Napabileg a Mangdaer iti Aniaman a Pakasuotan

“Ta iti amin a bambanag addaanak iti bileg gapu iti daydiay mangmangted kaniak iti pannakabalin.”​—FIL. 4:13.

1. Apay a maipaspasango ti ili ni Jehova iti adu a pakarigatan?

 MASANSAN a maipaspasango ti ili ni Jehova iti nagduduma a pakarigatan. Mabalin a maigapu dagita iti bukodtayo a kinaimperpekto wenno iti sistema ti bambanag a pagbibiagantayo. Ti sabali pay a makagapu ket ti panagbinnusor iti nagbaetan dagiti agserserbi ken saan nga agserserbi iti Dios. (Gen. 3:15) Sipud pay rugrugi ti pakasaritaan ti tao, tultulonganen ti Dios dagiti matalek nga adipenna a mangdaer iti narelihiosuan a panangidadanes, mangsaranget iti makadangran nga impluensia ti kakadua, ken mangibtur iti amin a kita ti pakarigatan. Ti nasantuan nga espirituna mapabilegnatayo a mangaramid met kadagita.

Narelihiosuan a Panangidadanes

2. Ania dagiti kita ti narelihiosuan a panangidadanes, ken ania ti panggep dagita?

² Ti narelihiosuan a panangidadanes ket inggagara a panangriribuk wenno panangdangran kadagiti tattao gapu iti pammati wenno patpatienda. Nairanta dayta a mangdadael kadagiti kasta a patpatien, mangpasardeng iti panagsaknapna, wenno mangdadael iti kinatarnaw dagiti mamati iti dayta. Nagduduma dagiti kita ti panangidadanes​—adda dagiti direkta, ken saan a  direkta. Ti idadarup ni Satanas ket inyarig ti Biblia iti idadarup ti urbon a leon ken ti kobra.​—Basaen ti Salmo 91:13.

3. Iladawanyo ti arig leon ken arig kobra a panangidadanes.

³ Kas iti narungsot a leon, masansan a direkta ti idadarup ni Satanas babaen ti kinaranggas, panangibalud, wenno panangiparit. (Sal. 94:20) Ipakita dagiti report iti Tinawen a Libro ti pakasaritaan dagiti Saksi ni Jehova iti moderno a panawen a naglaon iti adu a salaysay maipapan kadagiti kasta a taktika. Iti adu a lugar, dagiti managderraaw minaltratoda ti ili ti Dios, a dadduma kadagita ket indauluan dagiti klero wenno dagiti panatiko iti politika. Sumagmamano ti nagsardeng nga agserbi ken Jehova gapu kadagiti kasta nga arig leon nga idadarup. Kas iti kobra, mabalin a nasikap ti idadarup ti Diablo tapno sabidonganna ti isip dagiti tattao ken allilawenna ida a mangaramid iti pagayatanna. Nairanta dayta a kita ti idadarup a mangpakapuy wenno mangdadael iti espiritualidadtayo. Ngem babaen ti nasantuan nga espiritu ti Dios, masarangettayo dagita a kita ti pannakaidadanes.

4, 5. Ania ti kasayaatan a pamay-an tapno masaganaan ti pannakaidadanes, ken apay? Mangted iti pagarigan.

⁴ Ti panangpampanunot kadagiti posible a pamay-an ti pannakaidadanes ket saan nga isu ti kasayaatan a panagsagana iti dayta. Kinapudnona, ditay ammo no ania ti mapasamak iti masanguanan isu nga awan ti magunggonatayo no maringgorantayo kadagiti bambanag a mabalin a di mapasamak. Ngem adda mabalintayo nga aramiden. Adu ti sibaballigi a nakapagibtur iti pannakaidadanes gapu iti panangut-utobda iti ulidan dagiti nangsalimetmet iti kinatarnawda a nairekord iti Kasuratan, agraman kadagiti pannursuro ken ulidan ni Jesus. Dayta ti nangtulong kadakuada a nangparayray iti panagayatda ken Jehova. Dayta met a panagayat ti nakatulong kadakuada a mangsaranget iti aniaman a suot a nakaipasanguanda.

