Napabileg a Mangsaranget iti Sulisog ken Mangparmek iti Pannakaupay

“Umawatkayto iti pannakabalin inton dumteng kadakayo ti nasantuan nga espiritu.”​—ARA. 1:8.

1, 2. Ania a tulong ti inkari ni Jesus kadagiti adalanna, ken apay a kasapulanda dayta?

 AMMO ni Jesus a saan a kabaelan dagiti adalanna nga annuroten ti amin nga imbilinna kadakuada no iti kabukbukodanda laeng. Nabatad a kasapulanda ti pannakabalin a nabilbileg ngem iti tao no ikabilanganda ti saklawen ti annongenda a panangasaba, ti kinabileg dagiti bumusbusor kadakuada, ken ti kinakapuy ti pisikal a bagida. Gapuna, sakbay la unay a nagpalangit ni Jesus, impanamnamana kadagiti adalanna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.”​—Ara. 1:8.

² Nangrugi a natungpal dayta a kari idi Pentecostes 33 K.P. idi a ti nasantuan nga espiritu pinabilegna dagiti pasurot ni Jesu-Kristo tapno makasabaanda ti intero a Jerusalem. Awan ti ibubusor a nakapasardeng iti dayta. (Ara. 4:20) Bayat ti “amin nga al-aldaw agingga iti panungpalan ti sistema ti bambanag,” dagiti matalek a pasurot ni Jesus, a pakairamanantayo, ket agkasapulan unay iti kasta a bileg nga inted ti Dios.​—Mat. 28:20.

3. (a) Ilawlawag ti nagdumaan ti nasantuan nga espiritu ken pannakabalin. (b) Ania ti maitulong kadatayo ti pannakabalin nga ipapaay ni Jehova?

³ Inkari ni Jesus kadagiti adalanna nga ‘umawatdanto iti pannakabalin inton dumteng kadakuada ti nasantuan nga espiritu.’ Nagduma ti kaipapanan dagiti termino a “pannakabalin” ken “espiritu.” Ti espiritu ti Dios, ti aktibo a puersana, ket nailadawan kas puersa a maipapaay ken agtigtignay kadagiti tattao wenno bambanag tapno maitungpal ti pagayatan ti Dios. Ngem ti pannakabalin ket mabalin a madepinar kas ti “abilidad nga agtignay wenno mangpataud iti resulta.” Mabalin nga adda laeng dayta iti maysa a tao wenno banag agingga a kasapulan dayta tapno mangpataud iti resulta. Gapuna, ti nasantuan nga espiritu ket mabalin a mayarig iti koriente a mangted iti enerhia iti rechargeable a bateria, idinto ta ti pannakabalin ket kas iti enerhia a naurnong iti bateria. Ti pannakabalin nga ipapaay ni Jehova kadagiti adipenna babaen ti nasantuan nga espirituna ti mangpabileg kadatayo a mangitungpal iti dedikasiontayo kas Kristiano ken, no kasapulan, mangsaranget kadagiti dakes nga impluensia a maipasango kadatayo.​—Basaen ti Mikias 3:8; Colosas 1:29.

4. Ania ti usigentayo iti daytoy nga artikulo, ken apay?

⁴ Kasano a maiparangarang ti pannakabalin a maipapaay kadatayo babaen ti nasantuan nga espiritu? Kasano a tulongannatayo dayta nga agtignay iti nagduduma a kasasaad? Bayat nga ikagkagumaantayo ti agserbi a simamatalek iti Dios, maipasangotayo iti adu a lapped​—a nagtaud ken Satanas, iti iturturayanna a sistema ti bambanag, wenno iti bukodtayo a kinaimperpekto. Nagpateg a mapagballigiantayo dagita a lapped tapno makapagtultuloytayo kas Kristiano, mabalinantayo ti makiraman a regular iti ministerio, ken mataginayontayo ti nasayaat a relasion ken Jehova. Usigentayo no kasano a matulongannatayo ti nasantuan nga espiritu a mangsaranget iti sulisog ken mangdaer iti pannakabannog ken pannakaupay.

