Dakayo a Kristiano a Pamilia​—“Agtalinaedkayo a Nakasagana”

“Agtalinaedkayo a nakasagana, agsipud ta iti oras a saanyo nga ipagpagarup umay ti Anak ti tao.”​—LUC. 12:40.

1, 2. Apay a rumbeng nga ipapusotayo ti balakad ni Jesus nga ‘agtalinaedtayo a nakasagana’?

 “INTON ti Anak ti tao dumteng iti dayagna” ken paglalasinenna “dagiti tattao iti maysa ken maysa,” anianto ti pagbanaganyo a sangapamiliaan? (Mat. 25:31, 32) Yantangay dumteng dayta iti oras a ditay ninamnama, anian a nagpateg nga ipapusotayo ti balakad ni Jesus nga ‘agtalinaedtayo a nakasagana’!​—Luc. 12:40.

² Nausig iti napalabas nga artikulo a masapul nga itungpal a naimbag ti tunggal kameng ti pamilia ti responsabilidadna tapno agtalinaed a siririing iti naespirituan ti intero a pamilia. Usigentayo ti dadduma pay a maaramidantayo tapno nasalun-at ti espiritualidad ti pamiliatayo.

Pagtalinaedenyo a “Simple” ti Matayo

3, 4. (a) Ania ti rumbeng a pagannadan dagiti Kristiano a pamilia? (b) Ania ti kaipapanan ti panangtaginayontayo a “simple” iti matatayo?

³ Tapno nakasagana dagiti pamilia iti iyaay ni Kristo, masapul nga agannadda a dida maisiasi kadagiti aktibidad mainaig iti pudno a  panagdayaw. Yantangay adun a pamilia ti nasiluan iti materialismo, usigentayo ti kinunana ni Jesus maipapan iti panangtaginayon a “simple” ti matatayo. (Basaen ti Mateo 6:22, 23.) No kasano a ti lampara silawanna ti danatayo tapno ditay maitibkol, ti makita ti piguratibo a ‘mata ti pusotayo’ ti mangsilnag kadatayo tapno ditay maitibkol.​—Efe. 1:18.

⁴ Tapno nalawag ti panagkita ti literal a mata, masapul nga awan depektona ken kabaelanna nga ipokus iti banag a kitkitaenna. Kasta met ti mata ti puso. No addaantayo iti simple a piguratibo a mata, naisentro ti atensiontayo iti maymaysa a panggep. Masapul a pagtalinaedentayo a nakapokus ti matatayo kadagiti naespirituan saan ket a kadagiti material a bambanag ken ditay maburiboran unay kadagiti pisikal a kasapulan ti pamiliatayo. (Mat. 6:33) Kaipapananna a makontentotayon kadagiti material a probision ti Dios ken ipangpangrunatayo ti agserbi kenkuana.​—Heb. 13:5.

5. Kasano nga impakita ti maysa nga agtutubo a nakapokus ti ‘matana’ iti panagserbi iti Dios?

⁵ Nagsayaat ti resultana no masanay dagiti annak a mangtaginayon iti simple a mata! Usigentayo ti kapadasan ti maysa nga agtutubo a taga-Ethiopia. Nakalalaing iti eskuelaanda isu nga idi nagraduar iti haiskul, naitukonan iti libre a panagadal iti kolehio. Ngem gapu ta nakapokus ti matana iti panagserbi ken Jehova, dina inawat dayta. Di nagbayag, natukonan iti trabaho nga agsueldo iti 3,000 euro iti binulan​—dakkel a kantidad no idilig iti gagangay a sueldo iti pagilianda. Ngem nakapokus ti ‘matana’ iti panagpayunir. Saanen a masapul a damagenna pay dagiti nagannakna no awatenna dayta wenno saan. Ania ngata ti narikna dagiti nagannakna idi naammuanda ti inaramidna? Nakipagragsakda ken imbagada kenkuana nga isu ket maipagpannakkelda!

6, 7. Masapul a ‘pagtalinaedentayo a silulukat ti matatayo’ iti ania a peggad?