⁵ Usigentayo ti kapadasan ti dua a kakabsat a babbai idiay Malawi. Tapno mapilitda a gumatang iti kard ti napolitikaan a partido, maysa a grupo ti naranggas a managderraaw ti nangkabkabil, nanglabus, ken nangpangta a mangrames kadakuada. Siuulbod a kinuna ti grupo a gimmatangen iti kard dagiti kameng ti pamilia ti Bethel. Ania ti sungbat dagitoy a kakabsat? “Ni Jehova a Dios laeng ti pagserserbianmi. Uray no gimmatangen iti kard dagiti kakabsat iti sanga nga opisina, saan nga agbalbaliw ti pangngeddengmi. Saankami nga agkompromiso uray papatayendakami!” Kalpasan ti situtured a panangsalimetmetda iti takderda, nawayawayaan dagiti dua a kakabsat.

6, 7. Kasano a pabpabilgen ni Jehova dagiti adipenna a mangsaranget iti pannakaidadanes?

⁶ Ammo ni apostol Pablo a dagiti Kristiano idiay Tesalonica inawatda ti mensahe ti kinapudno iti “sidong ti adu a rigat,” ngem “buyogen ti rag-o ti nasantuan nga espiritu.” (1 Tes. 1:6) Kinapudnona, adu a Kristiano idi ken ita, a naipasango ken nangsaranget iti pannakaidadanes ti nangibaga a bayat ti karirigatan a pannakasuotda, naaddaanda iti makin-uneg a talna, maysa nga aspeto ti bunga ti nasantuan nga espiritu ti Dios. (Gal. 5:22) Dayta a talna ti nangsaluad iti puso ken panunotda. Wen, us-usaren ni Jehova ti aktibo a puersana a mangpabileg kadagiti adipenna a mangsaranget kadagiti pakasuotan ken agtignay a nainsiriban no dumteng ti pakarigatan. a

⁷ Masmasdaaw dagiti makapaliiw iti determinasion ti ili ti Dios a mangtaginayon iti kinatarnawda uray iti sidong ti naulpit a pannakaidadanes. Arigna addaan dagiti Saksi iti bileg a napigpigsa ngem iti tao. Kinapudnona, addaanda iti kasta. Impanamnama kadatayo ni apostol Pedro: “No maum-umsikayo gapu iti nagan ni Kristo, naragsakkayo, agsipud ta ti espiritu ti dayag, ti mismo nga espiritu ti Dios, agtataeng kadakayo.” (1 Ped. 4:14) Ti pannakaidadanestayo gapu iti panangsalimetmettayo kadagiti nalinteg a pagalagadan ipasimudaagna nga adda kadatayo ti anamong ni Jehova. (Mat. 5:10-12; Juan 15:20) Anian a rag-o ti itden dayta kadatayo!

 Impluensia ti Kakadua

8. (a) Apay a nabaelan da Josue ken Caleb a sinaranget ti impluensia ti kakaduada? (b) Ania ti maadaltayo iti ulidan da Josue ken Caleb?

⁸ Ti nasiksikap a kita ti ibubusor a masapul nga ibturan dagiti Kristiano ket ti dakes nga impluensia dagiti kakadua. Ngem gapu ta nabilbileg nga amang ti espiritu ni Jehova ngem iti espiritu ti lubong, kabaelantayo a sarangten dagiti tattao a mangumsi, mangpadakes, wenno mangpilit kadatayo a mangsurot kadagiti pagalagadanda. Kas pagarigan, apay a nabaelan da Josue ken Caleb a kinontra ti panangmatmat ti sangapulo nga espia a naibaon iti daga ti Canaan? Ti nasantuan nga espiritu ti nangtignay kadakuada a maaddaan iti naiduma nga “espiritu,” wenno panangmatmat.​—Basaen ti Numeros 13:30; 14:6-10, 24.

