Diyo Allilawen ti Bagiyo Babaen ti Ulbod a Panagrasrason

“ANIA daytoy inaramidmo?” Dayta ti insaludsod ti Dios ken ni Eva kalpasan a nangan iti bunga ti maiparit a kayo. “Ti serpiente​—inallilawnak ket ngarud nanganak,” insungbatna. (Gen. 3:13) Ni Satanas, ti nasikap a serpiente a nangituggod ken Eva nga agsukir iti Dios, ket naawagan idi agangay iti “kadaanan a serpiente, . . . a mangyaw-awan iti intero a mapagnaedan a daga.”​—Apoc. 12:9.

Ti salaysay ti Genesis tukoyenna ni Satanas kas nasikap, daydiay nangparnuay iti kinaulbod tapno maallilawna dagidiay saan a naannad. Ni Eva ti maysa kadagiti naallilawna. Nupay kasta, ditay koma panunoten a ni laeng Satanas ti mabalin a mangallilaw kadatayo. Pakdaarannatayo met ti Biblia maipapan iti peggad ti ‘panangallilaw iti bagitayo babaen ti ulbod a panagrasrason.’​—Sant. 1:22.

Kasla imposible a maallilawnatayo ti bagitayo. Ngem sigurado nga adda rason no apay nga impakdaar dayta ti Dios. Gapuna, nasayaat nga usigentayo no kasano a maallilawnatayo ti bagitayo ken no ania nga ulbod a panagrasrason ti mangyaw-awan kadatayo. Adda Nainkasuratan a pagarigan a makatulong kadatayo.

Pagarigan iti Panangallilaw ti Bagi

Idi agarup 537 K.K.P., nangipaulog ni Ciro a Dakkel iti Persia iti bilin a dagiti nakautibo a Judio idiay Babilonia ket agsublida idiay Jerusalem ken ibangonda manen ti templo. (Esd. 1:1, 2) Iti sumaganad a tawen, insaad dagiti umili ti pamuon ti baro a templo maitunos iti panggep ni Jehova. Nagragsak dagiti nagsubli a Judio ken indaydayawda ni Jehova gapu iti panangbendisionna iti umuna a paset daytoy napateg a proyekto. (Esd. 3:8, 10, 11) Ngem idi agangay, timmaud ti ibubusor iti trabahoda a panagibangon isu a naupay dagiti umili. (Esd. 4:4) Agarup 15 a tawen kalpasan ti panagsublida, imparit ti autoridad ti Persia ti trabaho a panagibangon idiay Jerusalem. Tapno maipatungpal dayta, dimteng dagiti opisial ket “pinasardengda [dagiti Judio] babaen iti puersa dagiti armas.”​—Esd. 4:21-24.

Gapu iti dayta a nakaro nga ibubusor, inallilaw dagiti Judio ti bagbagida babaen ti ulbod a panagrasrason. Kinunada: “Ti tiempo saan pay a dimteng, ti tiempo ti balay ni Jehova, tapno maibangon dayta.” (Hag. 1:2) Impagarupda a saan pay a pagayatan ti Dios a mairingpas a dagus ti templo. Imbes nga ikagumaanda nga itungpal ti pagayatan ti Dios, pinanawanda ti sagrado a trabahoda ket impamaysada a pinapintas dagiti balayda. Ni Haggeo a propeta ti Dios, direkta nga insaludsodna kadakuada: “Tiempo kadi nga agnaedkayo kadagiti balayyo a nagsukot ti didingna, idinto ta daytoy a balay [ti templo ni Jehova] ket rebbek?”​—Hag. 1:4.

Ania ti maadaltayo iti dayta a pagarigan? No di umiso ti panangmatmattayo iti tiempo a pannakaitungpal ti panggep ti Dios, mabaybay-antayo dagiti naespirituan nga aktibidad ken masingatayo kadagiti personal a pakaseknantayo. Kas panangyilustrar, ipapantayo nga adda ur-urayenyo a bisita. Gapu ta namnamaenyo ti isasangpetda, makarintarkayo a mangisagana iti kasapulanda bayat ti panagyanda iti balayyo. Ngem naammuanyo a maladawda a sumangpet. Isardengyo kadin ti agsagana?

