Talaga Kadi nga Ap-apresiarem Dagiti Maaw-awatmo a Bendision?

GAPU ta simimilagro a nawayawayaan dagiti Israelita manipud pannakaadipen idiay Egipto, maragsakanda idi damo ta nawayadan nga agdayaw ken Jehova. (Ex. 14:29–15:1, 20, 21) Ngem di nagbayag kalpasanna, nagbaliw ti panangmatmatda. Nangrugida nga agreklamo maipapan iti kasasaadda. Apay? Gapu ta ad-adda a pinanunotda ti narigat a kasasaadda iti let-ang ngem iti inaramid ni Jehova para kadakuada. Kinunada ken Moises: “Apay nga inaondakami idiay Egipto tapno mataykami iti let-ang? Ta awan tinapay ken awan danum, ket karuroden ti kararuami ti uumsien a tinapay [a manna].”​—Num. 21:5.

Sinigsiglo kalpasanna, ni Ari David iti nagkauna nga Israel inkantana: “No maipapan kaniak, iti naayat a kinamanangngaasim nagtalekak; ti pusok agrag-o koma iti panangisalakanmo. Kantaakto ni Jehova, ta isu nakilangen a siiimbag kaniak.” (Sal. 13:5, 6) Saan a nalipatan ni David dagiti inaramid kenkuana ni Jehova nga ebkas ti naayat a kinamanangngaasina. Kanayon a pinampanunotna dagita. (Sal. 103:2) Sibabaknang met a bembendisionannatayo ni Jehova, isu a ditay koma tagtagilag-anen ti ar-aramidenna para kadatayo. Usigentayo ti sumagmamano a bendision ti Dios a tagtagiragsakentayo ita.

“Kinasinged ken Jehova”

Inkanta ti salmista: “Ti kinasinged ken Jehova kukua dagidiay agbuteng kenkuana.” (Sal. 25:14) Anian a pribilehio dagiti imperpekto a tattao a maaddaan iti nasinged a relasion ken Jehova! Ngem kasanon no okupadotayo unay kadagiti inaldaw a pakaseknantayo iti biag isu a manmanon ti tiempotayo nga agkararag? Ania ngata ti mabalin a mapasamak iti nasayaat a relasiontayo ken Jehova? Kas Gayyemtayo, namnamaen ni Jehova nga agtalektayo kenkuana ken iparukpoktayo ti linaon ti pusotayo babaen ti kararag, nga iyebkastayo kenkuana dagiti  pagam-amkan, tarigagay, ken pakaringgorantayo. (Prov. 3:5, 6; Fil. 4:6, 7) Gapuna, saan kadi a nasayaat nga usigentayo ti kalidad dagiti kararagtayo?

Idi inusig ti agtutubo a ni Paul dagiti kararagna, nabigbigna a masapul a pasayaatenna dagita. a Kinunana, “Nayugalikon nga usaren dagiti isu met laeng a sasao no agkararagak ken Jehova.” Idi nagsukimat ni Paul maipapan iti kararag iti Watch Tower Publications Index, naammuanna nga adda agarup 180 a kararag a nairekord iti Biblia. Kadagita a kararag, inyebkas dagiti nagkauna nga adipen ni Jehova ti kaunggan a rikriknada. Kinuna ni Paul: “Babaen ti panangutobko kadagita a pagarigan iti Biblia, nasursurok ti agbalin nga espesipiko kadagiti kararagko. Daytoy ti nangtulong kaniak tapno mayebkasko ken Jehova ti amin a linaon ti pusok. Maragragsakanak itan nga umadani kenkuana iti kararag.”

‘Taraon iti Umiso a Tiempo’

Ti sabali pay a bendision nga ipapaay ni Jehova kadatayo ket ti adu a Nainkasuratan a kinapudno. Bayat a tagtagiragsakentayo ti aglaplapusanan a naespirituan a taraon, addaantayo iti rason nga ‘agdir-i a sirarag-o gapu iti nasayaat a kasasaad ti puso.’ (Isa. 65:13, 14) Ngem masapul nga agannadtayo kadagiti dakes nga impluensia, a ditay ipalubos a dagita ti mangpabaaw iti interestayo iti kinapudno. Kas pagarigan, ti panangbasa iti propaganda dagiti apostata mabalin nga apektaranna ti panunottayo ken ituggodnatayo a mangilaksid iti kinapateg dagiti naespirituan a ‘taraon iti umiso a tiempo’ nga ipapaay ni Jehova babaen “ti matalek ken masirib nga adipen.”​—Mat. 24:45-47.

Nasaem ti napasaran ni André, a nabayagen nga agserserbi ken Jehova, gapu ta nagpaimpluensia iti kapanunotan dagiti apostata. Impagarupna nga awan pagdaksanna ti apagbiit laeng a panangkita iti Web site dagiti apostata. Malagipna: “Idi damo, naatrakarak iti ibagbaga dagiti apostata a kinapudno. Bayat nga umun-uneg ti panangusigko iti ibagbagada, ad-adda a nakombinsirak a mangpanaw iti organisasion ni Jehova. Ngem idi agangay, bayat a suksukimatek dagiti argumento dagiti apostata maibusor kadagiti Saksi ni Jehova, nabigbigko no kasano kasikap dagiti ulbod a mannursuro. Dagiti impormasion a di umiso ti pannakayaplikarna ti ‘nabileg nga ebidensiada’ maibusor kadatayo. Gapuna, rinugiak manen ti agbasa kadagiti publikasiontayo ken tumabuno kadagiti gimong. Idi agangay, nabigbigko a nagadu gayamen ti nakaikapisak.” Makaparagsak ta nagsubli ni André iti kongregasion.

