Agtalekkayo ken Jehova Bayat nga Umas-asideg ti Panungpalan

“Agtalekkayo ken Jehova iti amin a tiempo.”​—ISA. 26:4.

1. Ania ti nakaidumaan dagiti adipen ti Dios kadagiti tattao ditoy lubong?

 AGBIBIAGTAYO iti lubong a minilion ti saanen a makaammo no asino wenno ania ti pagtalkanda, nalabit gapu ta namin-adun a nasaktan wenno napaayda. Anian a naiduma dagiti adipen ni Jehova! Gapu ta agpapaidalanda iti nadiosan a sirib, saanda nga agtalek iti daytoy a lubong wenno kadagiti “natan-ok” a tattao. (Sal. 146:3) Imbes ketdi, italekda ti biag ken masanguananda ken Jehova, ta ammoda nga ay-ayatenna ida ken kanayon a tungpalenna ti Saona.​—Roma 3:4; 8:38, 39.

2. Kasano a pinatalgedan ni Josue ti kinamapagtalkan ti Dios?

² Ni Josue a nagbiag idi ugma pinatalgedanna ti kinamapagtalkan ti Dios. Idi lakayen, kinunana kadagiti padana nga Israelita: “Pagaammoyo unay iti amin a pusoyo ken iti amin a kararuayo nga awan napaay a maysa a sao manipud iti amin  a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo.”​—Jos. 23:14.

3. Ania ti ipalgak ti nagan ti Dios maipapan kenkuana?

³ Tungtungpalen ni Jehova dagiti karina, saan laeng a maigapu iti panagayatna kadagiti adipenna no di ket kangrunaanna a maigapu iti naganna. (Ex. 3:14; 1 Sam. 12:22) Ti pakauna ti The Emphasized Bible ni J. B. Rotherham, inlawlawagna a ti nagan ti Dios kaipapananna a kabaelan ti Dios ti agbalin iti aniaman a kayatna tapno matungpalna dagiti karina. No mangngegtayo ti naganna, sumiplot iti panunottayo a kanayon nga aramidenna no ania ti imbagana. Iti aniaman a tiempo ken lugar, kabaelanna nga aramiden ti masapul nga aramidenna. Awan ti imposible kenkuana. Kanayon nga agtignay maitunos iti kaipapanan ti naganna.

4. (a) Ania ti iparegta ti Isaias 26:4 nga aramidentayo? (b) Ania ti usigentayo iti daytoy nga artikulo?

⁴ Isaludsodyo iti bagiyo: ‘Am-ammok kadi a talaga ni Jehova tapno maaddaanak iti naan-anay a panagtalek kenkuana? Addaanak kadi iti kompiansa a mangsango iti masanguanan gapu ta ammok a kontrolado ti Dios dagiti bambanag?’ Kuna ti Isaias 26:4: “Agtalekkayo ken Jehova iti amin a tiempo, ta ken Jah Jehova adda ti Bato kadagiti tiempo a di nakedngan.” Pudno, saanen a simimilagro a bumallaet ti Dios iti biag dagiti tattao a kas idi tiempo ti Biblia. Nupay kasta, kas “ti Bato kadagiti tiempo a di nakedngan,” isu ket mapagtalkan “iti amin a tiempo.” Kasano a tultulongan ita ti mapagtalkan a Diostayo dagiti matalek nga agdaydayaw kenkuana? Usigentayo ti tallo a pamay-an: Pabilgennatayo no kiddawentayo ti tulongna a mangsaranget iti sulisog, tulongannatayo no maipasangotayo iti kinaaleng-aleng wenno direkta nga ibubusor, ken pabilgennatayo no maipasangotayo iti adu a pakaringgoran. Bayat nga usigentayo dagitoy a banag, utobenyo no kasanoyo a mapabileg ti panagtalekyo ken Jehova.

