Adda Panggapuanyo nga Agrag-o

MAKITA ti kinaurnos kadagiti parsua ni Jehova, manipud iti sibibiag a selula agingga iti babassit ken dadakkel a grupo dagiti galaksi. Saan a nakaskasdaaw dayta yantangay ti Namarsua ket Dios ti urnos. (1 Cor. 14:33) Nakaskasdaaw met ti inaramid ti Dios nga urnos para iti panagdayaw. Usigenyo ti inaramid ni Jehova. Binuangayna ti sapasap nga organisasion a buklen ti ginasgasut a milion nga intelehente a parsua​—anghel ken tattao​—nga addaan iti wayawaya nga agpili ken nagkaykaysa iti nasin-aw a panagdayaw. Anian a makapaamanga dayta!

Iti nagkauna nga Israel, ti naindagaan a paset ti organisasion ti Dios ket isimbolo ti Jerusalem, nga ayan ti templo ni Jehova ken pagnanaedan ti pinulotanna nga ari. Maysa nga Israelita a nakautibo idiay Babilonia ti nangyebkas iti riknana maipapan iti nasantuan a siudad: “Ti dilak dumket koma iti ngadasko, no saanka a lagipen, no saanko nga ipangpangruna ti Jerusalem nga ad-adda ngem iti kangrunaan a makagapu iti panagrag-ok.”​—Sal. 137:6.

Kasta met kadi ti mariknayo iti organisasion ti Dios ita? Ad-adda kadi a dayta ti mangparparagsak kadakayo ngem iti aniaman a banag? Ammo kadi dagiti annakyo ti pakasaritaan ken panagandar ti naindagaan a paset ti organisasion ti Dios? Ap-apresiarenda kadi a kamengda ti sangalubongan a panagkakabsat dagiti Saksi ni Jehova? (1 Ped. 2:17) Apay a diyo aramiden dagiti sumaganad a singasing iti Panagdaydayaw ti Pamiliayo tapno rumayray ti panangapresiaryo iti organisasion ni Jehova?

Isalaysayyo ti “Al-aldaw ti Nabayagen a Tiempo”

Tunggal tawen, agtataripnong dagiti pamilia nga Israelita tapno rambakanda ti Paskua. Idi nayussuat ti piesta, imbilin ni Moises iti umili: “No kas pagarigan ti anakmo agimtuod kenka iti kalpasanna, a kunkunana, ‘Ania ti kaipapanan daytoy?’ iti kasta masapul a kunaem kenkuana, ‘Babaen ti pigsa ti ima inruarnakami ni Jehova manipud Egipto, manipud balay dagiti adipen.’” (Ex. 13:14) Masapul a dida liplipatan ti pannakilangen ni Jehova kadakuada. Sigurado nga adu nga amma nga Israelita ti nangtungpal iti bilin ni Moises. Kalpasan ti sumagmamano a henerasion, inkararag ti maysa nga Israelita: “O Dios, nangngegmi kadagiti lapayagmi, imbinsabinsa kadakami dagidi mismo nga ammami ti aramid nga inaramidmo idi al-aldawda, idi al-aldaw ti nabayagen a tiempo.”​—Sal. 44:1.

Para kadagiti agtutubo ita, ti pakasaritaan dagiti Saksi ni Jehova iti napalabas a 100 a tawen wenno nasursurok pay ket mabalin a kasla “al-aldaw ti nabayagen a tiempo.” Kasanoyo a biagen dagita a pasamak kadagiti annakyo? Dadduma a nagannak ti agusar iti Dagiti Saksi ni Jehova​—Manangiwaragawag iti Pagarian ti Dios, Tinawen a Libro, pakasaritaan ti biag a naipablaak kadagiti pagbasaantayo, ken dadduma pay a report mainaig kadagiti nateokratikuan nga aktibidad, a pakairamanan dagiti baro a DVD maipapan iti ili ti Dios iti kaaldawantayo. Dagiti video mainaig iti pannakaidadanes dagiti kakabsattayo iti dati a Soviet Union ken Nazi Germany isuroda dagiti pamilia nga agpannuray ken Jehova bayat dagiti pakasuotan. Iramanyo dagita a material iti Panagdaydayaw ti Pamiliayo. Dayta ti mangpabileg iti pammati dagiti annakyo no kas pagarigan ta masubok ti kinatarnawda.