9. Apay a rumbeng a di agamak dagiti Kristiano a naidumada iti kaaduan?

⁹ Ti met laeng nasantuan nga espiritu ti nangpabileg kadagiti apostol ni Jesus tapno agtulnogda iti Dios, saan ket a kadagidiay maibilbilang kas mararaem a mannursuro ti pudno a relihion. (Ara. 4:21, 31; 5:29, 32) Kaykayat ti adu a tattao a tuladen ti ar-aramiden ti kaaduan tapno maliklikan ti riri. Ngem dagiti pudno a Kristiano masansan a takderanda ti ammoda nga umiso. Dida maamak a naiduma gapu iti bileg nga ipaay ti aktibo a puersa ti Dios. (2 Tim. 1:7) Usigentayo ti maysa a benneg a masapul a ditay tumulok iti impluensia dagiti kakadua.

10. Ania a parikut ti mabalin a pakaipasanguan ti dadduma a Kristiano?

¹⁰ Saan nga ammo ti dadduma nga agtutubo no ania ti aramidenda no maammuanda nga adda basol a naaramid ti gayyemda. Mabalin a mariknada a kasla liniputanda ti gayyemda no agipulongda kadagiti panglakayen isu nga ipapanda a nasaysayaat laengen no dida ibagbaga dayta iti sabali. Mabalin a ti nakabasol pilitenna pay ketdi ti gayyemna a mangilimed iti basolna. Siempre, saan laeng a dagiti agtutubo ti maipaspasango iti kasta a parikut. Marigatan met ti dadduma nga adulto a mangibaga kadagiti panglakayen iti basol a naaramidan ti gayyem wenno kapamiliada. Ngem ania ti rumbeng nga aramiden dagiti Kristiano mainaig iti dayta?

11, 12. Ania ti kasayaatan nga aramidenyo no adda kakongregasionyo a mangpilit kadakayo a mangilimed iti basolna, ken apay?

¹¹ Panunotenyo daytoy a senario. Ipapantayo a ti agtutubo a ni Alex naammuanna a ti gayyemna iti kongregasion a ni Steve ket nayugalinan ti agbuya iti pornograpia. Imbagana ken ni Steve a maburburiboran iti ar-aramiden daytoy. Ngem di inkankano ni Steve ti imbagana. Idi imparegta ni Alex nga agpudno ni Steve kadagiti panglakayen, kinunana a no talaga nga aggayyemda, saan nga agipulpulong ni Alex. Rumbeng kadi a maamak ni Alex a madadael ti panaggayyemda? Mabalin a panunotenna no asino ngata ti patien dagiti panglakayen no aglibak ni Steve. Kaskasdi, ad-adda a kumaro ti kasasaad no agulimek lattan ni Alex. Kinapudnona, mabalin nga agresulta dayta iti pannakadadael ti relasion ni Steve ken ni Jehova. Nasayaat a laglagipen ni Alex a “ti panagpigerger iti tattao isu  ti mangipakat iti silo, ngem daydiay agtalek ken Jehova masalaknibanto.” (Prov. 29:25) Ania pay ti mabalin nga aramiden ni Alex? Mabalin a siaayat nga asitganna manen ni Steve ken sipaprangka a pagsaritaanda ti basol daytoy. Agkalikagum dayta iti kinatured. Ngem mabalin nga iti dayta a gundaway, kayaten ni Steve a pagtungtonganda ti parikutna. Masapul a ni Alex iparegtana manen ken Steve nga agpudno kadagiti panglakayen ken ibagana a no dina aramiden dayta iti kabiitan a panawen, isun ti mangaramid iti dayta.​—Lev. 5:1.

¹² No maipasangoka iti kasta a situasion, mabalin a di maapresiar a dagus ti gayyemmo ti panangikagumaam a mangtulong kenkuana. Ngem mabalin a mabigbigna inton agangay nga agpaay a pagsayaatanna ti ar-aramidem. No ti nakabasol awatenna ti tulongmo, kanayonto nga agyaman kenka gapu iti kinatured ken kinasungdom. Iti sabali a bangir, no kaguranaka latta, talaga kadi a kasta a kita ti gayyem ti kayatmo? Ti kanayon nga umiso nga aramiden ket ti pananggun-od iti anamong ti katan-okan a Gayyemtayo a ni Jehova. No isu ti iyun-unatayo, raemendatayo dagiti mangay-ayat kenkuana gapu iti kinasungdotayo, iti kasta, agbalinda a pudno a gagayyemtayo. Ditay koma pulos ikkan iti lugar ti Diablo iti uneg ti kongregasion Kristiano tapno saantay a mapagleddaang ti nasantuan nga espiritu ni Jehova. Ngem agtigtignaytayo maitunos iti dayta no ikagumaantayo a pagtalinaeden a nasin-aw ti kongregasion Kristiano.​—Efe. 4:27, 30.

