Raemenyo ti Panagasawa kas Sagut a Naggapu iti Dios

“Dayta ti makagapu a ti maysa a lalaki panawannanto ti amana ken ti inana ket masapul a makitipon iti asawana ket masapul nga agbalinda a maymaysa a lasag.”​—GEN. 2:24.

1. Apay a maikari ni Jehova iti panagraemtayo?

 NI Jehova a Dios, ti Namunganay iti panagasawa, ket maikari unay iti panagraemtayo. Kas ti Namarsua, Soberano, ken nailangitan nga Amatayo, maitutop ti pannakailadawanna kas Manangted iti “tunggal naimbag a sagut ken tunggal naan-anay a rangkap.” (Sant. 1:17; Apoc. 4:11) Pammaneknek dayta iti dakkel a panagayatna. (1 Juan 4:8) Bin-ig a pagimbagan ken pakagunggonaantayo ti amin nga isursurona, ti amin nga ikalkalikagumna, ken ti amin nga ipapaayna kadatayo.​—Isa. 48:17.

2. Ania nga instruksion ti inted ni Jehova kadagiti umuna nga agassawa?

² Dakamaten ti Biblia ti panagasawa kas maysa kadagiti “naimbag” a sagut a naggapu iti Dios. (Ruth 1:9; 2:12) Idi inangay ni Jehova ti umuna a panagkallaysa, inikkanna da Adan ken Eva kadagiti espesipiko nga instruksion no kasano nga agballigi ti panagasawada. (Basaen ti Mateo 19:4-6.) No nagtulnogda iti bilin ti Dios, nasagrapda koma ti manayon a kinaragsak. Ngem simamaag nga inlaksidda dayta isu a napalalo ti panagsagabada.​—Gen. 3:6-13, 16-19, 23.

3, 4. (a) Ania ti mangipakita nga adu ita ti awanan panagraem iti panagasawa ken iti namunganay iti dayta a ni Jehova a Dios? (b) Ania a pagarigan ti usigentayo iti daytoy nga artikulo?

³ Kas iti umuna a pagassawaan, adu ita ti saan unay wenno di pulos mangikabilangan kadagiti bilin ni Jehova no mangaramidda iti desision mainaig iti panagasawa. Adda dagiti makidenna ngem awan planoda a makikallaysa, idinto ta ti dadduma binalbaliwandan ti nainkasigudan a panangmatmat iti panagasawa tapno maaramidda ti kaykayatda. (Roma 1:24-32; 2 Tim. 3:1-5) Saanda a bigbigen a ti panagasawa ket sagut a naggapu iti Dios. Babaen ti dida panangraem iti dayta a sagut, saanda met a raraemen ti nangipaay iti dayta a ni Jehova a Dios.

⁴ No dadduma, adda met dagiti adipen ti Dios a saanen a maitunos ti panangmatmatda iti panangmatmat ni Jehova iti panagasawa. Dadduma nga agassawa a Kristiano ti nangikeddeng a makisina wenno makidiborsio uray no awan ti Nainkasuratan a nakaibatayanna. Kasano a maliklikan dayta? Kasano a ti bilin ti Dios iti Genesis 2:24 matulonganna dagiti naasawaan a Kristiano tapno bumileg ti panagasawada? Ken kasano a makapagsagana iti dayta dagiti agplamplano nga agasawa? Usigentayo ti tallo a naballigi a panagasawa idi panawen ti Biblia a mangipakita no kasano a ti panagraem ken Jehova ket maysa a nagpateg a tulbek iti manayon a panagasawa.

Patanoren ken Taginayonen ti Kinasungdo

5, 6. Ania a situasion ti mabalin a nangsubok kada Zacarias ken Elisabet, ken kasano a nagunggonaan ti kinasungdoda?

⁵ Agpada nga umiso ti inaramid da Zacarias ken Elisabet. Pinilida a pakiasawaan daydiay nasungdo nga adipen ni Jehova. Simamatalek nga intungpal ni Zacarias dagiti annongenna kas maysa a padi, ken sinalimetmetanda a dua ti Linteg ti Dios agingga iti kabaelanda. Sigurado a nagadu ti rason tapno agyamanda. Ngem no sumarungkarkayo iti pagtaenganda idiay Juda, matakuatanyo nga adda kurang. Awan ti anakda gapu ta lupes ni Elisabet, ken agpadada a nataenganen.​—Luc. 1:5-7.

