Panagserbi ken Jehova Buyogen ti Kinaserioso

“Aniaman a bambanag a serioso a pakaseknan, . . . itultuloyyo nga utoben dagitoy a banag.”​—FIL. 4:8.

1, 2. Ania ti makagapu nga adu ita ti mangtagtagilag-an iti biag, ken ania dagiti tumaud a saludsod?

 AGBIBIAGTAYO iti maysa kadagiti karirigatan a tiempo iti pakasaritaan ti tao. Dagiti tattao nga awanan iti nasinged a relasion ken Jehova ibilangda a kasla imposible a daeran dagiti “napeggad a tiempo a narigat a pakilangenan.” (2 Tim. 3:1-5) Saanda a naan-anay a masolbar dagiti problemada gapu ta awan ti makatulong kadakuada. Tapno saanda unay a maringgoran iti biag, adu ti agbirok iti nadumaduma a ragragsak kadagiti paglinglingayan ti lubong.

² Tapno mapagballigian dagiti tattao dagiti pakarigatanda iti biag, masansan nga iyun-unada dagiti ragragsak. No saan a naannad dagiti Kristiano, nalakada laeng a matulad ti kasta a wagas ti panagbiag. Kasanotayo a maliklikan dayta? Kayatna kadi a sawen a kanayontayo a serioso? Kasanotayo nga agbalin a balanse no iti panaglinglingay ken kadagiti responsabilidadtayo? Nupay masapul a naipamaysa ti biagtayo iti napapateg a bambanag, ania dagiti Nainkasuratan a prinsipio a makatulong kadatayo tapno ditay masobraan ti agbalin a serioso?

Panagbalin a Serioso iti Lubong a Managayat iti Ragragsak

3, 4. Kasano a makatulong kadatayo ti Kasuratan a mangapresiar iti kinapateg ti panagbalin a serioso?

³ Daytoy a lubong ipangpangrunana ti ‘panagayat iti ragragsak.’ (2 Tim. 3:4) Ti panangitandudona iti ragragsak ket makadangran iti espiritualidadtayo. (Prov. 21:17) Gapuna, adda naimbag a rason a kadagiti surat ni apostol Pablo kada Timoteo ken Tito inramanna met ti balakad maipapan iti kinaserioso. Makatulong ti panangyaplikar iti dayta a balakad tapno ditay maimpluensiaan iti saan a serioso a panangmatmat ti lubong mainaig iti biag.​—Basaen ti 1 Timoteo 2:1, 2; Tito 2:2-8.

⁴ Sinigsiglo sakbayna, insurat ni Solomon ti kinapateg ti panangisakripisio no dadduma iti ragragsak tapno maiwayaan dagiti napatpateg a bambanag iti biag. (Ecl. 3:4; 7:2-4) Gapu iti kinaababa ti biag, masapul nga ‘umagawatayo a sipipinget’ tapno maisalakantayo. (Luc. 13:24) Tapno maaramidtayo dayta, masapul a kanayon nga utobentayo ti amin a bambanag a maibilang a ‘serioso a pakaseknantayo.’ (Fil. 4:8, 9) Kaipapanan dayta a seriosuentayo ti amin nga aspeto ti biagtayo kas Kristiano.

5. Ania ti maysa nga aspeto ti biag a masapul a seriosuentayo?

⁵ Kas pagarigan, kas panangtulad ken Jehova ken ni Jesus, ipappapuso dagiti Kristiano ti responsabilidadda nga agbalin a nagaget. (Juan 5:17) Kas resultana, masansan a mapadpadayawanda gapu iti kinagaget ken kinamapagtalkanda. Nangnangruna nga agtrabaho a sipipinget dagiti ulo ti pamilia tapno masuportaranda ti sangakabbalayanda. Ti ngamin saanda a panangipaay iti material a kasapulan ti pamiliada ket kayariganna a ‘tinallikudanda ni Jehova’!​—1 Tim. 5:8.

