Saan Pay a Naladaw Tapno Agserbi iti Dios

Idiay Málaga, a makin-abagatan nga Espania, adda agina nga agpada nga agnagan iti Ana a nabautisaran idi Disiembre 19, 2009. Karamanda iti 2,352 a nabautisaran idiay Espania idi 2009. Ngem adda pay naisangsangayan a banag kadagitoy nga agina​—ti tawenda. Agtawen ti ina iti 107 ken ti anak iti 83!

Ania ti nakatignayanda nga agpabautisar kas simbolo ti dedikasionda ken Jehova? Iti rugrugi ti dekada 1970, adda kaarrubada a masansan a mangawis iti ub-ubing nga Ana a tumabuno iti Panagadal iti Libro ti Kongregasion a maang-angay iti balay ti maysa a Saksi. Sagpaminsan a tumabuno ni Ana. Ngem saan a nagtultuloy gapu iti trabahona.

Agarup sangapulo a tawen kalpasanna, nangrugi a nagadal iti Biblia ti dadduma nga annak ni Ana ket idi agangay nagbalinda nga adipen ni Jehova. Ti maysa kadakuada ket ni Mari Carmen, a nangbiag iti interes ni nanangna iti kinapudno ken nangtulong kenkuana nga agpayadal iti Biblia. Idi agangay, ti lola ni Mari Camen a ni Ana, naginteres met iti Biblia. Kamaudiananna, sangapulo a miembro daytoy a pamilia ti nagpabautisar.

Iti aldaw ti bautismo ti agina nga Ana, napalalo ti ragsakda. “Nakaim-imbag kaniak ni Jehova ta inikkannak iti gundaway a mangam-ammo kenkuana,” kuna ti 107 ti tawenna a ni Ana. Kinuna ti anakna: “Sakbay nga umay ti Paraiso, kayatko ti agserbi ken Jehova, aramiden ti pagayatanna, ken ikasaba ti naimbag a damag agingga a kabaelak.”

Ti gubuayan ti dakkel a rag-o dagitoy dua a balo ket ti itatabunoda kadagiti gimong. “Awan a pulos ti malangananda a gimong,” kuna ti maysa a panglakayen iti kongregasionda. “Kanayon a nakasaganada nga agkomento iti Panagadal iti Pagwanawanan.”

Ti nagsayaat nga ulidanda ipalagipna kadatayo ti maysa a balo nga agnagan iti Anna “a saan a pulos limmanglangan idiay templo, a mangipapaay iti sagrado a panagserbi iti rabii ken aldaw buyogen dagiti panagayunar ken ar-araraw.” Gapu iti dayta, naaddaan ni Anna iti pribilehio a makakita iti ubing a ni Jesus. (Luc. 2:36-38) Iti edad a 84, nakapagserbi pay laeng ni Anna ken ni Jehova, ken uray dagiti katukayona a nadakamat ditoy.

Adda kadi kakabagianyo a mayat a dumngeg iti mensahe ti Biblia? Wenno adda kadi nakasaritayo nga interesado a lakay wenno baket a dimngeg kadakayo bayat ti panangasabayo iti pagtaenganna? Mabalin a kaslada kada Ana iti daytoy a kapadasan, yantangay saan pay a naladaw tapno irugida ti agserbi iti pudno a Dios a ni Jehova.

[Blurb iti panid 25]

“Nakaim-imbag kaniak ni Jehova”

[Blurb iti panid 25]

“Sakbay nga umay ti Paraiso, kayatko ti agserbi ken Jehova”