Mabalin a nalaka a mauma dagiti ubbing no es-estoriaanyo laeng ida maipapan iti pakasaritaan ti organisasion. Gapuna, iramanyo ida. Kas pagarigan, pagpilienyo ti anakyo no ania a pagilian ti paginteresanna, ipasukimatyo ti nateokratikuan a pakasaritaan dayta a pagilian, ken kiddawenyo nga iranudna iti pamiliayo ti  sumagmamano a naadalna. Nalabit adda kakongregasionyo a nabayagen a matalek nga agserserbi ken Jehova a mabalinyo nga awisen iti panagdaydayaw ti pamiliayo. Mabalin a ti anakyo ti manginterbiu ken mangkiddaw iti kabsat nga isalaysayna dagiti kapadasanna. Wenno mabalinyo nga ipadrowing iti anakyo ti napapateg a nateokratikuan a pasamak, kas iti pannakaibangon ti sanga nga opisina, internasional a kombension, wenno panagusar iti ponograpo iti panangasaba iti binalaybalay.

Ammuenyo no Kasano nga “Agtrabaho ti Tunggal Paset”

Inyarig ni apostol Pablo ti kongregasion Kristiano ‘iti amin a paset ti bagi, nga agtutunos ken agkakamang babaen kadagiti nagsusuopanna. Isut’ gapuna a no agtrabaho ti tunggal paset a kas rebbengna, dumakkel ti sibubukel a bagi ket pumigsa babaen iti ayat.’ (Efe. 4:16, Ti Baro a Naimbag a Damag Biblia) No ammotayo ti panagandar ti bagi ti tao, umuneg ti apresasion ken panagraemtayo iti Namarsua kadatayo. Umasping iti dayta, no ammotayo ti panagandar ti sangalubongan a kongregasion, agamangatayo iti naindaklan ken ‘nadumaduma a pannakaiparangarang ti sirib ti Dios.’​—Efe. 3:10.

Inladawan ni Jehova no kasano ti panagandar ti organisasionna, agraman ti nailangitan a pasetna. Kas pagarigan, imbagana kadatayo nga intedna nga umuna ti palgaak ken Jesu-Kristo, a nangibaon met iti “anghelna ket baeten kenkuana imparangna dayta babaen kadagiti pagilasinan iti adipenna a ni Juan, a nangsaksi.” (Apoc. 1:1, 2) No impalgak ti Dios ti panagandar ti nailangitan a paset ti organisasionna, sigurado a kayatna a maammuantayo no kasano nga agan-andar ti naindagaan a paset ti organisasionna.

Kas pagarigan, no dandanin bumisita iti kongregasionyo ti manangaywan iti sirkito, apay a diyo pagsasaritaan kas pamilia dagiti annongen ken bendision a tagtagiragsaken dagiti agdaldaliasat a manangaywan? Kasanoda a tultulongan ti tunggal maysa kadatayo? Ti dadduma pay a saludsod a mabalinyo a pagsasaritaan ket: Apay a napateg nga ireport ti nagapuanantayo iti ministerio? Kasano a masupsuportaran ti organisasion ti Dios? Kasano ti pannakaorganisar ti Bagi a Manarawidwid, ken kasano a mangipapaay iti naespirituan a taraon?

Dagitoy ti dadduma kadagiti magunggonatayo no ammotayo ti pannakaorganisar ti ili ni Jehova: Rumayray ti apresasiontayo kadagidiay agtartrabaho a sipipinget para kadatayo. (1 Tes. 5:12, 13) Matignaytayo a mangsurot kadagiti nateokratikuan nga urnos. (Ara. 16:4, 5) Kamaudiananna, dumakkel ti panagtalektayo kadagidiay mangidadaulo kadatayo no ammotayo a naibatay iti Kasuratan dagiti ar-aramidenda a desision ken urnos.​—Heb. 13:7.

“Sukimatenyo Dagiti Pagnaedan a Torrena”

“Agmartsakayo a manglikmut iti Sion, ket likmutenyo dayta, bilangenyo dagiti torrena. Isaadyo ti puspusoyo kadagiti baluartena. Sukimatenyo dagiti pagnaedan a torrena, tapno iti kasta maibinsabinsayo dayta iti masanguanan a kaputotan.” (Sal. 48:12, 13) Ti salmista indagadagna kadagiti Israelita a sukimatenda a naimbag ti Jerusalem. Mailadawanyo kadi dagiti nakallalagip a kapadasan dagiti pamilia nga Israelita a napan iti nasantuan a siudad para iti tinawen a piesta ken nakakita iti nangayed a templo? Natignayda la ketdi a nangisalaysay iti “dayta iti masanguanan a kaputotan.”