⁶ Ti pakdaar maipapan iti kinaagum ket naipasimudaag kadagiti sasao ni Jesus iti Mateo 6:22, 23. Saan nga inusar ni Jesus ti sao a “komplikado” a kasungani ti sao a “simple” imbes ketdi inusarna ti sao a “nadangkes.” Ti ‘nadangkes a mata’ ket naapal wenno naagum. (Mat. 6:23) Ania ti panangmatmat ni Jehova iti kinaagum? Kuna ti Biblia: “Ti pannakiabig ken tunggal kita ti kinarugit wenno kinaagum saan koma nga uray madakamat iti nagtetengngaanyo.”​—Efe. 5:3

⁷ Nupay nalaka la a mailasin ti kinaagum ti dadduma, narigattayo a madlaw dayta iti bagitayo. Gapuna, nainsiriban nga ipangagtayo daytoy a balakad ni Jesus: “Pagtalinaedenyo a silulukat dagiti matayo ket agaluadkayo iti tunggal kita ti kinaagum.” (Luc. 12:15) Tapno maaramidtayo dayta, masapul nga usigentayo ti mismo a bagitayo, iti kasta, maammuantayo no ania ti nakaisentruan ti pusotayo. Nasken a tingitingen a naimbag dagiti Kristiano a pamilia ti tiempo ken kuarta a busbusbosenda iti panaglinglingay ken iti panaggatang iti material a bambanag.

8. No adda kayattayo a gatangen, kasano nga arigna ‘mapagtalinaedtayo a silulukat ti matatayo’?

⁸ No gumatangka, saanmo laeng a panunoten no kabaelam a gatangen ti maysa a banag wenno saan. Ikabilangam dagiti sumaganad: ‘Adda kadi panawenko a regular a mangusar ken mangmantener iti dayta? Kasano kabayag a masursurok nga usaren dayta?’ Dakayo nga agtutubo, diyo koma patien amin nga adbertismen dagiti produkto ken diyo piliten ti gumatang kadagiti nangina a kawes ken dadduma pay a banag. Sursuruenyo ti agteppel. Kas pamilia, panunotenyo no ania ti epekto ti pananggatangyo iti maysa a banag iti panagsaganayo iti iyaay ti Anak ti tao. Agtalekkayo iti kari ni Jehova: “Saankanto a pulos panawan ket saankanto a pulos baybay-an.”​—Heb. 13:5.

 Rumagpat Kadagiti Naespirituan a Kalat

9. Kasano a makatulong iti pamilia ti panangragpat kadagiti naespirituan a kalat?

⁹ Ti sabali pay a pamay-an a dagiti kameng ti pamilia mapabilegda ti pammatida ken makatulongda iti irarang-ay ti espiritualidad ti intero a pamilia ket ti panangipasdek ken panangragpatda kadagiti naespirituan a kalat. Makatulong dayta tapno maammuan ti pamilia ti rimmang-ayan ti panagserbida ken ni Jehova ken tapno maikeddengda no ania nga aktibidad ti kapatgan iti biagda.​—Basaen ti Filipos 1:10.

10, 11. Kas pamilia, ania dagiti naespirituan a kalat a ragragpatenyo, ken ania dagiti kalat a kayatyo a ragpaten iti masanguanan?

¹⁰ Mabalin a mangyeg iti dakkel a gunggona ti panangipasdek kadagiti simple a kalat a kabaelan a ragpaten ti tunggal miembro ti pamilia. Alaentayo a pagarigan ti kalat a panangusig iti teksto iti inaldaw. Ti komento ti tunggal kameng ti pamilia tulonganna ti ulo ti sangakabbalayan a mangammo iti kasasaad ti espiritualidadda. Ti kalat a regular ken sangapamiliaan a panagbasa iti Biblia ket nagsayaat a gundaway tapno maparang-ay dagiti annak ti abilidadda nga agbasa ken ti pannakaawatda iti mensahe ti Biblia. (Sal. 1:1, 2) Ken saan kadi a rumbeng laeng a pagbalinentayo a kalat ti panangparang-ay iti kalidad dagiti kararagtayo? Nagsayaat met a kalat ti panangikagumaan a mangsukay kadagiti aspeto ti bunga ti espiritu. (Gal. 5:22, 23) Ti sabali pay a kalat ket ti panangikagumaantayo nga agbalin a mannakipagrikna kadagiti makasaritatayo iti ministerio. No aramidentayo dayta kas pamilia, matulongan dagiti annak nga agbalin a naasi, ken ad-adda a mapatanorda ti tarigagay nga agserbi kas regular pioneer wenno misionero.

¹¹ Apay a diyo pagsasaritaan ti dadduma a kalat a mabalinyo a ragpaten kas pamilia?  Mabalinyo kadi nga ikeddeng a sangapamiliaan ti mangbusbos iti ad-adu a tiempo iti ministerio? Mabalinyo kadi nga ikagumaan a parmeken ti panagamak a mangasaba babaen ti telepono, iti lansangan, wenno kadagiti lugar ti negosio? Mabalinyo kadi ti agserbi iti lugar nga agkasapulan iti ad-adu nga agibumbunannag? Mabalin kadi nga agsursuro ti maysa a miembro ti pamilia iti baro a lenguahe tapno mairanudna ti naimbag a damag kadagiti ganggannaet?