 Panangsaranget iti Sulisog

5. Kasano a mapabilegnatayo ti panagkararag?

⁵ Insuro ni Jesus dagiti pasurotna nga ikararagda: “Saannakami nga iyeg iti pannakasulisog, no di ket ispalennakami iti daydiay nadangkes.” (Mat. 6:13) Saan a baybay-an ni Jehova dagiti matalek nga adipenna a mangikarkararag iti dayta. Iti sabali pay a gundaway, kinuna ni Jesus a “ti Ama sadi langit mangtedto iti nasantuan nga espiritu kadagidiay agdawdawat kenkuana.” (Luc. 11:13) Anian a makaliwliwa a maammuan nga inkari ni Jehova nga ipaayannatayo iti espirituna tapno maaramidtayo ti umiso! Siempre, di kayat a sawen daytoy nga ilikliknatayo ni Jehova iti sulisog. (1 Cor. 10:13) Ngem no maipasangotayo iti sulisog, dayta ti tiempo a napaspasnek ti panagkararagtayo.​—Mat. 26:42.

6. Nangibatayan ni Jesus kadagiti sungbatna iti pannulisog ni Satanas?

⁶ Kas sungbat iti pannulisog ti Diablo, nagadaw ni Jesus iti Kasuratan. Pamiliar ni Jesus iti Sao ti Dios idi kinunana: “Adda a naisurat . . . Manen adda a naisurat . . . Pumanawka, Satanas! Ta adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.’” Ti panagayatna ken ni Jehova ken iti Saona ti nanggutugot ken Jesus a mangilaksid iti panangguyugoy kenkuana ti Mannulisog. (Mat. 4:1-10) Pimmanaw ni Satanas kalpasan ti maulit-ulit a panangsaranget ni Jesus iti panangsulisogna.

7. Kasano a matulongannatayo ti Biblia a mangsaranget iti sulisog?

⁷ Yantangay nagpannuray ni Jesus iti Kasuratan tapno masarangetna dagiti pannulisog ti Diablo, saan kadi a nangnangruna pay koma a kasta ti aramidentayo? Kinapudnona, tapno masarangettayo ti Diablo, masapul a determinadotayo nga umuna a mangammo kadagiti pagalagadan ti Dios ken naan-anay nga annurotentayo dagita. Adu a tattao ti natignay a mangannurot kadagiti pagalagadan ti Biblia bayat nga ad-adalenda ti Kasuratan ken naipategda ti sirib ti Dios ken ti kinalintegna. Wen, nabileg “ti sao ti Dios” ta kabaelanna nga ilasin “dagiti panunot ken dagiti panagem ti puso.” (Heb. 4:12) No ad-adu ti panawen ti maysa a mangbasa ken mangutob iti Kasuratan, ad-adda nga umuneg ti ‘pannakatarusna iti kinapudno ni Jehova.’ (Dan. 9:13) Gapuna, nagpateg nga utobentayo dagiti teksto nga adda pakainaiganna kadagiti mismo a pagkapuyantayo.

8. Ania dagiti pamay-an a magun-odantayo ti nasantuan nga espiritu?

⁸ Nasaranget ni Jesus ti sulisog saan laeng a gapu ta pamiliar iti Kasuratan no di ket “napno [pay] iti nasantuan nga espiritu.” (Luc. 4:1) Tapno maaddaantayo met iti kasta a bileg ken abilidad, masapul nga umadanitayo ken Jehova babaen ti naan-anay a panangaprobetsar kadagiti us-usarenna a mangipaay iti espirituna, kas iti panagadal iti Biblia, panagkararag, ken pannakilangen kadagiti kapammatian. (Sant. 4:7, 8) Napaneknekan ti adu a makagunggona ti agtalinaed nga okupado kadagiti Nakristianuan nga aktibidad ta dayta ti tumulong tapno maipamaysa ti panunot kadagiti makapabileg a naespirituan a bambanag.