Serioso Ngem Naragsak ti Panangmatmattayo iti Panagdayawtayo

6. Apay a rumbeng a seriosuentayo ti panagdayawtayo ken Jehova?

⁶ Nagpateg ken Jehova ti pudno a panagdayaw. Kas pagarigan, iti sidong ti Mosaiko a Linteg, nagsagaba dagiti Israelita idi simiasida iti panagdayawda ken Jehova. (Jos. 23:12, 13) Idi  umuna a siglo K.P., kasapulan dagiti pasurot ni Kristo ti napinget a pannakidangadang tapno saan a maimpluensiaan ti pudno a panagdayaw manipud iti di umiso a pannursuro ken kababalin. (2 Juan 7-11; Apoc. 2:14-16) Dagiti pudno a Kristiano ita agtultuloy nga ibilangda a serioso ti panagdayawda.​—1 Tim. 6:20.

7. Kasano a nagsagana ni Pablo para iti ministeriona?

⁷ Ti ministeriotayo ket maysa a gubuayan ti rag-o. Ngem tapno mataginayontayo ti rag-o iti ministerio, masapul nga ipategtayo dayta ken agsaganatayo. Imbaga ni Pablo no kasano nga inkabilanganna dagiti tattao nga insurona. Kinunana: “Nagbalinak nga amin a bambanag iti amin a kita ti tattao, tapno iti amin a pamay-an maisalakanko ti sumagmamano. Ngem aramidek ti amin a bambanag maipagapu iti naimbag a damag, tapno agbalinak a manangiranud iti dayta iti sabsabali.” (1 Cor. 9:22, 23) Pakaragsakan ni Pablo a tulongan dagiti tattao iti naespirituan, ken pinanunotna a naimbag no kasanona a maipaay ti espesipiko a kasapulan dagiti agdengdengngeg kenkuana. Iti kasta, naparegta ken natulonganna ida nga agdayaw ken Jehova.

8. (a) Ania ti rumbeng a panangmatmattayo kadagiti tattao nga isursurotayo iti ministerio? (b) Kasano a mangyeg iti kinaragsak ti panangyadal iti Biblia?

⁸ Kasano kapateg ken Pablo ti ministeriona? Situtulok a ‘nagpaadipen’ ken ni Jehova ken kadagidiay dimngeg iti mensahe ti kinapudno. (Roma 12:11; 1 Cor. 9:19) No ibaklaytayo ti annongentayo a mangisuro kadagiti tattao maipapan iti Sao ti Dios​—iti man panangyadal iti Biblia iti pagtaengan, Nakristianuan a gimong, wenno iti Panagdaydayaw ti Pamilia​—mariknatayo kadi nga adda responsabilidadtayo kadakuada? Nalabit ibilangtayo a nadagsen unay nga ibaklay ti annongentayo a regular a panangyadal iti Biblia. Pudno, masansan nga agkalikagum dayta iti panangkissay iti tiempotayo kadagiti personal a bambanag tapno adda tiempotayo a mangtulong iti sabsabali. Ngem saan aya a maitunos dayta iti sasao ni Jesus a ‘naragragsak ti mangted ngem ti umawat’? (Ara. 20:35) Ti personal a panangisuro iti sabsabali tapno maisalakanda ket mangyeg iti kinaragsak a di pulos maipaay ti aniaman nga aktibidad.

9, 10. (a) Ti kadi panagbalin a serioso kayatna a sawen a ditay mabalin ti agrelaks ken aglinglingay? Ilawlawagyo. (b) Ania ti makatulong kadagiti panglakayen nga agbalin a makaparegta ken nalaka nga asitgan?

⁹ Ti panagbalin a serioso dina kayat a sawen a saantayo a mabalin ti agrelaks ken aglinglingay a kadua ti sabsabali. Inyulidan ni Jesus ti panangiwaya saan laeng nga iti panangisuro no di ket iti panaglinglingay ken pannakigayyem iti sabsabali. (Luc. 5:27-29; Juan 12:1, 2) Ti panagbalin a serioso dina met kaipapanan a kanayontayo nga istrikto. No koma istrikto ken serioso unay ni Jesus, sigurado a saan nga immasideg kenkuana dagiti tattao. Ngem uray dagiti ubbing komportableda kenkuana. (Mar. 10:13-16) Kasanotayo a matulad ti kababalin ni Jesus?

