Usarenyo a Nainsiriban ti Kinaawan Asawayo

“Ti makaiwaya iti dayta iwayaanna koma dayta.”​—MAT. 19:12.

1, 2. (a) Ania ti panangmatmat ni Jesus, Pablo, ken ti dadduma pay iti kinaawan asawa? (b) Apay a saan nga ibilang ti dadduma a maysa a sagut ti kinaawan asawa?

 AWAN duadua a ti panagasawa ket maysa kadagiti kapatgan a sagut ti Dios iti sangatauan. (Prov. 19:14) Ngem adu a di naasawaan a Kristiano ti addaan iti naragsak ken makapnek a biag. Ni Harold nga agtawen iti 95 ken di pulos nagasawa, kinunana: “Nupay maragragsakanak a makikadua ken mangsangaili iti sabsabali, diak pulos makarikna iti liday no agmaymaysaak. Ibilangko a maysa a sagut ti kinaawan asawak.”

² Kinapudnona, ti kinaawan asawa ket agpada a tinukoy ni Jesu-Kristo ken ni apostol Pablo kas sagut manipud iti Dios, kas met laeng iti panagasawa. (Basaen ti Mateo 19:11, 12; 1 Corinto 7:7.) Pudno, saan nga amin nga awanan asawa ket inkeddengda ti di mangasawa. No dadduma, marigatanda nga agbirok iti maitutop a pakiasawaanda gapu iti kasasaadda. Wenno kalpasan ti sumagmamano a tawen a pannakiasawada, dadduma ti agsolsolo manen gapu iti diborsio wenno ipapatay ti asawada. Gapuna, iti ania nga anag a maysa a sagut ti kinaawan asawa? Ken kasano a  mausar a nainsiriban ti maysa a Kristiano ti kinaawan asawana?

Naisangsangayan a Sagut

3. Ania dagiti bentaha a masansan a matagiragsak dagiti di naasawaan a Kristiano?

³ Masansan nga ad-adu ti tiempo ken nawaywaya ti maysa nga awanan iti asawa ngem iti naasawaan. (1 Cor. 7:32-35) Naisangsangayan dagitoy a bentaha ta mangyeg iti gundaway tapno mapalawa ti maysa ti ministeriona ken ti panagayatna iti sabsabali, ken ad-adda a suminged ken Jehova. Gapuna, adu a Kristiano ti makaapresiar kadagiti gunggona nga itden ti kinaawan asawa ket inkeddengda nga ‘iwayaan dayta’ wenno agtalinaedda a kasta uray iti sumagmamano laeng a tiempo. Mabalin nga idi damo, saan a plano ti dadduma ti agtalinaed nga awanan asawa ngem idi nagbaliw ti kasasaadda, inkararag ken inutobda dayta ket nabigbigda a babaen ti tulong ni Jehova, naawatda ti nagbaliw a kasasaadda ket inkeddengda ti saanen a mangasawa.​—1 Cor. 7:37, 38.

4. Apay a di koma panunoten dagiti Kristiano nga awanan asawa a saan a napateg ti panagserbida iti Dios?

⁴ Ammo dagiti di naasawaan a Kristiano a saan a masapul nga agasawada tapno maibilangda a napateg ken Jehova wenno iti organisasionna. Ipakpakita ti Dios ti panagayatna iti tunggal maysa kadatayo. (Mat. 10:29-31) Awan ti makaisina kadatayo iti ayat ti Dios. (Roma 8:38, 39) Naasawaantayo man wenno saan, ditay koma panunoten a saan a napateg ti panagserbitayo iti Dios.

5. Ania ti kasapulan tapno mausar a nainsiriban ti kinaawan asawa?

⁵ Kaskasdi, kas iti sagut a talento iti musika wenno isport, ti sagut a kinaawan asawa ket agkalikagum iti panagregget tapno mausar dayta a nainsiriban. Kasano ngarud a dagiti di naasawaan a Kristiano ita​—lallaki man wenno babbai, agtutubo wenno nataengan, pinilida man dayta wenno saan​—maaprobetsarda ti kasasaadda? Usigentayo ti dadduma a makaparegta nga ulidan iti nagkauna a kongregasion Kristiano ken kitaentayo no ania ti maadaltayo kadakuada.

