Kinamapagpiaran iti Lubong a Di Mapagpiaran

KAS iti angin a langlang-abentayo, adda ti kinakusit iti sadinoman. Agulbod dagiti tattao, sobra ti singirenda, agtakawda, dida agbayad iti utangda, ken iparammagda dagiti nakusit nga ar-aramidda iti negosio. Yantangay agbibiagtayo iti daytoy a lubong, masansan a maipasangotayo kadagiti situasion a mangsubok iti kinamapagpiarantayo. Kasanotayo a masaranget ti pagannayasan nga agbalin a di mapagpiaran? Usigentayo ti tallo a kangrunaan a banag a makatulong kadatayo a mangaramid iti dayta. Isu ti panagbuteng ken Jehova, nadalus a konsiensia, ken kinakontento.

Umiso a Panagbuteng ken Jehova

Insurat ni propeta Isaias: “Ni Jehova isu ti Ukomtayo, ni Jehova isu ti Manangted-paglintegantayo, ni Jehova isu ti Aritayo.” (Isa. 33:22) Ti panangbigbig iti autoridad ni Jehova ket agresulta iti nadiosan a panagbuteng​—maysa a puersa a mangtigtignay kadatayo a mangsaranget iti espiritu ti kinakusit. Kuna ti Proverbio 16:6: “Iti panagbuteng ken Jehova umadayo ti maysa iti dakes.” Daytoy a panagbuteng ket saan a pannakaaliaw iti managibales a Dios, no di ket panagamak a makaaramid iti saan a makaay-ayo iti nailangitan nga Amatayo, a maseknan unay iti pagimbagantayo.​—1 Ped. 3:12.

Ti pudno a kapadasan iti biag iyilustrarna ti positibo nga epekto ti umiso a panagbuteng. Ni Ricardo ken ti baketna a ni Fernanda, nangiruarda iti pito a gasut a doliar (U.S.) manipud iti depositoda iti banko. a Imbulsa daytoy ni Fernanda a dina binilbilang. Idi nakaawiddan ken nabayadandan ti dadduma a babayadanda, nasdaawda ta dandani di naksayan ti kuarta nga inruarda. Kinunada, “Sobra la ketdi ti inted kadata ti kahera ti banko.” Idi damo, pampanunotenda a saandan nga isubli ti kuarta gapu ta adu pay ti babayadanda. Kuna ni Ricardo: “Inkararagmi ken Jehova a pabilgennakami a mangisubli iti kuarta. Ti tarigagaymi a mangay-ayo kenkuana kas panagtulnog iti kiddawna iti Proverbio 27:11 ti nangtignay kadakami a mangisubli iti kuarta.”

Nasanay-Biblia a Konsiensia

Masanaytayo ti konsiensiatayo babaen ti panagadal iti Biblia ken panangikagumaantayo a mangyaplikar kadagiti maad-adaltayo. Iti kasta, ‘ti sao ti Dios a nabiag ken adda bilegna,’ ket saan laeng a dumanon iti isiptayo no di ket iti pay pusotayo. Daytoy ti mangtignay kadatayo nga “agbiag a mapagtalkan iti amin a bambanag.”​—Heb. 4:12; 13:18.

Usigentayo ti kapadasan ni João. Naaddaan iti dakkel nga utang nga aggatad iti lima ribu a doliar (U.S.). Kalpasanna, immakar iti sabali nga ili a dina binaybayadan dayta. Walo a tawen kalpasanna, naammuan ni João ti kinapudno, ket ti nasanay-Biblia a konsiensiana ti nangtignay kenkuana a mangbirok iti nakautanganna tapno bayadanna dayta! Gapu ta bassit laeng ti masapsapulanna a pangsuporta iti asawana ken iti uppat nga annakda, immanamong ti nagpautang a mabalinna a tinnagan dayta iti binulan.