9, 10. (a) Ania dagiti sulisog a gagangay iti lugaryo? (b) Kasano a ti panagutob ken panagkararag pabilgendakayo a mangsaranget iti sulisog uray no nabambannogkayo?

⁹ Ania dagiti sulisog a masapul a sarangtentayo? Adda kadi gundaway a nasulisogka nga agalembong iti dimo asawa? No awan ti asawam, naguyugoyka kadin a makideyt iti maysa a di manamati? Mabalin a masulisog dagiti Kristiano a mangkita kadagiti makagargari a ladawan a di mapakpakadaan nga agparang no agbuyada iti telebision wenno aginternetda. Napasamak kadi dayta kenkan? No wen, ania ti inaramidmo? Nainsiriban nga utobem no kasano a ti maysa a kamali ket agbanag iti sabali pay a kamali ken inton agangay iti nadagsen a basol. (Sant. 1:14, 15) Panunotem no kasano kasaem ken Jehova, iti kongregasion, ken iti pamiliam, no makaaramidka iti nadagsen a basol. Iti kasumbangirna, no agtalinaedka a nasungdo kadagiti prinsipio ti Dios, maaddaanka iti nadalus a konsiensia. (Basaen ti Salmo 119:37; Proverbio 22:3.) No maipasangoka kadagiti kasta a  suot, sipapasnek koma nga agkararagka maipaay iti bileg tapno masarangetmo dagita.

¹⁰ Adda sabali pay a banag a rumbeng a laglagipen maipapan iti pannulisog ti Diablo. Ni Satanas immasideg ken Jesus kalpasan ti 40 nga aldaw a panagayunarna iti let-ang. Awan duadua nga ammo ti Diablo a daytoy ti “mainugot a tiempo” tapno subokenna ti kinatarnaw ni Jesus. (Luc. 4:13) Agsapsapul met ita ni Satanas iti kasayaatan a tiempo tapno subokenna ti kinatarnawtayo. Nagpateg ngarud a taginayonentayo a natibker ti espiritualidadtayo. Masansan a rumaut ni Satanas no makitana a nakapuy ti puntiriana. Gapuna, no mariknatayo a nabannog wenno maup-upaytayo, ad-adda koma a determinadotayo nga agkiddaw ken Jehova iti tulong ken iti nasantuan nga espirituna.​—2 Cor. 12:8-10.

Panangdaer iti Pannakabannog ken Pannakaupay

11, 12. (a) Apay nga adu ita ti maup-upay? (b) Ania ti mangpabileg kadatayo a mangparmek iti pannakaupay?

¹¹ Kas imperpekto a tattao, maupaytayo no dadduma. Ad-adda a pudno dayta ita gapu ta ti tiempo a pagbibiagantayo ket ad-adda a makapaupay. Agbibiagtayo iti nalabit karirigatan pay laeng a tiempo a mapasaran ti intero a sangatauan. (2 Tim. 3:1-5) Bayat nga umas-asideg ti Armagedon, kumarkaro ti rigat ti panagbiag, emosional a parikut, ken dadduma pay a pakarigatan. Gapuna, ditay koma pakasdaawan nga adda dagiti marigatan a mangitungpal iti responsabilidadda a mangaywan ken mangsustento iti pamiliada. Mabalin a mabannog, madagsenan, ken mapaksuyanda pay ketdi. No kasta ti mapaspasaram, kasanom a mapagballigian dayta?

¹² Laglagipentayo nga impanamnama ni Jesus kadagiti adalanna nga ipaayanna ida iti maysa a katulongan​—ti nasantuan nga espiritu ti Dios. (Basaen ti Juan 14:16, 17.) Dayta ti kabilgan a puersa iti uniberso. Babaen iti dayta, maipaayannatayo ni Jehova iti ‘nawadwad’ a bileg a kasapulantayo tapno maibturantayo ti aniaman a suot. (Efe. 3:20) Kinuna ni apostol Pablo a no agpannuraytayo iti dayta, makaawattayo iti “pannakabalin a nalablabes ngem ti gagangay,” uray no ‘maimammamegtayo iti tunggal pamay-an.’ (2 Cor. 4:7, 8) Saan nga ikarkari ni Jehova nga ikkatenna ti pakarigatantayo, ngem ipanamnamana a babaen ti espirituna, ipaayannatayo iti bileg a mangdaer iti dayta.​—Fil. 4:13.