 ⁶ Iti nagkauna nga Israel, nagpateg unay ti kaadda ti anak, ken masansan a dakkel ti pamiliada. (1 Sam. 1:2, 6, 10; Sal. 128:3, 4) Adda idi dagiti lallaki nga Israelita a mangliput iti asawada babaen ti panangidiborsioda no lupes daytoy. Ngem nasungdo ni Zacarias ken ni Elisabet. Saan a nangbirok iti pamay-an tapno isinana ni baketna, ken kasta met ni Elisabet. Nupay maladingitanda nga awan ti anakda, simamatalek a nagtultuloyda a nagserbi ken Jehova. Idi agangay, simimilagro a binendisionan ida ni Jehova ta naaddaanda iti anak uray nataengandan.​—Luc. 1:8-14.

7. Ania ti sabali pay a pamay-an nga impakita ni Elisabet ti kinasungdona ken lakayna?

⁷ Impakita ni Elisabet ti naisangsangayan a kinasungdo iti sabali pay a pamay-an. Idi impasngayna ti anakna a ni Juan, saan a makasao ni Zacarias gapu ta nagumel iti saanna a panamati iti kinuna ti anghel ti Dios. Ngem nalabit ni Zacarias naibagana ken Elisabet ti bilin ti anghel ni Jehova a panagananna ti ubing iti “Juan.” Kayat dagiti kaarruba ken kakabagianda nga ipasurotda iti nagan ti amana. Ngem sisusungdo ni Elisabet a mangtungpal iti bilin ni lakayna. Kinunana: “Saan! no di ket isu maawagan iti Juan.”​—Luc. 1:59-63.

8, 9. (a) Kasano a ti kinasungdo patibkerenna ti panagasawa? (b) Ania ti sumagmamano nga espesipiko a pamay-an a maipakita dagiti agassawa ti kinasungdoda?

⁸ Kas kada Zacarias ken Elisabet, adda dagiti agassawa ita a maup-upay ken maipaspasango kadagiti karit. No awan ti kinasungdo, saan nga agballigi ti panagasawa. Ti panagalembong, pornograpia, pannakikamalala, ken dadduma pay a banag a mamagpeggad iti naragsak a panagasawa mabalin a dadaelenda ti panagtalekda iti maysa ken maysa. Ken no mapukawen ti panagtalekda, mangrugin a lumamiis ti ayatda. Ti kinasungdo ket mabalin a mayarig iti alad ti pagtaengan a mangsalaknib iti dayta manipud kadagiti estranghero ken peggad tapno natalged dagiti adda iti uneg ti pagtaengan. Gapuna, no nasungdo dagiti agassawa iti maysa ken maysa, natalged ti panagdennada ken mayebkasda iti asawada ti linaon ti pusoda, iti kasta, rumayray ti panagayatda. Wen, nagpateg ti kinasungdo.

⁹ Ni Jehova kinunana ken Adan: “Ti maysa a lalaki panawannanto ti amana ken ti inana ket masapul a makitipon iti asawana.” (Gen. 2:24) Ania ti kayat a sawen dayta? Agbaliwen ti dati a pannakilangenda kadagiti gagayyem ken kakabagianda. Masapul nga ipaayda nga umuna iti asawada ti tiempo ken atensionda. Saanen a dagiti gagayyem ken kakabagianda ti ipangpangrunada ta mabalin a mabaybay-anda ti baro a pamiliada. Saanda met nga ipalubos a makibiang dagiti nagannakda kadagiti desision wenno dida pagkinnaawatan. Masapul nga ‘agtipon’ ti agassawa iti anag nga ipangpangrunadan ti maysa ken maysa ta dayta ti bilin ti Dios.

10. Ania ti tumulong kadagiti agassawa a mangpatanor ken mangtaginayon iti kinasungdoda?

¹⁰ Makagunggona ti kinasungdo uray iti pamilia a saan nga agkakarelihionan. Kuna ti maysa a kabsat a babai a saan a manamati ti asawana: “Agyamanak unay ken Jehova ta insurona kaniak no kasano ti agpasakup ken maaddaan iti nauneg a panagraem ken ni lakayko. Gapu iti panagtalinaedko a nasungdo, nagtultuloy ti panaginnayat ken panagrinnaemmi iti 47 a tawenen.” (1 Cor. 7:10, 11; 1 Ped. 3:1, 2) Gapuna, aramidem ti amin a kabaelam tapno marikna ti asawam nga isu ket natalged. Babaen iti sao ken aramid, mangbirokka kadagiti pamay-an a mangpatalged iti asawam nga isu ti kapatgan a tao. Agingga nga agpannuray kenka, dimo ipalubos ti asinoman wenno aniaman a mamagpeggad iti relasionyo nga agassawa. (Basaen ti Proverbio 5:15-20.) Iti nasurok a 35 a tawenen, naragsak ti panagasawa da Ron ken Jeannette. Kinunada, “Gapu ta sisusungdo nga ar-aramidenmi ti ikalkalikagum kadakami ti Dios, naragsak ken naballigi ti panagasawami.”