¹⁰ Kuna ti maysa a kabsat maipapan iti maysa a panglakayen, “Dakkel ti namnamaenna iti bagina, ngem saan a kasta ti ekspektarenna iti sabsabali.” Kasta met kadi ti komentoda maipapan kenka? Rumbeng a nainkalintegan ti namnamaentayo iti sabsabali. Kas pagarigan, nalaklaka nga agtulnog dagiti annak no mangipasdek dagiti nagannak kadagiti nainkalintegan a kalat ken tulonganda ida a mangragpat kadagita. Umasping iti dayta, dagiti panglakayen mabalin a paregtaenda dagiti kameng ti kongregasion a rumang-ay iti naespirituan ken mangipaayda kadagiti espesipiko a singasing no kasanoda nga aramiden dayta. Kanayonanna, no natimbeng ti panangmatmat ti maysa a panglakayen iti bagina, isu ket makaparegta ken nalaka nga asitgan. (Roma 12:3) Kinuna ti maysa a kabsat a babai: “Diak kayat ti panglakayen a pagbalbalinenna nga ang-angaw ti amin a bambanag. Ngem no kanayon met a serioso, narigat met nga asitgan.” Kinuna pay ti maysa a kabsat a para kenkuana, dadduma a panglakayen ti “narigat nga asitgan gapu ta seriosoda unay.” Saan a pulos a kayat dagiti panglakayen a mapukaw ti rag-o dagiti kapammatianda nga itden ti panagserbida ken Jehova, “ti naragsak a Dios.”​—1 Tim. 1:11.

 Panangibaklay iti Responsabilidad iti Kongregasion

11. Ania ti kaipapanan ti sao a ‘panangragpat’ iti pribilehio iti kongregasion?

¹¹ Idi pinaregta ni Pablo dagiti lallaki iti kongregasion nga ikagumaanda ti agbalin a kualipikado iti dakdakkel a responsabilidad, saanna a panggep a paregtaen ti asinoman a mangragpat iti personal nga ambisionna. Imbes ketdi, insuratna: “No ti asinoman a lalaki ragragpatenna ti akem a manangaywan, tartarigagayanna ti nasayaat nga aramid.” (1 Tim. 3:1, 4) Ti sao a ‘panangragpat’ ikalikagumna kadagiti Kristiano a lallaki a maaddaanda iti napasnek a tarigagay a mangparang-ay kadagiti kasapulan a naespirituan a galad tapno makapagserbida kadagiti kakabsatda. No adda makatawenen a nabautisaran ti maysa a kabsat a lalaki ken naragpatnan dagiti Nainkasuratan a kualipikasion para iti ministerial nga adipen a nailanad iti 1 Timoteo 3:8-13, mabalinen a mairekomenda iti dayta a pribilehio. Imutektekanyo ta espesipiko a kuna ti bersikulo 8: “Dagiti ministerial nga adipen rebbeng a seriosoda met.”

12, 13. Ania ti sumagmamano a mabalin nga aramiden dagiti agtutubo a lallaki tapno makaragpatda iti pribilehio?

¹² Maysaka kadi a bautisado a kabsat a lalaki a dandanin agtawen iti 20 ken ipappapusom ti panagserbim ken Jehova? Adda sumagmamano a mabalinmo nga aramiden tapno makaragpatka iti pribilehio. Ti maysa ket ti panangparang-aymo iti pannakiramanmo iti ministerio. Maragragsakanka kadi a mangasaba a kadua dagiti kakabsat aniaman ti edadda? Ikagkagumaam kadi ti agbirok iti iyadalam iti Biblia? No iyaplikarmo dagiti singasing maipapan iti panangyadal iti Biblia a maipapaay kadagiti Nakristianuan a gimong, mapasayaatmo ti abilidadmo a mangisuro. Kanayonanna, masursurom ti agbalin a mannakipagrikna iti daydiay mayat a mangammo iti daldalan ni Jehova. No makita ti iyad-adalam a kasapulanna ti mangaramid kadagiti panagbalbaliw, masursurom ti agbalin a naanus ken nataktika a mangtulong kenkuana tapno mayaplikarna dagiti prinsipio ti Biblia.

