Dakayo a Kristiano a Pamilia​—‘Agtalinaedkayo a Siririing’

“Agtalinaedtayo koma a siririing ken agtalinaedtayo a sipupuot.”​—1 TES. 5:6.

1, 2. Ania ti masapul nga aramiden ti maysa a pamilia tapno makapagtalinaed a siririing iti naespirituan?

 NO MAIPAPAN iti “naindaklan ken nakaam-amak nga aldaw ni Jehova,” kastoy ti insurat ni apostol Pablo kadagiti Kristiano idiay Tesalonica: “Kakabsat, awankayo iti sipnget, tapno kellaatennakayo dayta nga aldaw a kas kadagiti mannanakaw, ta dakayo amin ket annak ti lawag ken annak ti aldaw. Saannatayo a kukua ti rabii wenno uray ti sipnget.” Innayon ni Pablo: “No kasta, ngarud, saantay koma a maturog a kas iti ar-aramiden ti dadduma, no di ket agtalinaedtayo koma a siririing ken agtalinaedtayo a sipupuot.”​—Joel 2:31; 1 Tes. 5:4-6.

² Ti balakad ni Pablo kadagiti taga-Tesalonica ket maitutop unay kadagiti Kristiano nga agbibiag “iti tiempo ti panungpalan.” (Dan. 12:4) Bayat nga umas-asideg ti panungpalan ti dakes a sistema ti bambanag, determinado ni Satanas a mangitallikud kadagiti pudno nga agdaydayaw iti Dios. Gapuna, masiribtayo no ipapusotayo ti balakad ni Pablo nga agtalinaed a siririing iti naespirituan. Tapno maaramidan dayta dagiti Kristiano, masapul nga itungpal ti tunggal kameng ti pamilia ti Nainkasuratan a responsabilidadna. Ania ngarud ti maaramidan ti asawa a lalaki, asawa a babai, ken annak tapno ‘agtalinaed a siririing’ ti pamiliada?

Assawa a Lallaki​—Tuladenyo “ti Nasayaat a Pastor”

3. Sigun iti 1 Timoteo 5:8, ania ti ramanen ti responsabilidad ti lalaki kas ulo ti pamilia?

³ “Ti ulo ti babai isu ti lalaki,” kuna ti Biblia. (1 Cor. 11:3) Ania ti ramanen ti responsabilidad ti lalaki kas ulo ti pamilia? Kuna ti Kasuratan: “No ti asinoman saanna nga ipaay ti kasapulan dagidiay kukuana, ken nangnangruna dagidiay kameng ti sangakabbalayanna, pinaglikudanna ti pammati ket isu dakdakes ngem ti tao nga awanan pammati.” (1 Tim. 5:8) Wen, masapul nga ipaay ti lalaki ti material a kasapulan ti pamiliana. Ngem tapno matulonganna ida nga agtalinaed a siririing iti naespirituan, saanna laeng nga isakad ti panagbiagda. Masapul a pabilgenna ti espiritualidad ti pamiliana tapno tumibker ti relasionda iti Dios. (Prov. 24:3, 4) Kasanona a maaramid dayta?

4. Ania ti makatulong iti asawa a lalaki a mangpabileg iti espiritualidad ti pamiliana?

⁴ Gapu ta “ti lalaki isu ti ulo ti asawana a kas met ti Kristo isu ti ulo ti kongregasion,” masapul nga usigen ken tuladenna ti panangusar ni Jesus iti kinaulona iti kongregasion. (Efe. 5:23) Usigenyo ti panangiladawan ni Jesus iti relasionna kadagiti pasurotna. (Basaen ti Juan 10:14, 15.) Ania ti tulbek tapno agballigi ti asawa a lalaki a mangpabileg iti espiritualidad ti pamiliana? Isu daytoy: Adalenna ti kinuna ken inaramid ni Jesus kas “ti nasayaat a pastor,” ken ‘sisisinged a surotenna dagiti addangna.’​—1 Ped. 2:21.

