Asino ti Kapatgan a Persona iti Biagmo?

“Sika laeng ti Kangatuan iti intero a daga.”​—SAL. 83:18.

1, 2. No maipapan iti mismo a pannakaisalakantayo, apay a saan nga umdas ti basta panangammotayo iti nagan ni Jehova?

 NALABIT damom a nakita ti nagan ni Jehova idi impabasada kenka ti Salmo 83:18. Mabalin a nasdaawka idi mabasam dagitoy a sasao: “Tapno maammuan koma dagiti tattao a sika, nga agnagan Jehova, sika laeng ti Kangatuan iti intero a daga.” Sigurado a sipud idin, inusarmon dayta a teksto a mangtulong iti sabsabali a mangam-ammo iti naayat a Dios a ni Jehova.​—Roma 10:12, 13.

² Nupay napateg a maammuan dagiti tattao ti nagan ni Jehova, saan nga umdas dayta. Imutektekanyo no kasano nga intampok ti salmista ti sabali pay a kinapudno a nagpateg iti pannakaisalakantayo idi kinunana: “Sika laeng ti Kangatuan iti intero a daga.” Wen, ni Jehova ti kapatgan a Persona iti intero nga uniberso. Kas Namarsua iti amin a bambanag, adda kalinteganna a mangnamnama iti naan-anay a panagpasakup kenkuana ti amin a pinarsuana. (Apoc. 4:11) Masapul ngarud nga isaludsodtayo, ‘Asino ti kapatgan a persona iti biagko?’ Nagpateg nga usigentayo a naimbag ti sungbattayo iti dayta a saludsod!

Ti Isyu a Timmaud iti Hardin ti Eden

3, 4. Kasano a ni Satanas naallilawna ni Eva, ken ania ti resultana?

³ Ti kinapateg dayta a saludsod ket nalawag a makita iti napasamak idi iti hardin ti Eden. Ti rebelioso nga anghel a naawagan idi agangay kas Satanas a Diablo inallukoyna ti umuna a babai a ni Eva nga ipangpangrunana ti tarigagayna imbes a ti bilin ti Dios a saan a mangan iti bunga ti maysa a kayo. (Gen. 2:17; 2 Cor. 11:3) Timmulok iti dayta ket impakitana nga awan panagraemna iti kinasoberano ni Jehova. Saan nga imbilang ni Eva a ni Jehova ti kapatgan a Persona iti biagna. Ngem kasano a ni Satanas naallilawna ni Eva?

⁴ Nagaramat ni Satanas iti nadumaduma a di madmadlaw a taktika idi nakisarita ken Eva. (Basaen ti Genesis 3:1-5.) Umuna, saan nga inusar ni Satanas ti personal a nagan ni Jehova. Inusarna laeng ti sao a “Dios.” Maisupadi iti dayta, ti mannurat iti Genesis inusarna ti personal a nagan ni Jehova iti umuna a bersikulo iti kapitulo 3. Maikadua, imbes a dakamatenna ti “bilin” ti Dios, dinamagna laeng no ania ti “kinuna” ti Dios. (Gen. 2:16) Babaen iti dayta a nasikap a pamay-an, tinagibassit ni Satanas ti kinapateg dayta a bilin. Maikatlo, nupay ni Eva laeng ti kasarsarita ni Satanas, inusarna ti sao a pang-adu a kas iti “dikay.” Nalabit kayatna a makarikna ni Eva iti pride ken mariknana nga isu ket napateg​—a kas la ket ‘tay isu ti pannakangiwat ni lakayna. Ania ti resultana? Nagsao ni Eva para kadakuada ken lakayna idi kinunana iti uleg: “Iti bunga dagiti kayo iti minuyongan mabalinmi ti mangan.”

5. (a) Ania nangallukoyan ni Satanas a pangipamaysaan ni Eva iti atensionna? (b) Ania ti ipakita ti pannangan ni Eva iti maiparit a bunga?