“Intero a Timpuyog Dagiti Kakabsat”

Maysa a bendision manipud ken Jehova ti naayat ken nagkaykaysa a panagkakabsat. (Sal. 133:1) Adda naimbag a rason ni apostol Pedro a nangisurat: “Maaddaankayo iti ayat iti intero a timpuyog dagiti kakabsat.” (1 Ped. 2:17) Kas paset ti Nakristianuan a panagkakabsat, tagtagiragsakentayo ti naayat a suporta dagiti naespirituan nga amma, inna, ken kakabsattayo iti pammati.​—Mar. 10:29, 30.

Nupay kasta, maapektaran no dadduma ti relasiontayo kadagiti kakabsattayo gapu iti  nagduduma a kasasaad. Kas pagarigan, gapu iti kinaimperpekto ti maysa, nalakatayo laeng a masuron ken agbalin a manangkritikar kenkuana. No mapasamak dayta, saan kadi a nasayaat a laglagipentayo nga ay-ayaten ni Jehova dagiti adipenna iti laksid ti kinaimperpektoda? Kanayonanna, “no kunaentayo: ‘Awan ti basoltayo,’ iyaw-awantayo ti bagbagitayo ket ti kinapudno awan kadatayo.” (1 Juan 1:8) Saan kadi a rumbeng nga ikagumaantayo nga ‘itultuloy nga anusan ti maysa ken maysa ken sibubulos a pakawanen ti maysa ken maysa’?​—Col. 3:13.

Sa la nasursuro ti agtutubo a ni Ann ti kinapateg ti pannakilangen kadagiti kakabsat kalpasan ti nasaem a kapadasanna. Kas iti bayanggudaw nga anak iti pangngarig ni Jesus, isu ket immadayo iti kongregasion Kristiano. Di nagbayag, nakapagpampanunot isu a nagsubli iti kinapudno. (Luc. 15:11-24) Ania ti nasursuro ni Ann iti daytoy a kapadasanna? Kinunana: “Ita ta nakasubliakon iti organisasion ni Jehova, nasursurok nga ipateg ti amin a kakabsat iti laksid ti kinaimperpektoda. Alistoak la idi a mangkritikar kadakuada. Ngem determinadoak itan a di mangipalubos iti aniaman a manglapped kaniak a mangtagiragsak kadagiti bendision a kadua dagiti kapammatiak. Awan a pulos ti kaimudingan ti aniaman a banag iti lubong no ikompara iti tagtagiragsakentayo a naespirituan a paraiso.”

Kanayon nga Agyamanka Gapu Kadagiti Maaw-awatmo a Bendision

Ti namnamatayo a ti Pagarian ti Dios ti solusion ti amin a problema ti sangatauan ket maysa a gameng a di magatadan ti pategna. Idi damo a naammuantayo dayta a namnama, napalalo ti ragsaktayo! Nariknatayo ti kas iti narikna ti komersiante iti pangngarig ni Jesus a ‘nangilako iti amin a bambanag nga adda kenkuana’ tapno magatangna ti “maysa a perlas a nangato ti pategna.” (Mat. 13:45, 46) Awan ti mabasatayo a kinuna ni Jesus a napukaw ti komersiante ti panangipategna iti perlas. Umasping iti dayta, ditay koma ipalubos a mapukaw ti panangipategtayo iti nagsayaat a namnamatayo.​—1 Tes. 5:8; Heb. 6:19.

Usigentayo ti kapadasan ni Jean a nasurok nga 60 a tawenen nga agserserbi ken Jehova. Kinunana: “Ti nakatulong kaniak a sipapanunot iti Pagarian ti Dios ket ti panangisarsaritak iti dayta iti sabsabali. Nagsayaat ti epektona kaniak no makitak a maragsakanda gapu ta naawatanda ti maipapan iti Pagarian. Gapu iti pannakakitak a ti kinapudno maipapan iti Pagarian ket nasayaat ti epektona kadagiti iyad-adalak iti Biblia, maikunak, ‘Anian a nagsayaat nga iranud dagiti kinapudno iti sabsabali!’”

Masapul nga agyamantayo gapu iti adu a naespirituan a bendision a tagtagiragsakentayo. Uray no maipaspasangotayo kadagiti pakasuotan kas iti ibubusor, sakit, panaglakay, depression, ipapatay ti ipatpateg iti biag, ken rigat ti panagbiag, ammotayo a temporario laeng dagita. Malaksid kadagiti naespirituan a bendision, matagiragsaktayto pay dagiti pisikal a bendision iti sidong ti Pagarian ti Dios. Aniaman a panagsagaba nga ib-ibturantayo ita ket mapukawton iti baro a sistema ti bambanag.​—Apoc. 21:4.

Kabayatanna, agyamantayo koma gapu kadagiti maipapaay kadatayo a naespirituan a bendision ken ipakitatayo ti kas iti panangapresiar nga impakita ti salmista a nangikanta: “Adu a banag ti inaramidmo, O Jehova a Diosko, ti mismo a nakaskasdaaw nga ar-aramidmo ken ti pampanunotmo maipaay kadakami; awan ti maipadis kenka. No nagannayasak koma nga agibaga ken agsao maipapan kadakuada, nagbalinda nga ad-adu ngem iti kabaelak nga ibinsabinsa.”​—Sal. 40:5.

[Footnote]

[Ladawan iti panid 18]

Adda dagiti naespirituan a tulong a magun-odtayo no maipasangotayo iti pakasuotan