5. Ania ti ammo ti Nasayaat a Pastor maipapan iti kongregasion?

⁵ Ti relasion ti pastor ken ti karnero ket naibatay iti pannakaammo ken panagtalek. Ammo ti pastor ti amin a banag maipapan iti karnerona. Ti karnero am-ammona met ti pastorna ken agtalek kenkuana. Mailasin ken agtulnog ti karnero iti timek ti pastor. “Am-ammok dagiti karnerok ket dagiti karnerok am-ammodak,” kuna ni Jesus. Saan laeng a narabaw ti pannakaammona iti kongregasion. Ti Griego a sao a naipatarus kas “am-ammo” ipasimudaagna ti “personal, nauneg a pannakaammo.” Wen, ti Nasayaat a Pastor am-ammona  ti mismo a karnerona. Ammona ti kasapulan, pagkapuyan, ken paglaingan ti tunggal maysa kadakuada. Makitana ti amin a mapaspasamak iti karnerona. Ken ti karnero am-ammona a naimbag ti pastor ken agtalek iti panangidaulona.

6. Kasano a matulad dagiti assawa a lallaki ti Nasayaat a Pastor?

⁶ Tapno matulad ti asawa a lalaki ti kinaulo ni Kristo, masapul nga ibilangna ti bagina kas maysa a pastor ken ti pamiliana kas karnero. Ikagumaanna nga am-ammuen a naimbag ti pamiliana. Posible kadi a maaramidanna dayta? Wen, no addaan iti nasayaat a komunikasion iti tunggal kameng ti pamiliana, imdenganna dagiti pakaseknanda, idauluanna dagiti aktibidad ti pamilia, ken naannad a mangaramid kadagiti desision mainaig iti panagdaydayaw ti pamilia, pannakigimong, panangasaba, panagaliwaksay, ken panaglinglingay. No ammuen a naimbag ti Kristiano nga asawa a lalaki ti kuna ti Sao ti Dios ken ti tunggal kameng ti pamiliana, dakdakkel ti posibilidadna nga agtalekda iti panangidaulona ken maragsakanto a makakita a sangsangkamaysada nga agtalinaed iti pudno a panagdayaw.

7, 8. Kasano a matulad ti asawa a lalaki ti Nasayaat a Pastor no iti panangipakita iti kinadungngo kadagiti adda iti aywanna?

⁷ Ti nasayaat a pastor ket nadungngo met kadagiti karnerona. No adalentayo dagiti salaysay iti Ebanghelio maipapan iti biag ken ministerio ni Jesus, matukay ti pusotayo a mangapresiar iti kinadungngona kadagiti adalanna. ‘Insukona pay ti kararuana maigapu kadagiti karnerona.’ Kas ken Jesus, dagiti assawa a lallaki masapul a nadungngoda kadagiti adda iti aywanda. Imbes a siuulpit a dominaranna ni baketna, ti asawa a lalaki nga agtarigagay iti anamong ti Dios itultuloyna nga ayaten ti asawana kas ‘iti panagayat ni Kristo iti kongregasion.’ (Efe. 5:25) Naasi ken nakonsiderar koma ti panagsasaona yantangay maikari ni baketna iti pammadayaw.​—1 Ped. 3:7.

⁸ Ti ulo ti pamilia masapul a salimetmetanna a sititibker dagiti nadiosan a prinsipio iti panangsanayna kadagiti annakna. Ngem kanayon koma a nadungngo kadakuada. No kasapulan ti disiplina, siaayat koma a maipaay dayta. Nabaybayag a matarusan ti dadduma nga annak no ania ti manamnama kadakuada. Iti kasta a kasasaad, masapul nga agbalin a naan-anus ti ama. No kanayon a suroten dagiti amma ti ulidan ni Jesus, agbalin a natalged ti pagtaenganda. Ken matagiragsak ti pamiliada ti naespirituan a kinatalged a kas iti inkanta ti salmista.​—Basaen ti Salmo 23:1-6.

9. Kas ken patriarka a Noe, ania ti rebbengen dagiti Kristiano nga assawa a lallaki, ken ania ti makatulong kadakuada a mangaramid iti dayta?

