Salsaludsod Dagiti Agbasbasa

Mabasatayo iti Genesis 6:3: “Ti espirituk saanto nga agtignay iti tao iti di nakedngan gapu ta isu lasag met. Iti kasta ti al-aldawna agdagupto iti sangagasut ket duapulo a tawen.” Kinedngan kadi ni Jehova ti kapaut ti biag ti tao iti 120 a tawen, ken kasta kadi kabayag ti panangikasaba ni Noe iti iyaay ti Layus?

Agpada a saan ti sungbat dagita a saludsod.

Sakbay ti Layus, ginasgasut ti kapaut ti biag ti adu a tao. Agtawen ni Noe iti 600 idi dimteng ti Layus, ken nagbiag iti 950 a tawen. (Gen. 7:6; 9:29) Adda dagiti nayanak kalpasan ti Layus a nagbiag iti nasursurok ngem 120 a tawen. Natay ni Arpaksad idi agtawen iti 438 ken ni Shela idi agtawen iti 433. (Gen. 11:10-15) Ngem idi panawen ni Moises, ti gagangay a kapaut ti biag ti tao ket 70 wenno 80 a tawen. (Sal. 90:10) Gapuna, saan a kinedngan ti Genesis 6:3 ti kapaut ti biag ti tao iti 120 a tawen.

No kasta, dayta kadi a teksto ket sasao ti Dios ken ni Noe mainaig iti panangpakdaar iti sabsabali maipapan iti um-umay a pannakadadael a dumteng kalpasan iti 120 a tawen? Saan. Adu a gundaway a nakisarita ti Dios ken ni Noe. Kalpasan dayta a teksto, adda sangapulo a bersikulo a mabasatayo a nagsao ti Dios ken ni Noe. Kuna ti salaysay: “Ti Dios kinunana ken Noe: ‘Ti panungpalan ti isuamin a lasag dimtengen iti imatangko, agsipud ta ti daga napno iti kinaranggas.’” Kadagiti simmaganad a tawen, nairingpas ni Noe ti nagrigat a trabaho a panangibangon iti daong, ket iti dayta a tiempo, “Ni Jehova kinunana ken Noe: ‘Sumrekka, sika ken ti intero a sangakabbalayam, iti daong.’” (Gen. 6:13; 7:1) Ken iti dadduma  pay a gundaway, adda sumagmamano a bambanag nga impakaammo ni Jehova ken ni Noe.​—Gen. 8:15; 9:1, 8, 17.

Ngem naiduma ti mabasatayo iti Genesis 6:3, yantangay saan a nadakamat ni Noe ken saan met a nadakamat a nakisarita ti Dios kenkuana. Mabalin a panangyebkas laeng dayta ti Dios iti panggepna wenno iti kayatna nga aramiden. (Idilig ti Genesis 8:21.) Makapainteres ta iti pakasaritaan dagiti pasamak sakbay a naparsua ni Adan, mabasatayo dagiti ebkas a kas iti: “Kinuna ti Dios.” (Gen. 1:6, 9, 14, 20, 24) Nalawag a saan a kasarsarita ni Jehova dagiti tattao ditoy daga gapu ta saanda pay idi a naparsua.

Nainkalintegan ngarud a panunoten a dakdakamaten ti Genesis 6:3 ti pangngeddeng ti Dios a mamagpatingga iti dakes a sistema dagiti bambanag ditoy daga. Inkeddeng ni Jehova nga aramidenna dayta kalpasan ti 120 a tawen nupay saan pay idi nga ammo dayta ni Noe. Ngem apay a nangikeddeng iti tiempo? Apay a masapul nga aguray?

Ibaga ni apostol Pedro ti rason: “Ti kinaanus ti Dios nagur-uray idi kaaldawan ni Noe, bayat a maibangbangon daydi daong, nga iti dayta sumagmamano a tattao, kayatna a sawen, walo a kararua, ti sitatalged a nailasat iti danum.” (1 Ped. 3:20) Wen, idi inkeddeng ti Dios ti 120 a tawen, adda pay dagiti bambanag a masapul a maaramid. Agarup 20 a tawen kalpasanna, naaddaan da Noe ken ti asawana kadagiti annak. (Gen. 5:32; 7:6) Dimmakkel ken nangasawa dagiti tallo nga annakda isu a nagbalin a “walo a kararua” ti kameng ti pamiliada. Kalpasanna, masapul nga ibangonda ti daong, maysa a narigat a trabaho gapu ta nagdakkel dayta ken manmano laeng ti kameng ti pamilia ni Noe. Wen, ti panagan-anus ti Dios iti 120 a tawen ket nangted iti gundaway tapno mairingpasda dagita a bambanag ken agbalin a posible ti pannakataginayon ti biag, iti kasta, naispal wenno “sitatalged a nailasat iti danum” ti walo a matalek a tattao.

Saan nga espesipiko a dinakamat ti Biblia ti tawen a panangibaga ni Jehova ken ni Noe nga umay ti Layus. Posible a naglabas pay ti 40 wenno 50 a tawen sakbay a dimteng ti Layus yantangay naaddaan pay ni Noe iti annak, dimmakkelda, ken nagasawada. Kalpasanna, kinuna ni Jehova ken ni Noe: “Ti panungpalan ti isuamin a lasag dimtengen iti imatangko.” Kinunana pay a masapul a mangibangon ni Noe iti dakkel a daong ken sumrekda iti dayta a sangapamiliaan. (Gen. 6:13-18) Bayat dagita a tawen, saan laeng a nagbiag ni Noe buyogen ti kinalinteg. ‘Inkaskasabana pay ti kinalinteg,’ nga impakaammona ti naglawag a mamakdaar a mensahe​—ti pangngeddeng ti Dios a mangdadael iti kinadakes idi a tiempo. Saan nga ammo ni Noe a nasaksakbay no ania a tawen a dumteng dayta, ngem ammo a sigurado a dumteng. Ken ammoyo a talaga a dimteng.​—2 Ped. 2:5.