Mailasinyo Kadi ti Pammaneknek iti Panangiwanwan ti Dios?

SAAN pay idi a nakakita iti kasta dagiti Israelita ken Egipcio. Bayat ti ipapanaw dagiti Israelita idiay Egipto, adda munmon nga ulep iti asidegda ken nagtalinaed dayta iti aldaw ken rabii. Agbalin dayta a munmon nga apuy iti rabii. Anian a nakaskasdaaw! Ngem naggapuan dayta? Ania ti panggepna? Nupay agarup 3,500 a tawen ti napalabasen, ania ti maadaltayo iti panangmatmat dagiti Israelita iti “munmon nga apuy ken ulep”?​—Ex. 14:24.

Ipalgak ti Sao ti Dios ti gubuayan ken panggep ti munmon idi kinunana: “Mapmapan idi ni Jehova iti masanguananda iti aldaw iti maysa a munmon nga ulep tapno iturongna ida iti dalan, ket iti rabii iti maysa a munmon nga apuy tapno mangted kadakuada iti lawag tapno makapagnada iti aldaw ken iti rabii.” (Ex. 13:21, 22) Inusar ni Jehova ti munmon nga apuy ken ulep a mangiwanwan iti ilina bayat ti ipapanawda idiay Egipto ken iti kaaddada iti let-ang. Masapul a nakasaganada a kanayon tapno masurotda dayta. Idi dandanin makamakam dagiti buyot ti Egipto ti ili ti Dios, napan ti munmon iti nagbaetanda tapno masalakniban dagiti Israelita. (Ex. 14:19, 20) Nupay saan a dimmalan ti munmon iti mas direkta a ruta, ti panangsurot iti dayta ti kakaisuna a pamay-an tapno makagteng dagiti Israelita iti Naikari a Daga.

Ti kaadda ti munmon ipasiguradona iti ili ti Dios nga adda kadakuada ni Jehova. Irepresentarna ni Jehova ken no dadduma, usarenna dayta a makisarita kadakuada. (Num. 14:14; Sal. 99:7) Kanayonanna, ti ulep ti nangpaneknek a ni Moises ti dinutokan ni Jehova a mangidalan iti nasion. (Ex. 33:9) Umasping iti dayta, ti maudi a nairekord a panagparang ti ulep pinatalgedanna ti panangdutok ni Jehova ken ni Josue kas suno ni Moises. (Deut. 31:14, 15) Wen, ti naballigi nga ipapanawda iti Egipto nga agturong iti Naikari a Daga ket agpannuray iti panangilasin dagiti Israelita iti pammaneknek iti panangiwanwan ti Dios ken panangsurot iti dayta.

Dida Nailasin ti Pammaneknek

Sigurado a nagamanga dagiti Israelita idi damo a nakitada dayta a munmon. Ngem nakalkaldaang ta di immanay ti kanayon a pannakakitada iti milagro tapno agtultuloy ti panagtalekda ken Jehova. Namin-adu a kinuestionaranda ti panangiwanwan ti Dios. Idi kinamat ida dagiti buyot ti Egipcio, dida impakita ti panagtalekda iti pannakabalin ni Jehova a mangisalakan. Imbes ketdi, ni Moises nga adipen ti Dios inakusaranda nga inturongna ida iti lugar a pakatayanda. (Ex. 14:10-12) Kalpasan ti pannakaispalda iti Nalabaga a Baybay, nagtanabutobda maibusor ken Moises, Aaron, ken Jehova gapu iti pagarupda a kaawan ti taraon ken danum. (Ex. 15:22-24; 16:1-3; 17:1-3, 7) Sumagmamano a lawas kalpasanna, pinilitda ni Aaron nga agaramid iti balitok a baka. Agasenyo dayta! Iti maysa a benneg ti kampoda, makitkita dagiti Israelita ti munmon nga apuy ken ulep​—ti nakaskasdaaw a pammaneknek Daydiay nangiruar kadakuada manipud Egipto. Ngem iti sabali a benneg ti kampo, agdaydayawda iti awan biagna nga idolo a kunkunada: “Daytoy ti Diosmo, O Israel, a nangipanaw kenka iti daga ti Egipto.” Anian a ‘nagdakkel nga ar-aramid ti kinaawan panagraem’!​—Ex. 32:4; Neh. 9:18.