Kinaawan Asawa Bayat ti Kinaagtutubo

6, 7. (a) Ania a pribilehio iti panagserbi iti Dios ti tinagiragsak dagiti babbalasang ni Felipe? (b) Kadagiti ania a pamay-an nga inusar a nainsiriban ni Timoteo ti kinabarona, ken kasano a nabendisionan gapu iti kinatulokna nga agserbi bayat ti kinaagtutubona?

⁶ Kas iti ebanghelisador a ni Felipe, naregta met iti ministerio ti uppat a babbalasangna. (Ara. 21:8, 9) Ti panagipadto ket maysa kadagiti namilagruan a sagut ti nasantuan nga espiritu, ken inusar dagitoy a babbalasang dayta a sagut kas kaitungpalan ti Joel 2:28, 29.

⁷ Ti agtutubo a ni Timoteo inusarna a nainsiriban ti kinabarona. Ni nanangna a Eunice ken ni apongna a Loida insuroda kenkuana “ti nasantuan a sursurat” sipud kinamaladagana. (2 Tim. 1:5; 3:14, 15) Ngem agparang nga idi laeng agarup 47 K.P. a nagbalinda a Kristiano, bayat  ti immuna nga ibibisita ni Pablo iti ilida a Listra. Kalpasan ti dua a tawen, iti maikadua nga ibibisita ni Pablo, nalabit agtawen idin ni Timoteo iti nasurok wenno kumurang a 20. Nupay agtutubo ken nabiit pay iti kinapudno, “naimbag ti damagna” kadagiti Kristiano a panglakayen idiay Listra ken iti kabangibangna nga Iconio. (Ara. 16:1, 2) Gapuna, inawis ni Pablo a makikadua kenkuana iti trabaho a panagdaliasat. (1 Tim. 1:18; 4:14) Ditay masigurado no nagasawa ni Timoteo. Ngem ammotayo a kas maysa nga agtutubo, siraragsak nga inawatna ti awis ni Pablo, ken adu a tawen kalpasanna, tinagiragsakna ti nagserbi a misionero ken manangaywan kas maysa a baro.​—Fil. 2:20-22.

8. Ania ti nakatulong ken Juan Marcos a mangragpat kadagiti naespirituan a kalat, ken ania dagiti bendision a nasagrapna gapu iti dayta?

⁸ Inusar met a nainsiriban ni Juan Marcos ti kinabarona. Kas ken nanangna a Maria ken ti kasinsinna a ni Bernabe, isu ket maysa kadagiti immuna a kameng ti kongregasion ti Jerusalem. Mabalin a nanam-ay ti biag da Marcos yantangay adda balayda iti siudad ken adda adipenda. (Ara. 12:12, 13) Ngem iti laksid dagita, nupay maysa nga agtutubo ni Marcos, saanna nga impangpangruna ti bukodna a pagimbagan ken saan a managimbubukodan. Saanna met a pinanunot ti agasawa a dagus ken agpamilia. Ti nasapa a pannakilangenna kadagiti apostol ti nalabit nangpatanor kenkuana iti tarigagay nga agmisionero. Gapuna, sigagagar a kimmuyog kada Pablo ken Bernabe iti umuna a panagdaliasatda kas misionero ken nagserbi kas katulonganda. (Ara. 13:5) Idi agangay, nakikadua ken Bernabe sa kalpasanna, nagserbi a kadua ni Pedro idiay Babilonia. (Ara. 15:39; 1 Ped. 5:13) Ditay ammo no kasano kabayag a nagtalinaed a baro ni Marcos. Ngem pagaammo unay kas maysa a nakasagana nga agserbi iti sabsabali ken mangaramid iti ad-adu pay agpaay iti Dios.

9, 10. Ania dagiti oportunidad a silulukat kadagiti babbaro ken babbalasang a Kristiano tapno mapalawada ti ministerioda? Mangted iti pagarigan.

⁹ Adu nga agtutubo ita iti uneg ti kongregasion ti maragsakan met a mangaprobetsar iti kinaawan asawada tapno mapalawada ti panagserbida iti Dios. Kas kada Marcos ken Timoteo, ammoda a ti kinabaro wenno kinabalasangda ket mangted iti gundaway tapno ‘naynay a makapagserbida iti Apo nga awan ti makasinga.’ (1 Cor. 7:35) Talaga a maysa a bentaha dayta. Adu dagiti silulukat nga oportunidad​—panagpayunir, panagserbi iti lugar nga agkasapulan iti ad-adu a manangiwaragawag iti Pagarian, panagsursuro iti sabali a lenguahe, itutulong iti panagibangon iti Kingdom Hall wenno sanga nga opisina, itatabuno iti Ministerial Training School, ken panagserbi iti Bethel. No baro wenno balasangka pay, ap-aprobetsarem kadi ti kasasaadmo?

