Nakastrekka Kadin iti Panaginana ti Dios?

“Ti sao ti Dios nabiag ken adda bilegna.”​—HEB. 4:12.

1. Kasanotayo ita a makastrek iti panaginana ti Dios? Apay a narigat ti agtulnog?

 NAAMMUANTAYO iti napalabas nga artikulo a makastrektayo iti panaginana ti Dios no agtulnogtayo kenkuana ken makidanggaytayo iti organisasionna. Nalaka nga ibaga dayta ngem narigat nga aramiden. Kas pagarigan, no maammuantayo a saan nga anamongan ni Jehova ti banag a kayattayo, mabalin a ti damo a reaksiontayo ket agsukir. Masapul ngarud a sursuruentayo ti “sisasagana nga agtulnog.” (Sant. 3:17) Pagsasaritaantayo ita ti dadduma a situasion no kasano a maipakitatayo a sisasaganatayo nga agtulnog iti amin a tiempo.

2, 3. Ania ti aramidentayo tapno maay-ayotayo ni Jehova?

² Nakasaganaka kadi nga agtulnog no naammuan manipud Biblia nga adda rumbeng a balbaliwam? Kuna ti Biblia a kayat ti Dios nga iserrek iti organisasionna “dagiti matarigagayan a banag dagiti amin a nasion.” (Hag. 2:7) Siempre, kaaduan kadatayo idi ti agar-aramid iti di umiso sakbay a naammuantayo ti kinapudno. Ngem gapu iti panagayattayo iti Dios ken iti patpatgenna  nga Anak, nagreggetantayo a binalbaliwan ti kababalintayo tapno magun-odtayo ti anamong ni Jehova. Kalpasan ti adu a kararag ken panagregget, nakualipikartayo met laeng nga agpabautisar.​—Basaen ti Colosas 1:9, 10.

³ Gapu ta imperpektotayo, kasapulantayo pay laeng ti agbalbaliw ken ikagumaantayo nga aramiden ti umiso. Ngem inkari ni Jehova a tulongannatayo no aramidentayo ti amin a kabaelantayo a mangay-ayo kenkuana.

No Mabalakadantayo

4. Ania dagiti tallo a pamay-an nga us-usaren ni Jehova a mangilinteg kadatayo?

⁴ Masapul nga ammuentayo nga umuna dagiti pagkapuyantayo tapno mabalbaliwantayo dagita. Nagduduma ti pamay-an ni Jehova a mangtulong kadatayo. Mabalinna nga usaren ti maysa a palawag iti Kingdom Hall wenno artikulo kadagiti publikasiontayo a mangipalgak iti pagkapuyantayo. Iti kasumbangirna, no ditay nayaplikar ti nangngegantayo a palawag wenno nabasatayo nga artikulo, mabalin nga usaren ni Jehova dagiti kakabsattayo tapno siaasi nga ilintegnatayo.​—Basaen ti Galacia 6:1.

5. No dadduma, ania ti reaksiontayo no adda mangbalakad kadatayo? Apay a masapul nga agtultuloy a balakadandatayo dagiti panglakayen?

⁵ Narigat nga awaten ti balakad ti imperpekto a tao, uray no siaannad ken sidudungngo a maipaay dayta. Ngem binilin ni Jehova dagiti panglakayen nga ikagumaandatayo nga aturen iti “espiritu ti kinaalumamay.” (Gal. 6:1) No awatentayo ti balakadda, ad-adda nga agbalintayo a makaay-ayo iti imatang ti Dios. Agpayso a no agkararagtayo, bigbigbigentayo nga imperpektotayo. Ngem no adda mangibaga iti kamalitayo, agannayastayo nga agikalintegan, mangpalag-an iti parikut, mangkuestionar iti motibo ti nangbalakad, wenno mangibaga a saan a naasi ti wagas a panangbalakadna. (2 Ar. 5:11) Wenno mabalin a makapungtottayo no adda ibaga dagiti panglakayen a ditay kayat a mangngeg. Kas pagarigan no ibagada nga adda dakes nga ar-aramiden ti kapamiliatayo, di maitutop ti panagkawkawestayo, saantay a managdaldalus, wenno kagura ni Jehova ti pilpilientayo a paglinglingayan. Gapu iti dayta, maldaangantayo ken maldaangan met ti kabsat a nangbalakad kadatayo. Ngem inton bumaaw ti pungtottayo, maamiristayo a pagimbagantayo gayam ti balakadna.