⁵ Binallikug met ni Satanas dagiti kinapudno. Imparipiripna a saan a nainkalintegan ti bilin ti Dios kada Adan ken Eva a ‘dida mangan iti tunggal kayo iti minuyongan.’ Kalpasanna, tinignayna ni Eva a panunotenna met ti bagina ken no kasanona a pasayaaten ti kasasaadna tapno agbalin a “kas iti Dios.” Idi agangay, naallukoyna met laeng ni Eva a mangipamaysa iti atensionna iti kayo ken iti bungana imbes nga iti relasionna iti Daydiay nangted kenkuana iti  amin a bambanag. (Basaen ti Genesis 3:6.) Nakalkaldaang ta babaen ti pannangan ni Eva iti bunga, impakitana a saan a ni Jehova ti kapatgan a Persona iti biagna.

Ti Isyu a Timmaud Idi Kaaldawan ni Job

6. Kasano a kinuestion ni Satanas ti kinatarnaw ni Job, ket ania a gundaway ti naited ken Job?

⁶ Sumagmamano a siglo kalpasanna, naaddaan iti gundaway ti matalek a lalaki a ni Job a mangipakita no asino ti kapatgan a Persona iti biagna. Idi a ni Jehova dinakamatna ken Satanas ti kinatarnaw ni Job, kinuna ni Satanas: “Agpaay aya iti awan kapapay-anna a ni Job nagbuteng iti Dios?” (Basaen ti Job 1:7-10.) Ammo ni Satanas a natulnog ni Job iti Dios isu a ti motibo ni Job ti kinuestionna. Sisisikap nga inakusaranna ni Job nga agserserbi ken Jehova gapu iti personal nga interesna saan ket a maigapu iti ayat. Ni laeng Job ti makasungbat iti akusasion, ket naikkan iti gundaway a mangaramid iti dayta.

7, 8. Ania dagiti suot a napasaran ni Job, ken ania ti pinaneknekan ti simamatalek a panagibturna?

⁷ Ni Jehova pinalubosanna ni Satanas a mangyeg iti agsasaruno a didigra ken Job. (Job 1:12-19) Ania ti inaramid ni Job iti nagbaliw a kasasaadna? Kuna kadatayo ti Biblia a “saan a nagbasol ni Job wenno nangipabiang iti aniaman a banag a di umiso iti Dios.” (Job 1:22) Ngem saan a nagsardeng ni Satanas. Kinunana: “Kudil maigapu iti kudil, ken isuamin nga adda iti maysa a tao itednanto maigapu iti kararuana.” a (Job 2:4) Pinagparang ni Satanas a no agsagaba a mismo ni Job, dinan ibilang ni Jehova a kapatgan a Persona iti biagna.

⁸ Limmaad ti langa ni Job gapu iti nakaar-ariek a sakitna ken sinugsogan pay ni baketna nga ilunodna ti Dios ket matayen. Kalpasanna, tallo a sinsinan a manangliwliwa ti nangakusar a di umiso ti ar-aramidenna. (Job 2:11-13; 8:2-6; 22:2, 3) Ngem iti laksid ti amin a sinagabana, sinalimetmetan ni Job ti kinatarnawna. (Basaen ti Job 2:9, 10.) Babaen ti simamatalek a panagibturna, pinaneknekanna a ni Jehova ti kapatgan a Persona iti biagna. Impakita pay ni Job a kabaelan ti imperpekto a tao a sungbatan, uray iti limitado a pamay-an, dagiti ulbod nga akusasion ti Diablo.​—Idilig ti Proverbio 27:11.

Ti Naan-anay a Sungbat ni Jesus

9. (a) Kasano nga inusar ni Satanas ti naikasigudan a tarigagay tapno masulisogna ni Jesus? (b) Ania ti inaramid ni Jesus iti dayta a sulisog?

