Surotenyo ni Kristo, ti Perpekto a Lider

MASANSAN a maupay dagidiay agpapaituray kadagiti natauan a lider. Ngem saan a kasta ti mapaspasaran dagiti agpaspasakup iti panangidaulo ni Kristo. Kinuna ni Jesus: “Umaykayo kaniak, dakayo amin a mabambannogan ken madagdagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo.” (Mat. 11:28, 29) Makapabang-ar ken makapabileg ti panangidaulo ni Jesus. Maseknan unay kadagiti marigrigatan ken mairurrurumen, isu nga aw-awisenna ida a mangibaklay iti sangolna. Ngem ania ti ramanen ti panagpasakup iti panangidaulo ni Jesus?

Insurat ni apostol Pedro: “Ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna.” (1 Ped. 2:21) Kasano kapateg ti panangsurot kadagiti addang ni Jesus? Ipapantayo a karamanka iti maysa a grupo a lumasat iti lugar a nakaimulaan dagiti bomba ken maymaysa laeng kadakayo ti makaammo iti natalged nga ilalasat. Saanmo kadi a suroten a naimbag ti addangna, a nalabit uray ti mismo a tugotna? Umasping iti dayta, agpannuray ti natalged a masanguanantayo iti panangtulad iti mismo nga ulidan ni Jesus. Ramanen dayta ti panagimdeng ken panagtulnog kenkuana ken pannakikooperar kadagiti pannakabagina.

Agimdeng ken Agtulnog

Idi dandani agngudon ti Sermon ni Jesus iti Bantay, kinunana: “Tunggal maysa a dumngeg kadagitoy a sasaok ket aramidenna ida mayaspingto iti masirib a lalaki, a binangonna ti balayna iti rabaw ti dakkel a bato. Ket nagbuyat ti tudo ken immay dagiti layus ket nagpuyupoy dagiti angin ken immablatda iti dayta a balay, ngem saan a narba, ta naibangon iti rabaw ti dakkel a bato.”​—Mat. 7:24, 25.

Tinukoy ni Jesus a “masirib” ti lalaki a dumngeg ken agtulnog kadagiti sasaona. Ipakpakitatayo kadi ti panagraem ken panangapresiar iti ulidan ni Kristo babaen ti naimpusuan a panagtulnog, wenno agtulnogtayo laeng kadagiti bilin ni Jesus no nalaka wenno kombiniente kadatayo? Kinuna ni Jesus: “Kankanayon nga aramidek ti bambanag a makaay-ayo [iti Dios].” (Juan 8:29) Ikagumaantayo koma a tuladen ti ulidanna.

Idi umuna a siglo, nangipakita dagiti apostol iti nagsayaat nga ulidan ti panagpasakup iti panangidaulo ni Kristo. Naminsan, kinuna ni Pedro ken ni Jesus: “Adtoy! Pinanawanmi ti amin a bambanag ket simmursurotkami kenka.” (Mar. 10:28) Kinapudnona, dagiti apostol imbilangda a nagpateg ti panangidaulo ni Jesus nga uray la situtulokda a nangpanaw iti amin a bambanag tapno isu ket masurotda.​—Mat. 4:18-22.

Pannakikooperar Kadagiti Pannakabagi ni Kristo

Sakbay la unay ti ipapatayna, dinakamat ni Jesus ti sabali pay a pamay-an a masurottayo ti panangidaulona. Kinunana: “Ti umawat iti asinoman nga ibaonko awatennak met.” (Juan 13:20) Kinapudnona, tinukoy ni Jesus dagiti napulotan a pannakabagina kas ‘kakabsatna.’ (Mat. 25:40) Kalpasan ti pannakapagungar ken panagpalangit ni Jesus, nadutokan dagiti ‘kakabsatna’ nga agbalin a pannakabagina, a “mangisunsuno ken Kristo” kas embahador a mangaw-awis iti sabsabali a makikappia ken Jehova a Dios. (2 Cor. 5:18-20) Ti panangbigbig iti  panangidaulo ni Kristo ramanenna ti panagpasakup kadagiti ‘kakabsatna.’

Nagsayaat nga usigentayo no kasano ti panangipangagtayo iti naintiempuan a balakad manipud iti Kasuratan a maipapaay babaen kadagiti naibatay iti Biblia a publikasiontayo. Babaen ti panangadal iti Kasuratan ken pannakigimong, mapalpalagipantayo kadagiti sasao ni Kristo. (2 Ped. 3:1, 2) Naimpusuan nga ap-apresiarentayo dagiti maipapaay a naespirituan a taraon no regular nga ar-aramidentayo dagita. Ngem ania ti reaksiontayo no pasaray maulit-ulit ti maysa a balakad? Kas pagarigan, balakadan ti Sao ti Dios dagiti Kristiano a mangasawada ‘laeng iti Apo.’ (1 Cor. 7:39) Dayta a topiko ket masansan a maad-adal iti Ti Pagwanawanan iti nasuroken a maysa a siglo. Babaen ti panangipablaakda kadagiti kasta nga artikulo ken dadduma pay a naipaltiing a balakad, ipakpakita dagiti kakabsat ni Kristo ti naayat a pannakaseknanda iti espiritualidadtayo. Ti panangipangag kadagita a pammalagip ket maysa a pamay-an a maipakitatayo a sursurotentayo ti perpekto a Lidertayo, ni Jesu-Kristo.

“Ti dana dagidiay nalinteg ket kas iti naraniag a lawag a lumawlawag a lumawlawag agingga nga immaldaw unayen,” kuna ti Proverbio 4:18. Wen, aktibo ni Jesus ken rumangrang-ay ti panangidaulona. Maipakitatayo pay ti pannakikooperartayo kadagiti ‘kakabsat’ ni Kristo no awatentayo dagiti baro a pannakailawlawag dagiti kinapudno iti Kasuratan nga ipabpablaak “ti matalek ken masirib nga adipen.”​—Mat. 24:45.

Agpaspasakuptayo pay kadagiti ‘kakabsat’ ni Kristo no makikooperartayo kadagiti nadutokan a manangaywan iti kongregasion Kristiano. Kinuna ni apostol Pablo: “Agtulnogkayo kadagidiay mangidadaulo kadakayo ket agpasakupkayo, ta agtultuloy a bambantayanda dagiti kararuayo.” (Heb. 13:17) Kas pagarigan, mabalin a paregtaennatayo ti maysa a panglakayen mainaig iti kinapateg ti kaadda ti regular a Panagdaydayaw ti Pamilia wenno mangted kadagiti singasing maipapan iti dadduma nga aspeto ti ministeriotayo. Mabalin a mangipaay ti agdaldaliasat a manangaywan iti makatulong a Nainkasuratan a balakad mainaig iti partikular nga aspeto ti biag kas Kristiano. No situtulok nga iyap-aplikartayo dagita a balakad ipakpakitatayo a sursurotentayo ni Jesus kas Lidertayo.

Nakalkaldaang ta awanan ti lubong iti epektibo a lider. Ngem anian a makapabang-ar ti panangsurottayo iti naayat a panangidaulo ni Kristo! Ikagumaantayo ngarud ti agtulnog iti Lidertayo ken makikooperartayo kadagiti pannakabagina ita.

[Dagiti Ladawan iti panid 27]

Ipangpangagmo kadi ti Nainkasuratan a balakad a saan a makisinnangol iti di manamati?