‘Raemenyo Dagidiay Agtartrabaho a Sipipinget iti Tengngayo’

“Maaddaankayo iti panagraem kadagidiay agtartrabaho a sipipinget iti tengngayo ken mangidadaulo kadakayo iti Apo ken mangbagbaga kadakayo.”​—1 TES. 5:12.

1, 2. (a) Ania ti kasasaad ti kongregasion ti Tesalonica idi damo a sinuratan ida ni Pablo? (b) Ania ti imparegta ni Pablo nga aramiden dagiti taga-Tesalonica?

 IPAPANMO a kamengka ti kongregasion ti Tesalonica idi umuna a siglo, ti maysa kadagiti kaunaan a nabuangay idiay Europa. Adu a tiempo ti binusbos ni apostol Pablo a nangpabileg kadagiti kakabsat sadiay. Mabalin a nangdutok kadagiti panglakayen a mangidaulo, kas iti inaramidna iti dadduma a kongregasion. (Ara. 14:23) Ngem kalpasan a nabuangay ti kongregasion, nangbukel dagiti Judio iti naranggas a grupo a mangpapanaw kada Pablo ken Silas manipud iti siudad. Mabalin a narikna dagiti nabati a Kristiano a nabaybay-anda ken nalabit mabutbutengda pay ketdi.

² Kalpasan a napapanaw ni Pablo idiay Tesalonica, maawatantayo no apay a maseknan iti kasasaad ti kabubuangay a kongregasion. Pinadasna ti agsubli, ngem ‘binangenan ni Satanas ti danana’ isu nga imbaonna ni Timoteo tapno paregtaenna ti kongregasion. (1 Tes. 2:18; 3:2) Ngem idi nasayaat ti impadamag ni Timoteo, natignay ni Pablo a mangsurat kadagiti taga-Tesalonica. Iti suratna, pinaregtana ida a ‘raemenda dagidiay mangidadaulo kadakuada.’​—Basaen ti 1 Tesalonica 5:12, 13.

3. Apay a rumbeng a mangipakita dagiti Kristiano a taga-Tesalonica iti naisangsangayan a konsiderasion kadagiti panglakayen?

³ Dagiti kakabsat a mangidadaulo iti kongregasion ti Tesalonica ket bassit pay ti kapadasanda no idilig ken Pablo ken iti kakaduana nga agdaldaliasat, ken nabiitda pay a Kristiano no idilig kadagiti panglakayen idiay Jerusalem. Awan pay ngamin makatawen a nabuangay dayta a kongregasion! Kaskasdi, masapul nga agyaman dagiti kameng ti kongregasion ta addaanda  kadagiti panglakayen nga “agtartrabaho a sipipinget” ken “mangidadaulo” iti kongregasion ken “mangbagbaga” kadakuada. Wen, adda panggapuanda a ‘mangipaay kadagiti panglakayen iti ad-adda pay a nalablabes a konsiderasion iti ayat.’ Kalpasan dayta, imbalakad ni Pablo a ‘makikappiada iti maysa ken maysa.’ No addaka idi idiay Tesalonica, nasged kadi ti panangapresiarmo iti ar-aramiden dagiti panglakayen? Ania ti panangmatmatmo kadagiti “sagut a tattao” nga impaay ti Dios babaen ken Kristo iti kongregasionyo?​—Efe. 4:8.

“Agtartrabaho a Sipipinget”

4, 5. Apay a maikuna a napinget a trabaho para kadagiti panglakayen idi kaaldawan ni Pablo ti panangisuro iti kongregasion, ken apay a kasta met ita?