¹⁰ Maysa a kabsat nga agnagan iti Mark ti nangrugi a nagpayunir sakbay nga agtawen iti 20, timmabuno iti Ministerial Training School, ken naaddaan iti nagduduma nga annongen kadagiti nagserbianna a pagilian. Iti pananglagipna iti 25 a tawen nga amin-tiempo a panagserbina, kinunana: “Inkagumaak a paregtaen ti amin a kameng ti kongregasion babaen ti pannakikaduak kadakuada iti ministerio, panagipastor a panagsarungkar, panangawisko kadakuada iti pagtaengak para iti maysa a pannangan, ken panangyurnosko kadagiti makapabileg a panaglalangen. Amin dagitoy ti nangyeg kaniak iti dakkel a rag-o.” Kas ipakita ti komento ni Mark, ti panangted ket gubuayan ti dakkel a rag-o, ken adu ti gundawaymo a mangted no usarem a naan-anay ti biagmo para iti sagrado a panagserbi. (Ara. 20:35) Aniaman ti paginteresan, abilidad, wenno kapadasanyo iti biag, adu ti trabaho ti Apo a silulukat kadakayo nga agtutubo.​—1 Cor. 15:58.

11. Ania ti sumagmamano a pagimbagan ti saan a panagapura nga agasawa?

¹¹ Nupay kaaduan nga agtutubo ti agasawa met laeng inton agangay, adda dagiti naimbag a rason a saanda nga agapura. Paregtaen ni Pablo dagiti agtutubo a palabsenda pay “ti kinalasbang ti kinaagtutubo,” ti panawen a nagpigsa ti seksual a tarigagayda. (1 Cor. 7:36) Agkalikagum iti tiempo tapno matarusam ti bagim ken maaddaanka iti kapadasan a kasapulam iti panangpilim iti maitutop nga asawa. Ti panagkinnari  bayat ti kasar ket maysa a serioso a desision nga agpaut iti tungpal-biag.​—Ecl. 5:2-5.

Kinaawan Asawa Bayat ti Kinamataengan

12. (a) Kasano a napagballigian ti balo a ni Anna ti nagbaliw a kasasaadna? (b) Ania ti pribilehio a natagiragsakna?

¹² Naladingitan la ketdi ni Anna, a nadakamat iti Ebanghelio ni Lucas, iti nasapa nga ipapatay ni lakayna kalpasan ti pito a tawen a panagdennada. Ditay ammo no naaddaanda iti anak wenno no pinanunotna ti agasawa manen. Ngem kuna ti Biblia a maysa a balo ni Anna nga agtawen iti 84. Maibatay iti salaysay ti Biblia, maikunatayo nga inaprobetsar ni Anna ti nagbaliw a kasasaadna tapno ad-adda a suminged ken Jehova. “Saan a pulos limmanglangan idiay templo, a mangipapaay iti sagrado a panagserbi iti rabii ken aldaw buyogen dagiti panagayunar ken ar-araraw.” (Luc. 2:36, 37) Wen, inyun-unana dagiti naespirituan a bambanag. Agkalikagum la ketdi dayta iti determinasion ken panagregget ngem sibabaknang a nabendisionan. Naaddaan iti pribilehio a makakita iti ubing a ni Jesus ken impakaammona iti sabsabali ti maipapan iti pannakawayawaya nga iyeg ti um-umay a Mesias.​—Luc. 2:38.

13. (a) Ania ti mangipakita nga addaan ni Dorcas iti aktibo a paset iti kongregasion? (b) Kasano a nagunggonaan ni Dorcas gapu iti kinaimbag ken kinamanangngaasina?

