Naregtakayo Koma iti Pudno a Panagdayaw
Naregtakayo Koma iti Pudno a Panagdayaw
“Dakkel ti anien, ngem bassit dagiti trabahador.”—MAT. 9:37.
1. Iladawanyo ti kinaganat.
ANIA ti aramidenyo no adda dokumento a kasapulan a mairingpas sakbay nga agngudo ti aldaw? Nalabit a markaanyo iti “NAGANAT!” Ania ti aramidenyo no naladawkayon iti papananyo? Mabalin nga ibagayo iti drayber, “Pangngaasim, darasem ta AGGANGGANATAK!” Wen, tensionado ken agdardaraskayo no adda naganat a trabaho a masapul a mairingpas ngem awanen ti tiempoyo. Makarintarkayo isu nga aramidenyo ti amin a kabaelanyo a mangiringpas iti trabaho. Kinaganat ti awag iti dayta!
2. Ania ti kaganatan a trabaho kadagiti pudno a Kristiano ita?
2 Para kadagiti pudno a Kristiano ita, awanen ti nagangganat pay no di ti panangikasaba iti naimbag a damag ti Pagarian ken ti panagaramid iti adalan iti amin a nasion. (Mat. 24:14; 28:19, 20) Iti panangadawna iti sasao ni Jesus, insurat ni adalan a Marcos a masapul a mairingpas nga “umuna” dayta a trabaho sakbay nga umay ti panungpalan. (Mar. 13:10) Rumbeng laeng a kasta ta kinuna ni Jesus: “Dakkel ti anien, ngem bassit dagiti trabahador.” Saan a mabalin nga itungtungkua ti panagani; masapul a maurnong dagiti anien sakbay a marpek dagita.—Mat. 9:37.
3. Ania ti inaramid ti adu gapu iti kinaganat ti panangasaba?
3 Gapu ta nakapatpateg kadatayo ti panangasaba, agkalikagum dayta iti adu a tiempo, atension, ken panangusar iti pigsatayo agingga a kabaelantayo. Makaparagsak ta adu ti mangar-aramid iti dayta. Dadduma ti nangpasimple iti biagda tapno makastrekda iti amin-tiempo a serbisio kas payunir wenno misionero, wenno agserbida iti maysa kadagiti pagtaengan a Bethel iti intero a lubong. Okupado ti biagda. Mabalin nga adu ti insakripisioda, ken adu a karit ti pakaipaspasanguanda. Kaskasdi, sibabaknang a bembendisionan ida ni Jehova. Makipagragsaktayo kadakuada. (Basaen ti Lucas 18:28-30.) Nupay adda dagiti saan a makapagserbi kas amin-tiempo nga agibumbunannag, adu a tiempo ti busbusbosenda iti daytoy mangispal-biag a trabaho, a pakairamanan ti panangtulong kadagiti annak tapno maisalakanda.—Deut. 6:6, 7.
4. Apay a mapukaw ti dadduma ti pannakariknada iti kinaganat?
4 Kas nakitatayon, ti kinaganat ket masansan a mainaig iti limitado a tiempo wenno panawen nga adda pagpatinggaanna. Adu ti pammaneknek iti Biblia ken iti historia nga agbibiagtayon iti tiempo ti panungpalan. (Mat. 24:3, 33; 2 Tim. 3:1-5) Ngem awan ti tao a makaammo iti eksakto a tiempo nga iyaay ti panungpalan. Idi dinakamatna dagiti detalye “ti pagilasinan” kas tanda ti “panungpalan ti sistema ti bambanag,” espesipiko a kinuna ni Jesus: “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama.” (Mat. 24:36) Gapu iti dayta, mabalin a marigatan ti dadduma a mangtaginayon iti pannakariknada iti kinaganat iti panaglabas dagiti tawen, nangruna no nabayagen nga ar-aramidenda dayta. (Prov. 13:12) Kasta met kadi ti mariknayo no dadduma? Ania ti makatulong kadatayo a mangpatanor wenno mangtaginayon iti pannakarikna iti kinaganat para iti trabaho nga ipapaaramid ita kadatayo ni Jehova a Dios ken ni Jesu-Kristo?