⁴ Idi nakagteng da Pablo ken Silas idiay Berea, kasano nga “agtartrabaho a sipipinget” dagiti panglakayen idiay Tesalonica? Kas panangtulad ken Pablo, sigurado nga inusarda ti Kasuratan a nangisuro iti kongregasion. Mabalin a maisaludsodyo, ‘Ipatpateg kadi dagiti Kristiano a taga-Tesalonica ti Sao ti Dios?’ Kuna ngamin ti Biblia a dagiti taga-Berea “nataktakneng ti panagpampanunotda ngem kadagiti adda idiay Tesalonica, . . . a siaannad a suksukimatenda ti Kasuratan iti inaldaw.” (Ara. 17:11) Ngem saan a dagiti Kristiano ti tuktukoyenna no di ket ti kaaduan a Judio a taga-Tesalonica. Dagidiay nagbalin a manamati ‘inawatda ti sao ti Dios, saan a kas sao dagiti tattao, no di ket kas sao ti Dios.’ (1 Tes. 2:13) Sigurado nga inkagumaan dagiti panglakayen a tinaraonan ida iti naespirituan.

⁵ Ti klase matalek ken masirib nga adipen ita ipapaayanna ti arban ti Dios iti “taraonda iti umiso a tiempo.” (Mat. 24:45) Nalabit dagiti kameng ti kongregasion aduanda iti naibatay-Biblia a literatura, ken iti dadduma a lenguahe, magun-odan dagiti katulongan kas iti Watch Tower Publications Index ken Watchtower Library iti CD-ROM. Iti panangiwanwan ti klase adipen, agtartrabaho a sipipinget dagiti panglakayen tapno mataraonanda iti naespirituan dagiti kakabsatda. Tapno mataraonan iti naespirituan ti kongregasion, adu nga oras ti busbusbosen dagiti panglakayen a mangisagana kadagiti pasetda iti gimong tapno sieepektibo a maiparangda dayta. Napanunotyo kadin no kasano kaadu nga oras ti busbusbosen dagiti panglakayen a mangisagana kadagiti pasetda kadagiti gimong, asamblea, ken kombension?

6, 7. (a) Ania nga ulidan ni Pablo ti tinulad dagiti panglakayen a taga-Tesalonica? (b) Apay a mabalin a maysa a karit kadagiti panglakayen ita a tuladen ti ulidan ni Pablo?

⁶ Dagiti panglakayen a taga-Tesalonica dida nalipatan ti nasayaat nga ulidan ni Pablo iti panangipastor iti arban. Saanna nga inaramid dayta gapu laeng ta obligasionna. Nausigtayo iti napalabas nga artikulo a ‘naalumamay ni Pablo a kas iti agtagtagibi nga ina a mangtartaripato iti bukodna nga anak.’ (Basaen ti 1 Tesalonica 2:7, 8.) Situtulok pay a mangisakripisio iti ‘bukodna a kararua’! Sigurado a tinulad dagiti panglakayen ti wagas a panagipastorna.

⁷ Dagiti Kristiano a pastor ita matuladda ni Pablo no ipategda ti arban. Saan a naikasigudan a naasi ken mannakigayyem ti dadduma a karnero. Kaskasdi, ikagumaan dagiti panglakayen a tarusan ida ken ‘mangsarak iti naimbag’ kadakuada. (Prov. 16:20) Ngem mabalin a marigatan dagiti panglakayen a mangaramid iti dayta gapu ta imperpektoda. Kaskasdi, bayat nga ikagkagumaanda ti agbalin a naasi iti amin, saan kadi a rumbeng a komendarantayo ti panagreggetda nga agbalin a nasayaat a pastor iti panangidaulo ni Kristo?

8, 9. Kadagiti ania a pamay-an a dagiti panglakayen ita ‘agtultuloy a bambantayanda dagiti kararuatayo’?

⁸ Adda panggapuantayo amin nga ‘agpasakup’ kadagiti panglakayen. Kas iti kinuna ni Pablo, ‘agtultuloy a bambantayanda dagiti kararuatayo.’ (Heb. 13:17) Ipalagip dagita kadatayo ti literal a pastor a saan a maturog tapno masalakniban ti arbanna. Umasping iti dayta, mabalin nga agpuyat dagiti panglakayen a mangas-asikaso iti kasapulan dagiti masakit iti pisikal, emosional, wenno naespirituan. Kas  pagarigan, mabalin a mariing dagiti kakabsat a kameng ti Hospital Liaison Committee tapno asikasuenda dagiti kapammatianda a masakit. Ngem ad-adda a maapresiartayo ti serbisioda no maipasangotayo iti kasta a situasion!

