Saan a Sayang ti Panagreggetyo!

NAGPATEG ti Panagdaydayaw ti Pamilia ken panagadal iti Biblia tapno mapadakkel dagiti annak “iti disiplina ken panangiturong-panunot ni Jehova.” (Efe. 6:4) Ngem no maysaka a nagannak, ammom a nalaka a mauma dagiti ubbing. Kasanom a mataginayon ti atensionda? Usigem ti inaramid ti dadduma a nagannak.

“Idi ubbing pay dagiti annakmi,” kuna ni George a taga-California, U.S.A., “inkagumaanmi ken baketko a pinagbalin a makapainteres ti panagadalmi iti Biblia kas pamilia. Adda gundaway nga agkaweskami amin a kas kadagiti karakter iti Biblia ken iyaktomi ti maysa a salaysay bayat a basbasaenmi daytoy manipud iti Ti Librok Dagiti Estoria ti Biblia. Nagaramidkami met iti props kas iti espada, setro, basket, ken dadduma pay. Nagay-ayamkami iti pinnugtuan no ania a karakter iti Biblia ken nagaramidkami pay iti Bible cards nga addaan kadagiti narigat ken nalaka a saludsod. Adda met dagiti proyektomi kas iti panagaramid iti bassit a daong wenno listaan dagiti napateg a pasamak iti Biblia. Adda dagiti gundaway nga idrowingmi ti nagduduma a karakter ken estoria iti Biblia. Iti agdama, planomi nga idrowing ti naespirituan a kabal a nailadawan iti Efeso 6:11-17, a tunggal maysa kadakami ilawlawagna no ania ti irepresentar ti tunggal kabal. Tagtagiragsakenmi ti panagadal ti pamiliami gapu kadagitoy a pamay-an.”

Ni Debi a maysa nga ina a taga-Michigan, U.S.A., kunana: “Idi agarup tallo ti tawen ti anakmi, marigatankami ken lakayko a mangala iti atensionna. Maysa nga aldaw, bayat nga ibasbasak ti estoria maipapan kada Isaac ken Rebecca manipud iti Ti Librok Dagiti Estoria ti Biblia, nangalaak iti dua a munieka, sa pinagparangko nga isuda ti agsasao! Kadagiti simmaganad a bulan, nagduduma a karakter iti Biblia ti inakem dagita a munieka. Kalpasan a mabasami ti maysa a salaysay, agsapul ti anakmi kadagiti ay-ayam wenno aniaman a banag iti uneg ti balaymi a mabalin a mausar a mangyakto iti estoria. Kasla panagbirok dayta iti gameng! Maysa a karton ti sapatos ken nalabaga a ribon ti nagserbi a balay ni Rahab nga addaan iti nalabaga a tali. Ti 1.5 a metro ti kaatiddogna nga uleg-uleg a naiputipot iti sagad ket nagsayaat nga usaren a mangiladawan iti serpiente a gambang a nadakamat iti Numeros 21:4-9. Indulinmi ti props iti dakkel a bag. Maragsakankami ta masansan nga agtugaw ti anakmi iti salas sa bukitkitenna ti ‘Bible story bag-na.’ Anian a ragsakmi a makakita iti anakmi a mangyakto kadagiti estoria iti Biblia iti bukodna a pamay-an!”

Saan a nalaka ti agpadakkel iti annak. Dagiti nagannak masapul nga iyukuokda kadakuada ti tarigagay nga agserbi ken Jehova, nga aramidenda dayta iti inaldaw ken iti nagduduma a pamay-an. Tapno maibanag dayta napateg ti linawas a panagdaydayaw ti pamilia ken panagadal iti Biblia. Sigurado a saan a sayang ti panagreggetyo!