¹³ Maysa a babai nga agnagan iti Dorcas, wenno Tabita, ti agnanaed idiay Joppe, maysa a nagkauna a sangladan iti amianan a laud ti Jerusalem. Nalabit a di naasawaan idi a tiempo yantangay awan ti dinakamat ti Biblia nga asawana. “Aduan [ni Dorcas] iti naimbag nga ar-aramid ken sagsagut ti asi.” Agparang a nagaramid iti adu a kawes para kadagiti agkasapulan a balo ken ti sabsabali pay, ken impatpategda unay gapu iti dayta. Gapuna, idi bigla a nagsakit ken natay, adda imbaon ti kongregasion a mapan ken Pedro tapno agpakaasi kenkuana a pagungarenna ti dungdungnguenda a kabsat. Idi nagdinamag ti panagungarna iti intero a Joppe, adu ti nagbalin a manamati. (Ara. 9:36-42) Babaen ti naisangsangayan a kinamanangngaasi ni Dorcas, mabalin a natulonganna ti dadduma kadakuada.

14. Ania ti nangtignay kadagiti awanan asawa a Kristiano nga ad-adda a suminged ken Jehova?

¹⁴ Kas kada Anna ken Dorcas, adu kadagiti kameng ti kongregasion ita ti saanen a nagasawa ken nagtalinaed nga awanan asawa bayat ti kinamataenganda. Dadduma ti mabalin a saan a nakabirok iti maitutop nga asawa. Dadduma met ti diborsiado wenno balo. Gapu ta awan ti asawada a pangyebkasanda iti riknada, masansan nga ad-adda nga agpannurayda ken Jehova. (Prov. 16:3) Ni Silvia, maysa a balasang a kabsat nga agserserbi iti Bethel iti nasurok a 38 a tawenen, napaneknekanna a maysa a bendision daytoy. Kinunana: “No dadduma, mabannogak met a siak la ti mangpabpabileg. Pampanunotek no siasino met ti mangparegta kaniak.” Ngem innayonna: “Gapu ta agtalekak a mas ammo ni Jehova ti kasapulak, ad-adda a simmingedak kenkuana. Ken kanayon nga adda latta pammaregta a maawatko, no dadduma, manipud iti di pulos ninamnama a gubuayan.” No umadanitayo ken Jehova, kanayon a tulongannatayo iti nakadungdungngo ken makapabileg unay a pamay-an.

15. Kasano a dagiti awanan asawa a Kristiano ‘mapalawada’ ti panagayatda?

¹⁵ Ti kinaawan asawa ket mangyeg iti naisangsangayan nga oportunidad a ‘mangpalawa’ iti panagayat. (Basaen ti 2 Corinto 6:11-13.) Ni Jolene, maysa a kabsat a balasang a 34 a tawenen iti amin-tiempo a serbisio, kinunana: “Inkagumaak ti maaddaan kadagiti nasinged a gagayyem, saan laeng a kadagiti kapatadak no di ket iti nagduduma nga edad. Ti kinaawan asawam ket nagsayaat a gundaway tapno mausarmo ti biagmo agpaay ken Jehova, iti pamiliam, ken kadagiti kakabsat, agraman kadagiti kaarrubam. Bayat a bumakbaketak, mariknak a naragragsakak nga awan asawana.” Dagiti nataengan, baldado, agsolsolo a nagannak, agtutubo, ken ti dadduma pay iti kongregasion ket sigurado nga apresiarenda ti di agimbubukodan a suporta nga ipapaay kadakuada dagiti awanan asawa. Kinapudnona, naragragsaktayo no mangipakitatayo  iti panagayat iti sabsabali. Mabalinmo met kadi a ‘palawaen’ ti panagayatmo iti sabsabali?

Agtalinaed nga Awanan Asawa

16. (a) Apay a saan a nagasawa ni Jesus? (b) Kasano nga inusar a nainsiriban ni Pablo ti kinaawan asawana?

¹⁶ Saan a nagasawa ni Jesus gapu ta masapul a saganaan ken itungpalna ti naituding a ministeriona. Nalawa ti dinaliasatna, nagtrabaho manipud parbangon agingga iti naladaw a rabii, ken idi agangay, intedna ti biagna kas daton. Bentaha kenkuana ti kinaawan asawana. Ni apostol Pablo ket nagdaliasat iti rinibribu a kilometro ken nagpasar iti nakaro a rigat iti ministeriona. (2 Cor. 11:23-27) Nupay mabalin nga adda idi asawa ni Pablo, pinilina ti saan a nagasawa manen kalpasan a nadutokan kas apostol. (1 Cor. 7:7, 8; 9:5) Maigapu iti ministerio, agpada a pinaregta ni Jesus ken ni Pablo ti sabsabali a mangtulad iti ulidanda agingga a posible. Ngem saanda nga impaalagad ti kinaawan asawa kadagiti adipen ti Dios.​—1 Tim. 4:1-3.