13. (a) Kasano a napabileg ti maysa nga agtutubo tapno madaeranna ti narigat a kasasaadna? (b) Adda kadi ammoyo nga umasping a kapadasan?

¹³ Usigentayo ti kapadasan ni Stephanie, maysa a regular pioneer nga agtawen iti 19. Idi agtawen iti 12, naatake ken nadayagnos nga adda tumor iti utekna. Sipud idi, naminduan a naopera,  nagpaagasen babaen ti radiasion, ken namindua pay a naistrok, isu a saanna unay a maigaraw ti makannigid a paset ti bagina ken nakapuyen ti panagkitana. Masapul nga ireserba ni Stephanie ti pigsana para kadagiti ibilangna a napatpateg a bambanag, kas kadagiti Nakristianuan a gimong ken panangasaba. Ngem mariknana nga isu ket tultulongan ti espiritu ni Jehova tapno makapagibtur iti nadumaduma a pamay-an. Dagiti naibatay-Biblia a publikasion a naglaon kadagiti kapadasan dagiti padatayo a Kristiano ti mangliwliwa kenkuana no maup-upay. Liniwliwa met dagiti kakabsat babaen ti panagsurat wenno panangpabilegda kenkuana sakbay ken kalpasan dagiti gimong. Uray dagiti interesado a tattao ap-apresiarenda met dagiti isursuro kadakuada ni Stephanie babaen ti ipapanda iti pagtaenganna tapno sadiay nga agpayadalda iti Biblia. Napalalo ti panagyaman ni Stephanie ken ni Jehova gapu kadagita. Pudno unay kenkuana ti kunaen ti paboritona a teksto a Salmo 41:3.

14. Ania ti masapul a liklikantayo no nabannog wenno marigrigatantayo, ken apay?

¹⁴ No nabannogtayo wenno marigrigatantayo, ditay koma pulos irason a mapagballigiantayo dagita no kissayantayo ti panawentayo kadagiti Nakristianuan nga aktibidad. Ditay koma pulos ar-aramiden dayta. Apay? Gapu ta dagiti aktibidad kas iti personal ken sangapamiliaan a panagadal iti Biblia, panangasaba, ken pannakigimong ket pamay-an tapno umawattayo iti makapabileg a nasantuan nga espiritu. Kanayon a makapabang-ar dagiti Nakristianuan nga aktibidad. (Basaen ti Mateo 11:28, 29.) Masansan nga adda dagiti kakabsat a sumangpet iti gimong a napaksuyan, ngem inton agawiddan, arigna napabaro manen ti pigsada!

15. (a) Ikarkari kadi ni Jehova a nalaka laeng ti agbalin a Kristiano? Ilawlawagyo babaen ti Kasuratan. (b) Ania ti inkari kadatayo ti Dios, a mangpataud iti ania a saludsod?

¹⁵ Siempre, saan a kayat a sawen dayta a nalaka laeng ti agbalin a Kristiano. Masapul ti panagregget tapno makapagtalinaed a matalek a Kristiano. (Mat. 16:24-26; Luc. 13:24) Nupay kasta, kabaelan ni Jehova a pabilgen dagiti nabannog babaen ti nasantuan nga espirituna. Insurat ni propeta Isaias: “Dagidiay mangin-inanama ken Jehova mapasublidanto ti bilegda. Agpangatodanto a sipapayak a kas kadagiti agila. Agtaraydanto ket saanda a mapakil; magnadanto ket saanda a mabannog.” (Isa. 40:29-31) Gapu iti dayta, nasayaat nga isaludsodtayo, Ania ti talaga a rason a mariknatayo ti pannakabannog kadagiti naespirituan nga aktibidad?