Pannakakontento

Insurat ni apostol Pablo: “Dayta ket panggun-od iti dakkel a gunggona, daytoy nadiosan a debosion agraman iti pannakapnek. . . . No adda pagtaraon ken pagkawestayo, mapnektayon kadagitoy a banag.” (1 Tim. 6:6-8) No ipapusotayo dayta a nainsiriban a balakad, maliklikantayo ti kinaagum, kuestionable nga aramid iti negosio, wenno saan a realistiko a  napartak a panguartaan. (Prov. 28:20) Ti panangsurot iti balakad ni Pablo ti tumulong kadatayo a mangyun-una iti Pagarian ti Dios, a mangnamnamatayo nga ipaayna dagiti kangrunaan a kasapulantayo.​—Mat. 6:25-34.

Nupay kasta, gapu iti “makaallilaw a pannakabalin ti kinabaknang,” ditay koma pulos tagibassiten ti peggad ti itutulok iti kinaagum ken kinamanagimbubukodan. (Mat. 13:22) Lagipentayo ti napasamak ken Acan. Nakitana ti namilagruan nga ibaballasiw dagiti Israelita iti Karayan Jordan. Nupay kasta, gapu iti kinaagumna, timmulok iti tarigagayna nga agtakaw iti sumagmamano a pirak, balitok, ken nangina a kawes manipud kadagiti nasamsam iti siudad ti Jerico. Nagresulta dayta iti pannakapukaw iti biagna. (Jos. 7:1, 20-26) Di pakasdaawan a sinigsiglo kalpasanna, impakdaar ni Jesus: “Pagtalinaedenyo a silulukat dagiti matayo ket agaluadkayo iti tunggal kita ti kinaagum”!​—Luc. 12:15.

Agbalinkayo a Mapagpiaran iti Pagtrabahuan

Usigentayo ti dadduma a kasasaad a mangsubok iti determinasiontayo a mangtaginayon iti kinamapagpiaran iti amin a banag. Ti panagbalintayo a mapagpiaran iti pagtrabahuan ramanenna ti ‘saan a panagtakaw’​—uray no kaaduan ti mangar-aramid iti dayta. (Tito 2:9, 10) Ni Jurandir nga agtartrabaho iti maysa nga ahensia ti gobierno ket mapagpiaran iti panangireportna kadagiti magastosna iti panagbiahena. Ngem dagiti katrabahuanna dakdakkel ngem iti nagastoda ti ireportda. Posible dayta gapu ta ti boss iti dayta nga ahensia pampanuynoyanna ti kinakusitda. Kinapudnona, inungtanna pay ni Jurandir gapu iti kinamapagpiaranna ken saannan nga ibabaon nga agbiahe mainaig iti negosio. Ngem idi agangay, na-audit ti ahensia ket nakomendaran ken nai-promote ni Jurandir gapu iti kinamapagpiaranna.

Ni André, a maysa a salesman, ket binilin ti employerna a doble ti singirenna a bayad ti serbisioda iti maysa a kostumer. Nagkararag ken Jehova tapno maaddaan iti tured a mangannurot kadagiti prinsipio ti Biblia. (Sal. 145:18-20) Inlawlawagna pay iti employerna no apay a dina mabalin a tungpalen ti bilinna ngem saan a nakombinsir daytoy. Gapuna, inkeddengna ti agikkat iti napintas a trabahona. Ngem kalpasan ti agarup makatawen, pinasubli ti dati nga employerna nga impanamnamana a saandan a singiren iti doble dagiti kostumerda. Nai-promote kas manedyer ni André.

Bayadan ti Utang

Binalakadan ni apostol Pablo dagiti Kristiano: “Dikay koma makautang iti maysa a banag iti asinoman.” (Roma 13:8) Mabalin nga ikalintegantayo ti ditay panagbayad iti utangtayo,  nga irasontayo a nabaknang met ti nagpautang kadatayo isu a dina kasapulan ti kuarta. Ngem mamakdaar ti Biblia: “Daydiay nadangkes umutang ket saan nga agbayad.”​—Sal. 37:21.

Ngem kasanon no marigatantayo nga agbayad gapu iti “di mapakpakadaan a pasamak”? (Ecl. 9:11) Immutang ni Francisco iti pito a ribu a doliar (U.S.) manipud ken Alfredo tapno mabayadanna ti tintinnaganna. Ngem gapu kadagiti problema iti negosio, saan a nakabayad iti nagtulaganda a petsa. Personal nga immasideg ni Francisco ken ni Alfredo tapno pagsaritaanda dayta ket immanamong nga in-inutenna a bayadan ti utangna.