Ti Panagtinnulong Patibkerenna ti Panagasawa

11, 12. Kasano a nagtinnulong da Aquila ken Priscila (a) iti pagtaengan, (b) iti panggedan, ken (c) iti Nakristianuan a ministerio?

¹¹ No dakamaten ni apostol Pablo dagiti nasinged a gagayyemna a da Aquila ken Priscila, kanayonna a dakamaten ida a dua. Dagitoy nga agdangdanggay nga agassawa ket nasayaat a pagarigan  no ania ti kayat a sawen ti Dios idi kinunana a ti asawa a lalaki ken babai agbalinda a “maymaysa a lasag.” (Gen. 2:24) Kanayonda nga agtintinnulong iti pagtaenganda, panggedanda, ken iti Nakristianuan a ministerio. Kas pagarigan, idi damo a dimteng ni Pablo idiay Corinto, isu ket siraragsak nga inawis da Aquila ken Priscila nga agnaed iti pagtaenganda, a nagbalin idi agangay a temporario a nangaramidanna kadagiti aktibidadna. Idi nagnaedda idiay Efeso, inusarda ti pagtaenganda a paggigimongan ken nagdinnanggayda a nangtulong kadagiti kabbaro a Kristiano, a kas ken Apolos, tapno rumang-ay dagitoy iti naespirituan. (Ara. 18:2, 18-26) Kalpasanna, immakar dagitoy a naregta nga agassawa idiay Roma ket inusarda manen ti pagtaenganda a paggigimongan. Idi agangay, nagsublida idiay Efeso ket pinabilegda dagiti kakabsat.​—Roma 16:3-5.

¹² Adda idi tiempo a nakikadua ni Pablo kada Aquila ken Priscila iti panggedanda a panagaramid iti tolda. Nadakamat manen ditoy dagiti agassawa, nga agtintinnulong ken saanda nga agsinsinnalisal wenno agap-apa. (Ara. 18:3) Ngem sigurado a ti panagkadkaduada kadagiti Nakristianuan nga aktibidad ti nakatulong tapno ti panagserbida ken Jehova ti agtalinaed a kapatgan iti biagda. Idiay man Corinto, Efeso, wenno Roma, pagaammo ida dagiti tattao kas ‘katrabahuan ken Kristo Jesus.’ (Roma 16:3) Nagtinnulongda a nangyadelantar iti trabaho a panangikasaba iti Pagarian iti sadinoman a nagserbianda.

13, 14. (a) Ania dagiti mabalin a mangdadael iti panagkaykaysa ti panagasawa? (b) Ania ti sumagmamano a mabalin nga aramiden dagiti agassawa tapno mapatibkerda ti singgalutda kas “maymaysa a lasag”?

¹³ Kinapudnona, tumibker ti relasion ti agassawa no agpada dagiti kalat ken aktibidadda. (Ecl. 4:9, 10) Ngem nakalkaldaang ta bassit laeng a tiempo ti busbusbosen ti adu a pagassawaan ita a makikadua iti asawada. Adu nga oras ti busbusbosenda iti bukodda a panggedan. Dadduma ti kanayon nga agbiahe gapu iti trabahoda wenno maysa kadakuada ti mangged iti sabali a pagilian tapno adda maipatulodna a kuarta iti pamiliana. Adda dagiti agassawa nga uray agkaduada iti pagtaengan, awan unay ti panawenda nga agtungtong gapu iti tiempo a busbusbosenda iti telebision, pagesman, isport, video game, wenno Internet. Kasta kadi ti kasasaad iti pagtaenganyo? No kasta, mabalinyo kadi a balbaliwan ti kasasaadyo tapno ad-adu ti tiempoyo a makikadua iti asawayo? Mabalinyo kadi ti agtinnulong a mangaramid kadagiti inaldaw a trabaho a kas iti panagluto, panaginnaw, wenno panagdalus? Makapagtinnulongkayo kadi a mangaywan kadagiti annakyo wenno mangasikaso kadagiti nataenganen a nagannakyo?