⁹ Sipipinget nga agtrabaho dagiti panglakayen a kameng ti Regional Building Committee ken komite a pangsaranay tapno matulonganda dagiti kapammatianda. Maikarida iti naimpusuan a suportatayo! Usigentayo ti naaramid a panangsaranay kalpasan a ti Cyclone Nargis dinalapusna ti Myanmar idi 2008. Tapno makagteng ti grupo a mangsaranay iti kongregasion ti Bothingone iti rehion ti Irrawaddy Delta, limmasatda iti lugar a nakaro ti pannakadidigrana ken adu ti agkaiwara a bangkay. Idi a dagiti lumugar a kakabsat nakitada ti umuna a grupo a mangsaranay a nakagteng iti Bothingone, a pakairamanan ti dati a manangaywan iti sirkitoda, kinunada: “Kitaenyo! Adda ti manangaywan iti sirkitotayo! Inispalnatayo ni Jehova!” Ap-apresiarenyo kadi ti kinagaget dagiti panglakayen nga agtartrabaho iti aldaw ken rabii? Adda dagiti panglakayen a nadutokan nga agserbi iti special committee tapno tamingenda dagiti nadagsen a hudisial a kaso. Saanda nga ipannakkel ti naaramidanda. Kaskasdi, talaga nga agyamyaman dagidiay natulonganda.​—Mat. 6:2-4.

10. Ania dagiti di unay pagaammo a trabaho dagiti panglakayen?

¹⁰ Adu a panglakayen ti mangas-asikaso iti dadduma pay a trabaho mainaig iti kongregasion. Kas pagarigan, ti koordineytor ti bagi dagiti panglakayen isaganana dagiti eskediul ti linawas a gimong. Ti sekretario ti kongregasion urnongenna ti binulan ken tinawen a report iti ministerio. Ti manangaywan iti eskuelaan mangaramid iti eskediul dagiti agpaset. Tunggal tallo a bulan, ma-audit ti kuenta ti kongregasion. Basaen dagiti panglakayen dagiti surat ti sanga nga opisina ken iyaplikarda dagiti instruksion a makatulong tapno agtalinaed ti “panagmaymaysa iti pammati.” (Efe. 4:3, 13) Gapu iti panagregget dagiti nagaget a panglakayen, ‘maaramid ti amin a bambanag a sitatakneng ken sigun iti urnos.’​—1 Cor. 14:40.

“Mangidadaulo Kadakayo”

11, 12. Siasino dagiti mangidadaulo iti kongregasion, ken ania ti ramanen dayta?

¹¹ Ni Pablo tinukoyna dagiti nagaget a panglakayen idiay Tesalonica kas “mangidadaulo” iti kongregasion. Ti orihinal a sao para iti dayta ipasimudaagna ti “panagtakder iti sanguanan” ken mabalin a maipatarus kas “panangiwanwan; panangyun-una.” (1 Tes. 5:12) Tinukoyna pay ida kas “agtartrabaho a sipipinget.” Saan la a maymaysa a ‘mangidadaulo’ ti tuktukoyenna no di ket ti amin a panglakayen iti kongregasion. Kaaduan a panglakayen ita ti mangidaulo kadagiti gimong ti kongregasion. Ti baro nga awag a “koordineytor ti bagi dagiti panglakayen” tulongannatayo a mangmatmat nga amin a panglakayen ket kameng ti maymaysa a bagi.

¹² Saan laeng a panangisuro ti ramanen ti ‘panangidaulo’ iti kongregasion. Agparang ti isu met la a termino iti 1 Timoteo 3:4. Kinuna ni Pablo a ti manangaywan ket rumbeng a “lalaki a mangidadaulo iti bukodna a sangakabbalayan iti nasayaat a pamay-an, addaan iti annak nga agpaspasakup buyogen ti isuamin a kinaserioso.” Ti sao a “mangidadaulo” ramanen ti panangisurona kadagiti annakna ken panangidaulona iti pamiliana ken “addaan iti annak nga agpaspasakup.” Wen, dagiti panglakayen ti mangidaulo iti kongregasion, a tulonganda ti amin nga agpasakup ken Jehova.​—1 Tim. 3:5.