6. Kasano nga ipalgak ti sao ti Dios “dagiti panunot ken dagiti panagem ti puso”?

⁶ Ti pannakatema a teksto daytoy nga artikulo dakamatenna a ti sao ti Dios ket “adda bilegna.” Wen, nabileg ti sao ti Dios a mangbalbaliw iti biag. Sakbay ken kalpasan a nabautisarantayo, tultulongannatayo ti Biblia a mangaramid kadagiti kasapulan a panagbalbaliw. Iti surat ni Pablo kadagiti Hebreo, dinakamatna a ti sao ti Dios “sumalput uray agingga iti paglasinan ti kararua ken espiritu, ken kadagiti nagsusuopan ken iti patada, ket kabaelanna a lasinen dagiti panunot ken dagiti panagem ti puso.” (Heb. 4:12) Iti sabali a pannao, no matarusantayo a naimbag ti panggep ti Dios para kadatayo, ti tigtignaytayo ipalgakna ti pudpudno a kinataotayo. Adda kadi nagdumaanna no dadduma ti makinruar a kinataotayo (ti “kararua”) ken ti pudpudno a kinataotayo (ti “espiritu”)? (Basaen ti Mateo 23:27, 28.) Usigem no ania ti reaksionmo kadagiti sumaganad a situasion.

Makidanggay iti Panagrang-ay ti Organisasion ni Jehova

7, 8. (a) Apay nga adda dagiti Judio a Kristiano a mangan-annurot iti dadduma a paset ti Mosaiko a Linteg? (b) Apay a maikunatayo a saanda a makidangdanggay iti panggep ni Jehova?

⁷ Adu kadatayo ti makinkabesado iti Proverbio 4:18: “Ti dana dagidiay nalinteg ket  kas iti naraniag a lawag a lumawlawag a lumawlawag agingga nga immaldaw unayen.” Kaipapanan dayta nga iti panaglabas ti tiempo, sumayaat ti kababalin ken pannakaawattayo iti panggep ti Dios.

⁸ Naadaltayo iti napalabas nga artikulo a kalpasan ti ipapatay ni Jesus, adu a Judio a Kristiano ti nagtultuloy a nangannurot iti Mosaiko a Linteg. (Ara. 21:20) Nupay inlawlawag a naimbag ni Pablo a saanen a masapul a tungpalen dagiti Kristiano dayta a Linteg, adu ti saan a nagtulnog. (Col. 2:13-15) Impapanda a no itultuloyda nga alagaden ti dadduma a paset ti Linteg, maliklikanda ti maidadanes. Aniaman ti rason, sinuratan ni Pablo dagiti Kristiano ket direkta nga imbagana a dida makastrek iti panaginana ti Dios no saanda a makidanggay iti panggepna. a (Heb. 4:1, 2, 6; basaen ti Hebreo 4:11.) Tapno magun-odda ti anamong ni Jehova masapul a bigbigenda a sabalin ti pamay-an a kayatna a panagdayaw kenkuana dagiti tattao.

9. Ania ti reaksiontayo no adda panagbalbaliw iti pannakatarustayo iti Kasuratan?

⁹ Adda dagiti panagbalbaliw ita iti pannakatarustayo iti sumagmamano a pannursuro ti Biblia. Maragsakantayo koma kadagita a panagbalbaliw. Pammaneknek dagita nga us-usaren ni Jehova ti matalek ken masirib nga adipen a mangisuro kadatayo iti kinapudno. No ti pannakabagi dayta nga “adipen” makitana a masapul a lawlawagan wenno aturen ti panangmatmattayo iti dadduma a kinapudno, saanda a bumdeng a mangaramid iti dayta. Napatpateg kadakuada ti pannakidanggay iti panggep ti Dios ngem iti panangbabalaw ti dadduma gapu iti dayta a panagbalbaliw. Ania ti reaksionmo no adda panagbalbaliw iti pannakatarustayo iti Kasuratan?​—Basaen ti Lucas 5:39.

10, 11. Ania ti maadaltayo iti reaksion ti dadduma idi adda naiparegta a baro a pamay-an ti panangikasaba iti naimbag a damag?

