Ti Naayat a Sagut ti Dios

“Ti di kaikarian a kinamanangngaasi [agturayto] kas ari babaen ti kinalinteg a maipaay iti agnanayon a biag.”​—ROMA 5:21.

1, 2. Ania ti ibilang ti adu a napateg a sagut? Ngem ania kadagita a dua ti napatpateg?

 KUNA ti maysa a propesor iti University of Melbourne, Australia, a dagiti linteg ti Imperio ti Roma ket sagut a manayon ti pategna iti sibilisasion. Ngem isuro ti Biblia nga inikkannatayo ti Dios iti naayat ken adayo a napatpateg a sagut. Dayta a sagut ket pamay-an ti Dios tapno maaddaantayo iti naanamongan ken nalinteg a takder iti imatang ti Dios. Mangyeg met dayta iti namnama a pannakaisalakan ken agnanayon a biag.

² Impaay ti Dios dayta a sagut maibatay iti hustisiana. Iti Roma kapitulo 5, saan nga indatag ni apostol Pablo dagita nga aspeto babaen ti panangusigna kadagiti linteg. Inrugina dayta babaen ti naragsak a pammatalged: “Naideklaratayon a nalinteg kas imbunga ti pammati, [gapuna] tagiragsakentayo ti pannakikappia iti Dios baeten ken Apotayo a Jesu-Kristo.” Dagidiay immawat iti sagut ti Dios matignayda a mangsubad iti ayatna. Kasta ti inaramid ni Pablo. Insuratna: “Ti ayat ti Dios naiparukpok iti puspusotayo babaen ti nasantuan nga espiritu.”​—Roma 5:1, 5.

3. Ania dagiti tumaud a saludsod?

³ Ngem apay a kasapulan dayta a naayat a sagut? Kasano nga impaay dayta ti Dios  iti pamay-an a nabuyogan iti hustisia ken magunggonaan ti amin a tattao? Ken ania ti rumbeng nga aramiden dagiti tattao tapno magun-odda dayta? Kitaentayo dagiti makapnek a sungbat ken no kasano a patalgedan dagita ti ayat ti Dios.

Ti Ayat ti Dios ken ti Basol

4, 5. (a) Kasano nga impakita ni Jehova ti naindaklan nga ayatna? (b) Ania a pannakaammo ti tumulong kadatayo a mangtarus iti Roma 5:12?

⁴ Gapu iti dakkel a panagayat ni Jehova, imbaonna ti bugbugtong nga Anakna a tumulong kadagiti tattao. Kastoy ti panangiladawan ni Pablo iti dayta: “Ti Dios irekomendana ti bukodna nga ayat kadatayo ta, bayat a managbasoltayo pay laeng idi, ni Kristo natay a maipaay kadatayo.” (Roma 5:8) Usigem daytoy a kinapudno: “Managbasoltayo pay laeng.” Masapul nga ammo ti amin no kasano a nagbalintayo a kasta.

⁵ Inlawlawag dayta ni Pablo idi kinunana: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Maawatantayo dayta gapu ta impaisurat ti Dios no kasano a nangrugi ti biag ti tao. Pinarsua ni Jehova immuna a dua a tao, da Adan ken Eva. Perpekto ti Namarsua, kasta met ti immuna a nagannaktayo. Inikkan ida ti Dios iti maysa a bilin ken imbagana a matayda no sukirenda dayta. (Gen. 2:17) Ngem pinilida ti agaramid iti dakes, a sinalungasingda ti nainkalintegan a bilin ti Dios. Iti kasta, inlaksidda ti Dios kas Manangted-linteg ken Soberano.​—Deut. 32:4, 5.

6. (a) Apay a matay ti amin a kaputotan ni Adan, ken nagbaliw kadi dayta a kasasaadda idi naited ti Mosaiko a Linteg? (b) Kasano a mayilustrar ti epekto ti natawid a basol?

⁶ Nagbasolen ni Adan idi naaddaan iti annak isu a naipatawidna ti basol ken ti epekto dayta iti amin a kaputotanna. Saan a kas ken Adan, dida linabsing ti bilin ti Dios isu a dida manungsungbat iti basol ni Adan ken awan pay idi ti naisurat a linteg. (Gen. 2:17) Kaskasdi, natawidda ti basol. Iti kasta, arigna nagturay ti basol ken ipapatay agingga a nangted ti Dios iti Linteg kadagiti Israelita, a nalawag a nangipakita a managbasolda. (Basaen ti Roma 5:13, 14.) Ti epekto ti natawid a basol ket mayilustrar iti sakit a mabalin a matawid kadagiti nagannak. Nupay adda dagiti annak a makatawid iti sakit ti nagannakda, saan a matawid dayta ti amin nga annak. Ngem saan a kasta ti basol. Natawidtayo amin ti basol ni Adan isu mataytayo. Adda kadi solusion iti dayta a kasasaad?