⁹ Nagbiag ti patriarka a ni Noe iti tiempo ti panungpalan ti lubong idi kaaldawanna. Ngem ni Jehova ‘inaywananna ni Noe a sitatalged agraman ti pito a sabsabali pay idi nangyeg iti layus iti lubong dagiti di nadiosan a tattao.’ (2 Ped. 2:5) Responsabilidad idi ni Noe a tulongan ti pamiliana a makalasat iti Layus. Kasta met ti rebbengen dagiti Kristiano nga ulo ti pamilia iti daytoy maudi nga al-aldaw. (Mat. 24:37) Ken matulonganda laeng ti pamiliada no adalen ken tuladenda ti ulidan ti Nasayaat a Pastor!

Assawa a Babbai​—‘Bangonenyo ti Sangakabbalayanyo’

10. Ania ti kaipapanan ti panagpasakup ti asawa a babai ken lakayna?

¹⁰ “Dagiti babbai agpasakupda koma kadagiti assawada a kas iti Apo,” insurat ni apostol Pablo. (Efe. 5:22) Kayat kadi a sawen dayta a saan a nadayaw ti akem ti babai? Saan. Sakbay a pinarsuana ti umuna a babai a ni Eva, kinuna ti pudno a Dios: “Saan a nasayaat iti tao nga agtultuloy nga is-isuna. Mangaramidak iti katulongan maipaay kenkuana, kas maysa a komplimentona.” (Gen. 2:18) Kinapudnona, maysa a nadayaw nga akem ti “katulongan” ken ‘komplimento’​—ti panangsuportana ken lakayna bayat nga itungtungpal daytoy ti responsabilidadna iti pamilia.

11. Kasano a ti mapagwadan nga asawa a babai ‘bangonenna ti sangakabbalayanna’?

¹¹ Ti mapagwadan nga asawa a babai ket agtrabaho agpaay iti pagimbagan ti sangakabbalayanna.  (Basaen ti Proverbio 14:1.) Saan a kas iti maag a babai nga awanan panagraem iti urnos ti kinaulo, ti masirib a babai ket nauneg ti panagraemna iti dayta nga urnos. Agpasakup ken lakayna imbes nga agsukir ken agwaywayas kas iti iparparangarang ti lubong. (Efe. 2:2) Ti maag a babai nasakit ti panagsasaona ken lakayna, ngem ti masirib a babai ikagumaanna a paunegen ti panagraem dagiti annakna ken ti sabsabali ken ni lakayna. Saan a reklamador wenno mannakirupir ti kasta nga asawa a babai tapno dina maipababa ti kinaulo ni lakayna. No maipapan iti panagekonomia, ti maag a babai gastuenna amin nga urnong ti pamiliada ngem saan a kasta ti masirib a babai. Makitinnulong ken lakayna nga agbadyet. Manakem ken saan a gastador. Dina piliten ni lakayna nga agobertaym iti trabaho.

12. Ania ti mabalin nga aramiden ti asawa a babai tapno matulonganna ti pamiliana nga ‘agtalinaed a siririing’?

¹² Ti mapagwadan a babai tulonganna ti pamiliana nga ‘agtalinaed a siririing’ babaen ti pannakikooperarna ken lakayna a mangisuro kadagiti annakda iti naespirituan. (Prov. 1:8) Sireregta a suportaranna ti eskediulda a Panagdaydayaw ti Pamilia. Suportaranna met ni lakayna no balakadan ken disiplinaenna dagiti annakda. Talaga nga isu ket naiduma iti saan a mannakikooperar nga asawa a babai, a dagiti annakna ket agsagaba iti pisikal ken naespirituan!

13. Apay a napateg a ti asawa a babai suportaranna ti aktibo a pannakiraman ni lakayna kadagiti nateokratikuan nga aktibidad?