16. Ania ti mabalintayo nga aramiden tapno maikkat dagiti posible a pakaigapuan ti pannakabannog wenno pannakaupaytayo?

¹⁶ Idagadag kadatayo ti Sao ni Jehova a ‘siguraduentayo ti napatpateg a bambanag.’ (Fil. 1:10) Iti panangyarigna ti biag ti maysa a Kristiano iti nawatiwat a lumba, napaltiingan ni apostol Pablo a nangikuna: “Ikkatentayo met ti tunggal dadagsen . . . , ket buyogen ti panagibtur tarayentayo ti lumba a naikabil iti sanguanantayo.” (Heb. 12:1) Ti puntona ket masapul a liklikantayo dagiti di napateg nga aktibidad ken pakadagsenan a mangibus iti pigsatayo. Mabalin nga adu unay ti ar-aramiden ti dadduma kadatayo uray no didan kabaelan. Gapuna, no masansan a mabannog ken maringgoranka mabalin a pagsayaatam no sukimatem ti kinaadu ti tiempo a busbusbosem iti panggedam, ti kasansan ti panagbiahem nga aglinglingay, ken ti kinapingetmo kadagiti isport ken paglinglingayan. Ipakpakitatayo a nainkalintegan ken naemmatayo no bigbigentayo ti limitasiontayo ken kissayantayo dagiti saan a napateg nga aktibidadtayo.

17. Apay a mabalin a maupay ti dadduma, ngem ania ti impanamnama ni Jehova?

¹⁷ Mabalin a dadduma kadatayo ti makarikna iti pannakaupay gapu ta di pay dimteng ti  panungpalan ti sistema ti bambanag kas iti ninamnamatayo. (Prov. 13:12) Ngem ti asinoman a makarikna iti kasta ket mabalin a maparegta kadagiti sasao iti Habakuk 2:3: “Ti sirmata agpaay pay laeng iti naituding a tiempo, ket uman-anangsab a tumurong iti panungpalan, ket saanto nga agulbod. Uray no agtaktak, agtultuloyka a manginanama iti dayta; ta di bumurong a pumudnonto. Saanto a maladaw.” Impanamnama kadatayo ni Jehova a dumteng ti panungpalan ti sistema ti bambanag iti eksakto a tiempo nga inkeddengna!

18. (a) Ania dagiti kari a mangpabpabileg kadakayo? (b) Kasano a makagunggona kadatayo ti sumaganad nga artikulo?

¹⁸ Sigurado nga amin a matalek nga adipen ni Jehova segseggaanda ti tiempo nga awanton ti pannakabannog ken pannakaupay, inton ti amin a sibibiag tagiragsakenda ti ‘kired ti kinaagtutuboda.’ (Job 33:25) Uray ita, mapabilegtayo babaen ti nasantuan nga espiritu no makipasettayo kadagiti aktibidad a makaparegta iti naespirituan. (2 Cor. 4:16; Efe. 3:16) Dimo koma ipalubos a ti pannakabannog ti manglapped kenka a mangsagrap kadagiti manayon a bendision. Amin a pakasuotan​—maigapu man dayta iti sulisog, pannakabannog, wenno pannakaupay​—ket aglabas, no saan man nga ita, idiayto baro a lubong ti Dios. Iti sumaganad nga artikulo, usigentayo no kasano a ti nasantuan nga espiritu pabilgenna dagiti Kristiano a mangdaer iti pannakaidadanes, mangsaranget iti makadangran nga impluensia dagiti kapatadan, ken mangibtur iti nagduduma a pakarigatan.

Ania ti Sungbatyo?

• Kasano a makapabileg kadatayo ti panagbasa iti Biblia?

• Kasano a makapabileg kadatayo ti panagkararag ken panagutob?

• Kasano a maikkat dagiti posible a makagapu iti pannakaupay?

[Salsaludsod]

[Ladawan iti panid 24]

Dagiti Nakristianuan a gimong pabilgendatayo iti naespirituan