Ti Impaay ti Dios Babaen ken Jesu-Kristo

7, 8. Kasano a nagduma ti resulta ti naaramidan ti dua a perpekto a tao?

⁷ Siaayat a nangaramid ni Jehova iti probision tapno mawayawayaan dagiti tattao iti natawidda a basol. Inlawlawag ni Pablo a posible dayta babaen ti maysa a perpekto a tao, ti maikadua nga Adan. (1 Cor. 15:45) Ngem nagduma ti nagbanagan ti inaramid ti dua a perpekto a tao. Kasano?​—Basaen ti Roma 5:15, 16.

⁸ ‘Ti sagut ket saan a kas iti labsing,’ insurat ni Pablo. Ni Adan ti nakaaramid iti dayta a labsing, isu a maiparbeng laeng a madusa iti ipapatay. Ngem saan la nga isu ti matay. Mabasatayo: “Babaen ti labsing ti maysa a tao adu ti natay.” Sigun iti pagalagadan ti Dios iti hustisia, amin a kaputotan ni Adan, a pakairamanantayo, ket matay yantangay managbasolda amin. Kaskasdi, makaliwliwa a maammuan a ti perpekto a tao a ni Jesus ket makapataud iti naiduma a resulta. Ania ti resultana? Sigun ken Pablo, isu ti pannakaideklara ti amin a kita ti tao “a nalinteg maipaay iti biag.”​—Roma 5:18.

9. Kas nadakamat iti Roma 5:16, 18, ania ti inaramid ti Dios tapno maideklara a nalinteg ti maysa a tao?

⁹ Ania ti kaipapanan ti Griego a sasao a “pannakaideklarada a nalinteg”? Insurat ti maysa nga eskolar ti Biblia: “Saanda a termino  ti linteg no di ket adda laeng pakainaiganda iti linteg. Tukoyenna ti panagbalbaliw ti kasasaad ti maysa iti relasionna iti Dios, saan ket a ti makin-uneg a kinataona . . . Dagita a termino iladawanda ti Dios kas ukom a naaddaan iti desision a pabor iti akusado, nga arigna naidatag iti pangukoman ti Dios gapu ta napabasol a nakillo. Ngem inabsuelto ti Dios ti akusado.”

10. Ania ti inaramid ni Jesus a nakaibatayan ti pannakaideklara dagiti tattao a nalinteg?

¹⁰ Ania ti nangibatayan ti nalinteg nga “Ukom ti intero a daga” iti panangabsueltona iti nakillo a tao? (Gen. 18:25) Ti umuna nga inaramid ti Dios ket ti siaayat a panangibaonna iti bugbugtong nga Anakna ditoy daga. Naan-anay nga inaramid ni Jesus ti pagayatan ni Amana iti laksid dagiti sulisog, nakaro a panangumsi, ken pannakaparigat. Tinaginayonna ti kinatarnawna agingga iti ipapatayna iti kayo a pagtutuokan. (Heb. 2:10) Idi indaton ni Jesus ti perpekto a natauan a biagna, indatagna ti subbot a mabalin a mangwayawaya kadagiti kaputotan ni Adan manipud basol ken ipapatay.​—Mat. 20:28; Roma 5:6-8.

11. Ania ti tinupagan ti subbot?

¹¹ Tinukoy dayta ni Pablo “kas katupag a subbot.” (1 Tim. 2:6) Ania ti tinupaganna? Inyeg ni Adan ti kinaimperpekto ken ipapatay iti binilion a kaputotanna. Pudno, kas perpekto a tao, kabaelan ni Jesus ti mangpataud iti binilion a perpekto a kaputotan. a Maibatay iti dayta, maikunatayo a ti biag ni Jesus ken dagiti agbalin koma a perpekto a kaputotanna ket sakripisio a katupag ti basol ni Adan ken ti kaputotanna. Ngem saan nga ibaga ti Biblia a karaman iti subbot ti asinoman nga agbalin koma a kaputotanna. Kuna ti Roma 5:15-19 a ti ipapatay ti “maysa [laeng] a tao” ti mangipaay iti pannakawayawaya. Wen, ti perpekto a biag ni Jesus ket katupag ti perpekto a biag ni Adan. Ni laeng Jesu-Kristo ti rumbeng nakaipamaysaan dayta. Naikkan iti gundaway ti amin a tao nga umawat iti libre a sagut ken biag gapu iti “maysa nga aramid [ni Jesus] a panangpalinteg,” ti kinatulnog ken kinatarnawna agingga ken patay. (2 Cor. 5:14, 15; 1 Ped. 3:18) Kasano a maaramidan dayta ti subbot?