Nagduduma a Pakarigatan

13. Ania a kita ti pakarigatan ti pakaipaspasanguan ti ili ni Jehova, ken apay a nakasaksaknap dagita?

¹³ Mabalin a maipasangotayo iti nagduduma a kita ti pakarigatan kas iti pinansial a problema, pannakapukaw iti trabaho, natural a didigra, ipapatay ti ipatpateg iti biag, panagsakit, ken dadduma pay. Gapu ta agbibiagtayo iti “napeggad a tiempo,” manamnamatayo a maipasangotayo iti pakasuotan. (2 Tim. 3:1) No mapasamak dayta, ditay koma madanagan. Ti nasantuan nga espiritu mapabilegnatayo a mangibtur iti aniaman a kita ti pakarigatan.

14. Ania ti nangpabileg ken Job a mangibtur kadagiti pakarigatanna?

¹⁴ Nagsasaruno a pakarigatan ti sinagaba ni Job​—nakaro a sakit, pannakapukaw ti kinabaknang, annak, gagayyem, ken napukaw ni baketna ti panagtalekna ken Jehova. (Job 1:13-19; 2:7-9) Ngem babaen ken Eliu, nasarakan ni Job ti pudno a liwliwa. Ti mensahe ni Eliu ken ti kangrunaan a punto ti mensahe ni Jehova ken ni Job ket: “Agintekka ket ipakitam a sipapaliiwka iti nakaskasdaaw nga ar-aramid ti Dios.” (Job 37:14) Ania ti nakatulong ken Job a mangibtur kadagiti pakasuotanna? Ken ania ti makatulong met kadatayo a mangibtur kadagiti pakasuotantayo? Isu ti pananglaglagip ken panangutob iti nagduduma a panangiparangarang ni Jehova iti nasantuan nga espirituna ken iti pannakabalinna. (Job 38:1-41; 42:1, 2) Nalabit adda dagiti malagiptayo a gundaway a tinulongannatayo a mismo ti Dios kas pammaneknek iti pannakaseknanna. Agingga ita, maseknan pay laeng kadatayo.

15. Ania ti nangpabileg ken apostol Pablo a mangibtur kadagiti pakasuotanna?

¹⁵ Inibturan ni apostol Pablo ti adu a rigat a namagpeggad iti biagna maigapu iti pammatina. (2 Cor. 11:23-28) Kasano a nataginayonna ti  kinatimbengna ken kinatibker ti pakinakemna kadagiti kasta a kasasaad? Babaen ti panagkararag ken panagpannurayna ken ni Jehova. Bayat ti pannakasubokna, nga agparang a nagpatingga iti pannakapapatayna kas martir, insurat ni Pablo: “Ti Apo nagtakder iti sibayko ket nangipastrek kaniak iti pannakabalin, tapno babaen kaniak naan-anay a maitungpal ti panangaskasaba ket amin dagiti nasion mangngegda koma dayta; ket naispalak iti ngiwat ti leon.” (2 Tim. 4:17) Gapuna, manipud iti mismo a kapadasan ni Pablo, maipasiguradona kadagiti kapammatianna a saanda a rumbeng a “maringgoran iti aniaman.”​—Basaen ti Filipos 4:6, 7, 13.

16, 17. Mangted iti pagarigan no kasano a pabpabilgen ni Jehova dagiti adipenna ita a mangsaranget kadagiti pakarigatan.