⁹ Kalpasan la unay ti pannakabautisar ni Jesus, isu ket pinadas ni Satanas nga allukoyen a mangyun-una iti inaagum a tarigagay imbes a pagtalinaedenna a ni Jehova ti kapatgan a Persona iti biagna. Namitlo a sinulisogna ni Jesus. Umuna, inusarna ti naikasigudan a panagtarigagay iti taraon, isu a sinulisogna ni Jesus a  pagbalinenna a tinapay dagiti bato. (Mat. 4:2, 3) Napalalo ti bisin ni Jesus gapu ta 40 nga aldaw a nagayunar. Gapuna, ti Diablo sinugsoganna ni Jesus a mangusar iti pannakabalinna iti di umiso a pamay-an tapno mapennekna ti bisinna. Ania ti inaramid ni Jesus? Saan a kas ken Eva a di nangipangag iti bilin ti Dios, sipapanunot ni Jesus iti Sao ni Jehova ket dagus a pinagkedkedanna ti sulisog.​—Basaen ti Mateo 4:4.

10. Apay a ni Satanas sinugsoganna ni Jesus a tumpuak manipud iti nangato a paset ti templo?

¹⁰ Pinadas met ni Satanas nga impluensiaan ni Jesus nga agbalin nga agimbubukodan. Sinugsoganna ni Jesus a tumpuak manipud iti nangato a paset ti templo. (Mat. 4:5, 6) Ania ti namnamaen ni Satanas a mapasamak? Kinuna ni Satanas a no saan a madangran ni Jesus iti pannakatnagna, pammaneknek dayta nga isu ket “anak ti Dios.” Nalawag a kayat ti Diablo nga iyun-una ni Jesus ti bukodna a dayaw, uray no kaipapanan dayta ti panagpangasna. Ammo ni Satanas a mabalin a masugsogan ti maysa gapu iti pride ken iti tarigagayna a mangtaginayon iti dayawna. Di umiso ti panangyaplikar ni Satanas iti maysa a teksto, ngem impakita ni Jesus nga umiso ti pannakaawatna iti Sao ni Jehova. (Basaen ti Mateo 4:7.) Babaen ti saan nga itutulok ni Jesus, pinaneknekanna a ni Jehova ti kapatgan a Persona iti biagna.

11. Apay a pinagkedkedan ni Jesus ti panangitukon ti Diablo iti amin a pagarian ti lubong?

¹¹ Gapu ta desperado unayen ni Satanas, intukonna ken Jesus ti amin a pagarian ti lubong. (Mat. 4:8, 9) Dagus a pinagkedkedan dayta ni Jesus. Ammona a no awatenna dayta kaipapananna nga inlaksidnan ti kinasoberano ni Jehova​—ti mismo a kalintegan ti Dios nga agturay kas ti Kangatuan. (Basaen ti Mateo 4:10.) Iti tunggal pannulisog ni Satanas, simmungbat ni Jesus babaen ti panagadawna iti kasuratan a naglaon iti personal a nagan ni Jehova.

12. Apay a nariribukan unay ni Jesus? Ania ti inaramidna, ken ania ti maadaltayo iti dayta?

¹² Idi dandanin agpatingga ti biag ni Jesus ditoy daga, naipasango iti nakarigrigat a desision. Iti intero a ministeriona, impakitana a sidadaan a mangidaton iti biagna. (Mat.  20:17-19, 28; Luc. 12:50; Juan 16:28) Ngem ammo ni Jesus nga isu ket siuulbod a mapabasol ken masentensiaan iti sidong ti sistema ti linteg dagiti Judio ken mapapatay kas maysa a managtabbaaw. Nariribukan unay gapu iti dayta. Inkararagna: “Amak, no mabalin, daytoy a kopa lumabas koma kaniak.” Ngem intuloyna: “Nupay kasta, saan a kas iti pagayatak, no di ket kas iti pagayatam.” (Mat. 26:39) Wen, ti kinamatalek ni Jesus agingga ken patay silalawag a pinaneknekanna no asino ti kapatgan a Persona iti biagna!