Pannakawayawaya Maibatay iti Subbot

12, 13. Apay a dagidiay naideklara a nalinteg kasapulanda ti asi ken ayat ti Dios?

¹² Inawat ni Jehova a Dios ti daton a pangsubbot nga indatag ti Anakna. (Heb. 9:24; 10:10, 12) Kaskasdi, imperpekto latta dagiti adalan ni Jesus ditoy daga, agraman dagiti matalek nga apostol. Nakaaramidda iti di umiso nupay inkagumaanda a liklikan dayta. Apay? Gapu iti natawidda a basol. (Roma 7:18-20) Ngem kabaelan ken adda inaramid ti Dios maipapan iti dayta. Inawatna ti “katupag a subbot” ken sisasagana a nangipakat iti dayta agpaay kadagiti adipenna ditoy daga.

 ¹³ Saan a maigapu iti naimbag nga aramid dagiti apostol ken ti sabsabali nga impakat ti Dios ti subbot no di ket maigapu iti asi ken dakkel a panagayatna kadakuada. Inkeddengna a wayawayaan dagiti apostol ken ti sabsabali manipud iti naipataw a dusa, nga inabsueltona ida iti natawid a basol. Simple ti panangilawlawag iti dayta ni Pablo: “Babaen itoy a di kaikarian a kinamanangngaasi, kinapudnona, naisalakankayo babaen ti pammati; ket daytoy saan a maigapu kadakayo, dayta ket sagut ti Dios.”​—Efe. 2:8.

14, 15. Ania a gunggona ti namnamaen dagidiay indeklara ti Dios a nalinteg, ngem ania ti agtultuloy nga aramidenda?

¹⁴ Anian a nagsayaat a sagut ti panangpakawan ti Mannakabalin-amin iti natawid a basol ti maysa a tao, agraman kadagiti di umiso a naaramidanna! Di mabilang dagiti basol a naaramidan ti maysa sakbay a nagbalin a Kristiano, ngem maibatay iti subbot, mapakawan dagita ti Dios. Insurat ni Pablo: “Ti sagut imbunga ti adu a labsing maipaay iti pannakaideklara iti kinalinteg.” (Roma 5:16) Dagiti apostol ken ti sabsabali nga immawat iti naayat a sagut (ti pannakaideklara a nalinteg) masapul nga itultuloyda a dayawen ti pudno a Dios buyogen ti pammati. Ania a gunggona ti awatenda iti masanguanan? “Dagidiay umawat iti kinaruay ti di kaikarian a kinamanangngaasi ken iti awan bayadna a sagut ti kinalinteg [agturaydanto] kas ar-ari iti biag babaen ti maysa a persona, ni Jesu-Kristo.” Saan a kas iti epekto ti labsing ni Adan, ti sagut ti kinalinteg ket agresulta iti biag.​—Roma 5:17; basaen ti Lucas 22:28-30.

¹⁵ Agbalin a naespirituan nga annak ti Dios dagidiay umawat iti sagut a pannakaideklara a nalinteg. Kas makipagtawid ken Kristo, addaanda iti namnama a mapagungar idiay langit kas espiritu nga annak a ‘makipagturay ken Jesu-Kristo kas ar-ari.’​—Basaen ti Roma 8:15-17, 23.

Impakita ti Dios ti Panagayatna iti Sabsabali

16. Ania a sagut ti magun-odan itan dagidiay addaan iti naindagaan a namnama?

¹⁶ Saan nga amin a Kristiano a mangipakita iti pammati ken simamatalek nga agserbi iti Dios ket addaan iti namnama a ‘makipagturay ken Kristo kas ar-ari’ idiay langit. Kas kadagiti adipen ti Dios sakbay ti panawen Kristiano, adu ita ti addaan iti namnama nga agbiag iti paraiso a daga. Mabalinda kadi ti umawat itan iti naayat a sagut manipud iti Dios tapno maibilangda a nalinteg nga addaan namnama nga agbiag ditoy daga? Wen, sigun iti surat ni Pablo kadagiti taga-Roma!

17, 18. (a) Ania ti nangibilangan ti Dios ken ni Abraham maigapu iti pammatina? (b) Apay nga imbilang ni Jehova a nalinteg ni Abraham?

¹⁷ Dinakamat ni Pablo ti kangrunaan a pagarigan a ni Abraham, maysa a lalaki nga addaan iti pammati a nagbiag sakbay nga inted ni Jehova ti Linteg kadagiti Israelita ken nabayag pay sakbay a linuktan ni Kristo ti namnama a biag idiay langit. (Heb. 10:19, 20) Mabasatayo: “Saan a babaen ti linteg a ni Abraham wenno ti bin-ina naaddaan iti kari nga isu agtawid iti lubong, no di ket baeten ti kinalinteg babaen ti pammati.” (Roma 4:13; Sant. 2:23, 24) Gapuna, imbilang ti Dios a nalinteg ti matalek a ni Abraham.​—Basaen ti Roma 4:20-22.