¹⁰ Usigentayo ti sabali pay a pagarigan. Agarup 100 a tawen ti napalabasen, ipapan ti dadduma a nalaing a pumapalawag nga Estudiante ti Biblia a ti panagpalawag ti kasayaatan a pamay-an ti panangasabada. Maragragsakanda nga agpalawag iti publiko, ken dadduma kadakuada ti maay-ayatan a mapadayawan. Ngem idi agangay, nabatad a kayat ni Jehova nga okupado ti ilina iti nagduduma a pamay-an ti panangasaba, a pakairamanan ti panagbalaybalay. Saan a kayat nga aramiden dayta ti dadduma a nalaing a pumapalawag. No kitkitaen, kasla nataenganda iti naespirituan ken naregtada nga agserserbi iti Apo ngem ipakita ti reaksionda iti panagbalbaliw a saanda a kasta. Ammotayo a saan a naragsakan ni Jehova iti inaramidda. Kas resultana, pinanawanda ti organisasionna.​—Mat. 10:1-6; Ara. 5:42; 20:20.

¹¹ Narigatan met ti adu nga Estudiante ti Biblia a nangasaba iti binalaybalay, nangruna idi damo. Ngem nagtulnogda ken matalekda iti organisasion ni Jehova. Idi agangay, nairuamdan a mangasaba iti binalaybalay ket binendisionan ida ni Jehova. Ania ti reaksionmo no iparegta ti matalek ken masirib nga adipen a padasem ti sabali a pamay-an ti panangasaba? Agtulnogka kadi uray no kasla narigat dayta para kenka?

No ti Ipatpategtayo Panawanna ni Jehova

12, 13. (a) Apay nga ibaga ni Jehova a mailaksid ti saan nga agbabbabawi a managbasol? (b) Ania a suot ti pakaipaspasanguan ti dadduma a Kristiano a nagannak, ken apay a nagrigat dayta?

¹² Sigurado nga umanamongtayo a tapno maay-ayotayo ni Jehova, masapul nga agtulnogtayo  iti bilinna nga agbalintayo a nadalus iti amin nga aspeto ti biagtayo. (Basaen ti Tito 2:14.) Ngem no dadduma, narigattayo a tungpalen dayta a bilin. Kas pagarigan, ipapantayo a ti kakaisuna nga anak ti maysa a mapagwadan nga agassawa a Kristiano pinanawanna ti kinapudno. Gapu ta ad-adda a pinilina ti “temporario a panangtagiragsak iti basol” ngem iti relasionna ken ni Jehova ken kadagiti nagannakna, nailaksid dayta nga agtutubo.​—Heb. 11:25.

¹³ Nadudog la ketdi ti puso dagita a nagannak! No maipapan iti panangilaksid, ammoda ti kuna ti Biblia nga “isardengyo ti makikadkadua iti asinoman a maaw-awagan kabsat a maysa a mannakiabig wenno naagum a tao wenno managrukbab iti idolo wenno manangrabngis wenno managbarbartek wenno manangkikil, saan uray makipangan iti kasta a tao.” (1 Cor. 5:11, 13) Ammoda met a ti sao nga “asinoman” iti dayta a teksto ramanenna ti kapamilia a saanda a kabbalay. Ngem gapu iti napalalo a panagayatda iti anakda, mabalin a panunotenda: “Masapul a sansanenmi a kasarita ti anakmi tapno matulonganmi nga agsubli ken Jehova.” b

14, 15. Ania ti laglagipen dagiti nagannak no ikeddengda a kasarita ti nailaksid nga anakda?

¹⁴ Makipagriknatayo kadagita a nagannak. Mabalin koma nga agbalbaliw ti anakda no kayatna. Nupay kasta, mas pinilina nga itultuloy ti agaramid iti di umiso ngem kadagiti nagannakna ken kapammatianna. Gapuna, awan maaramidanda. Talaga a nagrigat ti kasasaadda!

¹⁵ Ngem ania ti aramiden dagitoy a naayat a nagannak? Agtulnogda ngata iti nalawag a bilin ni Jehova? Wenno ikalinteganda kadi a mabalinda latta a kanayon a kasarita ti anakda gapu kadagiti napateg a banag mainaig iti pamilia? No agdesisionda, kanayonda koma nga ikabilangan ti panangmatmat ni Jehova. Kayatna nga agtalinaed a nadalus ti organisasionna ken, no posible, maamiris ti nakabasol a di umiso ti inaramidna ket agsubli iti kongregasion. Kasano a maipakita dagiti nagannak a makituntunosda iti pagayatan ni Jehova?

16, 17. Ania ti maadaltayo iti ulidan ni Aaron?