Ti panagrebelde ti Israel ket pammaneknek iti nabatad a panangilaksidda iti panangiwanwan ni Jehova. Saan a ti literal a panagkitada ti parikut no di ket ti naespirituan a panagkitada. Nakitada ti munmon, ngem nalipatanda a ni Jehova ti irepresentar dayta. Nupay  “pinasakitanda uray Daydiay Santo ti Israel” gapu kadagiti aramidda, siaasi nga intultuloy ni Jehova nga inwanwan ida babaen ti munmon agingga a nakagtengda iti Naikari a Daga.​—Sal. 78:40-42, 52-54; Neh. 9:19.

Kitaenyo ti Pammaneknek ti Panangiwanwan ti Dios Ita

Uray iti kaaldawantayo, agtultuloy nga iwanwanwan ni Jehova ti ilina. No kasano a saanna a ninamnama a dagiti Israelita ti mangbirok iti rutada, dina met ikalikagum ita a datayo lattan ti makaammo no kasanotayo a sumrek iti naikari a baro a lubong. Ni Jesu-Kristo ti nadutokan a Lider ti kongregasion. (Mat. 23:10; Efe. 5:23) Intedna ti dadduma nga autoridad iti klase matalek nga adipen, a buklen dagiti matalek a Kristiano a napulotan iti espiritu. Daytoy a klase adipen ti mangdutok met kadagiti manangaywan iti kongregasion Kristiano.​—Mat. 24:45-47; Tito 1:5-9.

Kasanotayo a mailasin no asino a talaga ti klase matalek nga adipen, wenno mayordomo? Imutektekanyo no kasano ti panangdeskribir a mismo ni Jesus iti dayta: “Asino a pudpudno ti matalek a mayordomo, daydiay masirib, a dutokanto ni apona iti bagi dagiti agserserbi kenkuana tapno agtultuloy nga ipaayanna ida ti bingayda nga abasto a taraon iti umiso a tiempo? Naragsak dayta nga adipen, no iti idadateng ni apona masarakanna nga ar-aramidenna ti kasta!”​—Luc. 12:42, 43.

Gapuna, ti klase mayordomo ket “matalek,” a dina pulos tallikudan wenno panawan ni Jehova, ni Jesus, dagiti kinapudno iti Biblia, wenno ti ili ti Dios. Gapu ta “masirib” ti klase mayordomo, adda umiso a pannakaawatna a mangiwanwan iti kapatgan a trabaho a panangikasaba iti “naimbag a damag ti pagarian” ken panagaramid iti “ad-adalan kadagiti tattao iti amin a nasion.” (Mat. 24:14; 28:19, 20) “Iti umiso a tiempo,” situtulnog a mangipapaay ti klase mayordomo iti nasayaat ken makapasalun-at a naespirituan a taraon. Ti anamong ni Jehova ket makita iti umad-adu a bilang dagiti pudno nga agdaydayaw kenkuana, iti panangiwanwanna kadagiti napateg a desision, nalawlawag a pannakaawat iti kinapudno iti Biblia, panangsaluadna kadakuada manipud iti panangtalipupos dagiti kabusor, ken panangipaayna iti talna ti panunot ken puso.​—Isa. 54:17; Fil. 4:7.

Panangsurot iti Panangiwanwan ti Dios

Kasanotayo a maipakita nga ap-apresiarentayo ti panangiwanwan ti Dios? Kinuna ni apostol Pablo: “Agtulnogkayo kadagidiay mangidadaulo kadakayo ket agpasakupkayo.” (Heb. 13:17) Saan a kanayon a nalaka nga aramiden dayta. Kas panangyilustrar: Ipapanmo a maysaka nga Israelita idi kaaldawan ni Moises. Kalpasan ti nawatiwat a pampannagnayo, nagsardeng ti munmon. Kasano ngata kabayag dayta? Maysa nga aldaw? Maysa a lawas? Sumagmamano a bulan? Pampanunotem: ‘Masapul kadi nga iruarko amin ti nayempake a gargaretko?’ Mabalin nga iti damo, dagiti laeng napapateg a banag ti iruarmo. Kalpasan ti sumagmamano nga aldaw, gapu ta adda dimo mabirokan, iruarmo aminen a gargaretmo. Ngem idi dandani mairuarmo aminen, nakitam nga agpangaton ti munmon isu nga agempakeka manen! Saan a nalaka dayta. Kaskasdi, masapul nga “agluas a dagus” dagiti Israelita.​—Num. 9:17-22.