Ti Sungbattayo iti Karit

13. Ania dagiti naadaltayo iti inaramid ni Eva, Job, ken Jesu-Kristo?

¹³ Ania ti naadaltayon? Iti kaso ni Eva, naadaltayo a dagidiay tumulok iti agimbubukodan a tarigagay wenno mangipangpangruna iti bagida ipakpakitada a saan a ni Jehova ti kapatgan a Persona iti biagda. Maisupadi iti dayta, naadaltayo manipud iti panangsalimetmet ni Job iti kinatarnawna nga uray dagiti imperpekto a tattao mayun-unada ni Jehova babaen ti simamatalek a panagibturda kadagiti pakarigatan​—uray no dida naan-anay a matarusan ti pakaigapuan dagita. (Sant. 5:11) Kamaudiananna, ti ulidan ni Jesus tulongannatayo nga agbalin a situtulok a maibabain ken ditay ipangpangruna ti bukodtay a dayaw. (Heb. 12:2) Ngem kasanotayo a mayaplikar dagiti naadaltayo?

14, 15. Kasano a naiduma ken Eva ti reaksion ni Jesus iti sulisog, ken kasanotayo a matulad dayta? (Komentuan ti ilustrasion iti panid 18.)

¹⁴ Dimo ipalpalubos a malipatam ni Jehova gapu kadagiti sulisog. Impamaysa ni Eva ti atensionna iti sulisog a direkta a naipasango kenkuana. Nakitana a ti bunga ket “nasayaat a pagtaraon ken maysa a banag a pakailiwan dagiti mata, wen, ti kayo makaay-ayo a matmatan.” (Gen. 3:6) Anian a naiduma dayta iti inaramid ni Jesus idi naipasango iti tallo a sulisog! Iti tunggal sulisog, sipapanunot iti mabalin nga epekto ti aramidenna. Nagpannuray iti Sao ti Dios ken inusarna pay ti nagan ni Jehova.

¹⁵ Ania ti pangipamaysaantayo iti atensiontayo no masulisogtayo nga agaramid iti kagura ni Jehova? No ad-adda nga ipamaysatayo ti atensiontayo iti sulisog, napigpigsa ti tarigagaytayo nga agaramid iti dakes. (Sant. 1:14, 15) Dagus koma nga iwaksitayo dayta a tarigagay uray no nakarigrigat, a kas iti panangikkat iti maysa a paset ti bagi. (Mat. 5:29, 30) Kas ken Jesus masapul a sipapanunottayo iti mabalin nga epekto ti aramidentayo​—no kasano nga apektaranna ti relasiontayo ken Jehova. Masapul a lagipentayo ti kuna ti Biblia a Saona. No aramidentayo dayta, pampaneknekantayo a ni Jehova ti kapatgan a Persona iti biagtayo.

16-18. (a) Ania ti mabalin a pakaigapuan ti pannakaupaytayo? (b) Ania ti tumulong kadatayo a mangdaer kadagiti narigat a kasasaad?

¹⁶ Dimo ipalpalubos nga agsakit ti nakemmo ken Jehova no agsagabaka iti trahedia. (Prov. 19:3) Bayat nga umad-adanin ti panagpatingga ti dakes a lubong, umad-adu nga adipen ni Jehova ti maap-apektaran kadagiti didigra ken trahedia. Ditay namnamaen ita a simimilagro a masalaknibantayo. Nupay kasta, mabalin a maupaytayo a kas ken Job no matay dagiti ipatpategtayo iti biag wenno agsagabatayo a mismo kadagiti pakarigatan.

¹⁷ Saan a matarusan ni Job no apay nga impalubos ni Jehova a napasamak ti dadduma a bambanag, ken no dadduma, kasta met ti mariknatayo. Mabalin a nadamagtayo nga adda dagiti matalek a kakabsat a natay gapu iti ginggined, kas iti napasamak idiay Haiti, wenno gapu iti dadduma pay a natural a didigra. Wenno adda am-ammotayo a natarnaw a kabsat a biktima ti kinaranggas wenno natay iti nakaro nga aksidente. Wenno nalabit agsagsagabatayo gapu iti nariribuk a kasasaad wenno iti ipapantayo a kinaawan hustisia. Mabalin nga iyikkis ti nadudog a pusotayo: ‘Apay a siak pay laeng ti nakapasamakan daytoy Jehova? Ania ti  inaramidko a dakes?’ (Hab. 1:2, 3) Ania ti makatulong kadatayo a mangdaer kadagiti kasta a kasasaad?