Tuladentayo ti Pagwadantayo a ni Jesus
5. Kadagiti ania a pamay-an a nangipakita ni Jesus iti kinaganat iti ministerio?
5 Kadagiti amin a nangipakita iti kinaganat ti panagserbi iti Dios, ni Jesu-Kristo ti kangrunaan a pagwadantayo. Ti maysa a rason a nakarikna iti kinaganat ket ti kaadu ti masapul nga iringpasna iti uneg laeng ti tallo ket kagudua a tawen. Nupay kasta, ad-adu ti naibanagna no maipapan iti pudno a panagdayaw ngem iti asinoman. Impakaammona ti nagan ken panggep ni Amana, inkasabana ti naimbag a damag ti Pagarian, imbutaktakna ti kinamanaginsisingpet ken palso a pannursuro dagiti lider ti relihion, ken intandudona ti kinasoberano ni Jehova agingga iti ipapatayna. Inaramidna ti amin a kabaelanna a nangisuro, nangtulong, ken nangpaimbag kadagiti tattao iti sadinoman a napananna. (Mat. 9:35) Awan ti asinoman a nakaibanag iti kasta kaadu iti ababa laeng a tiempo. Sipipinget nga intungpal ni Jesus ti trabahona.—Juan 18:37.
6. Ania ti nakaipamaysaan ti biag ni Jesus?
6 Ania ti nangtignay ken Jesus nga agtrabaho a sipipinget iti intero a ministeriona? Ammo ni Jesus manipud iti padto ni Daniel no kasano kaababa ti tiempo nga inted kenkuana ni Jehova a mangiringpas iti trabahona. (Dan. 9:27) Kas nadakamaten, agpatingga ti ministeriona ditoy daga “iti kagudua ti lawas,” wenno kalpasan ti tallo ket kagudua a tawen. Di nagbayag kalpasan ti naballigi nga iseserrek ni Jesus idiay Jerusalem iti primavera ti 33 K.P., kinunana: “Ti oras dimtengen tapno maipadayag ti Anak ti tao.” (Juan 12:23) Nupay ammo ni Jesus a dandanin ti ipapatayna, saan a dayta ti nakaipamaysaan ti biagna wenno ti kangrunaan a makagapu iti naanep a panagtrabahona. Imbes ketdi, impangpangrunana ti panangaramid iti pagayatan ni Amana ken ti panagayatna iti padana a tao. Dayta nga ayat ti nangtignay kenkuana a mangummong ken mangsanay kadagiti adalanna, nga imbaonna ida a mangasaba. Inaramidna dayta tapno maitultuloyda ti trabaho nga inrugina ken ad-adu pay ti maitungpalda ngem iti naaramidanna.—Basaen ti Juan 14:12.
7, 8. Ania ti reaksion dagiti adalan iti panangdalus ni Jesus iti templo, ken apay a kasta ti inaramidna?
7 Adda maysa a pagteng iti biag ni Jesus a nalawag a mangpaneknek iti kinaregtana. Napasamak dayta iti rugrugi ti ministeriona bayat ti Paskua idi 30 K.P. Napan ni Jesus ken dagiti adalanna idiay Jerusalem ket nakitada iti templo dagiti “aglaklako kadagiti baka ken karnero ken kalapati ken dagiti managsukat iti kuarta kadagiti tugawda.” Ania ti inaramid ni Jesus ken ania ti reaksion dagiti adalanna iti dayta?—Basaen ti Juan 2:13-17.