Agtalek iti Dios no Masulisog nga Agaramid iti Dakes

5. Kaano nga ad-adda a masubok ti panagtalektayo iti Dios?

⁵ Nalaklaka ti agtalek ken Jehova no maipapan iti bambanag a tartarigagayantayo, kas iti karina a Paraiso wenno panagungar. Ngem mabalin a narigrigat ti agtalek Kenkuana no iti panangsurot kadagiti moral a pagalagadan, ken iti panagbalin a naan-anay a kombinsido a ti panangannurot kadagita ket umiso ken mangyeg iti dakkel a ragsak. Insurat ni Ari Solomon daytoy a balakad: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” (Prov. 3:5, 6) Imutektekanyo ti pannakadakamat dagiti sasao a ‘daldalan’ ken ‘danatayo.’ Wen, ti intero a panagbiagtayo​—saan laeng a ti namnamatayo kas Kristiano​—iyanninawna koma ti panagtalektayo iti Dios. Kasanotayo a maipakita dayta a panagtalek no maipasangotayo kadagiti sulisog?

6. Kasanotayo a mapabileg ti determinasiontayo a mangiwaksi iti dakes a panagpampanunot?

⁶ Ti panangliklik iti dakes ket mangrugi iti  isiptayo. (Basaen ti Roma 8:5; Efeso 2:3.) Kasanotayo ngarud a mapabileg ti determinasiontayo a mangiwaksi iti dakes a panagpampanunot? Usigentayo ti lima a pamay-an: 1. Kiddawem ti tulong ti Dios babaen ti kararag. (Mat. 6:9, 13) 2. Utobem dagiti pagarigan iti Biblia maipapan kadagidiay nangipangag ken saan a nangipangag ken Jehova. Kalpasanna, kitaem no ania ti nagbanaganda. a (1 Cor. 10:8-11) 3. Panunotem ti riribuk ken saem nga iyeg ti basol kenka ken iti ipatpategmo iti biag. 4. Panunotem ti marikna ti Dios no makaaramid dagiti adipenna iti nadagsen a basol. (Basaen ti Salmo 78:40, 41.) 5. Panunotem ti ragsak a marikna ni Jehova no makitana ti nasungdo nga adipenna a mangilaksid iti dakes ken mangaramid iti umiso, adda man makakitkita wenno awan. (Sal. 15:1, 2; Prov. 27:11) Maipakitam ti panagtalekmo ken Jehova babaen ti panangaramidmo iti umiso.

Agtalek iti Dios no Maipasango iti Kinaaleng-aleng ken Ibubusor

7. Ania dagiti suot a nakaipasanguan ni Jeremias, ken ania ti nariknana?

⁷ Adu a kakabsattayo ti agserserbi kadagiti narigat a teritoria. Nagserbi idi ni propeta Jeremias iti kasta a lugar​—ti pagarian ti Juda bayat dagiti nariribuk a maudi nga al-aldawna. Inaldaw a masubok ti pammatina gapu ta simamatalek nga impakaammona ti panangukom ti Dios. Naminsan, uray ti nasungdo a sekretariona a ni Baruc inreklamona ti pannakabannogna. (Jer. 45:2, 3) Naupay kadi ni Jeremias? Bueno, adda gundaway a nakarikna iti kasta. “Mailunod koma ti aldaw a pannakayanakko!” kinunana. “Apay a rimmuarak manipud iti mismo nga aanakan tapno makitak ti napinget a panagtrabaho ken ladingit ket dagiti aldawko rebbeng nga agngudoda iti pannakaibabain laeng?”​—Jer. 20:14, 15, 18.

8, 9. Maitunos iti Jeremias 17:7, 8 ken Salmo 1:1-3, ania ti masapul nga aramidentayo tapno agtultuloy a makapataudtayo iti nasayaat a bunga?

⁸ Kaskasdi, saan a simmuko ni Jeremias. Intultuloyna ti nagtalek ken Jehova. Kas resultana, napasaran daytoy a matalek a propeta ti kaitungpalan dagiti mismo a sasao ni Jehova a nairekord iti Jeremias 17:7, 8: “Bendito ti nabaneg a lalaki a mangikabil ti panagtalekna ken Jehova, ket ni Jehova ti nagbalin a pagkammatalkanna. Ket isu pudno unay nga agbalinto a kas maysa a kayo a naimula iti igid ti dandanum, a mangparuar kadagiti ramutna iti mismo nga igid ti pagay-ayusan ti danum; ket saannanto a makita no umay ti pudot, no di ket ti bulbulongna pudno nga agbalinto a nabaludbod. Ket iti tawen ti tikag saanto a maringgoran, saanto met a mamingga a mangpataud iti bunga.”