¹³ Dakayo nga agtutubo a lallaki sidadaankayo koma a tumulong kadagiti natataengan iti kongregasion iti aniaman a pamay-an. Maipakitayo met ti pannakaseknanyo iti langa ti Kingdom Hall babaen ti itutulongyo a mangtaginayon iti dayta a nadalus ken nadalimanek. No aramidem ti amin a kabaelam a tumulong, ti kinatulokmo ket pammaneknek a seriosoka iti ministeriom. Kas ken Timoteo, masursurom nga asikasuen a naimbag dagiti kasapulan ti kongregasion.​—Basaen ti Filipos 2:19-22.

14. Kasano a dagiti kakabsat nga agtutubo a lallaki ‘masubokda no maikarida’ nga agserbi iti kongregasion?

¹⁴ Sipapanunot koma dagiti panglakayen a mangusar kadagiti agtutubo a mangikagkagumaan nga ‘umadayo kadagiti tarigagay a naikasigudan iti kinaagtutubo’ ken mangsuksukay iti “kinalinteg, pammati, ayat, talna,” agraman ti dadduma pay a naimbag a kababalin. (2 Tim. 2:22) No maikkanda kadagiti annongen iti kongregasion, ‘masubokda no maikarida’ a mangibaklay iti responsabilidad. Iti kasta, ‘maiparangarang ti panagrang-ayda iti amin a tattao.’​—1 Tim. 3:10; 4:15.

Kinaserioso iti Kongregasion ken iti Pamilia

15. Sigun iti 1 Timoteo 5:1, 2, kasano a maipakitatayo a seriosotayo iti sabsabali?

¹⁵ Ti kinaserioso ramanenna ti panangraem kadagiti kakabsattayo. Iti balakad ni Pablo ken ni Timoteo, dinakamatna a masapul a raemen  ti sabsabali. (Basaen ti 1 Timoteo 5:1, 2.) Napateg dayta nangnangruna no makilangen iti kasungani a sekso. Nagsayaat a tuladen ti ulidan ni Job no iti panagraem kadagiti babbai, nangruna iti asawana. Inkagumaanna a liniklikan ti kumita iti sabali a babai buyogen ti panaggartem. (Job 31:1) No raraementayo dagiti kakabsattayo, ditay agalembong kadakuada wenno mangaramid iti aniaman a mamagbalin kadakuada a saan a komportable a makikadua kadatayo. Napateg ti panagraem nangnangruna iti biang ti agnobio a dandanin agkasar. Ti maysa a serioso a Kristiano dina pulos pagay-ayaman ti rikna ti kasunganina a sekso.​—Prov. 12:22.

16. Ania ti nagdumaan ti panangmatmat ti lubong ken ti Biblia iti akem ti asawa a lalaki ken ama?

¹⁶ Masapul met a naannadtayo tapno mataginayontayo ti kinaseriosotayo iti inted-Dios nga akemtayo iti pamilia. Ti lubong ni Satanas pagang-angawanna ti akem ti asawa a lalaki ken ama. Ti industria ti paglinglingayan pagparparangenna nga awan dakesna a pagkakatawaan ken di raemen dagiti ulo ti pamilia. Ngem ipakita ti Kasuratan a napateg ti responsabilidad ti asawa a lalaki, a natudingan kas “ulo ti babai.”​—Efe. 5:23; 1 Cor. 11:3.

17. Ilawlawagyo no kasano a ti pannakiramantayo iti panagdaydayaw ti pamilia ipakitana a seriosotayo kadagiti responsabilidadtayo.