¹³ Ania ti marikna ti manangsuporta a babai no makitana ni lakayna nga aktibo a mangitungtungpal iti annongenna iti kongregasion? Siempre, maragsakan aniaman ti pribilehio ni lakayna​—maysa man a ministerial nga adipen, panglakayen, wenno nalabit miembro ti Hospital Liaison Committee wenno Regional Building Committee. Agkalikagum iti panagsakripisio ti aktibo a panangsuportana ken lakayna iti sao man ken aramid. Ngem ammona a ti pannakiraman ni lakayna kadagiti nateokratikuan nga aktibidad ti tumulong iti intero a pamiliada nga agtalinaed a siririing iti naespirituan.

14. (a) Ania ti mabalin a karit para iti mannakitinnulong nga asawa a babai, ken kasanona a mapagballigian dayta? (b) Kasano a makatulong ti asawa a babai tapno nasayaat ti kasasaad ti intero a pamilia?

¹⁴ Mabalin a maysa a karit iti mapagulidanan nga asawa a babai ti panangsuportana ken lakayna no saan nga umanamong iti desisionna. Nupay kasta, mangipakita iti “naulimek ken naalumamay nga espiritu” ken makikooperar ken lakayna tapno agballigi dayta a desision. (1 Ped. 3:4) Ti naimbag nga asawa a babai ikagumaanna a suroten ti nagsayaat nga ulidan dagiti nadiosan a babbai idi un-unana, a kas kada Sara, Ruth, Abigail, ken ni Maria nga ina ni Jesus. (1 Ped. 3:5, 6) Tuladenna met dagiti nataengan a babbai ita a ‘mararaem ti  panagtigtignayda.’ (Tit. 2:3, 4) Babaen ti panagayat ken panagraemna ken lakayna, dakkel ti maaramidan ti mapagwadan nga asawa a babai tapno agballigi ti panagasawada ken nasayaat ti kasasaad ti sangakabbalayanda. Ti pagtaenganna ket makapabang-ar ken natalged. Para iti maysa a naespirituan a lalaki, awan kaaspingna ti mannakikooperar nga asawa a babai!​—Prov. 18:22.

Annak​—‘Pagtalinaedenyo Dagiti Matayo iti Bambanag a Di Makita’

15. Kasano a makitinnulong dagiti annak kadagiti nagannakda tapno ‘agtalinaed a siririing’ ti pamiliada?

¹⁵ Dakayo nga annak, kasanokayo a makitinnulong kadagiti nagannakyo tapno ‘agtalinaed a siririing’ iti naespirituan ti pamiliayo? Usigenyo ti gunggona nga ituktukon kadakayo ni Jehova. Nalabit sipud kinaubingyo, ipakpakitan dagiti nagannakyo ti ladawan ti biag iti Paraiso. Bayat nga agmatmataengankayo, mabalin nga us-usarendan ti Biblia ken dagiti Nakristianuan a publikasion a mangtulong kadakayo a mangiladawan no kasano ti biag nga agnanayon iti baro a lubong. Ti panangyun-unayo iti panagserbiyo ken ni Jehova ken ti panangipasdek kadagiti kalat a maitunos iti dayta tulongannakayo nga ‘agtalinaed a siririing.’

16, 17. Ania ti mabalin nga aramiden dagiti annak tapno sibaballigi a matarayda ti lumba ti biag?

¹⁶ Ipapusoyo ti sasao ni apostol Pablo iti 1 Corinto 9:24. (Basaen.) Tarayenyo ti lumba ti biag nga addaan iti tarigagay a mangabak. Pilienyo ti dana nga agturong iti gunggona a biag nga agnanayon. Intulok ti adu a maisiasi ti panagkitada iti gunggona gapu ta impangpangrunada ti material a bambanag. Anian a kinamaag dayta! Saan a mangyeg iti pudpudno a kinaragsak ti panangipamaysa iti pananggun-od iti material a kinabaknang. Temporario laeng dagiti bambanag a magatang ti kuarta. Ngem pagtalinaedenyo dagiti matayo iti “bambanag a di makita.” Apay? Gapu ta “ti bambanag a di makita agnanayonda.”​—2 Cor. 4:18.