¹⁸ Di kayat a sawen dayta a di nakaaramid ni Abraham iti basol bayat ti adu a dekada a panagserbina ken Jehova. Saan a kasta nga anag ti panagbalinna a nalinteg. (Roma 3:10, 23) Ngem gapu iti awan patinggana a kinasirib ni Jehova, inkabilanganna ti naisangsangayan a pammati ni Abraham ken dagiti aramidna a resulta dayta. Kas pagarigan, nangipakita ni Abraham iti pammati iti naikari a ‘bin-i’ nga agtaud iti kaputotanna. Dayta a Bin-i ket ti Mesias, wenno Kristo. (Gen. 15:6; 22:15-18) Maitunos iti dayta, ti nadibinuan nga Ukom pakawanenna dagiti basol a naaramid idi ugma maibatay iti “subbot nga  imbayad ni Kristo Jesus.” Iti kasta, ni Abraham ken dagiti adipen ti Dios sakbay ti panawen Kristiano adda namnamada a mapagungar.​—Basaen ti Roma 3:24, 25; Sal. 32:1, 2.

Maibilang a Nalinteg Uray Itan

19. Apay a makapabileg iti adu ita ti panangmatmat ti Dios ken ni Abraham?

¹⁹ Ti panangibilang ti naayat a Dios ken ni Abraham kas nalinteg ket makapabileg kadagiti pudno a Kristiano. Ti panangideklara ni Jehova ken ni Abraham kas nalinteg ket saan a kas kadagidiay pinulotanna iti espiritu a “makipagtawid ken Kristo.” Ti limitado a bilang dayta a grupo ket “naayaban tapno agbalin a sasanto” ken “annak ti Dios.” (Roma 1:7; 8:14, 17, 33) Maisupadi iti dayta, sakbay pay a naidatag ti daton a pangsubbot nagbalinen ni Abraham a “gayyem ni Jehova.” (Sant. 2:23; Isa. 41:8) Komusta met ngay dagiti pudno a Kristiano a mangnamnama nga agbiag iti maisubli a Paraiso a daga?

20. Ania ti namnamaen ti Dios kadagidiay ibilangna ita a nalinteg, kas ken Abraham?

²⁰ Saanda a mangnamnama nga agbiag idiay langit idi inawatda ti “awan bayadna a sagut ti kinalinteg . . . baeten iti pannakaluk-at babaen ti subbot nga imbayad ni Kristo Jesus.” (Roma 3:24; 5:15, 17) Ngem dakkel ti pammatida iti Dios ken kadagiti probisionna, ken pampaneknekanda dayta babaen iti naimbag nga ar-aramid. Ti maysa kadagita ket ti ‘panangikasaba iti pagarian ti Dios ken panangisuro iti bambanag maipapan ken Apo Jesu-Kristo.’ (Ara. 28:31) Iti kasta, ibilang ida ni Jehova a nalinteg kas ken Abraham. Ti sagut nga awatenda​—ti panagbalin a gayyem ti Dios​—ket naiduma “iti awan bayadna a sagut” nga inawat dagiti napulotan. Kaskasdi, naimpusuan nga inawatda dayta.

21. Ania dagiti magunggonatayo gapu iti panagayat ken kinahustisia ni Jehova?

²¹ No mangnamnamaka nga agbiag nga agnanayon ditoy daga, masapul a bigbigem a saanmo a magun-odan dayta gapu kadagiti kari ti natauan nga agturay. Imbes ketdi, maigapu dayta iti nainsiriban a panggep ti Soberano iti Uniberso. Nangaramiden ni Jehova kadagiti addang tapno maitungpalna ti panggepna. Maitunos dagita nga addang iti pudno a hustisia ken iparangarangda ti dakkel a panagayat ti Dios. Gapuna, maibaga ni Pablo: “Ti Dios irekomendana ti bukodna nga ayat kadatayo ta, bayat a managbasoltayo pay laeng idi, ni Kristo natay a maipaay kadatayo.”​—Roma 5:8.

[Footnote]

Malagipyo Kadi?

• Ania ti natawid dagiti kaputotan ni Adan, ken ania ti resultana?

• Kasano a naipaay ti katupag a subbot, ken iti ania nga anag nga adda tinupaganna?

• Ania ti manamnamam gapu iti sagut a pannakaideklara a nalinteg?

[Salsaludsod]

[Ladawan iti panid 13]

Nagbasol ti perpekto a tao a ni Adan. Indatag ti perpekto a tao a ni Jesus ti “katupag a subbot”

[Ladawan iti panid 15]

Maysa a naimbag a damag ti pannakaideklaratayo a nalinteg babaen ken Jesus!