8 Ti inaramid ken imbaga ni Jesus iti daydi a pagteng impalagipna kadagiti adalan dagiti naimpadtuan a sasao ti maysa a salmo ni David: “Ti bin-ig a regta maipaay iti balaymo inibusnak.” (Sal. 69:9) Apay? Gapu ta nakapegpeggad ti inaramid ni Jesus. Dagiti ngamin mangimatmaton iti templo—dagiti papadi, eskriba, ken dadduma pay—ti adda iti likudan ti di maiparbeng a panagnegosio a maar-aramid sadiay. Ammo ni Jesus nga isu ket busoren dagiti lider ti relihion idi kaaldawanna gapu iti panangibutaktak ken panangpasardengna iti aramidda. Kas iti siuumiso a nautob dagiti adalan ni Jesus, nabatad ‘ti regtana maipaay iti balay ti Dios,’ wenno kinaregta maipaay iti pudno a panagdayaw. Ngem ania ti kinaregta? Naiduma kadi dayta iti kinaganat?
Nagdumaan ti Kinaganat ken Kinaregta
9. Ania ti kinaregta?
9 Sigun iti maysa a diksionario, ti “kinaregta” ket “kinagagar ken narayray nga interes a mangragpat iti maysa a banag.” Awan duadua a kasta ti impakita ni Jesus iti ministeriona. Gapuna, kastoy ti panangipatarus Ti Baro a Naimbag a Damag Biblia iti dayta a teksto: “Kasla gumilgil-ayab nga apuy ti panagayatko iti Templom.” Makapainteres ta iti dadduma a lenguahe iti Daya, ti termino a “kinaregta” ket buklen ti sasao a literal a kaipapananna “nabara a puso,” a kasla umap-apuy a puso. Di pakasdaawan a dagiti adalan nalagipda dagiti sasao ni David idi nakitada ti inaramid ni Jesus idiay templo. Ngem ania ti namaggil-ayab iti puso ni Jesus, no ar-arigen, ken nanggutugot kenkuana nga agtignay iti kasta a pamay-an?
10. Ania ti kaipapanan ti “kinaregta” sigun iti pannakaaramatna iti Biblia?
10 Ti sao a “kinaregta” iti salmo ni David ket nagtaud iti Hebreo a sao a masansan a maipatarus kas ‘imon’ iti dadduma a paset ti Biblia. No dadduma, ipaulog dayta ti Baro a Lubong a Patarus kas “mangalkalikagum iti naipamaysa a debosion.” (Basaen ti Exodo 20:5; 34:14; Josue 24:19.) Kuna ti maysa a diksionario a daytoy a sao ket masansan a mausar mainaig iti relasion ti agassawa. No kasano nga adda ekslusibo a kalintegan ti agassawa iti maysa ken maysa, adda met ekslusibo a kalintegan ti Dios kadagidiay kukuana ken salaknibanna dayta a kalintegan. Gapuna, ti kinaregta a nadakamat iti Biblia ket saan laeng a kinagagar wenno kinapinget a mangaramid iti maysa a banag, kas iti ipakpakita ti dadduma iti paboritoda nga ay-ayam. Ti kinaregta ni David ket panagimon iti positibo nga anag, kayatna a sawen, dina ipalubos nga adda aniaman a karibal wenno mangumsi iti Dios. Maysa dayta a nasged a tarigagay a mangsalaknib iti naimbag a nagan wenno mangatur iti kamali.
11. Ania ti nangtignay ken Jesus a mangipakita iti kinaregta?
11 Saan a nagbiddut dagiti adalan ni Jesus idi innaigda ti sasao ni David iti nakitada nga inaramid ni Jesus iti templo. Inaramidna ti amin a kabaelanna saan laeng a gapu ta limitado ti tiempona no di ket gapu iti kinaregtana—wenno panagimonna—agpaay iti nagan ni Amana ken iti pudno a panagdayaw. Maiparbeng laeng ti kinaregta, wenno panagimonna, idi nakitana a nakaro ti pannakaumsi ken pannakatabbaaw ti nagan ti Dios, isu a nagtignay tapno mailintegna ti situasion. Idi naimatanganna a mairurrurumen dagiti nanumo a tattao ken gunggundawayan ida dagiti lider ti relihion, ti kinaregtana ti nangtignay kenkuana a mangbang-ar kadagiti tattao ken siiinget a kinondenarna dagiti manangirurumen a lider ti relihion.—Mat. 9:36; 23:2, 4, 27, 28, 33.