⁹ Kas iti narangpaya a kayo a “naimula iti igid ti dandanum” wenno iti mapadpadanuman a minuyongan, ‘saan a namingga ni Jeremias a nangpataud iti bunga.’ Saan a nagpaimpluensia kadagiti nadangkes ken managuy-uyaw. Imbes ketdi, nagtalinaed iti Gubuayan ti mangbibiag a “danum” ken impapusona ti amin nga imbaga kenkuana ni Jehova. (Basaen ti Salmo 1:1-3; Jer. 20:9) Anian a nagsayaat a pagwadan kadatayo ni Jeremias, nangruna kadagidiay agserserbi iti Dios kadagiti narigat a teritoria! No kasta ti kasasaadmo, itultuloymo ti agpannuray ken Jehova, a mangipaay kenka iti panagibtur bayat nga ‘idekdeklaram ti naganna iti publiko.’​—Heb. 13:15.

10. Ania dagiti bendision a tagtagiragsakentayo, ken ania ti rumbeng nga isaludsodtayo iti bagitayo?

¹⁰ Adu ti ipapaay ni Jehova a tulong tapno mapagballigiantayo dagiti pakarigatan bayat ti maudi nga al-aldaw. Ti maysa kadagita ket ti kompleto a Sao ti Dios a siuumiso a naipatarus iti adu a lenguahe. Ipapaayna ti nawadwad a naespirituan a taraon iti umiso a tiempo babaen ti klase matalek ken masirib nga adipen. Kadagiti gimong ken asamblea, us-usarenna ti nagadu a kapammatiantayo a tumulong kadatayo. Naan-anay kadi nga ap-aprobetsarenyo dagitoy a probision? Amin a mangar-aramid iti dayta “agdir-idanto a sirarag-o gapu iti nasayaat a kasasaad ti puso.” Ngem dagidiay saan a mangipangag iti Dios ‘agsangitdanto gapu iti saem ti puso ket aganug-ogdanto gapu iti bin-ig a pannakarba ti espiritu.’​—Isa. 65:13, 14.

 Agtalek iti Dios no Maipasango Kadagiti Pakaringgoran

11, 12. Gapu kadagiti problema iti lubong, ania ti nainsiriban nga aramidentayo?

¹¹ Kas naipadto, malaplapunos ti sangatauan kadagiti pakarigatan. (Mat. 24:6-8; Apoc. 12:12) No dumteng ti layus, ti gagangay nga aramiden ti maysa ket ti agkamang iti nangatngato a lugar wenno umuli iti atep ti maysa a patakder. Umasping iti dayta, bayat a malaplapunos ti lubong kadagiti problema, minilion ti agkamang iti kasla nangato wenno natalged nga institusion mainaig iti ekonomia, politika, wenno relihion, agraman ti siensia ken teknolohia. Ngem awan kadagitoy ti makaipaay iti pudpudno a kinatalged. (Jer. 17:5, 6) Iti kasumbangirna, dagiti adipen ni Jehova ket addaan iti natalged a pagkamangan​—“ti Bato kadagiti tiempo a di nakedngan.” (Isa. 26:4) Kinuna ti salmista: “[Ni Jehova] ti batok ken pakaisalakanak, ti natalged a kamangko.” (Basaen ti Salmo 62:6-9.) Kasano nga agbalin a pagkamangantayo daytoy a Bato?

