Malagipyo Kadi?

Natagiragsakyo kadi a binasa dagiti nabiit pay a ruar Ti Pagwanawanan? Kitaentayo no masungbatanyo dagiti sumaganad a saludsod:

• Apay a kombinsidotayo a pudno a lugar ti hardin ti Eden?

Pudpudno ti panangdeskribir ti Biblia iti dayta, a dinakamatna dagiti detalye mainaig iti lugar nga ayanna. Ti dua a karayan a nadakamat ket adda pay laeng agingga ita. Saan a kasta ti kadetalyado dagiti sarsarita idi ugma. Ni Jesus, ti mapagtalkan a Saksi, dinakamatna da Adan ken Eva kas pudno a tattao.​—1/1, panid 5-6, 9.

• Ammo kadi ti Dios nga agbasol da Adan ken Eva?

Saan. Inikkan ida ni Jehova iti sirib ken wayawaya nga agpili tapno maikeddengda ti agtulnog wenno saan. Nupay kabaelan ti Dios nga ammuen ti mapasamak iti masanguanan, dina kanayon nga usaren dayta.​—1/1, panid 13-15.

• Us-usaren kadi dagiti pudno a Kristiano ti nagan ti Dios kas an-anib?

Ibilang ti dadduma kas an-anib ti maysa a banag wenno simbolo a simimilagro a mangsalaknib kadakuada, ngem saan a kasta ti panangibilang dagiti pudno a Kristiano iti nagan ti Dios. Adda pammatida ken Jehova ken ikagumaanda nga aramiden ti pagayatanna, iti kasta, agkamangda iti naganna. (Sof. 3:12, 13)​—1/15, panid 5-6.

• Siasino ti nagunggonaan iti kaugalian dagiti Israelita a panagadas?

Amin. Iparegtana ti kinagaget kadagiti napanglaw, a masapul nga agadas. Magunggonaan met ti dadduma gapu ta maparegtada nga agbalin a naparabur ken agpannuray iti bendision ti Dios.​—2/1, panid 15.

• Apay a ni Jehova inlaksidna ni Ari Saul?

Rumbeng koma nga inuray ni Saul ti propeta ti Dios nga agidaton, ngem saan a nagtulnog ti ari ket isun a mismo ti nagidaton. Kalpasanna, sinukirna ti bilin a mangtalipupos iti kabusorda a nasion.​—2/15, panid 22-23.

• Kasanotayo a maipakita a kaguratayo ti kinakillo?

Masapul a natimbeng ti panaginumtayo, liklikantayo ti okultismo, ken ipangagtayo ti pakdaar ni Jesus maipapan iti imoralidad. Kas pagarigan, liklikantayo ti pornograpia ken ti patauden dayta a panagar-arapaap. (Mat. 5:27, 28) Kasta met, ditay makilangen kadagiti nailaksid.​—2/15, panid 29-32.

• Ania ti naisangsangayan maipapan iti nabirokan dagiti arkeologo a nagkauna a balay ti uyokan iti agdama nga Israel?

Nakabirok dagiti arkeologo iti nasurok a 30 a balay ti uyokan, a pattapattaen dagiti eskolar a mangpataud dayta iti nasurok a kagudua a tonelada a diro iti tinawen. Ipakita dayta a gagangay ti panagtaraken iti uyokan iti daga a tinukoy ti Dios a “pagay-ayusan ti gatas ken diro.” (Ex. 3:8)​—3/1, panid 15.

• Kasano a nayarig ni Jeremias iti maysa a kayo a “naimula iti igid ti dandanum, a mangparuar kadagiti ramutna”? (Jer. 17:7, 8)

Saan a nagsardeng a nangpataud iti bunga. Saan met a nagpaimpluensia kadagiti managuy-uyaw. Imbes ketdi, nagtalinaed iti Gubuayan ti danum a mangsussustiner iti biag, nga impapusona ti imbaga kenkuana ti Dios.​—3/15, panid 14.

• Ania ti punto ni Jesus idi imbagana ken Marta a sumagmamano wenno maysa laeng a banag ti kasapulan? (Luc. 10:41, 42)

Saanna nga ibagbaga a materialistiko ni Marta gapu iti panangisaganana iti adu a taraon. Dina met ibagbaga nga awan serserbi ti panagbannogna. Imbes ketdi, ipagpaganetgetna ti masapul nga iyun-una ni Marta. Saanna nga inaprobetsar ti naisangsangayan a gundaway a mangpabileg iti pammatina.​—4/1, panid 12-13.

• Ania ti sumagmamano a di nainkalintegan a naaramid iti pannakabista ni Jesus?

Awan ti naidatag nga argumento para iti pannakaabsuelto. Nangidatagda kadagiti ulbod a testigo. Nausig ti kaso iti rabii. Maysa laeng nga aldaw ti pannakabistana.​—4/1, panid 20.