Naregtakayo Koma iti Pudno a Panagdayaw
12, 13. Ania ti inaramid dagiti lider ti relihion ti Kakristianuan ita mainaig iti (a) nagan ti Dios? (b) Pagarian ti Dios?
12 Ti kasasaad ti relihion ita ket umasping—no saan a dakdakes pay—idi kaaldawan ni Jesus. Kas pagarigan, ti umuna nga insuro ni Jesus nga ikararag dagiti pasurotna ket mainaig iti nagan ti Dios: “Masantipikar koma ti naganmo.” (Mat. 6:9) Makitkitatayo kadi a dagiti lider ti relihion, nangnangruna ti klero ti Kakristianuan, isursuroda dagiti tattao a mangammo iti nagan ti Dios ken mangsantipikar, wenno mangidaydayaw iti dayta? Saan, yantangay di umiso ti panangiladawanda iti Dios babaen kadagiti ulbod a pannursuro kas iti Trinidad, imortalidad ti kararua, ken umap-apuy nga impierno, a pagparangenda a misterioso ti Dios, narigat a matarusan, naulpit, ken sadista pay ketdi. Inumsida pay ti Dios babaen ti nakababain nga aramidda ken ti kinamanaginsisingpetda. (Basaen ti Roma 2:21-24.) Kanayonanna, inaramidda ti amin a kabaelanda a mangilemmeng iti personal a nagan ti Dios, nga inikkatda pay ketdi dayta kadagiti patarusda iti Biblia. Iti kasta, laplapdanda dagiti tattao nga umadani iti Dios ken mangpatanor iti personal a relasion kenkuana.—Sant. 4:7, 8.
13 Insuro pay ni Jesus dagiti pasurotna nga ikararagda ti Pagarian ti Dios: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mat. 6:10) Nupay masansan nga ulit-uliten nga ikararag dayta dagiti lider ti relihion ti Kakristianuan, iparparegtada kadagiti tattao a suportaranda dagiti napolitikaan ken dadduma pay a natauan nga institusion. Kanayonanna, tagibassitenda dagidiay mangikagkagumaan a mangikasaba ken mangsaksi iti dayta a Pagarian. Kas resultana, adu kadagiti agkunkuna a Kristiano ti saanen a mangdakdakamat iti Pagarian ti Dios, ken awanen ti pammatida iti dayta.
14. Kasano a ti klero ti Kakristianuan tinagilag-anna ti Sao ti Dios?
14 Nalawag a kinuna ni Jesus iti kararagna iti Dios: “Ti saom ket kinapudno.” (Juan 17:17) Idi adda pay la ditoy daga, impasimudaag ni Jesus a mangdutok iti “matalek ken masirib nga adipen” a mangipaay iti naespirituan a taraon iti ili ti Dios. (Mat. 24:45) Nupay ibagbaga ti klero ti Kakristianuan nga isuda ti nakaitalkan ti Sao ti Dios, simamatalek kadi nga itungtungpalda ti annongen nga intalek kadakuada ti Apo? Saan. Ibagbagada a ti linaon ti Biblia ket sarsarita laeng. Imbes a pakanen dagiti klero ti arbanda iti naespirituan a taraon tapno maliwliwa ken malawlawaganda, dagiti laeng kayat a mangngeg dagiti pasurotda ti ibagada babaen kadagiti natauan a pilosopia. Kanayonanna, tinagilag-anda dagiti moral a pagalagadan ti Dios tapno maay-ayo dagiti pasurotda nga agbibiag a maitunos iti maaw-awagan baro a moralidad.—2 Tim. 4:3, 4.