¹² Arigna a kumpettayo ken Jehova no ipangagtayo ti Saona, a masansan a naiduma iti natauan a sirib. (Sal. 73:23, 24) Kas pagarigan, dagiti agpapaimpluensia iti natauan a sirib mabalin a kunaenda: ‘Maminsanka la nga agbiag; ipapasmon.’ ‘Mangalaka iti nangato a kurso.’ ‘Agpabaknangka.’ ‘Gatangem amin a kayatmo.’ ‘Agpasiarka, likmutem ti lubong.’ Ngem ti nadiosan a sirib ket maitunos iti daytoy a balakad: “Dagidiay [koma] mangus-usar iti lubong [agbalinda a] kas kadagidiay di mangus-usar a naan-anay iti dayta; ta ti buya daytoy a lubong agbaliwbaliw.” (1 Cor. 7:31) Umasping iti dayta, iparegta kadatayo ni Jesus a kanayon nga iyun-unatayo dagiti interes ti Pagarian, iti kasta, makaurnongtayo kadagiti “gameng idiay langit,” a sadiay sigurado a natalged dagita.​—Mat. 6:19, 20.

13. Bayat a pampanunotentayo ti 1 Juan 2:15-17, ania ti masapul nga isaludsodtayo iti bagitayo?

¹³ Ti kadi panangmatmatmo iti “lubong” ken iti “bambanag nga adda iti lubong” ipakitana a naan-anay ti panagtalekmo iti Dios? (1 Juan 2:15-17) Napatpateg kadi kenka dagiti naespirituan a kinabaknang ken ti pribilehiom nga agserbi iti Dios ngem kadagiti ituktukon ti lubong? (Fil. 3:8) Ikagkagumaam kadi a taginayonen a “simple ti matam”? (Mat. 6:22) Siempre, saan a kayat ti Dios nga agbalintayo nga iresponsable, nangruna no adda pamilia a supsuportarantayo. (1 Tim. 5:8) Ngem namnamaenna a naan-anay nga agtalek kenkuana dagiti adipenna imbes nga iti dandanin agpatingga a lubong ni Satanas.​—Heb. 13:5.

14-16. Kasano a nagunggonaan ti dadduma gapu iti panangtaginayonda iti ‘simple a mata’ ken panangyun-unada kadagiti interes ti Pagarian?

¹⁴ Usigentayo ti kapadasan da Richard ken Ruth nga addaan iti tallo nga annak. “Ammok nga ad-adu pay ti kabaelak nga aramiden agpaay ken Jehova,” kuna ni Richard. “Nanam-ay ti biagko ngem mariknak a tedtedda laeng ti ipapaayko iti Dios. Kalpasan ti panangikararag ken panangtingitingmi iti bambanag, nagtulaganmi ken Ruth a kiddawek iti superbisorko nga uppat laengen nga aldaw ti panagtrabahok iti makalawas​—uray no krisis idi ti ekonomia iti pagilianmi. Napatgan ti kiddawko, pinadasko a sinurot ti baro nga eskediulko iti makabulan.” Ania ti marikna itan ni Richard?

¹⁵ “Naksayan iti 20 a porsiento ti sueldok,” kinunana, “ngem adda kanayonan a 50 nga aldaw iti makatawen a mausarko a makikadua iti  pamiliak ken mangsanay kadagiti annakmi. Nagdoble ti tiempo a busbusbosek iti ministerio, nagtriple ti bilang dagiti iyad-adalak iti Biblia, ken ad-adu ti panawenko a mangidaulo iti kongregasion. Ken gapu ta ad-adu ti tiempok a mangaywan kadagiti annakmi, adda dagiti gundaway a makapag-auxiliary pioneer ni Ruth. Determinadoak a mangtaginayon iti daytoy nga eskediul agingga a kabaelak.”

¹⁶ Da Roy ken Petina, nga adda pay la maysa nga anakda iti poderda, kinissayanda ti orasda a mangged tapno makapag-regular payunirda. Kinuna ni Roy: “Tallo nga aldaw iti kada lawas nga agtrabahoak ken dua nga aldaw met ken Petina. Kasta met, immakarkami iti maysa nga apartment a nalaklaka a manteneren. Payunirkami sakbay a naaddaankami iti annak, ken pulos a di napukaw ti tarigagaymi nga agpayunir. Gapuna, idi dimmakkelen dagiti annakmi, nagpayunirkami manen. Di magatadan dagiti bendision a nasagrapmi.”

