni Moises, dagiti Israelita pinilitda ni Aaron a mangaramid iti didiosen para kadakuada. Timmulok isu nga inaramidna dayta. Ipakita daytoy a saan laeng a dagiti agtutubo ti maipaspasango iti panangpilit ti kapatadan. Maipaspasango met dagiti natataengan a mayat a mangaramid iti umiso. Masapul a sarangtentayo ti dakes nga impluensia dagiti kapatadantayo.​—11/15, panid 8.

• Ania ti pudno, ken ania ti palso?

Pudno: Ni Satanas ket pudpudno a persona. (2 Cor. 11:14) Palso: Amin a matay ket agbalin nga espiritu. (Ecl. 9:5) Pudno: Maseknan kadatayo dagiti matalek nga anghel. (Sal. 34:7) Palso: Ni Jesus ket pumada iti Dios. (1 Cor. 11:3)​—12/1, panid 8-9.