12. Ania ti mabalin nga aramiden ti ulo ti pamilia tapno matulonganna ti sangakabbalayanna a rumang-ay iti naespirituan?

¹² Kas ulo ti pamilia, ammuem dagiti benneg a mabalin a pagrang-ayan ti pamiliam. Kalpasanna, mangipasdekka kadagiti espesipiko a kalat tapno maragpat dayta. Realistiko koma dagita ken kabaelan a ragpaten ti pamiliam sigun iti kasasaad ken abilidadda. (Prov. 13:12) Siempre, agkalikagum iti tiempo ti panangragpat iti makagunggona a kalat. Gapuna, ti tiempoyo nga agbuya iti TV ket usarenyo a mangragpat kadagiti naespirituan a kalat. (Efe. 5:15, 16) Ikagumaanyo a ragpaten dagiti impasdekyo a kalat para iti pamiliayo. (Gal. 6:9) Ti pamilia a mangragragpat kadagiti naespirituan a kalat ‘iparparangarangna ti panagrang-ayna iti amin a tattao.’​—1 Tim. 4:15.

Taginayonenyo ti Panagdaydayaw ti Pamiliayo

13. Ania ti naaramid a panagbalbaliw iti linawas nga eskediul dagiti gimong ti kongregasion, ken ania dagiti saludsod a rumbeng nga usigentayo?

¹³ Ti nagsayaat a makatulong kadagiti pamilia tapno ‘makapagtalinaedda a sisasagana’ iti iyaay ti Anak ti tao ket ti nagpateg a panagbalbaliw iti linawas nga eskediul ti panagadal a nangrugi idi Enero 1, 2009. Awanen ti naisina nga aldaw para iti Panagadal iti Libro ti Kongregasion. Naitipon daytan iti gimong ti Teokratiko nga Eskuelaan ti Panagministro ken Gimong ti Serbisio. Naaramid dayta a panagbalbaliw tapno adda gundaway dagiti Kristiano a pamilia a mangpabileg iti espiritualidadda babaen ti panangyeskediulda iti espesipiko nga aldaw iti kada lawas para iti panagdaydayaw ti pamilia. Yantangay nabayagen a nangrugi dayta a panagbalbaliw, isaludsodtayo iti bagitayo: ‘Us-usarek kadi dayta a tiempo para iti Panagdaydayaw ti Pamilia wenno iti personal a panagadalko? Sibaballigi kadi a naragpatko ti panggep dayta nga urnos?’

14. (a) Ania ti kangrunaan a panggep a taginayonentayo ti Panagdaydayaw ti Pamilia wenno personal a panagadaltayo? (b) Apay a nagpateg ti panangiwaya nga agadal?

¹⁴ Ti kangrunaan a panggep a taginayonentayo ti Panagdaydayaw ti Pamilia wenno ti personal a panagadaltayo ket tapno sumingedtayo iti Dios. (Sant. 4:8) Bumileg ti relasiontayo iti Namarsua no regular nga agadaltayo iti Biblia ken umuneg ti pannakaammotayo kenkuana. No nasingsingedtayo ken Jehova, ad-adda a matignaytayo a mangayat kenkuana ‘iti intero a pusotayo, iti intero a kararuatayo, iti intero a panunottayo ken iti intero a pigsatayo.’ (Mar. 12:30) Wen, magagarantayo nga agtulnog iti Dios ken mangtulad kenkuana. (Efe. 5:1) Gapuna, ti panangtaginayontayo iti regular a Panagdaydayaw ti Pamilia ket nagpateg tapno matulongan ti tunggal kameng ti pamilia nga ‘agtalinaed a siririing’ iti naespirituan bayat nga ur-urayentayo ti idadateng ti “dakkel a rigat.” (Mat. 24:21) Nagpateg dayta tapno maisalakantayo.

15. Ania ti epekto ti Panagdaydayaw ti Pamilia iti relasion dagiti miembro ti pamilia?

¹⁵ Ti sabali pay a panggep ti urnos a Panagdaydayaw ti Pamilia ket tapno suminged dagiti miembro ti pamilia. Ti sangsangkamaysa a panangusig kadagiti naespirituan a banag iti kada lawas ket nasayaat ti epektona iti relasion dagiti miembro ti pamilia. Ad-adda a suminged dagiti agassawa no mangngegda ti panangyebkas ti maysa ken maysa iti rag-ona gapu kadagiti baro a nasursuroda! (Basaen ti Eclesiastes 4:12.) Dagiti nagannak ken annak a sangsangkamaysa nga agdaydayaw ket dakdakkel ti posibilidadna  a maaddaanda iti nagkaykaysa nga ayat, ti “naan-anay a singgalut ti panagkaykaysa.”​—Col. 3:14.