Ti “Talna ti Dios” Saluadanna Koma ti Pusoyo

17. Gapu ta ditay ammo ti mapasamak iti masanguanan, kasano a makaliwliwa kenka ti Kasuratan?

¹⁷ Ditay ammo no ania ti mapasamak iti masanguanan yantangay mapagteng kadatayo amin “ti tiempo ken ti di mapakpakadaan a pasamak.” (Ecl. 9:11) Ngem saan koma a dayta ti mangikkat iti talna ti panunottayo, kas iti masansan a mapaspasamak kadagidiay awanan iti nasinged a relasion iti Dios. (Mat. 6:34) Insurat ni apostol Pablo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo.”​—Fil. 4:6, 7.

18, 19. Kadagiti ania a pamay-an a liwliwaennatayo ti Dios? Mangted iti pagarigan.

¹⁸ Adu a kakabsattayo nga agpaspasar iti narigat a kasasaad ti makarikna iti talna ti panunot manipud ken Jehova. Kuna ti maysa a kabsat: “Maulit-ulit a binutbutengnak ti maysa a siruhano tapno agpayalisonak iti dara. Ti maysa kadagiti damo nga imbagana ket, ‘Minamaag ti saan a panagpayalison iti dara.’ Kalpasan dayta ken iti dadduma a gundaway, siuulimek a nagkararagak ken Jehova ket naaddaanak iti talna ti panunot. Nariknak a nagtibker ti determinasionko. Nupay agkakapsutak gapu ta nababa ti darak, nabaelak nga inrasonan ti takderko manipud Kasuratan.”

¹⁹ No dadduma, mangipaay ti Dios iti kasapulantayo a tulong babaen ti panangliwliwa ti maysa a kapammatian wenno ti naespirituan a taraon iti umiso a tiempo. Mabalin a makangngegkayo iti kabsat a nagkuna: “Naintiempuan unay daytoy nga artikulo. Nairanta para kaniak!” Wen, aniaman ti kasasaad wenno kasapulantayo, ipakita ni Jehova ti panagayatna kadatayo no agtalektayo kenkuana. Datayo ngamin dagiti ‘karnerona’ ken awittayo ti naganna.​—Sal. 100:3; Juan 10:16; Ara. 15:14, 17.

20. Apay natalgedto dagiti adipen ni Jehova inton agpatingga ti lubong ni Satanas?

²⁰ Bayat ti napartak nga idadateng ti “aldaw ti rungsot ni Jehova,” madadaelto ti amin a pagtaltalkan ti lubong ni Satanas. Ti balitok, pirak, ken dadduma pay a napateg a bambanag ket saanto a pulos a makaipaay iti proteksion. (Sof. 1:18; Prov. 11:4) Ti kakaisuna a natalged a pagkamangan ket ti “Bato kadagiti tiempo a di nakedngan.” (Isa. 26:4) Gapuna, ipakitatayo koma ita ti naan-anay a panagtalektayo ken Jehova babaen ti pannagnatayo iti nalinteg a danana, babaen ti panangipakaammotayo iti mensahe ti Pagarian iti laksid ti kinaaleng-aleng ken ibubusor, ken babaen ti panangyallatiwtayo kenkuana ti amin a pakaringgorantayo. No aramidentayo dagita, sigurado a ‘natalgedtayto ken ditayto masinga manipud alinggaget ti didigra.’​—Prov. 1:33.

[Footnote]

Mailawlawagyo Kadi?

Kasano a maipakitatayo ti panagtalek iti Dios

• no masulisogtayo nga agaramid iti dakes?

• no maipasangotayo iti kinaaleng-aleng ken ibubusor?

• no maipasangotayo kadagiti pakaringgoran?

[Salsaludsod]

[Ladawan iti panid 13]

Mangyeg iti kinaragsak ti panangsalimetmet

kadagiti pagalagadan ti Dios

[Ladawan iti panid 15]

‘Ni Jehova ti Bato kadagiti tiempo a di nakedngan’