¹⁴ Kangrunaanna, agkaduakayo koma a kanayon kadagiti aktibidad a mainaig iti panagdayaw ken Jehova. Ti panagtekstoyo iti inaldaw ken panagkaduayo iti panagdaydayaw ti pamiliayo ket nagsayaat a gundaway tapno agtalinaed nga agkaykaysa ti panunot ken dagiti kalatyo kas pamilia. Agkaduakayo met koma iti ministerio. No posible, padasenyo ti agpayunir a dua, uray maysa laeng a bulan wenno maysa a tawen no isu ti ipalubos ti kasasaadyo. (Basaen ti 1 Corinto 15:58.) Kuna ti maysa a kabsat, a nagpayunir a kadua ni lakayna: “Ti ministerio ti maysa kadagiti pamay-an a makapagkaduakami ken  makapagtungtongkami a naimbag. Gapu ta agpada a kayatmi a tulongan iti naespirituan ti sabsabali, talaga a nagsayaat ti panagdanggaymi. Mariknak met a nasingsingedak kenkuana saan laeng a kas asawa no di ket kas nasayaat pay a gayyem.” Bayat nga agtintinnulongkayo a mangragpat kadagiti makagunggona a kalat, ti paginteresam, prioridadmo, ken pagesmam ket in-inutton a maitunos iti asawam, agingga a, kas kada Aquila ken Priscila, agpadanton ti pampanunot, rikrikna, ken tigtignayyo.

Ipangpangrunayo ti Dios iti Biagyo Kas Agassawa

15. Ania ti tulbek ti naballigi a panagasawa? Ilawlawagyo.

¹⁵ Ammo ni Jesus a nagpateg iti panagasawa ti panangyun-una iti Dios. Naimatanganna ti panangkasar ni Jehova iti umuna nga agassawa. Napaliiwna no kasano karagsak da Adan ken Eva idi agpapaiwanwanda pay laeng iti Dios, ken nakitana a mismo ti didigra nga imbunga ti panangilaksidda iti dayta. Gapuna, idi isursuro ni Jesus dagiti tattao, inulitna ti bilin ni Amana a masarakan iti Genesis 2:24. Innayonna pay: “Ti pinagsinnangol ti Dios saan koma a pagsinaen ti tao.” (Mat. 19:6) Agingga ita, ti nauneg a panagraem ken Jehova ti tulbek ti naragsak ken naballigi a panagasawa. No maipapan iti dayta, mapagwadan unay dagiti nagannak ni Jesus ditoy a daga a da Jose ken Maria.

16. Kasano nga impakita da Jose ken Maria nga impangpangrunada ti Dios iti biagda kas pamilia?

¹⁶ Ni Jose ket naasi ken ni Maria ken adda panagraemna kenkuana. Idi naammuanna a masikog, siaasi a trinatona, uray sakbay pay nga inlawlawag kenkuana ti anghel ti Dios no ania ti napasamak ken Maria. (Mat. 1:18-20) Kas agassawa, tinungpalda ti bilin ni Cesar ken inannurotda a naimbag ti Mosaiko a Linteg. (Luc. 2:1-5, 21, 22) Ken nupay dagiti laeng lallaki ti maikalikagum a tumabuno kadagiti dadakkel a narelihiosuan a piesta idiay Jerusalem, tinawen a timmabuno da Jose ken Maria a kaduada ti pamiliada. (Deut. 16:16; Luc. 2:41) Kadagita ken iti dadduma pay a pamay-an, dagitoy a managbuteng iti Dios nga agassawa inkagumaanda a pinaragsak ni Jehova ken impategda unay dagiti naespirituan a bambanag. Dayta ti makagapu a pinili ida ni Jehova a mangaywan iti Anakna a ni Jesus bayat ti kinaubingna ditoy daga.

17, 18. (a) Kadagiti ania a pamay-an a dagiti agassawa ipangpangrunada ti Dios iti biagda kas pamilia? (b) Kasano a magunggonaanda iti dayta?