¹⁷ Ti asawa a lalaki mabalin nga ipapaayanna ti material a kasapulan ti pamiliana. Ngem no dina ipaay ti naespirituan a kasapulanda, ipakpakitana nga isu ket di naannad ken di masirib. (Deut. 6:6, 7) Gapuna, kuna ti 1 Timoteo 3:4 a no maysaka nga ulo ti pamilia a rumagragpat iti kanayonan a pribilehio iti kongregasion, masapul a ‘maidauluam ti bukodmo a sangakabbalayan iti nasayaat a pamay-an, nga addaanka iti annak nga agpaspasakup buyogen ti isuamin a kinaserioso.’ Maitunos iti dayta, isaludsodmo iti bagim, ‘Regular kadi nga iwaywayaak ti panagdaydayaw ti pamiliak?’ Uray la ipakaasi ti dadduma a Kristiano nga assawa a babbai kadagiti assawada nga idauluanda ida iti naespirituan. Amin koma nga assawa a lallaki usigenda a naimbag ti panangmatmatda iti responsabilidadda. Siempre, ti asawa a babai rumbeng a suportaranna ti urnos a Panagdaydayaw ti Pamiliada ken makitinnulong ken lakayna tapno agballigi dayta.

18. Kasano a masursuro dagiti ubbing ti agbalin a serioso?

¹⁸ Maiparegta met kadagiti annak nga ipamaysada ti napapateg a bambanag. (Ecl. 12:1) Nasayaat no masursuro dagiti ubbing ti agbalin a nagaget, a tumulongda kadagiti trabaho iti balay a kabaelanda nga aramiden. (Un. 3:27) Idi ubing pay ni Ari David, nasursurona ti agbalin a nasayaat a pastor. Nasursurona pay ti agtokar ken agputar kadagiti kanta​—maysa a paglaingan a nangituggod kenkuana nga agserbi iti ari ti Israel. (1 Sam. 16:11, 12, 18-21) Sigurado a nagay-ayam met ni David idi ubing pay. Ngem nasursurona dagiti napateg a paglaingan a nausarna idi agangay a nangidayaw ken Jehova. Ti abilidadna kas pastor ti nangtulong kenkuana a siaanus  a nangidaulo iti nasion ti Israel. Dakayo nga agtutubo, adda kadi ad-adalenyo a makagunggona a paglaingan a makatulong kadakayo nga agserbi iti Namarsua ken mangisagana kadakayo kadagiti responsabilidad iti masanguanan?

Panangtaginayon iti Kinatimbeng

19, 20. Ania a natimbeng a panangmatmat ti determinado a taginayonenyo mainaig iti biagtayo ken iti panagdayawtayo?

¹⁹ Kabaelantayo amin ti agbalin a natimbeng​—saan unay a serioso. Ditay kayat ti agbalin a “nalabes ti kinalintegna.” (Ecl. 7:16) Ti panagpakatawa ket makaikkat iti tension, iti man pagtaengan, pagtrabahuan, wenno iti pannakilangen kadagiti Kristiano a kakabsat. Saan koma a manangkritikar unay dagiti kameng ti pamilia tapno saan a mapukaw ti natalged ken natalna a kasasaad a manamnama iti pagtaengan. Iti kongregasion, mabalin a matagiragsaktayo amin ti pannakikaduatayo kadagiti kakabsat, a pagtalinaedentayo a makapabileg ken positibo ti panagsasarita ken panangisurotayo.​—2 Cor. 13:10; Efe. 4:29.

²⁰ Agbibiagtayo iti lubong nga awanan panangipateg ken Jehova wenno iti lintegna. Maisupadi iti dayta, ibilang ti ili ni Jehova a nakapatpateg ti panagtulnog ken kinasungdoda iti Diosda. Anian a makaparagsak ti agbalin a paset ti kasta a dakkel a timpuyog dagiti agdaydayaw ken Jehova “buyogen ti isuamin a kinaserioso”! Sapay koma ta determinadotayo a mangtaginayon iti serioso a panangmatmat iti biag ken iti panagdayawtayo.

Ania ti Sungbatyo?

• Apay a rumbeng a ditay agpaimpluensia iti saan a serioso a panangmatmat ti lubong mainaig iti biag?

• Kasanotayo nga agbalin a naragsak ngem serioso iti ministeriotayo?

• Kasano a ti panangibaklaytayo iti responsabilidadtayo ipakitana no seriosotayo wenno saan?

• Ilawlawagyo no apay a serioso a banag ti panagraem kadagiti kakabsat ken kapamiliatayo.

[Salsaludsod]

[Dagiti Ladawan iti panid 12]

Ti asawa a lalaki masapul nga ipaayna ti material ken naespirituan a kasapulan ti pamiliana