Panunotenyo ti reyna ti Sheba, nga agduadua idi damo iti nadamagna maipapan iti nangayed a turay ni Solomon ken iti naruay a kinasiribna. Ania ti nakakombinsir kenkuana nga umiso dagiti nangngegna? Kinunana: “Saanak a naaddaan iti pammati kadagiti saoda agingga nga immayak tapno makita koma dagiti bukodko a mata.” (2 Cron. 9:6) Wen, dakkel ti epektona kadatayo ti makita dagiti mismo a matatayo.

Kasanoyo a matulongan dagiti annakyo tapno makitada a mismo ti nakaskasdaaw nga organisasion ni Jehova? No adda sanga nga opisina dagiti Saksi ni Jehova nga asideg iti pagtaenganyo, ikagumaanyo a pasiaren dayta. Kas pagarigan, da Mandy ken Bethany ket dimmakkel iti lugar nga agarup 1,500 a kilometro ti kaadayona manipud Bethel. Ngem dagiti nagannakda masansan nga ipasiarda ida iti Bethel bayat nga ubbingda pay.  “Idi saanmi pay a napasiar ti Bethel, impagarupmi a nakaing-inget ken para laeng dayta kadagiti nataengan,” kinunada. “Ngem naam-ammomi sadiay dagiti agtutubo a nagaget ken naragsak nga agtartrabaho para ken Jehova! Nakitami a saan laeng a ti bassit a lugarmi ti sakup ti organisasion ni Jehova, ken tunggal agpasiarkami iti Bethel bumileg ti espiritualidadmi.” Idi naammuan da Mandy ken Bethany ti panagandar ti organisasion ti Dios, natignayda nga agpayunir, ken naawisda pay a temporario nga agserbi iti Bethel.

Adda sabali pay a pamay-an tapno ‘makitatayo’ ti panagandar ti organisasion ni Jehova, maysa a banag nga awan iti nagkauna nga Israel. Iti napalabas a tawtawen, immawat ti ili ti Dios kadagiti video ken DVD a nangitampok iti nagduduma nga aspeto ti organisasion ti Dios kas iti: Jehovah’s Witnesses​—Organized to Share the Good News, Our Whole Association of Brothers, To the Ends of the Earth, ken United by Divine Teaching. Sigurado a rumayray ti panangapresiaryo iti sangalubongan a panagkakabsat no makitayo a sangapamiliaan ti kinagaget dagiti Bethelite, boluntario iti trabaho a panangsaranay, misionero, ken kakabsat nga agsagsagana ken mangor-organisar kadagiti kombension.

Tunggal kongregasion iti ili ti Dios ket addaan iti nagpateg a paset iti panangikasaba iti naimbag a damag ken panangtulong kadagiti Kristiano iti lugarda. Ngem maaddaankayo koma iti tiempo kas pamilia a manglagip iti “intero a timpuyog ti kakabsatyo ditoy lubong.” Dayta ti tumulong kadakayo ken kadagiti annakyo nga agtalinaed a “natibker iti pammati,” yantangay ammoyo nga adda panggapuanyo nga agrag-o.​—1 Ped. 5:9.

 [Kahon/Ladawan iti panid 18]

Ti Organisasion ti Dios Nagsayaat a Topiko iti Panagadal

Aglaplapusanan dagiti probision a makatulong iti amin a mangammo iti ad-adu pay maipapan iti pakasaritaan ken panagandar ti organisasion ni Jehova. Tapno maaramidyo dayta, makatulong kadakayo dagiti sumaganad a saludsod:

☞ Kasano a nangrugi ti trabaho dagiti agdaldaliasat a manangaywan ita?​—Dagiti Saksi ni Jehova​—Manangiwaragawag iti Pagarian ti Dios, panid 222-227.

☞ Ania ti naisangsangayan maipapan iti “Aldaw Dagiti Ubbing” bayat ti Nateokratikuan nga Asamblea idi 1941?​—Dagiti Saksi ni Jehova​—Manangiwaragawag iti Pagarian ti Dios, panid 86, 88.

☞ Kasano a makaaramid kadagiti desision ti Bagi a Manarawidwid?​—Naan-anay nga Ikasabam ti Pagarian ti Dios, panid 108-114.