16. Isalaysayyo no kasano a nagunggonaan ti tallo a kakabsat a babbai iti inyeskediulda a panagadal iti Biblia.

¹⁶ Usigentayo no kasano a nagunggonaan ti tallo a kakabsat a babbai iti inyeskediulda a panagadal iti Biblia. Nupay saanda nga agkakabagian, agnanaed dagitoy a babbaket a balo iti maymaysa a siudad ken nabayagen nga aggagayyemda. Gapu ta kayatda nga ad-adu ti tiempoda nga agkakadua ken pagbalinen dayta a makagunggona iti naespirituan imbes nga aglalangenda laeng, nangyeskediulda iti tiempo para iti panagadal iti Biblia. Inrugida dayta babaen ti panangusigda iti libro a Naan-anay nga Ikasabam ti Pagarian ti Dios. “Gapu ta maragragsakankami unay iti panagadalmi, masansan nga agpaut dayta iti nasurok a maysa nga oras,” kuna ti maysa kadakuada. “Ikagumaanmi nga iladawan iti panunotmi ti kasasaad dagiti kakabsat idi umuna a siglo ken pagsasaritaanmi no ania ti aramidenmi no addakami iti kasta a situasion. Kalpasanna, ikagumaanmi nga iyaplikar iti ministerio dagiti naadalmi. Dayta ti namagbalin a naragragsak ken nabungbunga ti panangasaba ken panangyadalmi.” Malaksid iti pannakapabileg ti espiritualidadda, simminged pay ti panaggagayyemda. Kunada: “Nagpateg kadakami daytoy nga urnos.”

17. Ania dagiti makatulong tapno naballigi ti Panagdaydayaw ti Pamilia?

¹⁷ Dakayo ngay? Kasanokayo a nagunggonaan iti panagdaydayaw ti pamilia wenno iti personal a panagadalyo? No saan a regular ti panagadalyo, dikayo mabenepisiaran iti panggep dayta nga urnos. Nakasagana koma nga agadal ti intero a pamilia iti nayeskediul a tiempo. Diyo koma ipalubos a dagiti babassit a bambanag ti manglapped iti panagadalyo. Kanayonanna, ti koma pilienyo nga adalen ket dagiti makatulong iti pamiliayo iti inaldaw. Ania ti maaramidanyo tapno makaparagsak ti tunggal panagadalyo? Usarenyo dagiti epektibo a metodo ti panangisuro, ken pagtalinaedenyo a nadayaw ken natalna dayta.​—Sant. 3:18. a

‘Agtalinaedkayo a Siririing ken Sisasagana’

18, 19. Ania ti rumbeng nga epektona kenka ken iti pamiliam ti pannakaammom nga asidegen ti iyaay ti Anak ti tao?

¹⁸ Ti dumakdakes a kasasaad ti lubong ita ket nabatad a pammaneknek a sipud idi 1914, ti dakes a lubong ni Satanas ket dimtengen iti maudi nga al-aldawna. Sumungsungaden ti Armagedon. Iti din agbayag, iwayaten ti Anak ti tao ti panangukom ni Jehova kadagiti di nadiosan a tattao. (Sal. 37:10; Prov. 2:21, 22) Ania ti rumbeng nga epektona kenka ken iti pamiliam ti pannakaammom iti dayta?

¹⁹ Ipangpangagyo kadi ti balakad ni Jesus a taginayonenyo a “simple” ti matayo? Bayat a gumunggun-od dagiti tattao ita iti kinabaknang, dayaw, wenno pannakabalin, ikagkagumaan kadi ti pamiliayo a ragpaten dagiti naespirituan a kalat? Naballigi kadi kadakayo ti urnos a Panagdaydayaw ti Pamilia wenno ti personal a panagadal? Natulonganna kadi ti pamiliayo a suminged ken ni Jehova ken iti maysa ken maysa? Kas iti nausig iti napalabas nga artikulo, ar-aramidem kadi ti Nainkasuratan a responsabilidadmo kas asawa a lalaki, asawa a babai, wenno anak tapno matulongam ti intero a pamiliam nga ‘agtalinaed a siririing’? (1 Tes. 5:6) No aramidenyo dayta, ‘sisasaganakayo’ iti iyaay ti Anak ti tao.

[Footnote]

Ania ti Naadalyo?

• Ilawlawagyo no kasano a ‘makapagtalinaed a sisasagana’ dagiti Kristiano a pamilia babaen ti . . .

kaadda ti “simple” a mata.

panangipasdek ken panangragpat kadagiti naespirituan a kalat.

panangtaginayon iti Panagdaydayaw ti Pamilia.

[Salsaludsod]

[Ladawan iti panid 13]

No “simple” ti matatayo, ilaksidtayo dagiti tukon ti lubong