¹⁷ “Ti bambanag a di makita” ramanenna dagiti bendision ti Pagarian. Agbiagkayo iti pamay-an a magun-odyo dagita a bendision. Aggubuay ti pudpudno a kinaragsak iti panangusaryo iti biagyo nga agserbi ken Jehova. Ti panagserbi iti pudno a Dios ket mangted kadagiti gundaway a mangragpat kadagiti simple ken dadakkel a kalat. a Ti panangipasdek kadagiti realistiko a naespirituan a kalat tulongannakayo a mangipamaysa iti panagserbiyo iti Dios tapno magun-odyo ti gunggona a biag nga agnanayon.​—1 Juan 2:17.

18, 19. Kasano a matingiting no naipapuso ti maysa nga agtutubo ti kinapudno?

¹⁸ Dakayo nga annak, ti umuna nga addang nga agturong iti biag ket ti panangipasdek iti personal a relasionyo ken Jehova. Inaramidyo kadin dayta nga addang? Isaludsodyo iti bagiyo: ‘Maysaak kadi a naespirituan a tao, wenno maigapu laeng kadagiti nagannakko a makipaspasetak kadagiti naespirituan nga aktibidad? Suksukayek kadi dagiti galad a makaay-ayo iti Dios? Pagregreggetak kadi a taginayonen ti rutinak a makiraman kadagiti aktibidad mainaig iti pudno a panagdayaw, kas iti regular a panagkararag, panagadal, pannakigimong, ken panangasaba? Ikagkagumaak kadi ti agtalinaed a nasinged iti Dios babaen ti panangparang-ayko iti personal a relasionko kenkuana?’​—Sant. 4:8.

¹⁹ Utobenyo ti ulidan ni Moises. Nupay dimmakkel  iti ganggannaet a kultura, kinaykayatna ti maibilang kas agdaydayaw ken Jehova imbes a kas anak ti balasang ni Faraon. (Basaen ti Hebreo 11:24-27.) Dakayo a Kristiano nga agtutubo, determinadokayo koma nga agserbi a simamatalek ken Jehova. No aramidenyo dayta, magun-odyo ti pudpudno a kinaragsak, ti kasayaatan a kita ti panagbiag ita, ken “mapetpetanyo a sititibker ti pudpudno a biag.”​—1 Tim. 6:19.

20. Iti lumba ti biag, siasino ti makagun-od iti gunggona?

²⁰ Kadagiti nagkauna a paay-ayam, maysa laeng a tumataray ti mangabak iti lumba. Ngem saan a kasta iti lumba ti biag. Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:3, 4) Adun ti nagballigi iti lumba, ken adu ti kagiddanmo nga agtartaray. (Heb. 12:1, 2) Ti gunggona ket magun-odan dagidiay saan a sumardeng, isu a determinadoka koma a mangabak!

21. Ania ti mausig iti sumaganad nga artikulo?

²¹ Sigurado a dumteng “ti dakkel ken nakaam-amak nga aldaw ni Jehova.” (Mal. 4:5) Rumbeng a sisasagana dagiti Kristiano a pamilia iti dayta nga aldaw. Nagpateg a tunggal kameng ti pamilia itungpalna ti Nakristianuan a responsabilidadna. Ania pay ti mabalinyo nga aramiden tapno agtalinaedkayo a siririing iti naespirituan ken tumibker ti relasionyo iti Dios? Usigen ti sumaganad nga artikulo ti tallo a banag a mangapektar iti naespirituan a kasasaad ti intero a pamilia.

[Footnote]

Ania ti Naadalyo?

• Apay a napateg nga ‘agtalinaed a siririing’ dagiti Kristiano a pamilia?

• Kasano a matulad ti asawa a lalaki ti Nasayaat a Pastor?

• Ania ti maaramidan ti mapagwadan nga asawa a babai tapno masuportaranna ni lakayna?

• Ania ti maaramidan dagiti annak tapno agtalinaed a siririing iti naespirituan ti pamiliada?

[Salsaludsod]

[Ladawan iti panid 9]

Para iti maysa a naespirituan a lalaki, awan kaaspingna ti mannakikooperar nga asawa a babai