Laglagipenyo a da Haggeo ken Zacarias tinulonganda dagiti Judio a mangtarus a kayat ni Jehova a mairingpas a dagus ti pannakaibangon ti templo. Indagadag ni Haggeo: “Pumigsakayo, dakayo amin nga umili iti daga, . . . ket agtrabahokayo.” (Hag. 2:4) Masapul nga itultuloyda ti trabahoda, nga agtalekda a tulongan ida ti espiritu ti Dios. (Zac. 4:6, 7) Makatulong  kadi daytoy a pagarigan tapno maliklikantayo ti maaddaan iti di umiso a konklusion maipapan iti aldaw ni Jehova?​—1 Cor. 10:11.

Maaddaan iti Natimbeng a Panagpampanunot

Iti maikadua a surat ni apostol Pedro, dinakamatna ti tiempo nga inkeddeng ni Jehova a panangipasdek iti “baro a langlangit ken baro a daga.” (2 Ped. 3:13) Kinunana nga adda dagiti managuy-uyaw a mangibagbaga a saan kano a bumallaet ti Dios iti ar-aramid dagiti tattao. Sibibiddut a kinunada nga awan ti mapasamak, nga “amin a bambanag [ket] nagtultuloy nga isu latta nanipud idi panangrugi ti sangaparsuaan.” (2 Ped. 3:4) Kayat ni Pedro nga ilinteg ti kasta a di umiso a panagrasrason. Insuratna: “Parayrayek dagiti nasin-aw a pannakabalinyo nga agpanunot babaen iti pammalagip.” Impalagipna kadagiti pada a Kristiano a nagkamali dagiti managuy-uyaw. Bimmalaet idi ti Dios iti ar-aramid dagiti tattao babaen ti panangipagtengna iti makadidigra a sangalubongan a layus.​—2 Ped. 3:1, 5-7.

Idi 520 K.K.P., kasta met laeng ti indagadag ni Haggeo kadagiti Judio a naupay ken nagsardeng a nagibangon. Imparegtana: “Isaadyo ta pusoyo iti daldalanyo.” (Hag. 1:5) Tapno matulonganna ida nga agpanunot, impalagipna dagiti panggep ken kari ti Dios iti ilina. (Hag. 1:8; 2:4, 5) Di nagbayag kalpasan dayta a panangparegta, naituloy ti trabaho a panagibangon iti laksid ti panangiparit ti autoridad. Inkagumaan manen dagiti bumusbusor a pasardengen ti panagibangon ngem saanda a nagballigi. Naikkat ti panangiparit, ket nairingpas ti templo kalpasan ti lima a tawen.​—Esd. 6:14, 15; Hag. 1:14, 15.

Isaadtayo ti Pusotayo iti Daldalantayo

Kas kadagiti Judio idi panawen ni Haggeo, maupaytayo met kadi no maipasangotayo kadagiti pakarigatan? No mapasamak dayta, nalabit bumaaw ti regtatayo a mangikasaba iti naimbag a damag. Ngem ania dagiti posible a pakaupayantayo? Bueno, mabalin nga agsagsagabatayo gapu iti kinaawan hustisia iti daytoy a sistema ti bambanag. Panunotenyo ni Habakuk a nangisaludsod: “Kasano pay kabayag ti panagdawatko iti tulongmo sakbay nga ipangagnak ket isalakannakami iti kinaranggas?” (Hab. 1:2, Ti Baro a Naimbag a Damag Biblia) No maipapan iti ibilang ti dadduma a pannakaitantan, mabalin a mapukaw ti maysa a Kristiano ti pannakariknana iti kinaganat ket ipangpangrunana ti pananggun-od iti nanam-ay a panagbiag. Kasta kadi ti mapaspasamak kenka? No kasta ti panagrasrasontayo, al-allilawentayo ti bagitayo. Anian a nagpateg nga ipangagtayo ti balakad ti Kasuratan nga ‘isaadtayo ti pusotayo iti daldalantayo’ ken ‘parayrayentayo ti nasin-aw nga abilidadtayo nga agpanunot’! Isaludsodtayo iti bagitayo, ‘Pakasdaawak kadi a di pay dimteng ti pannakadadael ti dakes a sistema ti bambanag a kas iti namnamaek?’