17. Kasano a tinulad ti dadduma ita ti ulidan ni Jesus ken ni Pablo, ken apay a masiguradotayo a nagpateg ken Jehova dagiti nangaramid iti kasta a panagsakripisio?

¹⁷ Adda met ita dagidiay nangikeddeng a saan a mangasawa tapno ad-adda a maitungpalda ti ministerioda. Ni Harold, a nadakamat itay, ket nasuroken a 56 a tawen a siraragsak nga agserserbi iti Bethel. “Idi sangapulo a tawenkon iti Bethel,” kinunana, “adu nga agassawa ti nakitak a rimmuar iti Bethel gapu iti sakit wenno gapu ta masapul nga aywananda ti bumaket wenno lumakayen a nagannakda. Agpada a natayen dagiti nagannakko. Ngem ipatpategko unay ti Bethel ket diak kayat nga irisgo dayta a pribilehio babaen ti panagasawak.” Umasping iti dayta, sumagmamano a tawen ti napalabasen, maysa a nabayagen a payunir nga agnagan iti Margaret ti nagkuna: “Adda dagiti gundaway a mabalinko koma ti agasawa ngem diak inaramid dayta. Imbes ketdi, inusarko ti nawaywaya a kasasaadko tapno agtalinaedak nga okupado iti ministerio ket daytoy ti nangyeg kaniak iti dakkel a rag-o.” Sigurado a saan a pulos a malipatan ni Jehova ti asinoman a nangaramid iti kasta a situtulok a panagsakripisio maipaay iti pudno a panagdayaw.​—Basaen ti Isaias 56:4, 5.

Usarenyo a Nainsiriban ti Kasasaadyo

18. Kasano a maparegta ken masuportarantayo dagiti di naasawaan a Kristiano?

¹⁸ Amin a di naasawaan a Kristiano a mangar-aramid iti amin a kabaelanda nga agserbi ken Jehova ket maikarida iti naimpusuan a komendasion ken pammaregta. Ipatpategtayo ida kas indibidual, apresiarentayo dagiti nasayaat a galadda, ken ti dakkel a maar-aramidanda iti kongregasion. Dida pulos marikna ti liday no agbalintayo kadakuada kas pudpudno a naespirituan a “kakabsat a lallaki ken kakabsat a babbai ken inna ken annak.”​—Basaen ti Marcos 10:28-30.

19. Ania ti mabalinyo nga aramiden tapno mausaryo a nainsiriban ti kinaawan asawayo?

¹⁹ Inkeddengyo man ti saan nga agasawa wenno gapu dayta iti kasasaadyo, paneknekan dagiti pagarigan a nadakamat iti Biblia ken dagiti moderno a kapadasan a mabalinyo ti agbiag a naragsak ken makagunggona. Ti kinaawan asawa ket mabalin a mayarig iti sagut a ninamnamatayo wenno iti ditay ninamnama. Adda dagiti mangipateg a dagus iti dayta, idinto ta ti dadduma, sada la maipateg dayta bayat ti panaglabas ti tiempo. Gapuna, kaaduanna nga agdepende dayta iti kababalintayo. Ania ti mabalinmo nga aramiden tapno mausarmo a nainsiriban ti kinaawan asawam? Ad-adda a pasingedem ti relasionmo ken Jehova, palawaem ti panagserbim iti Dios ken ti panagayatmo iti sabsabali. Kas kadagiti naasawaan, makagunggona ti kinaawan asawa no tuladentayo ti panangmatmat ti Dios ken usarentayo a nainsiriban dayta a sagut.

Malagipyo Kadi?

• Kadagiti ania a pamay-an a maysa a sagut ti kinaawan asawa?

• Kasano a maysa a bendision kadagiti agtutubo ti kinaawan asawada?

• Ania dagiti oportunidad a matagiragsak dagiti awanan asawa a Kristiano tapno ad-adda a sumingedda ken ni Jehova ken mapalawada ti panagayatda?

[Salsaludsod]

[Dagiti Ladawan iti panid 18]

Us-usarenyo kadi a nainsiriban ti gundawayyo nga agserbi iti Dios?