13. No agmiting dagiti panglakayen, apay nga agkalikagum iti tiempo ti panagdesisionda?

¹³ Tapno maidauluanda a naimbag ti arban, pagsasaritaan dagiti panglakayen no kasanoda nga aywanan ti kongregasion. Mabalin a nalaklaka no maysa laeng a panglakayen ti agdesision. Ngem kas panangtulad iti ulidan ti bagi a manarawidwid idi umuna a siglo, siwayawaya nga agsao ti tunggal kameng ti bagi dagiti  panglakayen, nga agpaiwanwanda iti Kasuratan. Kalatda nga iyaplikar dagiti prinsipio ti Biblia iti kasapulan ti kongregasionda. Mas epektibo dayta no agsagana ti tunggal panglakayen para iti mitingda, usigenna ti Kasuratan ken dagiti instruksion ti klase matalek ken masirib nga adipen. Siempre, agkalikagum dayta iti tiempo. No agduduma ti opinionda, kas iti napasamak iti bagi a manarawidwid idi umuna a siglo idi inusigda ti maipapan iti panagkugit, masapul ti kanayonan a tiempo ken panagsukimat tapno makaaramidda iti maymaysa a desision a naibatay iti Kasuratan.​—Ara. 15:2, 6, 7, 12-14, 28.

14. Ap-apresiarenyo kadi ti sangsangkamaysa a panagdadanggay ti bagi dagiti panglakayen? Apay a kasta ti sungbatyo?

¹⁴ Ania ti mabalin a mapasamak no ipilit ti maysa a panglakayen ti kayatna wenno ikampaniana ti opinionna? Wenno kasanon no ti maysa ket, kas ken Diotrefes idi umuna a siglo, mangpatpataud iti panagsisina? (3 Juan 9, 10) Sigurado nga agsagaba ti intero a kongregasion. No riniribuk ni Satanas ti kongregasion idi umuna a siglo, sigurado a kayatna met a riribuken ti kongregasion ita. Mabalin a rubrobanna ti pagannayasan ti tao a mangyun-una iti bagina, kas iti panagtarigagay iti kinaprominente. Gapuna, masapul a sukayen dagiti panglakayen ti kinapakumbaba ken agdadanggayda kas maysa a bagi. Apresiarentayo unay ti kinapakumbaba dagiti panglakayen nga agtutunos kas maysa a bagi!

“Mangbagbaga Kadakayo”

15. Apay a bagbagaan dagiti panglakayen ti maysa a kabsat?

¹⁵ Intampok ni Pablo ti narigat ngem napateg nga annongen dagiti panglakayen: panangbagbaga iti arban. Iti Kristiano a Griego a  Kasuratan, ni laeng Pablo ti nagusar iti Griego a termino a naipatarus kas “bagbagaan.” Mabalin a tumukoy dayta iti nadagsen ngem saan a nagubsang a balakad. (Ara. 20:31; 2 Tes. 3:15) Kas pagarigan, insurat ni Pablo kadagiti taga-Corinto: “Isursuratko dagitoy a banag, saan a tapno pabainankayo, no di ket tapno bagbagaankayo kas annakko a dungdungnguen.” (1 Cor. 4:14) Binagbagaanna ida gapu iti naayat a pannakaseknanna kadakuada.

16. Ania ti masapul a laglagipen dagiti panglakayen no bagbagaanda ti sabsabali?

¹⁶ Laglagipen dagiti panglakayen a napateg ti wagas a panangbagbagada iti sabsabali. Ikagumaanda a tuladen ni Pablo babaen ti panagbalinda a naasi, nadungngo, ken sisasagana a tumulong. (Basaen ti 1 Tesalonica 2:11, 12.) Siempre, dagiti panglakayen ‘kumpetda a sititibker iti matalek a sao tapno mabalinanda ti mamagbaga babaen ti makapasalun-at a sursuro.’​—Tito 1:5-9.