¹⁶ Ti kabsat ni Moises a ni Aaron ket naipasango iti kasta a narigat a situasion mainaig iti dua nga annakna. Panunotenyo ti nariknana idi pinapatay ni Jehova ti annakna a da Nadab ken Abihu gapu iti di umiso a panagidatonda. Siempre, dayta ti namagpatingga iti pannakilangenda kadagiti nagannakda. Ngem adda pay narigrigat nga aramiden ni Aaron ken dagiti matalek nga annakna.  Imbilin ni Jehova: “Dikay bay-an nga agsugsugabba dagiti uloyo, ket dikay pigisen dagiti kawesyo [iti panagladingityo], tapno saankayo a matay ken tapno . . . saan nga agrurod [ni Jehova] maibusor iti intero a gimong.” (Lev. 10:1-6) Nalawag ti bilin. Masapul a naun-uneg ti panagayattayo ken Jehova ngem kadagiti di matalek a kapamiliatayo.

¹⁷ Saan a dagus a papatayen ita ni Jehova dagiti manglabsing iti lintegna. Siaayat nga ikkanna ida iti gundaway nga agbabawi. Ngem ania ngata ti marikna ni Jehova no sukiren dagiti nagannak ti bilinna ket irasonda nga adu ti panggapuanda a makisarita iti nailaksid nga anakda?

18, 19. Ania a bendision ti magun-odan dagiti miembro ti pamilia no agtalinaedda a nasungdo ken Jehova?

¹⁸ Kuna ti adu a nakasublida iti kongregasion gapu ta nagtultuloy a nasungdo ken ni Jehova dagiti gagayyem ken kapamiliada babaen ti dida pannakilangen kadakuada. Kas pagarigan, imbaga ti maysa nga agtutubo a babai kadagiti panglakayen a ti maysa a namagbalbaliw kenkuana ket ti inaramid ni manongna. Kinunana a ti simamatalek a panagtulnog ni manongna kadagiti pagalagadan ti Biblia ti nakatulong kenkuana nga agsubli.

¹⁹ Ania ti maadaltayo iti dayta? Masapul a labanantayo ti pagannayasan ti imperpekto a pusotayo a manglabsing iti balakad ti Biblia. Naan-anay koma a kombinsidotayo a ti pamay-an ni Jehova a mangtaming kadagiti parikut ket isu ti kasayaatan.

“Ti Sao ti Dios Nabiag”

20. Ania ti dua a pagaplikaran ti Hebreo 4:12? (Kitaenyo ti footnote.)

²⁰ Idi insurat ni Pablo a “ti sao ti Dios nabiag,” saan a ti Biblia ti espesipiko a tuktukoyenna no di ket dagiti kari ti Dios, kas ipakita ti konteksto. c Ti kayat a sawen ni Pablo ket saan a malipatan ti Dios ti karina. Kinuna ni Jehova maipapan iti saona: “Saanto nga agsubli kaniak nga awanan kadagiti nagbanagan, no di ket . . . sigurado nga agballiginto iti banag a nangibaonak iti dayta.” (Isa. 55:11) Gapuna, ditay koma matektekan no saan a mapasamak a dagus ti ninamnamatayo. Masiguradotayo nga itungtungpal pay laeng ni Jehova ti panggepna.​—Juan 5:17.

21. Apay a makaparegta ti Hebreo 4:12 kadagiti matalek a natataengan a kameng ti “dakkel a bunggoy”?

²¹ Adun a dekada nga agserserbi ken Jehova dagiti matalek a natataengan a kameng ti “dakkel a bunggoy.” (Apoc. 7:9) Adu ti di nangnamnama a lumakay ken bumaketda iti daytoy a sistema ti bambanag. Ngem saanda a naupay. (Sal. 92:14) Ammoda a ‘nabiag ti sao ti Dios’ ket tungpalenna ti karina. Gapu ta nagpateg iti Dios ti panggepna, maragsakan no ipategtayo met dayta. Bayat daytoy maikapito nga aldaw ti panaginana, awan ti makalapped ken Jehova a mangibanag iti panggepna. Ken ammona a kas maysa a grupo, agtultuloy ti ilina a makitunos iti panggepna. Sika ngay? Nakastrekka kadin iti panaginana ti Dios?

[Footnotes]

Malagipyo Kadi?

• Ania ti kasapulan tapno makastrektayo ita iti panaginana ti Dios?

• Ania ti pakainaigan ti panggep ti Dios iti kinatuloktayo a mangipangag iti balakad ti Biblia?

• Kadagiti ania a situasion a narigat nga aramiden ti ibaga kadatayo ni Jehova? Ngem apay a nagpateg nga agtulnogtayo?

• Ania ti dua a pagaplikaran ti Hebreo 4:12?

[Salsaludsod]

[Ladawan iti panid 31]

Nadudog la ketdi ti puso dagiti nagannak!