Dikay Mangipakita iti Di Umiso nga Impresion

Lagipenyo ti dakes nga inaramid da Ananias ken Safira, maysa a pagassawaan iti kongregasion Kristiano idi umuna a siglo. Inlakoda ti talonda sa intedda ti dadduma a naglakuanda kadagiti apostol nga imbagada a dayta ti intero a naglakuanda. Kayatda nga idayaw ida dagiti tattao gapu iti kinamanagparaburda. Ngem babaen ti nasantuan nga espiritu ti Dios, impalgak ni apostol Pedro ti panangallilawda ket pinapatay ida ni Jehova.​—Ara. 5:1-11.

Saan a kas kada Ananias ken Safira, prangka ken napudno dagiti mannurat iti Biblia. Insurat a mismo ni Moises a gapu iti dina panangmedmed iti pungtotna, saan a nakastrek iti Naikari a Daga. (Num. 20:7-13) Umasping iti dayta, saan nga inlemmeng ni Jonas dagiti pagkapuyanna sakbay ken kalpasan ti panangasabana kadagiti taga-Nineve. Imbes ketdi, insuratna amin dagita.​—Jon. 1:1-3; 4:1-3.

Kasapulan ti tured a mangibaga iti pudno, uray no adda saan a nasayaat nga ibungana, kas iyilustrar ti kapadasan ti maysa nga estudiante a ni Nathalia nga agtawen iti 14. Idi kinitana ti resulta ti eksaminasionna, nadlawna nga adda di umiso a sungbatna a kinorek ti maestrana. Nupay ammona a maapektaran dagiti gradona, saan a bimdeng a nangibaga iti maestrana. “Kanayon nga ibagbaga dagiti nagannakko a tapno maay-ayok ni Jehova, masapul nga agbalinak a napudno. Buriborennak la ketdi ti konsiensiak no diak ibaga dayta iti maestrak,” kinunana. Inapresiar ti maestra ti panangibaga ni Nathalia iti pudno.

Kinamapagpiaran​—Galad a Mangted-Dayaw ken Jehova

Ni Giselle, nga agtawen iti 17, ket nakapidut iti pitaka a naglaon kadagiti dokumento ken kuarta nga aggatad iti $35 (U.S.). Iti tulong dagiti mangimatmaton iti eskuelaanda, naisubli ti pitaka iti makinkukua. Kalpasan ti makabulan, adda surat nga imbasa ti bise prinsipal ti eskuelaan iti intero a klase a nangpadayaw ken Giselle gapu iti kinamapagpiaranna ken nangkomendar iti pamiliada iti nasayaat a panangsanayda kenkuana ken iti narelihiosuan a pannakapadakkelna. Naidayaw ni Jehova gapu kadagiti ‘nasayaat nga aramidna.’​—Mat. 5:14-16.

Kasapulan ti panagregget tapno agbalintayo a mapagpiaran bayat nga agbibiagtayo a kadua dagiti tattao a ‘managayat iti bagbagida, managayat iti kuarta, napalangguad, natangsit, ken saan a nasungdo.’ (2 Tim. 3:2) Nupay kasta, ti umiso a panagbuteng ken Jehova, nasanay-Biblia a konsiensia, ken pannakakontento ti tumulong kadatayo a mangtaginayon iti kinamapagpiarantayo iti daytoy lubong a di mapagpiaran. Patanorentayo met ti nasingsinged a pannakigayyem ken Jehova, daydiay ‘nalinteg ken managayat iti nalinteg nga ar-aramid.’​—Sal. 11:7.

[Footnote]

[Dagiti Ladawan iti panid 7]

Ti umiso a panagbuteng ken Jehova pabilgenna ti determinasiontayo nga agbalin a mapagpiaran

[Ladawan iti panid 8]

Pakaidayawan ni Jehova ti kinamapagpiarantayo