¹⁶ Ni Roxana a maysa a payunir nakitana no kasano a tultulongan ni Jehova dagiti adipenna. Idi nagpakada nga agbakasion iti sumagmamano nga aldaw tapno makatabuno iti maysa a kombension, sipupungtot a kinuna ti employerna a masesante no mapan. Timmabuno latta ni Roxana ken sipapasnek nga inkararagna a saan koma a masesante. Kalpasanna, kimmalma ti riknana. Kas iti kinuna ti employer, isu ket nasesante iti kalunesanna kalpasan ti kombension. Nariribukan ni Roxana. Kasapulanna dayta a trabaho uray nababa laeng ti sueldona tapno masuportaranna ti pamiliana. Nagkararag manen, ken pinanunotna a gapu ta impaayan ti Dios iti naespirituan bayat ti kombension, sigurado nga ipaayanna met iti material. Iti pannagnana nga agawid, nakakita iti plakard iti maysa a paktoria nga agkasapulan iti eksperto nga agdait, isu a nagaplay. Naammuan ti manedyer nga awan ti kapadasanna iti dayta. Nupay kasta, inikkanna iti trabaho a dandani doble ti sueldona no idilig iti dati a trabahona. Narikna ni Roxana a nasungbatan dagiti kararagna. Ngem ti kasayaatan a bendisionna ket ti gundawayna a nangiranud iti naimbag a damag iti dadduma a katrabahuanna. Lima kadakuada, a pakairamanan ti manedyer, ti nangawat iti kinapudno ken nagpabautisar.

¹⁷ No dadduma, kasla saan a dagus a masungbatan dagiti kararagtayo wenno iti pamay-an a ninamnamatayo. Awan duadua nga adda naimbag a rason no apay a kasta. Ammo dayta ni Jehova ngem mabalin a satayto laeng maawatan dayta iti masanguanan. Nupay kasta, daytoy ti masiguradotayo​—saan a baybay-an ti Dios dagiti matalek kenkuana.​—Heb. 6:10.

Panangsaranget iti Pakasuotan ken Pakasulisogan

18, 19. (a) Apay a ditay pakasdaawan no maipasangotayo kadagiti pakasuotan ken pakasulisogan? (b) Kasanotayo a mapagballigian dagiti pakasuotan?

¹⁸ Saan a pakasdaawan dagiti adipen ni Jehova no maipasangoda iti sulisog, pannakaupay, pannakaidadanes, ken dakes nga impluensia ti kakadua. Gagangay a kaguranatayo ti lubong. (Juan 15:17-19) Ngem ti nasantuan nga espiritu matulongannatayo a mangsaranget iti aniaman a karit a mabalin a pakaipasanguantayo iti panagserbitayo iti Dios. Saan nga ipalubos ni Jehova a masulisogtayo iti labes ti kabaelantayo. (1 Cor. 10:13) Dinatayto pulos panawan wenno baybay-an. (Heb. 13:5) Masalakniban ken mapabilegtayo no agtulnogtayo iti naipaltiing a Saona. Kanayonanna, ti espiritu ti Dios tignayenna dagiti kapammatiantayo a tumulong kadatayo no kasapulantayo unay dayta.

¹⁹ Itultuloytayo koma amin a gun-oden ti nasantuan nga espiritu babaen ti kararag ken panagadal iti Kasuratan. Kanayon koma a ‘mapabilegtayo babaen ti isuamin a pannakabalin nga aggapu iti nadayag a pannakabalin ti Dios tapno naan-anay a makapagibturtayo ken maaddaantayo iti mabayag a panagitured buyogen ti rag-o.’​—Col. 1:11.

[Footnote]

Ania ti Sungbatyo?

• Kasanokayo a makapagsagana a mangsaranget iti pannakaidadanes?

• Ania ti rumbeng nga aramidenyo no ti maysa a nakabasol pilitennakayo a mangilimed iti basolna?

• Ania ti masiguradoyo no maipasangokayo iti aniaman a kita ti pakarigatan?

[Salsaludsod]

[Ladawan iti panid 28]

Ania ti maadaltayo kada Josue ken Caleb?

[Ladawan iti panid 29]

Kasanom a matulongan ti gayyemmo a nakaaramid iti basol?