15. Ania ti mariknayo maipapan iti amin nga inaramid dagiti lider ti relihion nga agkunkuna nga agserserbi iti Dios?
15 Gapu ta amin dagita ket ar-aramiden dagiti agkunkuna nga agserserbi iti Dios a nadakamat iti Biblia, adu a nasingpet a tattao ti naupay wenno naawananen iti pammati iti Dios ken iti Biblia. Natnagda iti silo ni Satanas ken iti dakes a sistema ti bambanag. Ania ti mariknayo no inaldaw a makakita ken makangngegkayo kadagiti kasta a bambanag? Kas adipen ni Jehova, saankayo kadi a matignay a mangilinteg iti pannakaumsi ken pannakatabbaaw ti nagan ti Dios? No makitayo dagiti nasingpet a tattao nga al-allilawen ken gunggundawayan dagiti lider ti relihion, saankayo kadi a matignay a mangliwliwa kadakuada? Idi nakita ni Jesus dagiti tattao idi kaaldawanna a “nalalatan ken naiwarawarada a kasla karkarnero nga awanan pastor,” saan laeng a simnek ti asina. “Rinugianna nga isuro ida iti adu a banag.” (Mat. 9:36; Mar. 6:34) Kas ken Jesus, masapul nga agbalintayo a naregta iti pudno a panagdayaw.
16, 17. (a) Ania ti rumbeng a mangtignay kadatayo nga agbalin a naregta iti ministerio? (b) Ania ti usigentayo iti sumaganad nga artikulo?
16 No naregtatayo iti ministerio, maaddaan iti naun-uneg a kaipapanan kadatayo dagiti sasao ni apostol Pablo iti 1 Timoteo 2:3, 4. (Basaen.) Naregtatayo iti ministerio saan laeng a gapu ta ammotayo nga agbibiagtayon iti maudi nga al-aldaw no di pay ket ammotayo a pagayatan dayta ti Dios. Kayatna nga amin a tattao ket maaddaan iti pannakaammo iti kinapudno tapno agdayaw ken agserbida kenkuana, iti kasta, mabendisionanda. Saan a ti limitado a tiempo ti kangrunaan a rason a matignaytayo nga agbalin a naregta iti ministerio no di ket ti tarigagaytayo a mangidayaw iti nagan ti Dios ken tumulong kadagiti tattao a mangammo iti pagayatanna. Naregtatayo iti pudno a panagdayaw.—1 Tim. 4:16.
17 Kas ad-adipen ni Jehova, naparaburantayo iti pannakaammo iti kinapudno maipapan iti panggep ti Dios iti sangatauan ken iti daga. Kabaelantayo a tulongan dagiti tattao a gumun-od iti kinaragsak ken iti pudno a namnama iti masanguanan. Maisurotayo kadakuada no kasano ti agtalinaed a natalged inton dumteng ti pannakadadael ti sistema ti bambanag ni Satanas. (2 Tes. 1:7-9) Imbes a mapaay wenno maupaytayo gapu ta kasla maitantantan ti aldaw ni Jehova, maragsakantayo koma ta adda pay tiempo nga agbalintayo a naregta para iti pudno a panagdayaw. (Mik. 7:7; Hab. 2:3) Kasanotayo a mapatanor ti kasta a kinaregta? Usigentayo dayta iti sumaganad nga artikulo.
Mailawlawagyo Kadi?
• Ania ti nangtignay ken Jesus nga agbalin a nagaget iti intero a ministeriona?
• Ania ti kaipapanan ti “kinaregta” sigun iti pannakaaramatna iti Biblia?
• Ania ti makitkitatayo ita a mangtignay kadatayo nga agbalin a naregta para iti pudno a panagdayaw?
[Salsaludsod]
[Ladawan iti panid 8]
Impamaysa ni Jesus nga inaramid ti pagayatan ni Amana ken impakitana ti panagayatna iti padana a tao
[Ladawan iti panid 10]
Masapul nga agbalintayo a naregta iti pudno a panagdayaw