Ania ngarud ti aramidentayo no adda instruksion a maawattayo manipud iti Dios? Ikagumaantayo kadi nga iyaplikar dayta a “dagus”? Wenno itultuloytayo latta nga aramiden ti nakairuamantayo? Pamiliartayo kadi kadagiti kabaruan nga instruksion, kas koma iti panangikondukta iti panagadal iti Biblia, panangasaba kadagiti ganggannaet ti lenguaheda, regular a pannakiraman iti panagdaydayaw ti pamilia, pannakitinnulong iti Hospital Liaison Committee, ken umiso a kondukta kadagiti kombension? Maipakitatayo met ti panangapresiartayo iti panangiwanwan ti Dios no awatentayo ti balakadna. No agaramidtayo kadagiti napateg a desision, agpaiwanwantayo ken ni Jehova ken iti organisasionna imbes nga agtalektayo iti bukodtayo a sirib. Ken kas iti maysa nga ubing nga agpannuray iti proteksion kadagiti nagannakna no dumteng ti bagyo, agkamangtayo met iti organisasion  ni Jehova no dumteng dagiti arig bagyo a problema.

Siempre, kas ken Moises, imperpekto dagiti mangidadaulo iti naindagaan a paset ti organisasion ti Dios. Nupay kasta, ti munmon ti agtultuloy a pammaneknek idi a ni Moises ket dinutokan ken an-anamongan ti Dios. Laglagipenyo met a saan a dagiti Israelita ti mangikeddeng no kaanoda nga umakar. Imbes ketdi, agtignayda “iti panagbilin ni Jehova babaen ken Moises.” (Num. 9:23) Gapuna, ni Moises nga us-usaren ti Dios a mangipaay kadagiti instruksion ti nalabit mangibaga no kaanoda nga umakar.

Iti kaaldawantayo, us-usaren ni Jehova ti klase mayordomo a mangibaga no kaano ti piguratibo nga iyaakartayo. Kasanona nga ar-aramiden dayta? Babaen kadagiti artikulo iti Ti Pagwanawanan ken Ti Ministeriotayo iti Pagarian, baro a publikasion, ken palawag kadagiti asamblea ken kombension. Mayal-allatiw met dagiti instruksion kadagiti kongregasion babaen kadagiti agdaldaliasat a manangaywan, sursurat, wenno panangsanay a tabtabunuan dagiti kakabsat a lallaki nga addaan kadagiti responsabilidad iti kongregasion.

Mailasinyo kadi a naimbag ti pammaneknek iti panangiwanwan ti Dios? Us-usaren ni Jehova ti organisasionna a mangiwanwan kadatayo kas ilina iti arig let-ang a dakes a lubong ni Satanas bayat daytoy maudi nga al-aldaw. Kas resultana, tagtagiragsakentayo ti panagkaykaysa, ayat, ken kinatalged.

Idi nakadanon dagiti Israelita iti Naikari a Daga, kinuna ni Josue: “Pagaammoyo unay iti amin a pusoyo ken iti amin a kararuayo nga awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo.” (Jos. 23:14) Umasping iti dayta, sigurado a makagtengto iti naikari a baro a lubong ti ili ti Dios ita. Ngem ti mismo a kaaddatayo sadiay ket naan-anay nga agpannuray iti kinapakumbaba ken situtulok a panangsurottayo kadagiti instruksion ti Dios. Gapuna, sapay koma ta itultuloytayo a bigbigen ti pammaneknek iti panangiwanwan ni Jehova!

[Dagiti Ladawan iti panid 5]

Idaldalannatayo ita ti organisasion ni Jehova

Baro a ruar iti kombension

Teokratiko nga eskuelaan

Pannakasanay iti taripnong sakbay ti panangasaba