¹⁸ Ditay koma ipapan a dagita a pasamak ipasimudaagda nga awan ti anamong kadatayo ni Jehova. Intampok dayta ni Jesus idi dinakamatna ti dua a trahedia a napasamak idi kaaldawanna. (Basaen ti Lucas 13:1-5.) Ti adu a trahedia ket resulta “ti tiempo ken ti di mapakpakadaan a pasamak.” (Ecl. 9:11) Ngem aniaman ti pakaigapuan ti pakarigatantayo, madaerantayo dayta no agpatulongtayo iti “Dios ti amin a liwliwa.” Ipaayannatayo iti bileg a kasapulantayo tapno simamatalek a makapagibturtayo.​—2 Cor. 1:3-6.

19, 20. Ania ti nakatulong ken Jesus a nangdaer kadagiti nakababain a kasasaad, ken ania ti makatulong kadatayo a mangtulad kenkuana?

¹⁹ Dimo ipalpalubos a ti pride wenno panagamak a maibabain ti pangipamaysaam iti atensionmo. Gapu iti kinapakumbaba ni Jesus, ‘inuksobanna ti bagina ket nagbalin a kas iti maysa nga adipen.’ (Fil. 2:5-8) Nadaeranna ti adu a nakababain a kasasaad gapu iti panagpannurayna ken Jehova. (1 Ped. 2:23, 24) Gapu iti dayta, nayun-unana ni Jehova, ken nagresulta iti pannakaipadayagna iti nangato a saad. (Fil. 2:9) Imparegta ni Jesus kadagiti adalanna a tuladenda ti inaramidna. ​—Mat. 23:11, 12; Luc. 9:26.

²⁰ No dadduma, mabalin nga adda dagiti nakababain a pakasuotan ti pammatitayo. Kaskasdi, masapul a tuladentayo ti panagtalek ni apostol Pablo a nangikuna: “Maigapu met laeng itoy sagsagabaek met dagitoy a banag, ngem saanak a mabain. Ta ammok daydiay pinatik, ket agtalekak a kabaelanna a saluadan ti intalekko kenkuana agingga iti dayta nga aldaw.”​—2 Tim. 1:12.

21. Iti laksid ti agimbubukodan a kababalin ti lubong, ania ti determinasionmo?

²¹ Impadto ti Biblia nga iti kaaldawantayo dagiti tattao ‘managayatda iti bagbagida.’ (2 Tim. 3:2) Ditay ngarud pakasdaawan nga adu dagiti mangipangpangruna iti bagida. Ditay koma pulos agpaimpluensia iti kasta a kababalin! Imbes ketdi, maipasangotayo man iti sulisog, agpasar iti trahedia, wenno maibabaintayo, determinadotayo koma a mangpaneknek a ni Jehova laeng ti kapatgan a Persona iti biagtayo!

[Footnote]

Ania ti Maadaltayo . . .

• iti panangallilaw ni Satanas ken ni Eva?

• iti reaksion ni Job iti napasaranna a trahedia?

• iti nangipamaysaan ni Jesus iti atensionna?

[Salsaludsod]

[Ladawan iti panid 17]

Saan nga impangpangruna ni Eva ti relasionna ken Jehova

[Ladawan iti panid 18]

Pinagkedkedan ni Jesus dagiti pannulisog ni Satanas ken impamaysana nga inaramid ti pagayatan ni Jehova

[Dagiti Ladawan iti panid 20]

Panangasaba kadagiti tolda kalpasan ti ginggined idiay Haiti

Agpatulongtayo iti “Dios ti amin a liwliwa’ no agsagabatayo iti pakarigatan