¹⁷ Ipangpangrunayo met kadi ti Dios iti biagyo kas pamilia? Kas pagarigan, no mangaramidkayo kadagiti napateg a desision, agsukimatkayo kadi nga umuna kadagiti prinsipio iti Biblia, ikararagyo dayta, ken kalpasanna, agpabalakadkayo kadagiti kakabsat a nataengan iti naespirituan? Wenno risutenyo kadi lattan dagiti parikutyo nga agpannuraykayo iti bukodyo a kapanunotan wenno iti kapanunotan dagiti kapamilia ken gagayyemyo? Ikagkagumaanyo kadi nga iyaplikar ti adu a praktikal a singasing nga impablaak ti matalek nga adipen mainaig iti panagasawa ken pamilia? Wenno sursurotenyo kadi lattan dagiti gagangay a kaugalian wenno ti balakad dagiti nalatak a tattao? Kas agassawa, regular kadi nga agkarkararag ken agad-adalkayo? Addaankayo kadi kadagiti naespirituan a kalat, ken pagsarsaritaanyo dagiti prioridad ti pamiliayo?

¹⁸ Kuna ni Ray maipapan iti 50 a tawenen a naragsak a panagasawada, “Awan pay a pulos ti problema a dimi napagballigian gapu ta pinagbalinmi ni Jehova a paset ti ‘tinallo a tali.’” (Basaen ti Eclesiastes 4:12.) Umanamong iti dayta da Danny ken Trina. “Timmibker ti relasionmi nga agassawa bayat nga agserserbikami a dua iti  Dios,” kinunada. Nasurok a 34 a tawenen nga addaanda iti naragsak a panagasawa. No kanayon nga iyun-unayo ni Jehova iti panagasawayo, tulongannakayo nga agballigi ken sibabaknang a bendisionannakayo.​—Sal. 127:1.

Itultuloyyo nga Ipateg ti Sagut ti Dios

19. Apay nga impaay ti Dios ti sagut a panagasawa?

¹⁹ Adu a tattao ita ti maseknan laeng iti personal a pagragsakanda. Ngem naiduma ti panangmatmat dagiti adipen ni Jehova. Ammoda nga impaay ti Dios ti panagasawa kas sagut tapno maitungpal ti panggepna. (Gen. 1:26-28) No impateg da Adan ken Eva dayta a sagut, nagbalin koma a paraiso ti intero a daga, a napno kadagiti naragsak ken nalinteg nga adipen ti Dios.

20, 21. (a) Apay a masapul nga ibilangtayo a sagrado ti panagasawa? (b) Ania a sagut ti usigentayo iti sumaruno a lawas?

²⁰ Kangrunaan iti amin, dagiti adipen ti Dios ibilangda ti panagasawa kas gundawayda a mangidayaw ken Jehova. (Basaen ti 1 Corinto 10:31.) Kas naammuantayon, ti kinasungdo, panagtinnulong, ken ti panangyun-una iti Dios ket makaay-ayo ken ni Jehova ken patibkerenna ti panagasawa. Gapuna, agplamplanokay man nga agasawa, patpatibkerenyo ti relasionyo kas agassawa, wenno ikagkagumaanyo nga isalbar ti panagasawayo, masapul nga ibilangyo ti panagasawa kas sagrado ken sagut a naggapu iti Dios. No silalagiptayo iti dayta a kinapudno, ikagumaantayo nga ibatay iti Sao ti Dios ti aniaman nga aramidentayo a desision mainaig iti panagasawa. Iti kasta, maipakitatayo ti panangipategtayo iti sagut a panagasawa ken panagraemtayo iti nangipaay iti dayta a sagut a ni Jehova a Dios.

²¹ Siempre, saan laeng a ti panagasawa ti sagut nga inted kadatayo ni Jehova. Ken saan laeng a dayta ti mangyeg iti kinaragsak. Iti sumaganad nga artikulo, usigentayo ti sabali pay a nagpateg a sagut a naggapu iti Dios​—ti sagut a kinaawan asawa.

Ania ti Sungbatyo?

• Ania ti maitulong ti kinasungdo kadagiti agassawa a Kristiano?

• Apay a ti panagdinnanggay patibkerenna ti panagasawa?

• Ania ti sumagmamano a pamay-an a maipakita dagiti agassawa nga agpapaiwanwanda iti Dios?

• Kasanotayo a maipakita ti panagraemtayo ken Jehova, ti Namunganay iti panagasawa?

[Salsaludsod]

[Dagiti Ladawan iti panid 15]

Ti panagkadua ken panagtinnulong pagkaykaysaenna dagiti agassawa