Ti Ur-urayentayo a Tiempo nga Impadto ti Biblia

Usigentayo ti sasao ni Jesus maipapan iti panungpalan daytoy a sistema ti bambanag. Ti salaysay ni Marcos maipapan iti padto ni Jesus mainaig iti maudi nga al-aldaw ipalgakna a  maulit-ulit a binalakadannatayo ni Jesus nga agtalinaed a siririing. (Mar. 13:33-37) Adda umasping a pakdaar iti paset ti padto a mangiladawan iti dakkel nga aldaw ni Jehova inton Armagedon. (Apoc. 16:14-16) Apay a maulit-ulit dagiti kasta a pakdaar? Kasapulan dagita a palagip gapu ta mabalin a mapukaw ti pannakarikna iti kinaganat no kasla maitantantan ti maysa a banag nga ur-urayen.

Inyilustrar ni Jesus ti kinapateg ti panagtultuloytayo a naridam bayat nga ur-urayentayo ti panagngudo ti sistema ti bambanag. Tinukoyna ti maysa a bumalay a natakawan ti balayna. Kasano koma a naliklikanna dayta? Babaen ti panagtalinaedna a siririing iti agpatnag. Ingngudo ni Jesus daytoy nga ilustrasion babaen ti panangibalakadna: “Paneknekanyo a sisasaganakayo, agsipud ta iti oras a saanyo nga ipagarup nga isu dayta, ti Anak ti tao umay.”​—Mat. 24:43, 44.

Ipakita ti ilustrasion ti kinapateg ti panagbalin a sisasagana nga aguray, uray no agpaut dayta. Ditay koma pakaseknan unay no di pay dimteng ti panungpalan daytoy dakes a sistema kas iti ninamnamatayo. Ditay koma al-allilawen ti bagitayo babaen ti di umiso a panangirasontayo a ‘di pay dimteng ti tiempo ni Jehova.’ Ti kasta a panagpampanunot kissayanna ti regtatayo a mangikasaba iti naimbag a damag ti Pagarian.​—Roma 12:11.

Panangiwaksi iti Ulbod a Panagrasrason

No maipapan iti ulbod a panagrasrason, agaplikar ti prinsipio iti Galacia 6:7: “Dikay payaw-awan . . . Aniaman nga imulmula ti maysa a tao, daytoyto met ti apitenna.” Alisto a pagtubuan iti ruot ti daga nga awan mulana. Umasping iti dayta, no ditay usaren ti nasin-aw nga abilidadtayo nga agpanunot, tumaud iti isiptayo dagiti ulbod a panagrasrason. Kas pagarigan, mabalin nga irasontayo, ‘Sigurado a dumteng ti aldaw ni Jehova​—ngem mabayag pay.’ Ti kasta a panagrasrason ituggodnatayo a mangtagilag-an kadagiti nateokratikuan nga aktibidad. Inton agangay, mabaybay-antayon dagiti naespirituan a rutinatayo. Iti kasta, maklaattayto inton dumteng ti aldaw ni Jehova.​—2 Ped. 3:10.

Ngem saan a rumamut iti isiptayo ti ulbod a panagrasrason no kanayon a siguraduentayo no ania “ti naimbag ken makaay-ayo ken naan-anay a pagayatan ti Dios.” (Roma 12:2) Ti regular a panagbasa iti Sao ti Dios ti maysa kadagiti kasayaatan a pamay-an tapno maaramidtayo dayta. Ti Kasuratan pabilgenna ti panagtalektayo a kanayon nga agtignay ni Jehova iti naituding a tiempo.​—Hab. 2:3.

Ti panagadal, panagkararag, regular a pannakigimong, panangasaba, ken panangipakita iti naayat a kinamanangngaasi, ti tumulong kadatayo nga ‘agtalinaed a silalagip iti kaadda ti aldaw ni Jehova.’ (2 Ped. 3:11, 12) Makita ni Jehova ti agtultuloy a panangaramidtayo kadagita. Ipalagip kadatayo ni apostol Pablo: “Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.”​—Gal. 6:9.

Gapuna, masapul a ditay ipalubos a maallilawnatayo ti ulbod a panagrasrason a maitantantan ti aldaw ni Jehova. Imbes ketdi, pabilgentayo koma ti pammatitayo yantangay asidegen ti aldaw ni Jehova.

[Ladawan iti panid 4]

Pinabileg da Haggeo ken Zacarias dagiti Judio iti trabaho a panagibangon

[Ladawan iti panid 5]

Ania ti aramiden ti bumalay no ammona nga adda agtatakaw nga umay iti balayna?