17, 18. Ania ti rumbeng a laglagipem no balakadannaka ti maysa a panglakayen?

¹⁷ Pudno, imperpekto dagiti panglakayen ken no dadduma, makaisawangda iti pagbabawyanda inton agangay. (1 Ar. 8:46; Sant. 3:8) Ammo met dagiti panglakayen a no balakadanda dagiti kapammatianda gagangay a saan a ‘makaparag-o no di ket makapaladingit’ dayta. (Heb. 12:11) Gapuna, sakbay koma a mangbalakad ti maysa a panglakayen, ikararag ken usigenna a naimbag ti ibalakadna. No mabalakadanka, apresiarem kadi ti naayat a pannakaseknan kenka dagiti panglakayen?

¹⁸ Ipapantayo nga adda sakitmo a kasla di mailawlawag ti medisina. Kalpasanna, adda doktor a nakatakuat iti sakitmo, ngem narigat nga awaten dayta. Kaguram kadi ti doktor? Saan! Uray irekomendana nga agpaoperaka, mabalin nga umanamongka ta ammom a pagimbagam. Mabalin a dimo kayat ti wagas a panagsao ti doktor, ngem ipalubosmo kadi a dayta ti mangapektar iti desisionmo? Nalabit saan. Umasping iti dayta, dimo ipalubos a ti wagas a pannakabalakadmo lapdannaka nga umimdeng kadagidiay us-usaren ni Jehova ken ni Jesus a mangtulong wenno mangsalaknib kenka iti naespirituan.

Apresiarem ti Sagut ni Jehova a Papanglakayen

19, 20. Kasanom a maipakita ti apresasionmo kadagiti “sagut a tattao”?

¹⁹ Ania ti aramidem no nakaawatka iti sagut a nairanta a naaramid para kenka? Usarem kadi dayta kas panangipakitam iti apresasionmo? Dagiti “sagut a tattao” ket impaay kenka ni Jehova babaen ken Jesu-Kristo. Ti maysa a pamay-an a maipakitam ti panagyamanmo kadagitoy a sagut ket ti panagimdengmo a naimbag kadagiti palawag dagiti panglakayen ken ti panangyaplikarmo kadagiti punto a dinakamatda. Ti sabali pay a pamay-an ket ti nabagas a panagkomentom kadagiti gimong. Suportaram ti trabaho nga idadauluan dagiti panglakayen, kas iti panangasaba. No nagunggonaanka iti imbalakad ti maysa a panglakayen, apay a dimo ibaga dayta kenkuana? Kanayonanna, apay a dimo ipakita ti apresasionmo iti pamilia dagiti panglakayen? Laglagipem a tapno sipipinget a makapagtrabaho iti kongregasion ti maysa a panglakayen, isakripisio ti pamiliana ti tiempo a makaduada koma.

²⁰ Wen, adu ti panggapuantayo nga agyaman kadagiti panglakayen, a sipipinget nga agtartrabaho, mangidadaulo, ken mangbalbalakad kadatayo. Talaga a naayat a probision ni Jehova dagitoy a “sagut a tattao!”

Malagipyo Kadi?

• Ania dagiti rason nga apresiaren dagiti Kristiano a taga-Tesalonica dagidiay mangidadaulo kadakuada?

• Kasano a sipipinget nga agtartrabaho para kadakayo dagiti panglakayen iti kongregasionyo?

• Kasanokayo a magunggonaan iti panangidaulo dagiti panglakayen?

• Ania ti masapul a laglagipenyo no balakadannakayo ti maysa a panglakayen?

[Salsaludsod]

[Ladawan iti panid 27]

Ap-apresiarem kadi ti adu a pamay-an a panangipastor dagiti panglakayen iti kongregasion?