Napasimple nga Ingles nga Edision

MARAGSAKANKAMI a mangipakaammo iti daytoy umuna a ruar ti napasimple nga Ingles nga edision (simplified English). Pamadasan daytoy iti makatawen ket no makatulong, agtultuloy a mayimprenta ken maipatulod kadagiti kongregasion a kagiddan ti regular nga Ingles nga edision (standard English).

Nagpateg a maawatan ti amin dagiti artikulo a linawas nga ad-adalentayo iti Ti Pagwanawanan ta dayta ti kangrunaan a pamay-an “ti matalek ken masirib nga adipen” a mangisuro iti ili ti Dios ita. (Mat. 24:45) Ngem apay a kasapulan ti napasimple nga Ingles nga edision?

Adu a kakabsat iti intero a lubong ti tumabtabuno kadagiti Ingles a gimong ngem saanda a maawatan ti amin nga Ingles a maus-usar iti Ti Pagwanawanan. Adda sumagmamano a rason. Kas pagarigan, Ingles ti maus-usar iti adu a pagilian ti Africa, Asia, ken South Pacific. Kadagita a lugar, Ingles ti us-usaren dagiti kakabsattayo nga aggigimong ken mangasaba ngem mabalin a sabali ti pagsasaoda iti pagtaenganda. Ken ti Ingles a maus-usar kadagita a pagilian ket naiduma iti Ingles a maus-usar iti regular nga edision Ti Pagwanawanan. Dadduma a kakabsat ti immakar kadagiti pagilian nga Ingles laeng ti mabalinda a tabunuan a gimong. Marigatanda a mangtarus iti Ti Pagwanawanan gapu ta saan nga Ingles ti nakayanakanda a pagsasao. Adda met dagiti agtutubo nga Ingles ti pagsasaoda ngem marigatanda no dadduma a mangtarus iti Ti Pagwanawanan. Gapu iti napasimple nga Ingles nga edision, ad-adu ti magunggonaan iti Panagadal ti Pagwanawanan.

Nupay nasimsimple ti Ingles ti baro nga edision ngem ti regular nga edision, agpada nga isuroda dagiti kinapudno iti Biblia. Agpada ti bilang dagiti parapo, saludsod, ladawan, ken repaso a saludsod. Ti maysa ti mangikeddeng no ania a magasin ti kayatna nga adalen wenno usaren iti Panagadal ti Pagwanawanan. Ipakita ti kahon iti baba ti nagdumaan dagiti sasao a nausar iti dua nga edision. Naadaw daytoy iti parapo 2 ti umuna a maadal nga artikulo iti daytoy a ruar.

Masiguradomi a babaen ti napasimple nga Ingles a magasin, nalaklaka nga agsagana dagiti kakabsat, agraman dagiti ubbing, iti linawas a Panagadal ti Pagwanawanan. Ay-ayaten ni Jehova ti “intero a timpuyog dagiti kakabsat,” ken agyamantayo ta us-usarenna “ti matalek ken masirib nga adipen” a mangipaay iti amin a kasapulantayo iti umiso a tiempo.​—1 Ped. 2:17.

Bagi a Manarawidwid Dagiti Saksi ni Jehova